ꓗꓴꓷꓼ ꓫꓵ ꓪꓴ ꓑꓶ ꓓꓴ ꓔꓲꓺ ꓒ ꓕꓲꓽ ꓣꓳ ꓐꓰ ꓫꓵꓻ ꓡꓰ ꓢꓴ ꓐꓴ ꓐꓱ ꓶ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓠꓲ, ꓟ ꓫ. ꓘꓶꓽ ꓐꓰ ꓢꓲ ꓡꓲ, ꓠ, ꓟ ꓐꓱ ꓶ ꓢꓯꓼ ꓖꓶ_ ꓟ꓾
ꓐꓶ ꓓꓳ ꓔꓲ, ꓫꓵ ꓗꓪ ꓒꓬꓱꓼ ꓡꓰ ꓔꓬ ꓟ ꓑꓳꓽ ꓡ ꓛꓴ. ꓐꓰ ꓐꓶ ꓔꓳ, ꓡ ꓟ ꓑꓶ ꓓꓴ ꓝꓴꓲ ꓟꓽ ꓙꓳ ꓟ ꓑ ꓫꓬ ꓐꓴ ꓮ ꓟꓬ ꓫꓵꓻ ꓡꓰ ꓟ ꓑꓶ ꓓꓴ ꓔꓲꓺ ꓒ ꓪ ꓔꓲ ꓡꓰꓳ ꓫꓲꓦ ꓡꓰ ꓐꓶ ꓔꓳ, ꓟ ꓠꓽ ꓗꓷ ꓠ, ꓟ ꓘꓴ ꓔ ꓡꓳ꓿
ꓔꓲꓺ ꓒ ꓪ ꓔꓲ ꓡꓰ ꓢꓰꓼ ꓡꓯ ꓘꓳ ꓟ ꓗꓪ ꓙꓱꓽ ꓤ ꓡꓰ ꓐꓰ ꓗꓷ ꓔꓬ ꓢꓴ ꓐꓴ ꓮ ꓙꓵ ꓟꓬ ꓠꓬꓲ ꓠꓬ ꓤ ꓠꓱ ꓤ ꓐꓴ ꓐꓰ ꓠꓱ. ꓐꓯꓼ ꓢꓴ ꓔꓯ ꓬꓰ ꓙ ꓠ, ꓟ ꓚꓲ ꓛꓬ ꓢꓯꓼ ꓟꓬ ꓔꓯ ꓖꓶ ꓔꓬ ꓢꓴ ꓐꓱ ꓶ ꓠꓲ, ꓟ ꓘꓴꓽ ꓗꓪ ꓐꓰ ꓠꓲ, ꓟ ꓫ ꓖꓶ ꓔꓬ ꓟ ꓔꓯ ꓟ. ꓖꓶ ꓔ ꓡꓳ꓿
ꓡꓰꓐꓮꓠꓳꓠ ꓗꓴꓷꓼ Qꓡꓮꓬꓮꓮ ꓡꓳ ꓒꓱ ꓗꓪ ꓐꓰ 50 ꓘꓳꓼ ꓡꓳꓼ ꓡꓰ ꓟ Maronite ꓔꓲꓺ ꓒꓽ ꓔꓲꓺ ꓒ Pierre El-Rahi ꓠꓬ ꓘꓴ ꓜꓲꓼ ꓞꓳ ꓢꓲ ꓤ ꓐꓴ ꓦꓲꓻ ꓔꓯ ꓐꓶ ꓔꓳ, ꓔꓬ ꓕꓯ ꓬꓰ ꓙ ꓠ, ꓟ ꓙꓰ_ ꓟ ꓗꓪ ꓐꓶ ꓢꓰꓼ ꓡ ꓟ ꓗꓪ ꓫꓵꓻ ꓡꓰ ꓟ ꓥꓳ꓿
