ꓢꓲꓺ ꓒ ꓬꓰ‐ꓢꓴ ꓠꓬ ꓫꓵꓻ ꓠꓯ, ꓐꓰ ꓢꓯ. ꓬꓲꓼ ꓡ ꓠꓯ, ꓟ (Daily reflection)
ꓧꓪ. ꓧꓪ ꓠꓬꓲ. ꓠꓬꓲ. ꓠꓽ ꓢꓽ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 20ꓽ17‐28 ꓝꓲ. ꓗꓪ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬ ꓙꓱ‐ꓣꓴ‐ꓢ‐ꓡꓱ ꓗꓪ ꓓꓯ ꓙꓰ ꓕꓯ ꓬꓲ ꓛꓳꓽ ꓒꓯ, ꓞꓲ ꓠꓬꓲ ꓣꓳ ꓔꓯ ꓙ ꓖꓴ ꓐꓺ ꓢꓲ ꓗꓪ ꓧꓳꓽ ꓙꓰ ꓢꓲ ꓠ ꓠ, ꓡ ꓞꓳ ꓮ‐ꓐꓲ ꓥꓪ ꓔꓯ ꓠꓬ ꓔꓲꓺ ꓒ ꓪꓴ. ꓓꓵ ꓣꓱꓽ ꓢꓴ ꓐꓴ ꓐꓰ ꓙꓵꓽ ꓗ ꓟ. ꓒ ꓐꓴ ꓔꓯ ꓡꓯꓼ ꓙꓱ ꓗꓷ ꓢꓲ ꓬꓲ ꓪ ꓡꓰ ꓫꓵꓻ ꓝꓴꓲ ꓐꓯ ꓞꓷ,ˍ ꓥꓳ꓿ ꓝꓮꓲ ꓬꓲ ꓠꓬ ꓢꓽ ꓠꓬꓲ ꓕꓲ ꓠꓬꓲ ꓗꓪ ꓬꓲ ꓢꓯ. ꓬꓲꓼ ꓡ ꓥꓳ ꓐꓰ ꓐꓯ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓚꓲ. ꓛꓬ ꓫ. ꓓꓴ ꓟꓷꓼ ꓓꓴ ꓔꓳ, ꓜꓳ ꓡ ꓓꓴ ꓥꓳ ꓐꓰ ꓢꓷ. ꓥ ꓟꓲ ꓬꓲ ꓚꓲ. ꓛꓬ ꓠꓲ, ꓡꓶ ꓔꓯ ꓡꓳ. ꓗꓷ ꓢꓲ ꓠꓬꓲ ꓐ, ꓐ ꓠꓲ, ꓡꓶ ꓔꓯ ꓒꓵꓽ ꓛꓳ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓙꓽ ꓣꓳ ꓟ ꓠꓲ, ꓟ ꓮ ꓘꓶ. ꓛꓲ ꓙꓳ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓞꓶꓻ ꓠꓯ, ꓗꓪ ꓥ ꓟꓲ ꓠꓲ, ꓫ. ꓟ ꓟꓬꓽ ꓫ. ꓓꓴ ꓫ. ꓓꓴ ꓟꓷ ꓓꓴ ꓮ ꓟꓬ, ꓛꓲ ꓙꓳ ꓡ ꓟ ꓙꓵ, ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓐꓰ ꓐ, ꓐ ꓪꓴ‐ꓢ ꓠꓲ, ꓡꓶ ꓔꓯ ꓛꓳ ꓠ, ꓟ ꓐꓰ ꓬꓲ ꓔꓯ ꓙꓵꓻ ꓠ, ꓟ ꓣꓳ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
