Nꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓧꓪꓽ ꓖꓳ ꓓꓱꓽ ꓡꓰꓽ ꓟꓽ ꓞꓲ ꓣꓳ ꓠꓲ, ꓟ ꓔꓯ ꓥˍ ꓟꓲ ꓬꓲ ꓓꓻ ꓡꓰ ꓝꓲ ꓠꓲ, ꓫꓵˍ ꓡꓳ꓿ ꓖꓳ ꓟ ꓑꓶ. ꓓꓴ ꓔꓯ ꓬꓲ ꓔꓯ ꓙꓵꓻ ꓐꓰ ꓐꓯˍ ꓟ ꓟ. ꓟꓲꓽ ꓝꓲ. ꓗꓪ ꓐꓰ ꓣꓳ ꓠ ꓡꓳ. ꓓꓴ ꓥꓳ꓿ ꓟ. ꓟꓲꓽ ꓝꓲ. ꓠꓬ ꓟ‐ꓘꓳ 3ꓽ7‐12 ꓗꓪ ꓟ ꓥꓳ꓿

ꓟ. ꓟꓲꓽ ꓝꓲ. ꓘꓴꓽ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓡ ꓞꓳ ꓮ ꓟꓬ, ꓜꓲꓼ ꓛꓲ ꓡˍ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓕꓳꓼ ꓠ ꓗꓷ ꓡꓰˍ ꓗꓪ ꓛꓲ ꓡ ꓞꓳ ꓟꓬꓽˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓠꓬꓲ ꓥ ꓡ ꓐꓯˍ ꓠꓬ꓾ ꓡ ꓞꓳ ꓮ ꓟꓬ, ꓠꓬ ꓠꓻ ꓫꓵꓽ ꓠꓻ ꓙꓰꓽ ꓠꓻ ꓔꓬ ꓠꓬꓲ꓾ ꓠꓲꓽ ꓜꓶꓽ ꓞ, ꓠꓬꓲ꓾ ꓬꓲ ꓫꓵꓽ ꓬꓲ ꓙꓰꓽ ꓗ, ꓔꓬ ꓟ ꓑꓶ. ꓓꓴ ꓫꓬ, ꓖꓶ ꓠ, ꓟ ꓕꓱ ꓡꓱ ꓐꓰ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓛꓲ ꓡ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓠꓬ ꓢꓲ ꓒ ꓬꓰ‐ꓢꓴ ꓚꓳ ꓡꓳ ꓡꓳ ꓗꓪ ꓢꓲ ꓒ ꓬꓰ‐ꓢꓴ ꓔꓯ ꓕꓳꓼ ꓠ ꓛꓲ ꓗꓷ ꓡꓰꓳ꓿

ꓢꓲ ꓒ ꓬꓰ‐ꓢꓴ ꓠꓬ ꓡ ꓞꓳ ꓮ ꓟꓬ, ꓔꓯ ꓠꓻ ꓫꓬ, ꓖꓶˍ ꓡꓳ꓿ ꓠꓲꓽ ꓔꓯ ꓥˍ ꓟꓲ ꓬꓲ ꓖꓼ ꓓꓳ ꓗꓷˍ ꓡꓳ꓿ ꓙꓳˍ ꓟ ꓮ ꓙꓵꓽ ꓔꓯ ꓥˍ ꓟꓲ ꓬꓲ ꓓꓻ ꓡꓰ ꓝꓲˍ ꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓖꓳ ꓕꓲ ꓑ, ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯˍ ꓡꓳ꓿ “ꓠꓴ ꓪ ꓡꓲꓺ ꓔꓯ ꓙꓽ ꓖꓶ ꓔ꓿ ꓮ ꓡꓲꓳ ꓐꓯˍ ꓠꓬ ꓕꓱ ꓗꓪ ꓡ ꓞꓳ ꓮ ꓟꓬ, ꓙꓳˍ ꓡꓳ꓿ ꓣꓳ ꓔꓯ ꓕꓳꓼ ꓠ ꓛꓲ ꓗꓷ ꓡꓰꓳ꓿ ꓕꓱ ꓟ ꓑꓶ. ꓓꓴ ꓣꓳ ꓠꓱ. ꓐꓯ ꓕꓲ ꓖ ꓗꓪ ꓙꓰ ꓢꓲ ꓠꓬꓲ ꓠꓻ ꓫꓬ, ꓖꓶ ꓙꓰ ꓡꓯ”꓾ ꓐꓰ ꓐꓯˍ ꓡꓳ꓿

ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓡ ꓞꓳ ꓬꓲ ꓜꓴ ꓬꓲ ꓟꓯꓼ ꓔꓯ ꓠꓻ ꓫꓬ, ꓖꓶ ꓠꓲ, ꓫꓵˍ ꓟ ꓠꓲ, ꓟ ꓟꓽ ꓙꓳ ꓠꓬꓲ ꓟꓽ ꓥ꓿ ꓬꓲ ꓠꓬ ꓧꓪꓽ ꓖꓳ ꓓꓱꓽ ꓠꓻ ꓫꓬ, ꓖꓶˍ ꓟ ꓕꓯꓽ ꓢꓲ ꓢꓲ ꓒ ꓬꓰ‐ꓢꓴ ꓠꓬ ꓡ ꓞꓳ ꓠꓲ, ꓟ ꓔꓯ ꓫꓬ, ꓠꓲ, ꓫꓵˍ ꓟ ꓥꓳ꓿ ꓫꓬ, ꓓꓻ ꓡꓰ ꓝꓲ ꓠꓲ, ꓫꓵˍ ꓟ ꓥꓳ꓿ ꓕꓱ ꓟ ꓑꓶ. ꓓꓴ ꓞꓳ ꓤ ꓠꓲ, ꓟ ꓔꓯ ꓢꓲ ꓒ ꓬꓰ‐ꓢꓴ ꓫꓬ, ꓖꓶ ꓐ ꓡ ꓠ, ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓙꓵꓻ ꓠ, ꓟ ꓥꓳ꓿

ꓧꓪꓽ ꓖꓳ ꓓꓱꓽ ꓐꓱ ꓶˍ ꓡꓰꓽ ꓡ ꓞꓳ ꓠꓬ ꓥꓳ ꓡꓳ. ꓔꓬ ꓡꓳ꓿ ꓖꓳ ꓡꓱ ꓐꓯ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓬ ꓠꓲ, ꓟ ꓐꓱ ꓶ ꓦꓻ ꓶꓼ ꓟꓬ ꓐꓱ ꓶ ꓥˍ ꓟꓲ ꓓꓻ ꓡꓰ ꓠ, ꓟ꓾ ꓬꓲ ꓔꓯ ꓙꓵꓻ ꓠ, ꓟ ꓬꓲ ꓥꓳ ꓡꓳ. ꓔꓬ ꓟ ꓥꓳ꓿ ꓕꓱ ꓟ ꓑꓶ. ꓓꓴ ꓬꓲ ꓠꓬ ꓡ ꓞꓳ ꓮ ꓟꓬ, ꓔꓯ ꓫꓬ, ꓗꓷ ꓗ ꓠꓯ. ꓤꓰꓻ ꓞ, ꓟ ꓔꓯ ꓠꓬ ꓗꓷ ꓔꓲ. ꓢꓲ ꓬꓲ ꓠꓬ ꓝꓮꓲ ꓕꓲ ꓖ ꓗꓪ ꓙꓰˍ ꓡꓳ꓿ ꓕꓱ ꓡꓱ ꓗꓷ ꓔꓲ. ꓬꓰˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓠꓲ, ꓟ ꓗꓪ ꓐꓰ ꓙꓵꓻ ꓠꓲ, ꓗꓪ ꓐꓰ ꓙꓵꓻ ꓢꓲ ꓠꓬꓲ ꓚꓲ. ꓛꓬ ꓦ ꓔꓯ ꓓꓻ ꓡꓰ ꓠ, ꓟ ꓧꓪꓽ ꓓꓳ ꓓꓱꓽ ꓓꓻ ꓡꓰ ꓠ, ꓟ ꓥꓳ꓿ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓔꓬ ꓗꓪ ꓣꓳ ꓧꓪꓽ ꓖꓳ ꓓꓱꓽ ꓓꓻ ꓡꓰ ꓓꓴ ꓐꓱ ꓶˍ ꓡꓰꓽ ꓓꓰꓽ ꓔꓬ ꓡ꓿ ꓕꓱ ꓡꓱ ꓟꓽ ꓥ꓿ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓕꓱ ꓟ ꓕꓯꓽ ꓢꓲ ꓠꓯ.ˍ ꓟ ꓣꓳ ꓠꓲ, ꓟ ꓗꓪ ꓠꓻ ꓓꓴ ꓮ ꓙꓵꓽ ꓓꓻ ꓡꓰ ꓠ, ꓟ꓾ ꓧꓪꓽ ꓖꓳ ꓓꓱꓽ ꓡꓰꓽ ꓟꓽ ꓞꓲ ꓠꓲ, ꓟ ꓗꓪ ꓓꓻ ꓡꓰ ꓠ, ꓟ꓾ ꓣꓳ ꓦꓻ ꓶꓼ ꓟꓬ ꓗꓪ ꓠꓻ ꓓꓴ ꓓꓴ ꓓ, ꓟ ꓮ ꓙꓵꓽ ꓢꓲ ꓒ ꓬꓰ‐ꓢꓴ ꓡꓰ ꓫꓬ, ꓖꓶ ꓠ, ꓟ ꓐꓱ ꓶ ꓣꓳ ꓠꓬ ꓬꓲ ꓔꓯ ꓙꓵꓻ ꓢꓲ ꓠꓬꓲ ꓘꓴꓻ ꓓꓰꓽ ꓠ, ꓟ ꓢꓲ ꓒ ꓬꓰ‐ꓢꓴ ꓣꓳ ꓔꓯ ꓠꓬꓲ. ꓠꓬꓲ ꓐꓯ ꓟ. ꓖꓶ ꓡ ꓔꓬ ꓡꓳ꓿