ꓙꓵꓽ ꓗ ꓕꓳ ꓶ ꓐꓬ ꓡꓰ ꓟꓽ ꓓ ꓟ (Daily reflection)

ꓧꓪ. ꓧꓪ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 5ꓽ17‐19 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓥꓪ ꓠꓬ ꓙꓵꓽ ꓗ ꓐꓰ ꓟꓷꓽ ꓠꓷ, ꓝ. ꓘꓶꓽ ꓔꓯ ꓐꓬ ꓡꓰ ꓝꓲˍ ꓐꓰ ꓡ ꓡꓳ ꓕꓽ ꓓꓵꓽ ꓙ꓿ ꓐꓬ ꓡꓰ ꓝꓲˍ ꓐꓰ ꓡ ꓟ ꓟꓽ ꓥ꓾ ꓐꓲ ꓡꓰ ꓝꓲˍ ꓐꓰ ꓡ ꓟ ꓥ ꓡꓳ ꓐꓰ ꓐꓯ ꓔ ꓟ ꓥ ꓡꓳ꓿

 ꓢꓲꓺ ꓒ ꓬꓰ‐ꓢꓴ ꓠꓬ ꓘꓶꓼ ꓫꓵꓼ ꓡꓵ ꓗꓪ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓐꓰ ꓟꓷ ꓠꓷ ꓝ. ꓒꓽ ꓐꓴ ꓡꓰ ꓐꓳ ꓔ ꓟ ꓢꓲꓽ ꓫꓬ ꓕꓳ ꓶ ꓔꓯ ꓐꓬ ꓡꓰ ꓝꓲ ꓡ ꓟ ꓟꓽ ꓥ ꓐꓰ ꓐꓯ ꓟ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓢꓲꓽ ꓫꓬ ꓕꓳ ꓶ ꓘꓴꓽ ꓗꓪ ꓐꓳ ꓔ ꓟ ꓮ ꓙꓵꓽ ꓔꓯ ꓔꓱ ꓚꓵ ꓟ ꓚꓱ, ꓐꓰ ꓐꓲ ꓜꓲꓼ ꓟ ꓚꓱ, ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿

ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓙꓵꓽ ꓗꓽ ꓐꓯ ꓟ ꓠꓬ ꓠꓵꓻ ꓠꓲ, ꓔꓯ ꓡꓰ ꓬꓲ ꓚꓰ ꓛ ꓔ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓟ. ꓖꓶ ꓟ ꓥ ꓡꓳ꓿ ꓔꓯꓺ ꓥꓳꓽ ꓐꓯ ꓠꓬ ꓡ ꓞꓳ ꓕꓽ ꓢꓰꓼ꓾ ꓐꓰ ꓐꓯ ꓟ ꓙꓵꓽ ꓗꓽ ꓔꓯ ꓠꓬ ꓕꓽ ꓠꓲ, ꓢꓲ꓾ ꓕꓽ ꓠꓲ, ꓟ ꓩꓴ ꓐꓰ ꓐꓯ ꓔ ꓟ ꓠꓵꓻ ꓠꓲ, ꓙꓵꓽ ꓗꓽ ꓔꓯ ꓖꓶ ꓢꓲ ꓠꓬꓲ ꓐꓲ ꓜꓲꓼ ꓡꓰ ꓝꓲ ꓟ ꓥ ꓡꓳ꓿

ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓟꓴ ꓗꓪ ꓐꓰ ꓟꓲ ꓠꓯ ꓡꓳ, ꓬꓰ ꓢꓲ ꓙꓵꓽ ꓗ ꓗꓪ ꓟ ꓮ ꓙꓵꓽ ꓐꓲ ꓡ ꓗꓪ ꓛꓲ ꓙꓵꓽ ꓗ ꓕꓳ ꓶ ꓗꓪ ꓟ ꓕꓲ ꓔꓳ, ꓕꓲ ꓖꓳꓼ ꓤ ꓟꓲ ꓟꓽ ꓐꓲ ꓡ ꓟꓽ ꓗꓷ ꓡꓰ ꓐꓰ ꓐꓯ ꓖꓶ ꓔ ꓟ ꓥ ꓡꓳ꓿

ꓐꓯ ꓠꓲ, ꓫꓵˍ ꓟ ꓠꓬ ꓪꓴ‐ꓢ ꓐꓯ ꓘꓶꓽ ꓠꓬ ꓮ ꓕꓯ ꓥ ꓟꓲ ꓟꓽ ꓒꓳ ꓡꓶꓽ ꓟꓽ ꓐꓬ ꓡꓰ ꓮ ꓕꓯ ꓥ ꓟꓲ ꓔꓱ ꓚꓵ꓾ ꓙꓳ ꓔꓬ ꓟ ꓔꓯ ꓐꓯ ꓟ. ꓖꓶ ꓟ ꓥ ꓡꓳ꓿