ꓝꓮꓲ ꓜꓲ‐ꓐꓱ‐ꓓꓲ ꓤ ꓟꓶ ꓠꓬ ꓬꓲ ꓤ ꓠꓬꓲꓽ ꓫꓵ. ꓐꓰ ꓡ ꓢꓲ꓾ ꓬꓰ‐ꓢꓴ ꓔꓯ ꓬꓲ ꓤ ꓠꓬꓲ ꓣꓳ ꓔꓯ ꓠꓴ ꓗꓴꓷꓼ ꓗꓪ ꓥꓪ ꓤ ꓠꓬꓲ ꓣꓳ ꓔꓯ ꓡꓯꓼ ꓙ ꓕꓲ ꓛꓱꓽ ꓗꓪ ꓕꓲ ꓣꓳ ꓡꓯꓼ ꓶ. ꓕꓲ ꓛꓱꓽ ꓗꓪ ꓕꓲ ꓣꓳ ꓠꓬꓲ. ꓠ. ꓠ, ꓟ ꓓꓰ ꓗꓷ ꓟ ꓥ ꓡꓳ꓿ ꓖꓳ ꓟ ꓠꓬ ꓟꓲ ꓠꓯ ꓡ ꓞꓳ ꓐꓴ ꓠꓬ ꓙꓵꓽ ꓪ ꓐꓰ ꓪꓴꓽ ꓟ ꓬꓰ ꓠꓲ, ꓫꓵˍ ꓟ ꓠꓲ, ꓦꓰ, ꓙꓵꓽ ꓟ ꓠꓲ, ꓟ ꓙꓳꓢꓴ ꓐꓴ ꓥ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓕꓲ ꓧꓪ, ꓧꓪ ꓠꓴ ꓥꓪ ꓠꓬ ꓪꓴ‐ꓢ ꓠꓯ, ꓗꓪ ꓪꓽ ꓘꓴ ꓟ ꓙꓵ, ꓕꓯ ꓪꓴ‐ꓢ ꓠꓲ, ꓡꓶ ꓔꓯ ꓓꓰꓽ ꓠ, ꓟ ꓕꓯ ꓢꓲ ꓚꓲ. ꓛꓬ ꓠꓲ, ꓡꓶ ꓔꓯ ꓡꓰ ꓓꓰꓽ ꓗꓷ ꓟ ꓚꓱ, ꓔꓯ ꓤ ꓟꓳ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿ ꓣꓳ ꓒꓬꓱꓼ ꓠꓲ, ꓫꓵˍ ꓟ ꓔꓯ ꓓꓽ ꓪꓴ. ꓓꓰ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓪ ꓮ ꓫꓵꓽ ꓓꓰꓽ ꓟ ꓠꓴ ꓪ ꓟꓽ ꓢꓷ. ꓐꓰ ꓐꓯ ꓔ ꓟ ꓐꓯ ꓘꓶꓽ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓪꓽ ꓘꓴ ꓟ ꓙꓵ, ꓕꓯ ꓦꓻ ꓕꓲ ꓒꓳ, ꓗꓪ ꓟꓬꓽ ꓠꓬꓲ ꓪꓴ. ꓟꓴ ꓡ ꓠ, ꓟ ꓶꓻ ꓓꓰ ꓠ, ꓟ ꓣꓳ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
ꓢꓲꓺ ꓒ ꓬꓰ‐ꓢꓴ ꓥꓪ ꓓꓳꓻ ꓐꓰ ꓬꓰˍ ꓟ ꓡꓴꓻ ꓗꓶ. ꓠꓴ ꓪ ꓓꓳꓻ ꓐ ꓡ ꓡ?
ꓢꓲꓺ ꓒ ꓬꓰ‐ꓢꓴ ꓡꓰ ꓬꓲ ꓓꓳꓻ ꓟ ꓡꓴꓻ ꓗꓶ. ꓔꓯ ꓠꓴ ꓪ ꓓꓳ ꓐ ꓡ ꓡ ꓐꓰ ꓝꓲ ꓓꓴ ꓐꓴ ꓔꓯ ꓠ ꓠꓬꓲˍ ꓟ ꓗꓷ ꓟ ꓥ ꓡꓳ꓿ ꓡꓴ ꓘꓶ. ꓐꓯ ꓟ ꓠꓬ ꓐ. ꓐ ꓪꓲ‐ꓢ ꓠꓲ, ꓡꓶ ꓡꓰ ꓔꓳ, ꓜꓳ ꓡ ꓠ, ꓟ ꓠꓲ, ꓫ. ꓟꓬꓽ ꓫ. ꓟ ꓔꓯ ꓠꓲ, ꓒꓴ ꓒꓴ ꓘꓳ, ꓣꓴ ꓠ, ꓟ ꓐꓯ ꓟ ꓚꓱ, ꓥ ꓡꓳ꓿
ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓣꓳ ꓠꓯ, ꓗꓪ ꓪꓴ‐ꓢ ꓣꓱ ꓛꓰ ꓡꓰ ꓟꓽ ꓞꓲ ꓫ. ꓓꓴ ꓟꓷ ꓓꓴ ꓠꓯ, ꓔꓯ ꓥ ꓟꓲ ꓔꓳ, ꓜꓳ ꓧꓪ. ꓡꓰ ꓠ, ꓟ ꓢꓲꓺ ꓒ ꓐꓰ ꓕꓲ ꓛꓳ ꓙ ꓫꓱ, ꓠ, ꓟ ꓘꓴ ꓔꓬ ꓟ ꓥ ꓡꓳ꓿ ꓪꓴ‐ꓢ ꓣꓱ ꓛꓰ ꓡꓰ ꓟꓽ ꓞꓲ ꓢꓮꓚꓣꓲꓝꓲꓚꓰ ꓐꓯ ꓟ ꓫ. ꓓꓴ ꓟꓷ ꓓꓴ ꓔꓯ ꓥ ꓟꓲ ꓔꓳ, ꓜꓳ ꓡ ꓟ ꓚꓱ, ꓕꓯ ꓟ. ꓖꓶ ꓔ ꓟ ꓥ ꓡꓳ꓿
