ꓟ‐ꓘꓳ 3ꓽ1‐6 ꓬꓰ‐ꓢꓴ ꓡꓰ ꓠꓽ ꓦꓬꓼ ꓠꓬꓲ ꓗꓪ ꓠꓻ ꓫꓬ, ꓖꓶ_ ꓟ
ꓡꓯ ꓒꓯ, ꓕꓲ ꓐ ꓙꓴ ꓡꓰ ꓟ ꓡ ꓞꓳ ꓕꓲ ꓣꓳ ꓔꓯ ꓠꓽ ꓦꓬꓼ ꓠꓬꓲ ꓕꓯ ꓠꓻ ꓫꓬ, ꓖꓶ_ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓠꓽ ꓦꓬꓼ ꓠꓬꓲ ꓟ ꓢꓲ ꓒꓽ ꓥ ꓟ ꓔꓯ ꓟ. ꓖꓶ_ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓔꓯ ꓝꓴꓲ ꓓꓰ ꓠ, ꓟ ꓠꓬꓲ. ꓠ. ꓔꓬ ꓢꓴ ꓐꓴ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓠꓽ ꓦꓬꓼ ꓠꓬꓲ ꓙꓵꓽ ꓗ ꓔꓯ ꓟꓽ ꓛꓳ_ ꓡꓳ꓾ ꓐꓰ ꓓꓵꓽ ꓙ ꓔ ꓡꓳ꓿
ꓙꓵꓽ ꓗ ꓔꓯ ꓗꓼ ꓛꓳ ꓠ, ꓟ ꓡꓰ ꓓꓵꓽ ꓙ ꓫ. ꓔꓬ ꓟ ꓑꓶ ꓓꓴ ꓒ‐ꓡꓲ‐ꓢꓷ ꓐꓴ ꓠꓬ ꓠꓻ ꓔꓬ ꓟ ꓖꓳ ꓕꓲ ꓣꓳ ꓔꓯ ꓠꓽ ꓦꓬꓼ ꓠꓬꓲ ꓕꓯ ꓟ. ꓖꓶ ꓔ ꓟ ꓢꓲ ꓒꓽ ꓬꓲ ꓫꓱ. ꓤ ꓠꓲ, ꓐꓰ ꓣꓱ ꓛꓰ ꓔꓯ ꓬꓲ ꓪ ꓟꓽ ꓟꓳ꓾ ꓙꓵꓻ ꓠꓲ, ꓦ ꓡꓱ ꓡꓳ ꓐꓯ ꓟ ꓔꓯ ꓡꓰ ꓐꓯ ꓢꓲ ꓒ‐ꓡꓲ‐ꓢꓷ ꓐꓴ ꓠꓬ ꓪꓴ‐ꓢ ꓚꓱ, ꓔꓯ ꓥ ꓠꓬ ꓞꓳ ꓤ ꓫ. ꓙꓵ ꓔꓬ ꓟ ꓔꓯ ꓟꓽ ꓓꓵꓽ ꓙ ꓠꓲ, ꓟ ꓗꓪ ꓟꓽ ꓗꓶ ꓗꓶ ꓔꓬ ꓡꓳ꓿
ꓠꓽ ꓦꓬꓼ ꓠꓬꓲ ꓔꓯ ꓢꓷ. ꓟ ꓡꓰ ꓟꓽ ꓞꓲ ꓔꓱ ꓔꓱ, ꓐꓰ ꓢꓷ._ ꓟ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓪ ꓔꓯ ꓠꓽ ꓦꓬꓼ ꓠꓬꓲ ꓔꓯ ꓢꓷ. ꓠ, ꓟ ꓟ. ꓖꓶ ꓗꓷ ꓟ ꓥꓳ꓿ ꓢꓲ ꓒ ꓬꓰ‐ꓢꓴ ꓬꓲ. ꓟ. ꓖꓶ_ ꓟ ꓑꓶ ꓓꓴ ꓣꓳ ꓥ ꓟꓲ ꓠꓽ ꓦꓬꓼ ꓠꓬꓲ ꓔꓯ ꓮ ꓡꓰ ꓐꓰ ꓛꓳ ꓠ, ꓟ ꓔꓯ ꓢꓷ. ꓡꓰ ꓟ ꓥꓳ꓿ ꓖꓳ ꓟ ꓑꓶ ꓓꓴ ꓪꓴ‐ꓢ ꓔꓯ ꓙꓵꓻ_ ꓟ ꓡꓰ ꓐꓰ ꓢꓲ ꓒꓽ ꓬꓲ ꓫꓱ. ꓤ ꓠꓵꓻ ꓠꓲ, ꓣꓱ ꓬꓯꓼ ꓔꓬ ꓢꓴ ꓐꓴ ꓔꓯ ꓬꓰ ꓙ ꓠ, ꓟ ꓢꓲ ꓒ ꓬꓰ‐ꓢꓴ ꓡꓰ ꓟ. ꓖꓶ_ ꓟ ꓔꓯ ꓓꓵꓽ ꓙ ꓓꓴ ꓬꓰ ꓡꓯ꓿
