ꓡꓰꓐꓮꓠꓳꓠ ꓗꓴꓷꓼ ꓗꓪ ꓟꓯꓼ ꓢꓰꓼ ꓡꓯꓽ ꓘꓳ ꓓꓴ ꓝꓮꓲ ꓒꓬꓱꓼ ꓔꓬ ꓟ
3 ꓦ ꓟ 13 ꓠꓬꓲ 2026 ꓘꓳꓼ ꓕꓯ ꓡꓰꓐꓮꓠꓳꓠ ꓗꓴꓷꓼ ꓗꓪ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓔꓬ ꓟ ꓝꓮꓲ ꓒꓬꓱꓼ ꓡ ꓔꓬ ꓡꓳ ꓐꓰ ꓐꓯ ꓔ ꓡꓳ꓿ ꓕꓱ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓠꓬ 3 ꓦ ꓟ 2 ꓠꓬꓲ ꓕꓯ ꓥ ꓢꓲ ꓫꓵꓻ ꓡꓰ ꓢꓴ ꓑ ꓫꓬ ꓮ ꓙꓵꓽ ꓠꓬ (600) ꓣꓳ ꓙꓳ ꓡꓰ ꓢꓲ ꓠꓬꓲ ꓑ ꓫꓬ (700000) ꓣꓳ ꓠꓬ ꓶꓻ ꓤ ꓟꓵꓽ ꓪ ꓚꓵ. ꓡꓰ ꓠ ꓗꓷ ꓡꓰꓳ ꓐꓰ ꓐꓯ ꓔ ꓡꓳ꓿
3 ꓦ ꓟ 5 ꓠꓬꓲ ꓕꓯ ꓬꓲ‐ꓢꓲ‐ꓡꓰ ꓟꓯꓼ ꓐꓴ ꓡꓰ ꓡꓰꓐꓮꓠꓳꓠ ꓗꓴꓷꓼ ꓗꓪ ꓔꓬ ꓟ ꓡꓳ ꓒꓱ ꓓꓽ ꓗꓪ ꓔꓬ ꓟ ꓑ ꓫꓬ ꓐꓴ ꓮ ꓙꓵꓽ ꓔꓯ ꓠꓱ. ꓐꓯꓼ ꓟꓵꓽ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓔꓶ. ꓗꓪ ꓐꓰ ꓶꓻ ꓤ ꓗꓪ ꓚꓵ. ꓙꓰ ꓠ, ꓟ ꓐꓯ ꓖꓶ ꓔ ꓟ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓡꓰꓐꓮꓠꓳꓠ ꓗꓴꓷꓼ ꓐ‐ꓣꓲ ꓡꓳ ꓒꓱ ꓗꓪ ꓬꓲ‐ꓢꓲ‐ꓡꓰ ꓟꓯꓼ ꓐꓴ ꓡꓰ ꓐꓳ ꓢꓶꓽ ꓒꓶ ꓩꓴ ꓡ ꓟ ꓑꓶ. ꓓꓴ ꓑ ꓫꓬ ꓐꓴ ꓮ ꓘꓶ. ꓛꓲ ꓙꓳꓺ ꓡꓰ ꓟ ꓑ ꓫꓬ ꓐꓴ ꓫꓵꓻ ꓡꓰ ꓟ ꓮ ꓟꓬ, ꓛꓲ ꓙꓳ ꓡꓰ ꓟ ꓥ ꓡꓳ꓿
ꓝꓮꓲ 2 ꓦ ꓟ 28 ꓠꓬꓲ ꓕꓯ ꓴꓢꓮ ꓗꓴꓷꓼ ꓬꓲ‐ꓢꓲ‐ꓡꓰ ꓟꓯꓼ ꓐꓴ ꓡꓰ ꓲꓣꓮꓠ ꓗꓴꓷꓼ ꓗꓪ ꓔꓬ ꓟ ꓗꓴꓷꓼ ꓙꓵꓽ ꓪ ꓙꓳ ꓢꓴ ꓐꓴ ꓔꓯ ꓢꓰꓼ ꓗꓷ ꓟ ꓑꓶ. ꓓꓴ ꓲꓣꓮꓠ ꓗꓴꓷꓼ ꓡꓰ ꓬꓲ‐ꓢꓲ‐ꓡꓰ ꓗꓴꓷꓼ ꓗꓪ ꓐꓳ ꓮ ꓟꓬ, ꓒꓶ ꓩꓴ ꓡ ꓟ ꓑꓶ. ꓓꓴ ꓡꓰꓐꓮꓠꓳꓠ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓮ ꓟꓬ, ꓠꓬ ꓦꓲꓻ ꓘꓴꓽ ꓗꓪ ꓬꓯꓼ ꓔ ꓟ ꓑꓶ. ꓙ ꓖꓴ ꓘꓶꓽ ꓗꓪ ꓬꓯꓼ ꓔ ꓠ, ꓗꓷ ꓡꓰꓳ ꓐꓰ ꓐꓯ ꓔ ꓡꓳ꓿
ꓕꓱ ꓡꓰ ꓐꓰ ꓑ ꓫꓬ ꓐꓴ ꓮ ꓟꓬ, ꓠꓬ ꓟꓯꓼ ꓘꓰ ꓟꓯꓼ ꓑꓬ ꓢꓴ ꓮ ꓟꓬ, ꓙꓳ ꓡꓰ ꓟ ꓑꓶ. ꓓꓴ ꓟꓯꓼ ꓘꓰ ꓡ ꓢꓴ ꓐꓴ ꓔꓬ ꓔꓬ ꓔꓶ. (500) ꓔꓶ. ꓔꓯ ꓒꓴ ꓖꓶ ꓔ ꓡꓳ ꓐꓰ ꓐꓯ ꓔ ꓡꓳ꓿
ꓝꓮꓲ ꓡꓰꓐꓮꓠꓳꓠ ꓗꓴꓷꓼ ꓗꓪ ꓔꓬ ꓟ ꓗ‐ꓔꓳ‐ꓡꓲꓗ ꓔꓲꓺ ꓟ ꓐꓴ ꓔꓬ ꓟ ꓪꓽ ꓘꓴ ꓦꓲꓻ ꓗꓪ ꓥ ꓟꓲ ꓟꓯꓼ ꓘꓰ ꓢꓴ ꓐꓴ ꓔꓯ ꓔꓬ ꓝꓲ ꓥ ꓟꓲ ꓬꓲ ꓙꓵ, ꓟꓶ ꓫꓵˍ ꓡ ꓠꓬ ꓫ. ꓓꓴ ꓙꓳ ꓡ ꓠ, ꓟ ꓚꓱ, ꓔꓯ ꓐꓯ ꓖꓶ ꓔ ꓟ ꓥ ꓡꓳ꓿
ꓑ ꓫꓬ ꓐꓴ ꓠꓯ, ꓘꓴꓽ ꓗꓪ ꓐꓰ ꓞꓲꓼ ꓣꓳ ꓟ ꓤ ꓠꓱ ꓤ ꓐꓴ ꓐꓰ ꓞꓲꓼ ꓟꓳ ꓡꓰ ꓢꓴ ꓐꓴ ꓠꓬ ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓑꓶ. ꓓꓴ ꓮ ꓘꓶ. ꓛꓲ ꓫ. ꓓꓴ ꓔꓳ, ꓜꓳ ꓔꓬ ꓡꓳ ꓐꓰ (Vatican) ꓓꓳꓽ ꓗꓪ ꓐꓰ ꓢꓷ. ꓪ ꓡꓳ꓿