ꓮ ꓘꓶ. ꓛꓲ ꓪꓴ. ꓬꓰ ꓠꓲ, ꓫꓵˍ ꓠꓬ ꓬꓲ ꓠꓽ ꓣꓱꓽ ꓙ ꓢꓴ ꓬꓰ ꓠꓯ, ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓥ ꓡꓳ꓿ ꓝꓲ ꓓꓴ ꓬ‐ꓗꓴ ꓐꓴ ꓠꓬꓲꓽ ꓣꓳ ꓔꓯ ꓝꓲ ꓓꓴ ꓐꓴ ꓠꓬ ꓙꓵꓽ ꓪ ꓖꓶ ꓠ, ꓟ ꓔꓯ ꓓꓰꓽ ꓟ ꓔꓯ ꓝꓲ ꓓꓴ ꓐꓴ ꓢꓷ. ꓡꓰ ꓠꓬ ꓬꓲ ꓪ ꓠꓬꓲ ꓣꓳ ꓔꓯ ꓠꓲ, ꓢꓲ, ꓡꓳ꓿ ꓖꓳ ꓕꓯ ꓢꓲꓺ ꓒ ꓬꓰ‐ꓢꓴ ꓡꓰ ꓪꓴꓽ ꓟ ꓧꓳꓽ ꓪꓴ. ꓟꓴ ꓢꓴ ꓬꓰ ꓢꓴ ꓠꓬ ꓮ ꓡꓲ ꓐꓰ ꓬꓰ ꓠ, ꓟ ꓔꓯ ꓔꓱ ꓔꓱ ꓡꓰ ꓐꓯ ꓟ. ꓖꓶ ꓗꓷ ꓠꓬ ꓬꓲ ꓪ ꓓꓵ ꓙ ꓚꓱ, ꓠꓬ ꓔꓱ, ꓚꓵ ꓟ ꓕꓲ ꓚꓱ, ꓗꓪ ꓒꓳ, ꓙꓰ ꓟ ꓥ ꓡꓳ꓿
ꓠꓬꓲ. ꓠꓬꓲ ꓟꓲ ꓠꓯ ꓙꓵꓽ ꓪ ꓙꓳ ꓢꓴ ꓐꓴ ꓠꓬ ꓙꓵꓽ ꓪ ꓟꓶ ꓕꓯ ꓬꓲ ꓪ ꓙꓵꓽ ꓪ ꓙꓳ ꓕꓯ ꓣꓳ ꓢꓴ ꓐꓴ ꓔꓯ ꓠꓬꓲˍ ꓟ ꓬꓰ ꓥ ꓟꓲ ꓘꓴ ꓜꓲꓼ ꓞꓳ ꓔꓯ ꓧꓳꓽ ꓪꓴ ꓟꓴ ꓢꓴ ꓐꓴ ꓠꓬ (ꓢꓰꓣꓦꓮꓠꓔ ꓡꓰꓮꓓꓰꓣꓢꓧꓲꓑ) ꓐꓯ ꓠꓬ ꓙꓽ ꓣꓳ ꓟ ꓠꓲ, ꓟ ꓠꓲ, ꓟ ꓗꓪ ꓣꓱ ꓙ ꓢꓴ ꓬꓰ ꓟ ꓚꓱ, ꓗꓪ ꓐꓰ ꓧꓳꓽ ꓪꓴ. ꓟꓴ ꓔꓬ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓠꓲ, ꓛꓳ ꓕꓲ ꓛꓳ ꓔꓯ ꓙꓽ ꓣꓳ ꓟ ꓠꓲ, ꓟ ꓗꓪ ꓐꓰ ꓣꓱ ꓙ ꓢꓴ ꓬꓰ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿ ꓙꓵꓽ ꓪ ꓐꓰ ꓞ ꓡ ꓙꓵꓽ ꓟ ꓠꓬ ꓢꓲꓺꓒ ꓬꓰ‐ꓢꓴ ꓬꓲ ꓗꓴꓷꓼ ꓐꓱ ꓶ ꓙꓲ ꓖꓴ ꓟꓽ ꓙꓳ ꓟ ꓐꓰ ꓠꓵꓻ ꓠꓲ, ꓡꓰ ꓙꓽ ꓣꓳ ꓟ ꓠꓲ, ꓟ ꓗꓪ ꓐꓰ ꓢꓴ ꓔꓯ ꓣꓱ ꓙ ꓢꓴ ꓬꓰ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿
ꓢꓴ ꓔꓯ ꓬꓰ ꓙ ꓢꓴ ꓣꓱ ꓢꓴ ꓙꓽ ꓣꓳ ꓟ ꓠꓲ, ꓟ ꓙꓳ ꓢꓴ ꓔꓯ ꓮ ꓘꓶ. ꓛꓲ ꓪꓴꓽ ꓟ ꓥ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿
