ꓟꓬ ꓔꓳ,ˍ ꓟ꓾ ꓛꓴꓽ ꓙꓳˍ ꓟ ꓠꓬ ꓔꓱ, ꓚꓵˍ ꓟ ꓔꓯ ꓟꓳꓻ ꓟꓽ ꓐ ꓡ ꓠ ꓛꓲ ꓣꓳ ꓔꓯ ꓟꓬ ꓛꓱꓼ ꓗꓷ ꓡꓰ ꓝꓲˍ ꓟˍ ꓡꓰ ꓐꓰ ꓙꓽ ꓜꓲꓼ ꓠꓲ,꓾ ꓙ ꓗꓳ ꓠꓲ, ꓐꓴ ꓔꓯ ꓥˍ ꓟꓲ ꓒꓲꓼ ꓡꓰ ꓝꓲ ꓐ ꓡˍ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ ꓟ‐ꓘꓳ 2ꓽ23‐28 ꓗꓪ꓾ ꓠꓽ ꓦꓬꓼ ꓠꓬꓲ ꓗꓪ ꓬꓰ‐ꓢꓴ ꓠꓬ ꓫꓪ ꓟꓲ ꓗꓪ ꓗꓳ. ꓙꓰˍ ꓕꓯ ꓬꓲ ꓛꓳꓽ ꓒꓯ, ꓐꓴ ꓠꓬ ꓕꓱ ꓡꓱ ꓙꓰ ꓕꓱ ꓡꓱ ꓫꓪ ꓠꓱ ꓞꓷ, ꓜꓽˍ ꓡꓳ꓿ ꓖꓳ ꓟ ꓔꓯ ꓒ‐ꓡꓲ‐ꓢꓷ ꓐꓴ ꓟꓳꓻˍ ꓕꓯ ꓬꓲ ꓪ ꓡꓰ ꓬꓰ‐ꓢꓴ ꓠꓴ ꓛꓳꓽ ꓒꓯ, ꓐꓴ ꓠꓬ ꓮ ꓫꓵꓽ ꓪꓴ. ꓠꓬꓲ ꓠꓽ ꓦꓬꓼ ꓠꓬꓲ ꓗꓪ ꓬꓰ ꓟꓽ ꓓꓻ ꓡꓳ ꓫꓵꓽ ꓔꓯ ꓬꓰˍ ꓡ? ꓐꓯˍ ꓡꓳ꓿ ꓬꓰ‐ꓢꓴ ꓡꓰ ꓬꓲ ꓪ ꓔꓯ ꓒꓳ, ꓖꓶ ꓢꓲ ꓠꓽ ꓦꓬꓼ ꓠꓬꓲ ꓠꓽ ꓞꓳ ꓤ ꓐꓱ ꓶ ꓬꓰ ꓔ ꓟ ꓥ ꓡꓳ꓿ ꓞꓳ ꓤ ꓠꓬ ꓠꓽ ꓦꓬꓼ ꓠꓬꓲ ꓐꓱ ꓶ ꓚꓰꓼ ꓔ ꓟ ꓟꓽ ꓥ꓿ ꓖꓳ ꓡꓱ ꓠꓬꓲ ꓡ‐ꓞꓳ‐ꓮ‐ꓐꓲ ꓠꓽ ꓠꓽ ꓦꓬꓼ ꓠꓬꓲ ꓢꓲ ꓒꓽˍ ꓟꓲ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓙꓲ‐ꓢꓴ ꓠꓬ ꓮ ꓟꓬ, ꓐꓱ ꓶ ꓬꓲ ꓞꓳ ꓙꓳ ꓗꓷꓳ꓾ ꓮ ꓟꓬ, ꓐꓱ ꓶ ꓟꓬꓱꓽ ꓬꓰ ꓗꓷꓳ꓿ ꓠꓱ. ꓐꓯ ꓢꓴ ꓡꓰ ꓬꓲ ꓔꓯ ꓝꓴꓲ. ꓓꓰ ꓡˍ ꓟ ꓔꓯ ꓬꓲ ꓟꓽ ꓚꓳ ꓛꓵꓽ ꓛꓵꓽ ꓐꓰ ꓬꓲ ꓬꓰ ꓙꓲꓽ ꓙꓳˍ ꓟ ꓔꓯ ꓬꓰ ꓢꓲ ꓞꓳ ꓙꓳ ꓗꓷꓳ꓿ ꓟꓽ ꓙꓲꓻ ꓟ ꓔꓯ ꓬꓲ ꓟꓽ ꓪꓳ, ꓟꓽ ꓡꓳ. ꓔꓬ꓿ ꓬꓲ ꓐ ꓡˍ ꓟ ꓡꓰ ꓛꓲ ꓬꓰˍ ꓡꓳ꓿ ꓠꓱ. ꓐꓯ ꓢꓴ ꓐꓱ ꓶ ꓬꓲ ꓢꓯꓼ ꓔꓯ ꓣꓱꓽ ꓗꓷꓳ꓿ ꓠꓱ. ꓐꓯ ꓢꓴ ꓐꓱ ꓶ ꓐꓯ ꓙꓻ ꓗꓷꓳ꓿ ꓙꓲ‐ꓢꓴ ꓠꓬ ꓟ. ꓟꓲꓽ ꓚˍ ꓕꓯ ꓥˍ ꓟꓲ ꓙꓵꓽ ꓪ ꓙꓳ ꓙꓳ ꓡꓰꓽ ꓔꓼ ꓝꓲ ꓙꓳ ꓙꓳ ꓡꓰꓽ ꓔꓱ, ꓔꓱ, ꓚꓵ ꓚꓵ ꓡꓰꓽ ꓚˍ ꓟ ꓑꓶ. ꓓꓴ ꓬꓲ ꓗ ꓠꓯ. ꓛꓳ ꓢꓴ ꓮ ꓟꓬ, ꓙꓳˍ ꓡꓳ꓿ ꓖꓳ ꓟ ꓘꓴꓽ ꓠꓯꓸꓼ ꓗꓪ ꓒ‐ꓡꓲ‐ꓢꓷ ꓐꓴ ꓙꓵꓽ ꓗ ꓟ. ꓒ ꓐꓴ ꓬꓲ ꓪ ꓬꓲ ꓛꓳ ꓢꓴ ꓐꓴˍ ꓟꓲ ꓐˍ ꓥꓳ꓿
ꓙꓲ‐ꓢꓴ ꓠꓬ ꓕꓱ ꓡꓱ ꓬꓲ ꓒꓵꓽ ꓙꓳˍ ꓟ ꓔꓯ ꓡꓰꓽ ꓬꓰ ꓔꓬ ꓕꓯ ꓒ‐ꓡꓲ‐ꓢꓷ ꓐꓴ ꓠꓬ ꓙꓲ‐ꓢꓴ ꓔꓯ ꓛꓴꓽ ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓟꓳꓻ ꓡ ꓢꓲ ꓬꓰ‐ꓢꓴ ꓔꓯ ꓝꓴꓲ. ꓧꓪˍ ꓡꓳ꓿ ꓬꓲ ꓪ ꓡꓰ ꓬꓰ‐ꓢꓴ ꓟꓬ ꓔꓳ,ˍ ꓟ꓾ ꓦꓯ. ꓠꓲ, ꓙꓵꓽˍ ꓟ꓾ ꓠꓲ, ꓐꓴˍ ꓟ ꓠꓬ ꓔꓱ, ꓚꓵˍ ꓟ ꓙꓲˍ ꓟ ꓔꓯ ꓟꓳꓻ ꓟꓽ ꓘꓴ ꓠ ꓗꓪ ꓛꓲ ꓬꓲ ꓪ ꓔꓯ ꓟꓬ ꓛꓱꓼ ꓗꓷ ꓡꓰ ꓝꓲꓳ꓿
ꓚꓵ ꓚꓵ ꓐꓯ ꓪˍ ꓕꓯ ꓠꓽ ꓒ‐ꓡꓲ‐ꓢꓷ ꓐꓴ ꓙꓵꓽ ꓗ ꓟ. ꓒ ꓐꓴ ꓥˍ ꓟꓲ ꓙꓲ‐ꓢꓴ ꓡꓰ ꓟ. ꓖꓶ ꓡˍ ꓟ ꓔꓯ ꓘꓳ ꓣꓴ ꓢꓲ ꓙꓲˍ ꓟ ꓓꓳꓽ ꓔꓯ ꓐꓯ ꓑꓶ ꓙꓰˍ ꓟ ꓝꓲ ꓓꓴ ꓐꓴ ꓒꓬꓱꓼ ꓡ ꓓˍ ꓥˍ ꓟꓲ ꓬꓲ ꓡꓰ ꓙꓲ‐ꓢꓴ ꓔꓯ ꓟꓬ ꓔꓳ,ˍ ꓟ ꓑꓶ. ꓓꓴ ꓬꓲ ꓪ ꓠꓬ ꓢꓲ ꓒ ꓬꓲ ꓝꓲ ꓓꓴ ꓒꓬꓱꓼ ꓪˍ ꓟ ꓙꓵꓽ ꓪ ꓔꓯ ꓡꓲ, ꓗꓷꓳ꓿ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓠꓬ ꓠꓱ. ꓐꓯ ꓢꓴ ꓧꓪ. ꓡꓰˍ ꓟ ꓔꓯ ꓟꓬ ꓔꓳ,ˍ ꓟ ꓦꓯ. ꓠꓲ, ꓙꓵꓽˍ ꓟ ꓟꓽ ꓬꓰ ꓬꓰ꓾ ꓠꓱ. ꓐꓯ ꓢꓴ ꓧꓪ. ꓡꓰˍ ꓟ ꓗꓪ ꓠꓲ, ꓘꓪꓽ ꓫꓵ ꓢꓲ ꓗ, ꓛꓲꓽ ꓗꓴ.ˍ ꓟ ꓠꓲ, ꓟ ꓫꓬ, ꓦꓵꓻ ꓓꓴ ꓬꓰ ꓡꓯ꓿