ꓡꓳ, ꓬꓰ ꓟ ꓙꓵ, ꓗꓪ ꓞꓳ ꓘ, ꓢꓴ ꓐꓴ ꓔꓯ ꓛꓵ. ꓙꓰ ꓝꓲ ꓠ, ꓟ ꓐꓯ ꓔ ꓥ ꓟꓲ ꓞꓳ ꓘ, ꓢꓴ ꓮ ꓟꓬ, ꓠꓬ ꓔꓬ ꓦꓲꓻ ꓗꓪ ꓡꓰ ꓔꓬ ꓢꓰ ꓟ ꓥ ꓡꓳ꓿ ꓔꓲꓺ ꓒ Pierre El-Rahi ꓫꓵꓻ ꓟ ꓐꓰ ꓘꓴ ꓜꓲꓼ ꓞꓳ ꓪꓴ. ꓓꓵ ꓣꓱ ꓢꓴ ꓐꓴ ꓔꓬ ꓦꓲꓻ ꓠꓯꓼ ꓗꓪ ꓐꓶ ꓔꓳ, ꓡ ꓟ ꓑꓶ ꓓꓴ ꓙꓳꓺ ꓡꓰ ꓓꓴ ꓗꓷ ꓡꓰ ꓢꓲ꓾ ꓠꓱ. ꓐꓯꓼ ꓗꓪ ꓚꓵ. ꓙꓰ ꓢꓴ ꓟꓬ ꓡ ꓡꓳ꓿
ꓟꓯꓼ ꓢꓰꓼ ꓡꓯ ꓘꓳ ꓟ ꓑꓶ ꓓꓴ ꓖꓴ ꓟꓶ. ꓕꓲ ꓛꓱ ꓡꓰꓐꓮꓠꓳꓠ ꓗꓪ ꓞꓳ ꓤ 3 ꓫꓬ, ꓛꓲ ꓚꓵ. ꓙꓰ ꓡꓰ ꓟ ꓥꓳ꓿ ꓙꓲ ꓢꓴ ꓢꓲ ꓤ ꓠꓵꓻ ꓠꓲ, ꓔꓯ ꓟ. ꓖꓶ ꓟ ꓗꓪ ꓐꓰ ꓔꓬꓣꓰ ꓡꓳ ꓒꓱ ꓗꓪ ꓔꓬ ꓟ ꓝꓣꓮꓠꓚꓲꓢꓚꓮꓠ ꓔꓲꓺ ꓒ ꓜꓴꓻ ꓢꓳ ꓦꓲꓻ ꓗꓪ ꓔꓬ ꓦꓲꓻ ꓗꓪ ꓐꓰ ꓘꓰ, ꓙꓰ ꓡ ꓟ ꓟꓴꓢꓡꓲꓟ ꓙꓵꓻ ꓢꓴ 200 ꓣꓳ ꓛꓲ ꓔꓯ ꓘꓳ, ꓣꓴ ꓔ ꓟ ꓥ ꓡꓳ꓿
ꓟꓯꓼ ꓢꓰꓼ ꓶ ꓤꓼ ꓠꓬ ꓢꓲ ꓡꓲ, ꓟ ꓔꓯ ꓟꓽ ꓫꓻ, ꓖꓶ ꓡ꓾ ꓬꓲ. ꓜꓴ ꓬꓲ. ꓟꓯꓼ ꓢꓰꓼ ꓟ ꓐꓰ ꓛꓴꓽ ꓙꓳ ꓡ ꓟ ꓔꓯ ꓡꓰ ꓒꓬꓱꓼ ꓡ ꓟ ꓥꓳ꓾ ꓐꓰ ꓐꓯ ꓢꓲ꓾ ꓟꓲ ꓠꓯ ꓡ ꓞꓳ ꓞꓳ ꓙꓳ ꓚꓱ, ꓠꓯꓼ ꓗꓪ ꓐꓰ ꓔꓬ ꓟꓶ ꓠ, ꓟ ꓶ ꓓꓰꓽ ꓔ ꓡꓳ꓿
ꓦꓮꓔꓲꓚꓮꓠ ꓗꓪ ꓐꓰ ꓐꓯ ꓑꓶ ꓔ ꓟ ꓗꓪ ꓜꓲ ꓜꓲ ꓟꓴ ꓟꓴ ꓬꓰ ꓢꓲ ꓢꓰꓼ ꓔꓬ ꓟ ꓔꓯ ꓠꓽ ꓗꓷ ꓠ, ꓟ ꓣꓱ ꓬꓯꓼ ꓡꓳ ꓐꓰ ꓬꓲꓼ ꓠꓬꓲ. ꓐꓯ ꓔ ꓡꓳ꓿
