ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓬ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓠꓬ ꓠꓯ ꓞꓲꓹ ꓟ ꓣꓳ ꓐꓴ ꓔꓯ ꓠꓬꓲ ꓟꓳꓻ ꓓꓴ ꓣꓳ ꓤꓶꓻ ꓙ ꓖꓴ ꓗꓪ ꓟꓳꓸ ꓖꓶˍ ꓟ ꓟꓬ ꓡꓴꓻ ꓥ ꓡꓳ꓾ ꓐꓰ ꓐꓯˍ ꓟ ꓟꓸ ꓟꓲꓽ ꓝꓲꓸ ꓗꓪ ꓐꓰ ꓣꓳ ꓦ ꓢꓯꓼ ꓪ ꓣꓴ ꓓꓴ ꓥꓳ= ꓠꓬꓲꓸ ꓠꓬꓲ ꓟ ꓟꓸ ꓟꓲꓽ ꓝꓲꓸ ꓠꓬ (ꓟ-ꓘꓳ= 4ꓽ21-25) ꓥ ꓡꓳ=
ꓟꓸ ꓟꓲꓽ ꓝꓲꓸ ꓗꓪ ꓠꓬ꓾ ꓟꓬ ꓡꓴꓻ ꓔꓯ ꓠꓬ ꓡꓴ ꓠꓯꓸꓼ ꓗꓪ ꓥ ꓠꓬ꓾ ꓘꓹ ꓛꓽ ꓠꓯꓸ ꓘꓪ ꓗꓶ ꓔ ꓓꓴ ꓥ ꓡ= ꓕꓱ ꓡꓱ ꓟꓽ ꓥ꓾ ꓟꓬ ꓡꓴꓻ ꓔꓯ ꓠꓬ ꓟꓬ ꓡꓴꓻ ꓕꓲꓺ ꓗꓪ ꓥ ꓠꓬ ꓟꓬ ꓡꓴꓻ ꓓꓻ ꓗꓪ ꓟꓬ ꓔ ꓓꓴ ꓥ ꓡꓳ꓾ ꓐꓰ ꓣꓳ ꓑ ꓙꓽ ꓪˍ ꓡꓳ=
ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓴ-ꓔ ꓡ ꓞꓳ ꓦꓲ ꓗꓪ ꓠꓬ ꓟꓬ ꓡꓴꓻ ꓟꓬˍ ꓡꓳ= ꓟꓬ ꓡꓴꓻ ꓔꓯ ꓠꓬ ꓘꓹ ꓛꓽ ꓠꓯꓸꓼ ꓗꓪ ꓗꓶ ꓔ ꓓꓴ ꓟꓽ ꓥ= ꓬꓲ ꓪ ꓠꓬ ꓟꓬ ꓡꓴꓻ ꓔꓯ ꓮ ꓡꓲ ꓗꓪ ꓗꓶ ꓔ ꓡ ꓐꓯˍ ꓠꓬ꓾ ꓕꓲ ꓦꓲ ꓡꓱꓸꓼ ꓟꓳꓻ ꓓꓹ ꓟ ꓟꓬ ꓡꓴꓻ ꓕꓲꓺ ꓗꓪ ꓗꓶ ꓔ ꓟ ꓥ ꓡꓳ= ꓟꓬ ꓡꓴꓻ ꓕꓲꓺ ꓮ ꓟꓴꓸ ꓟꓴ ꓗꓪ ꓗꓶ ꓔ ꓕꓯ ꓠꓬ ꓟꓬ ꓡꓴꓻ ꓖꓳ ꓟ ꓗꓪ ꓐꓰ ꓠꓬꓲ ꓟꓳꓻ ꓓꓴ ꓠꓬ ꓕꓲ ꓦꓲ ꓡꓱꓸꓼ ꓟꓳꓻ ꓓꓹ ꓟ ꓥ ꓡꓳ=
ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟꓬ ꓡꓴꓻ ꓠꓬ ꓮ ꓫꓵꓽ ꓔꓯ ꓐꓯ ꓔꓬ ꓡ ꓐꓯˍ ꓠꓬ꓾ ꓢꓲ ꓒ ꓬꓰ-ꓢꓴ ꓐꓯ ꓘꓶ ꓔꓯ ꓐꓯ ꓔꓬ ꓟ ꓥ ꓡꓳ= ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓠꓬ ꓣꓳ ꓤꓶꓻ ꓔꓯ ꓠꓬꓲ ꓟꓳꓻ ꓓꓴ꓾ ꓣꓳ ꓙ ꓫꓱꓽ ꓔꓬ ꓟ ꓗꓪ ꓠꓯ ꓞꓲꓹ ꓟ ꓗꓪ ꓪꓴ-ꓢ ꓠꓬ ꓣꓳ ꓐꓱ ꓶ ꓟꓬ ꓡꓴꓻ ꓥ ꓡꓳ꓾ ꓠꓬꓲ ꓟꓳꓻ ꓓꓴ ꓥ ꓡꓳ= ꓕꓱ ꓟ ꓑꓶꓸ ꓓꓴ ꓣꓳ ꓠꓬ ꓮ ꓡꓲ ꓐꓰ ꓛꓳ ꓫꓱꓽ ꓠ ꓗꓹ ꓡ= ꓠꓯ ꓞꓲꓹ ꓟ ꓟꓲ ꓠꓯ ꓙ ꓖꓴ ꓗꓪ ꓟꓴꓽ ꓗꓪ ꓗꓴꓷꓼ ꓗꓪ ꓕꓱ ꓡꓱ ꓐꓰ ꓣꓳ ꓙꓰ ꓔꓬ ꓕꓯ ꓓꓴ ꓓꓳ ꓔꓬ ꓕꓯ ꓠꓬ ꓠꓯ ꓞꓲꓹˍ ꓟ ꓗꓪ ꓛꓲ ꓬꓰˍ ꓕꓯ ꓣꓳ ꓮ ꓡꓲ ꓐꓰ ꓫꓱꓽ ꓠ ꓗꓹ ꓡ ꓐꓯˍ ꓠꓬ꓾ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓥ ꓟ ꓠꓬꓲ ꓟꓳꓻ ꓓꓴ ꓗꓪ ꓐꓰ ꓣꓳ ꓙ ꓫꓱꓽ ꓠꓹ ꓟ ꓥꓳ=
ꓐꓯ ꓠꓲꓹ ꓫꓵˍ ꓟ ꓠꓬ ꓢꓲ ꓒ ꓬꓰ-ꓢꓴ ꓐꓯ ꓘꓶꓽ ꓗꓪ ꓐꓰ ꓣꓳ ꓫꓱꓽ ꓓꓴ ꓥꓳ= ꓕꓱ ꓟ ꓕꓲ ꓡꓰꓹ ꓥꓳ꓾ ꓠꓬꓲꓸ ꓠꓬꓲ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓥˍ ꓟꓲ ꓣꓳ ꓐꓯ ꓘꓶꓽ ꓣꓳ ꓙꓵꓻ ꓠꓲꓹ ꓠꓬ ꓢꓴ ꓐꓱ ꓶ ꓟꓬ ꓡꓴꓻ ꓠꓬꓲ ꓟꓳꓻ ꓓꓴ ꓒꓬꓱꓼ ꓡ ꓝꓲ=
ꓕꓱ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓓꓵꓽ ꓙꓽ ꓠꓬꓲ ꓡꓯ= ꓣꓳ ꓐꓯ ꓔꓬ ꓟ ꓣꓳ ꓟꓷꓽ ꓠꓷꓹ ꓗꓪ ꓐꓰ ꓫꓸ ꓕꓱ ꓘꓶꓽ ꓠꓬ ꓣꓳ ꓒ ꓕꓲꓺ ꓣꓳ ꓚꓳ ꓡꓳ ꓗꓪ ꓣꓳ ꓠꓶꓽ ꓛꓳꓽ ꓔꓯ ꓠꓬꓲ ꓟꓳꓻ ꓓꓴ ꓣꓳꓺ ꓖꓶ ꓔꓬ ꓟ ꓟꓬ ꓡꓴꓻ ꓒꓬꓱꓼ ꓡˍ ꓡ= ꓣꓳ ꓐꓯ ꓘꓶꓽ ꓠꓬ ꓢꓲ ꓒ ꓬꓰ-ꓢꓴ ꓐꓯ ꓘꓶꓽˍ ꓡꓰ ꓐꓰ ꓢꓴ ꓐꓱ ꓶ ꓢꓴ ꓤꓶꓻ ꓔꓯ ꓠꓬꓲ ꓟꓳꓻ ꓓꓴ ꓬꓰ ꓖꓶ ꓐ ꓡˍ ꓟ꓾ ꓙ ꓖꓴ ꓫꓬꓹ ꓔꓱꓹ ꓖꓶ ꓐ ꓡˍ ꓟ ꓫꓸ ꓕꓱ ꓘꓶꓽ ꓒꓬꓱꓼ ꓡˍ ꓡ= ꓫꓸ ꓕꓱ ꓘꓶꓽˍ ꓡꓰꓽ ꓟꓽ ꓞꓲ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓣꓳ ꓣꓱꓽ ꓬꓰˍ ꓟ ꓗꓪ ꓐꓰ ꓢꓴ ꓔꓯ ꓣꓳꓽ ꓔꓱꓹ ꓚꓵˍ ꓟ ꓙ ꓖꓴ ꓔꓯ ꓟꓳꓸ ꓖꓶ ꓐ ꓡ ꓔꓬ ꓡ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓙ ꓖꓴ ꓥ ꓟ ꓡꓰ ꓐꓰ ꓕꓲ ꓡꓰꓹ ꓣꓳ ꓥˍ ꓟꓲ ꓠꓱꓸ ꓐꓯ ꓢꓴ ꓐꓱ ꓶ ꓙꓻ ꓖꓴ ꓟꓬ ꓡꓴꓻˍ ꓡꓰ ꓐꓰ ꓟꓬ ꓐ ꓡ ꓠꓹ ꓟ ꓙꓵꓻ ꓠꓲꓹ ꓙꓳˍ ꓟ꓾ ꓪꓴ-ꓢ ꓐꓱ ꓶ ꓜꓲꓽ ꓟꓴꓽ ꓬꓰ ꓖꓶ ꓐ ꓡˍ ꓟ꓾ ꓪꓴ-ꓢ ꓐꓱ ꓶ ꓢꓯꓸ ꓔꓬ ꓟ꓾ ꓪꓴ-ꓢ ꓐꓱ ꓶ ꓙ ꓫꓱꓽ ꓔꓬ ꓟ ꓗꓪ ꓐꓰ ꓠꓱꓸ ꓐꓯ ꓢꓴ ꓔꓯ ꓟꓬ ꓡꓴꓻ ꓟꓬ ꓖꓶ ꓠꓹ ꓟ ꓥꓳ= ꓢꓲ ꓒ ꓬꓰ-ꓢꓴ ꓠꓬ ꓣꓳ ꓔꓯ ꓕꓱ ꓡꓱ ꓐꓰ ꓐꓯ ꓖꓶ ꓔꓲꓸ ꓟ ꓥ ꓡꓳ=