ꓠꓬꓲ. ꓠꓬꓲ ꓠꓴ ꓥꓪ ꓤꓶꓻ ꓠꓯ, ꓗꓪ ꓗꓪ ꓥ ꓟꓲ ꓪꓴ‐ꓢ ꓡꓰ ꓟ. ꓖꓶ ꓔ ꓟ ꓪꓴ‐ꓢ ꓙꓵꓽ ꓗꓽ ꓮ ꓙꓵꓽ ꓠꓬ ꓞꓳ ꓟꓽ ꓞꓲ꓾ ꓝꓮꓲ ꓮ ꓟꓶ ꓤꓶꓻ ꓦꓬꓼ ꓠꓬꓲ ꓐꓰ ꓪꓴ‐ꓢ ꓙꓵꓽ ꓗ ꓠꓬ ꓮ ꓫꓵꓽ ꓗꓳ. ꓙꓰ ꓟꓽ ꓙꓳ ꓟꓽ ꓓꓵꓽ ꓙ ꓠ, ꓟ ꓣꓳ ꓚꓵˍ ꓟ. ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓪꓴ‐ꓢ ꓡꓰ ꓖꓶ ꓔ ꓟ ꓪꓴ‐ꓢ ꓙꓵꓽ ꓗꓽ ꓔꓯ ꓣꓳ ꓞꓳ ꓠꓬ ꓣꓳ ꓦꓻ ꓕꓲ ꓒꓳ, ꓗꓪ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴꓽ ꓟꓴ ꓡ ꓓꓴ ꓙꓳ ꓡ ꓟ ꓥ ꓡꓳ꓿ ꓪꓴ‐ꓢ ꓠꓬ ꓮ ꓕꓯ ꓥ ꓟꓲ ꓬꓲ ꓖꓶ ꓐꓯ ꓔ ꓟ ꓐꓯ ꓘꓶꓽ ꓔꓯ ꓟꓽ ꓒꓳ, ꓐꓲ ꓜꓲꓼ ꓡ ꓝꓲ ꓟ ꓢꓲꓺ ꓒ ꓥ ꓟ ꓔꓯ ꓣꓳ ꓓꓵꓽ ꓙ ꓠ, ꓟ ꓥ ꓡꓳ꓿

ꓪꓴ‐ꓢ ꓙꓵꓽ ꓗꓽ ꓔꓯ ꓢꓷ. ꓟ ꓡꓰ ꓟꓽ ꓞꓲ ꓚꓲ. ꓛꓬ ꓤꓶꓻ ꓠꓯ, ꓗꓪ ꓛꓳ ꓢꓲ ꓠꓬ ꓙ ꓫꓱ, ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓪꓴ‐ꓢ ꓔꓯ ꓦꓻ ꓡꓱ ꓡꓳ ꓐꓰ ꓟꓷ ꓠꓷ ꓘꓶꓽ ꓗꓪ ꓡꓰ ꓐꓯ ꓟ ꓕꓯ ꓢꓲ ꓚꓲ. ꓛꓬ ꓪꓴ‐ꓢ ꓔꓯ ꓠꓵꓻ ꓠꓲ, ꓢꓲ ꓠꓬꓲ ꓣꓳ ꓤꓶꓻ ꓗꓪ ꓞꓳ ꓫꓱ ꓠ, ꓟ ꓣꓳ ꓚꓵˍ ꓡꓳ꓿

ꓪꓴ‐ꓢ ꓡꓰ ꓟ. ꓖꓶ ꓔ ꓟ ꓙꓵꓽ ꓗꓽ ꓠꓬ ꓣꓳ ꓐꓱ ꓶ ꓮ ꓔꓳ ꓖꓶ ꓔ ꓟ ꓟꓽ ꓥ꓾ ꓣꓳ ꓕꓲ ꓣꓳ ꓛꓳꓽ ꓕꓲ ꓣꓳ ꓠꓲ, ꓠꓵ ꓡꓯꓽ ꓘꓳ ꓠ, ꓟ ꓟꓲ ꓠꓯ ꓡ ꓞꓳ ꓕꓲ ꓣꓳ ꓔꓯ ꓪꓴ‐ꓢ ꓠꓵꓻ ꓠꓲ, ꓗꓪ ꓐꓰ ꓘꓳ, ꓣꓴ ꓠ, ꓟ ꓣꓳ ꓚꓵ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿

ꓣꓳ‐ꓟ ꓕꓳ ꓶ 13ꓽ10 ꓝꓲ. ꓗꓪ ꓠꓵꓻ ꓠꓲ, ꓠꓬ ꓠꓶꓽ ꓛꓳ ꓕꓲ ꓛꓳ ꓔꓯ ꓟꓽ ꓙꓲ ꓟꓽ ꓬꓰ ꓖꓶ꓿ ꓖꓳ ꓡꓱ ꓠꓬꓲ ꓠꓵ ꓠꓲ, ꓠꓬ ꓙꓵꓽ ꓗ ꓔꓯ ꓐꓲ ꓡꓰ ꓝꓲˍ ꓟ ꓥ ꓡꓳ꓿