ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓮꓽ ꓐ ꓮ ꓟ ꓣꓱꓽ ꓢꓴ ꓮ ꓡꓲ ꓕꓲ ꓣꓳˍ ꓟꓲ꓾ ꓙꓵꓽ ꓢꓴ ꓟꓴ ꓢꓴ ꓮ ꓡꓲ ꓕꓲ ꓣꓳˍ ꓟꓲ ꓚꓲ. ꓛꓬ ꓤ ꓠꓱ꓾ ꓚꓲ. ꓛꓬ ꓢꓳ ꓤ ꓐꓴ ꓔꓯ ꓥꓳꓽ ꓡꓰ ꓟ ꓚꓱ, ꓗꓪ ꓙꓰ ꓝꓲ ꓠꓲ, ꓫꓵ ꓢꓴ ꓕꓲ ꓣꓳˍ ꓟꓲ ꓟꓽ ꓙꓳ꓿ ꓤ ꓠꓱ ꓮ ꓡꓲ ꓕꓲ ꓣꓳ ꓔꓯ ꓥˍ ꓟꓲ ꓙꓲꓻˍ ꓟ ꓚꓱ, ꓗꓪ ꓡꓰꓽ ꓚꓺ ꓝꓲ ꓠꓲ, ꓫꓵˍ ꓡꓳ꓿ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ‐ꓕꓲ 23ꓽ1‐12 ꓗꓪ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓝꓲ ꓓꓴ ꓐꓴ ꓔꓯ꓾ ꓗꓶ. ꓘꓶꓽ ꓫ. ꓕꓱˍ ꓟ ꓒ‐ꓡꓲ‐ꓢꓷ ꓐꓴ ꓙꓵꓽ ꓗ ꓟ. ꓒ ꓐꓴ ꓬꓲ ꓪ ꓚꓱ, ꓗꓪ ꓟꓽ ꓛꓳꓻ ꓫꓱꓽ ꓠ, ꓟ ꓟ. ꓖꓶˍ ꓡꓳ꓿

ꓬꓲ ꓪ ꓐꓴ ꓠꓬ ꓞꓳ ꓤ ꓐꓴ ꓡꓰ ꓫꓱ. ꓖꓶˍ ꓟ ꓔꓯ ꓟꓶ ꓠ, ꓟ ꓐꓱ ꓶ ꓙꓵꓽ ꓗ ꓐꓴ꓾ ꓟꓳ‐ꓫꓲ ꓡꓰ ꓖꓶꓽ ꓔ ꓟ ꓙꓵꓽ ꓗ ꓔꓯ ꓟꓷꓽ ꓠꓷ, ꓘꓶꓽ ꓕꓲꓽˍ ꓡꓳ꓿ ꓙ ꓖꓴ ꓔꓱ, ꓫꓵ ꓗꓪ “ꓟ. ꓒ” ꓐꓰ ꓐꓯ ꓢꓲ ꓘꓴꓻ ꓡˍ ꓟ ꓔꓯ ꓠꓵˍ ꓡꓳ꓿ ꓚꓵ ꓚꓵ ꓒꓵꓽ ꓓꓰ ꓡꓰˍ ꓟ ꓠꓬ ꓮ ꓫꓵꓽ ꓥ ꓟ ꓔꓯ ꓬꓲ ꓪ ꓟꓽ ꓢꓷ. ꓔꓬ꓿ ꓬꓰ‐ꓢꓴ ꓙꓲ‐ꓢꓴ ꓡꓰ ꓟ. ꓖꓶˍ ꓟ ꓚꓵ ꓚꓵ ꓒꓵꓽ ꓓꓰˍ ꓟ ꓐꓰ ꓪꓽ ꓠꓬꓲ ꓓꓰ ꓡꓰˍ ꓟ ꓚꓵ ꓠꓬ ꓙ ꓣꓳˍ ꓟ ꓐꓰ ꓣꓱꓽ ꓙˍ ꓟ ꓥ ꓡꓳ꓿ ꓙ ꓣꓳˍ ꓟ ꓠꓲ, ꓟ ꓚꓵ ꓠꓬ ꓚꓲ. ꓛꓬ ꓟꓽ ꓐꓲ ꓜꓲꓼ ꓟ ꓔꓯ ꓣꓷꓠ.ˍ ꓡꓳ꓾ ꓚꓲ. ꓛꓬ ꓢꓷ. ꓠꓲ,꓾ ꓚꓲ. ꓛꓬ ꓐꓲꓻˍ ꓟ꓾ ꓚꓲ. ꓛꓬ ꓔꓯ ꓙꓳˍ ꓟ ꓐꓳ ꓶ ꓐꓴ ꓠꓬ ꓪꓴ‐ꓢ ꓬꓲ ꓣꓱꓽ ꓛꓰꓽ ꓥ ꓡꓳ ꓐꓯˍ ꓟ ꓔꓯ ꓘꓳ ꓣꓴˍ ꓟ ꓥ ꓡꓳ꓿ ꓞꓳ ꓤ ꓕꓲ ꓣꓳ ꓐꓰ ꓕꓲ ꓣꓳ ꓙ ꓡꓯ ꓘꓳˍ ꓟ ꓗꓪ ꓥˍ ꓟꓲ ꓘꓶꓽ ꓘ, ꓠꓲ, ꓟ ꓟꓽ ꓙꓳ ꓙꓳ꓾ ꓥꓪ ꓠꓽ ꓠꓱ. ꓐꓯ ꓢꓴ ꓕꓯꓽ ꓢꓲ ꓓꓻˍ ꓡꓳ꓾ ꓠꓱ. ꓐꓯ ꓢꓴ ꓢꓶ. ꓟꓽ ꓞꓲꓺ ꓒꓵꓽˍ ꓡꓳ ꓐꓰ ꓟꓽ ꓓꓵꓽ ꓙꓽ ꓙꓽ꓾ ꓠꓱ. ꓐꓯ ꓢꓴ ꓠꓯꓸꓼ ꓗꓪ ꓙꓳˍ ꓟ ꓬꓲ ꓪ ꓓꓻˍ ꓟ ꓔꓯ ꓟꓳꓻ ꓗꓴ. ꓢꓴ꓾ ꓮ ꓙꓵꓽ ꓔꓯ ꓕꓲ ꓡꓰ, ꓞꓳ ꓒꓵꓽˍ ꓡꓳ꓿ ꓚꓲ. ꓛꓬ ꓟꓶ ꓔ ꓟ ꓣꓱꓽ ꓛꓰꓽ ꓔꓯ ꓣꓱꓽ ꓢꓲ ꓞꓳ ꓤ ꓮ ꓟꓬ, ꓙꓲꓻ ꓖꓴ ꓐꓱ ꓶ ꓣꓱꓽ ꓙˍ ꓟ꓾ ꓕꓱ ꓟ ꓠꓬ ꓔꓱ, ꓚꓵˍ ꓟ ꓣꓱꓽ ꓙ ꓚꓱ, ꓥ ꓡꓳ꓿