ꓬꓰ‐ꓢꓴ ꓟꓬꓱꓽ ꓬꓰ ꓪꓴ. ꓔꓴˍ ꓟ (Sunday reflection )
ꓧꓪ ꓧꓪ. ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (3) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓢꓲ ꓠꓬꓲ꓾ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ (4ꓽ12‐23) ꓝꓲ. ꓗꓪ ꓛꓲ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓬꓲ ꓪꓴ. ꓟꓬꓱꓽ ꓬꓰ ꓔꓴˍ ꓟ ꓬꓲ ꓗ. ꓠꓯ ꓢꓲ ꓗꓪ ꓛꓳ ꓠ, ꓟ ꓝꓲ ꓓꓴ ꓐꓴ ꓔꓯ ꓘꓴˍ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓡꓰ ꓠꓯ ꓞꓲ, ꓟ ꓔꓬ ꓟ ꓑ ꓫꓬꓼ ꓐꓴ ꓠꓬ ꓠꓬꓲ ꓟꓳꓻ ꓓꓴ ꓓꓽ ꓟ ꓔꓯ ꓡꓳ. ꓟꓳꓻ ꓡꓰꓳ꓿ ꓫꓵꓻ ꓶ ꓥꓳꓽ ꓟꓵꓽ ꓗꓰ ꓠꓬꓲ. ꓠ. ꓔꓬ ꓢꓴ ꓐꓴ ꓔꓯ ꓠꓬꓲ ꓟꓳ. ꓓꓴ ꓣꓳ ꓖꓶ ꓡꓺꓳ꓿ ꓐꓰ ꓐꓯˍ ꓟ ꓔꓯ ꓐꓲ ꓡꓰ ꓝꓲ ꓠ, ꓟ ꓥ ꓡꓳ꓿ ꓖꓳ ꓕꓲ ꓝꓲ. ꓗꓪ ꓬꓰ‐ꓢꓴ ꓠꓬ ꓟ. ꓟꓲꓽ ꓚ ꓪꓴ. ꓔꓴ ꓢꓲ꓾ ꓪꓴ‐ꓢ ꓗꓴꓷꓼ ꓠꓶꓽ ꓡꓺꓳ꓿ ꓠꓴ ꓪ ꓠꓲ, ꓟ ꓡꓶ. ꓐꓰ ꓟ. ꓟꓲꓽ ꓚꓺ ꓗꓷ ꓟ ꓠꓬ ꓠꓯ ꓞꓲ ꓟ ꓟꓲ ꓠꓯ ꓗꓪ ꓔꓬ ꓟ ꓟꓲ ꓠꓯ ꓡ ꓞꓳ ꓔꓯ ꓠꓬꓲ ꓟꓳ ꓓꓴ ꓗꓪ ꓔꓬ ꓝꓲˍ ꓠꓲ, ꓟ ꓐ, ꓐ ꓠꓲ, ꓡꓶ ꓔꓯ ꓐꓲ ꓡꓰ ꓝꓲˍ ꓟ ꓥ ꓡꓳ꓿
ꓝꓮꓲ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ ꓗ. ꓠꓯ ꓢꓲ ꓗꓪ ꓛꓳ ꓠ, ꓟ ꓝꓲ ꓓꓴ ꓐꓴ ꓔꓯ ꓘꓴ ꓟ ꓥ ꓡꓳ꓿ ꓬꓲ ꓠꓬ ꓠꓻ ꓓꓴ ꓒꓬ ꓓꓴ ꓙꓳ ꓢꓴ ꓐꓴ ꓔꓯ ꓠꓻ ꓫꓬ ꓖꓶ ꓝꓴꓲ ꓠꓯ, ꓗꓪ ꓔꓬ ꓟ ꓟꓲ ꓠꓯ ꓡ ꓞꓳ ꓔꓯ ꓪꓴ‐ꓢ ꓗꓴꓷꓼ ꓗꓪ ꓛꓲ ꓡꓰ ꓠ, ꓟ ꓶꓻ ꓓꓳꓽ ꓫꓱ, ꓓꓳ ꓔꓯ ꓚꓺ ꓟ. ꓖꓶ ꓗꓷ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓟꓳ‐ꓫꓲ ꓙꓵꓽ ꓔꓯ ꓟꓽ ꓢꓳꓻ ꓔ ꓢꓴ ꓟꓽ ꓢꓷ. ꓢꓴ ꓐꓴ ꓥ ꓟꓲ ꓥꓪ. ꓧꓪ ꓒꓽ ꓐꓴ ꓔꓯ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓒꓬꓱꓼ ꓡ ꓠ, ꓟ ꓘꓴ ꓗꓷ ꓟ ꓥ ꓡꓳ꓿ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓬꓰ ꓙ ꓔ ꓙ ꓟ ꓪꓴ. ꓠꓬꓲ ꓝꓲ ꓓꓴ ꓐꓴ ꓠꓬ ꓪꓴ‐ꓢ ꓟꓬꓱꓽ ꓗꓪ ꓮ ꓘꓶ. ꓛꓲ ꓫꓵꓽ ꓕꓵꓼ ꓢꓲ ꓠꓬꓲ ꓬꓲ ꓪ ꓪꓴ‐ꓢ ꓐꓯ ꓘꓶꓽ ꓚꓺ ꓟ ꓙꓵ, ꓗꓪ ꓥ ꓟꓲ ꓮ ꓘꓶ. ꓛꓲ ꓪꓴꓽ ꓟꓴ ꓟ ꓧꓪ ꓡꓰ ꓟ ꓙꓳ ꓡꓰ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓣꓳ ꓑ ꓙ ꓗꓷ ꓟ ꓪ ꓡꓰ ꓐꓰ ꓠꓴ ꓥꓪ ꓔꓯ ꓪꓴ‐ꓢ ꓡꓰ ꓬꓲ ꓤ ꓠꓱ ꓤ ꓐꓴ ꓒꓬꓱꓼ ꓡ ꓝꓲ ꓟ ꓪꓴ. ꓠꓬꓲ ꓣꓳ ꓐꓴ ꓪꓴ‐ꓢ ꓔꓯ ꓫ. ꓟꓳ ꓠꓯ, ꓟ ꓥ ꓡꓳ꓿ ꓝꓮꓲ ꓣꓳ ꓔꓯ ꓬꓲ ꓝꓲ ꓓꓴ ꓐꓴ ꓒꓬꓱꓼ ꓡ ꓠ, ꓟ ꓬꓲ ꓗ. ꓠꓯ ꓢꓲ ꓗꓪ ꓛꓳˍ ꓠ, ꓟ ꓘꓴ ꓟꓶ ꓡꓰ ꓢꓴ ꓐꓴ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓠꓴ ꓥꓪ ꓔꓯ ꓬꓲ ꓝꓲ ꓓꓴ ꓬꓲ ꓗ. ꓠꓯ ꓢꓲ ꓗꓪ ꓛꓳꓽ ꓢꓴ ꓐꓴ ꓒꓬꓱꓼ ꓡ ꓝꓲ ꓟ ꓘꓴˍ ꓟꓶ ꓟ ꓪꓴ. ꓠꓬꓲ ꓣꓳ ꓠꓯ, ꓗꓪ ꓪꓴ‐ꓢ ꓟꓬꓱꓽ ꓬꓰ ꓠ, ꓟ ꓐꓰ ꓪꓴ‐ꓢ ꓠꓲ, ꓡꓶ ꓢꓯ. ꓔꓬ ꓠ, ꓟ ꓶꓻ ꓙꓳ ꓟ ꓥ ꓡꓳ꓿
ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓝꓲ ꓓꓴ ꓒꓬꓱꓼ ꓡ ꓝꓲ ꓟ ꓪꓴ. ꓠꓬꓲ ꓣꓳ ꓦꓻ ꓢꓯꓼ ꓪ ꓙꓳˍ ꓠ, ꓟ ꓢꓲꓺ ꓒ ꓬꓰ‐ꓢꓴ ꓬꓲ ꓫꓵꓽ ꓐꓰ ꓧꓪ, ꓔꓯ ꓘꓳ, ꓣꓴ ꓠ, ꓟ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓘꓳ, ꓣꓴ ꓠ,ꓟ ꓢꓯꓼ ꓕꓵꓼ ꓠ, ꓟ ꓶꓻ ꓙꓳ ꓟ ꓥ ꓡꓳ꓿ ꓝꓮꓲ ꓣꓳ ꓠꓬ ꓦꓻ ꓢꓯꓼ ꓪ ꓙꓳ ꓠ,ꓟ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓵꓻ ꓝꓮꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓦꓻ ꓢꓯꓼ ꓪ ꓣꓴ ꓠ, ꓟ ꓣꓳ ꓚꓵˍ ꓡꓳ꓿ꓣꓳ ꓠꓬ ꓢꓲꓺ ꓒ ꓬꓰ‐ꓢꓴ ꓗ. ꓠꓯ ꓛꓳ ꓢꓴ ꓐꓴ ꓥ ꓟ ꓪꓴ. ꓠꓬꓲ ꓦꓻ ꓢꓯꓼ ꓪ ꓙꓳ ꓠ, ꓟ ꓣꓳ ꓚꓵˍ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓔꓯ ꓢꓳꓻ ꓣꓴ ꓢꓲ ꓠꓬꓲ ꓠꓵꓻ ꓠꓲ, ꓙꓳ ꓟ ꓙꓲ‐ꓢꓴ ꓢꓲꓺ ꓤ ꓝꓮꓲ ꓘꓴ ꓜꓲꓼ ꓞꓳ ꓟ. ꓖꓶ ꓡ ꓟ ꓚꓱ, ꓔꓯ ꓞꓳ ꓒꓵꓽ ꓠ, ꓟ ꓣꓳ ꓚꓵˍ ꓡꓳ꓿
ꓠꓴ ꓥꓪ ꓠꓬ ꓪꓴ‐ꓢ ꓐꓯ ꓘꓶꓽ ꓶꓼ ꓓꓳꓽ ꓫꓱ, ꓓꓳꓽ ꓔꓯ ꓚꓺ ꓠ, ꓟ ꓢꓯꓼ ꓕꓵꓼ ꓠ, ꓟ ꓔ ꓟ ꓥ ꓡꓳ꓿ ꓣꓳ ꓠꓬ ꓪꓴ‐ꓢ ꓤ ꓠꓱ ꓒꓬꓱꓼ ꓡ ꓟ ꓝꓮꓲ ꓖꓳ ꓓꓱꓽ ꓔꓲ ꓟꓶ ꓡꓰ ꓢꓴ ꓐꓴ ꓮ ꓙꓵꓽ ꓠꓬ ꓪꓴ‐ꓢ ꓶꓼ ꓓꓳ ꓫꓱ, ꓓꓳꓽ ꓚꓺ ꓠ, ꓟ ꓝꓮꓲ ꓪꓴ‐ꓢ ꓟꓬꓱꓽ ꓬꓰ ꓠ ꓟ ꓶꓻ ꓙꓳ ꓢꓴ ꓐꓴ ꓥ ꓡꓳ꓿
ꓝꓮꓲ ꓣꓳ ꓙꓵꓻ ꓠꓲ, ꓐꓰ ꓧ, ꓡꓰ ꓝꓲ ꓟ ꓚꓱ, ꓮ ꓙꓵꓽ ꓔꓯ ꓗꓽ ꓕꓽ ꓠ, ꓟ ꓶꓻ ꓥ ꓟꓲ ꓣꓳ ꓠꓯ, ꓗꓪ ꓙꓳ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓙꓵꓽ ꓠꓬ ꓣꓳ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓢꓯ. ꓔꓬ ꓟ ꓙꓵ, ꓗꓪ ꓪꓴ‐ꓢ ꓠꓵꓻ ꓠꓲ, ꓙꓳˍ ꓟ꓾ ꓫꓱ, ꓤ ꓗꓴ ꓟ꓾ ꓝꓴꓲ ꓖꓼ ꓖꓶ ꓗꓴ. ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓒꓬꓱꓼ ꓠ, ꓟ ꓐꓱ ꓶ ꓥ ꓟꓲ ꓮ ꓘꓶ. ꓣꓳ ꓚꓵˍ ꓡꓳ꓿
ꓬꓰ‐ꓢꓴ ꓙꓲ‐ꓢꓴ ꓡꓰ ꓟ. ꓖꓶ ꓔ ꓟ ꓡꓰ ꓐꓰ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓮ ꓕꓯ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓘꓴ ꓟ ꓢꓯꓼ ꓔꓯ ꓠ ꓡꓳ ꓠ, ꓟ ꓢꓯꓼ ꓕꓵꓼ ꓡꓯ꓿ ꓮ ꓕꓯ ꓥ ꓟꓲ ꓪꓽ ꓘꓴ ꓦꓲꓻ ꓗꓪ ꓙꓰ ꓢꓲ ꓠꓬꓲ ꓟꓲ‐ꓢ ꓔꓲ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓬꓲ ꓧꓪ ꓖꓳꓽ ꓓꓱ ꓚꓵˍ ꓥ ꓟ ꓢꓲꓽ ꓫꓬ ꓖꓳ ꓓꓱ ꓔꓯ ꓘꓳ, ꓣꓴ ꓠ, ꓟ ꓢꓯꓼ ꓕꓵꓼ ꓡꓯ꓿ ꓖꓳ ꓕꓯ ꓢꓲ ꓠꓬꓲ ꓪꓴ‐ꓢ ꓣꓱ ꓛꓰ ꓗꓪ ꓐꓰ ꓪꓴ‐ꓢ ꓠꓲ, ꓡꓶ ꓔꓯ ꓞꓳ ꓫꓱ, ꓠ, ꓟ ꓢꓯꓼ ꓪ ꓪ ꓓꓴ ꓥ ꓡꓳ꓿
