ꓟ-ꓘꓳ= 2ꓽ18-22

ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓒ-ꓡꓲ-ꓢꓷ ꓐꓴ ꓠꓬ ꓜꓽ ꓓꓴ ꓚꓲꓸ ꓔꓬ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓡ ꓢꓲ꓾ ꓬꓳ-ꓦ ꓬꓲ ꓛꓳꓽ ꓒꓯꓹ ꓐꓴˍ ꓐꓰ ꓒ-ꓡꓲ-ꓢꓷ ꓛꓳꓽ ꓒꓯꓹ ꓐꓴ ꓠꓬ ꓜꓽ ꓓꓴ ꓚꓲꓸ ꓔꓬ ꓥ ꓟꓲ꓾ ꓠꓴ ꓛꓳꓽ ꓒꓯꓹ ꓐꓴ ꓠꓽ ꓜꓽ ꓓꓴ ꓟꓽ ꓚꓲꓸ ꓔꓬ꓿ ꓕꓱ ꓟ ꓮꓸ ꓫꓵ ꓪꓴꓸ ꓠꓬꓲ ꓥ ꓡ?꓾ ꓐꓰ ꓠ ꓠꓬꓲˍ ꓡꓳ꓿

ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓪꓽ ꓔꓯ꓾ ꓤꓽ ꓟꓶ ꓝꓱꓺ ꓑꓮꓲꓽ ꓗꓪ ꓜꓲꓼ ꓞꓹ ꓟ ꓪꓰ ꓤ ꓐꓴ ꓠꓬ ꓜꓽ ꓓꓴ ꓚꓲꓸ ꓚꓰꓼˍ ꓡ? ꓟꓯꓸ ꓡꓯꓸ ꓒ ꓬꓲ ꓪꓽˍ ꓐꓰ ꓕꓲ ꓪꓺꓼ ꓔꓬ ꓕ ꓑꓳꓸ꓾ ꓬꓲ ꓪꓽ ꓠꓬ ꓜꓽ ꓓꓴ ꓟꓽ ꓚꓲꓸ꓿ ꓖꓳ ꓡꓱ ꓥ ꓟꓲ ꓟꓯꓸ ꓡꓯꓸ ꓒ ꓔꓯ ꓠꓬ꓾ ꓬꓲ ꓪꓽ ꓔꓯˍ ꓐꓰ ꓧꓳꓽ ꓔꓯꓹ ꓙꓰˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓿ ꓖꓳ ꓕꓲ ꓠꓬꓲ ꓗꓪ ꓠꓽ ꓬꓲ ꓪꓽ ꓜꓽ ꓓꓴ ꓚꓲꓸˍ ꓥꓳ꓿

ꓐꓵ ꓞꓶ ꓐꓰꓽ ꓗꓪ ꓟꓶ ꓛ ꓫꓵꓼ ꓡꓰ ꓑꓱꓺ ꓢꓴ ꓟꓽ ꓙꓳ꓿ ꓟꓽ ꓥ ꓠꓬ ꓑꓱ ꓔ ꓟ ꓟꓶ ꓛ ꓫꓵꓼ ꓡꓰ ꓐꓵ ꓞꓶ ꓐꓰꓽ ꓔꓯ ꓟꓬꓽ ꓠꓬꓲ ꓚꓵꓹ ꓧꓽ ꓡꓰˍ ꓥꓳ꓿ ꓝꓮꓲ ꓠꓬ ꓛꓱꓼ ꓡꓱꓼ ꓙꓵ ꓬꓲ ꓫꓵꓼˍ ꓟꓲ ꓧꓪꓽ ꓙꓲ ꓡꓵꓸ ꓐꓰꓽ ꓗꓪ ꓧꓳꓽ ꓢꓴ ꓟꓽ ꓙꓳ꓿ ꓟꓽ ꓥ ꓠꓬ ꓛꓱꓽ ꓡꓱꓼ ꓙꓵꓻ ꓫꓵꓼ ꓡꓰ ꓧꓪꓽ ꓙꓲ ꓡꓵꓸ ꓔꓯ ꓐꓶꓽ ꓡꓰ ꓝꓲ ꓢꓲ꓾ ꓛꓱꓽ ꓡꓱꓼ ꓙꓵꓻˍ ꓟꓲ ꓧꓳꓸ ꓡꓰ꓾ ꓧꓪꓽ ꓙꓲ ꓡꓵꓸˍ ꓟꓲ ꓐꓶꓽ ꓡꓰˍ ꓥꓳ꓿ ꓛꓱꓽ ꓡꓱꓼ ꓙꓵꓻ ꓫꓵꓼ ꓠꓽ ꓧꓪ ꓙꓲ ꓡꓵꓸ ꓫꓵꓼ ꓗꓪ ꓧꓳꓽ ꓓꓴ ꓥ ꓡꓳ꓾ ꓐꓯˍ ꓡꓳ꓿

———————————-

ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓜꓽ ꓓꓴ ꓚꓲ.ˍ ꓟ ꓚꓱ, ꓠꓬ ꓚꓲ. ꓔꓬ ꓢꓴ ꓐꓱ ꓶ ꓖꓳ ꓓꓱꓽ ꓐꓰ ꓦ ꓐꓱ ꓶ ꓙꓲꓻ ꓖꓴ ꓙꓳˍ ꓡꓳ꓿ ꓙꓲꓻˍ ꓟ ꓚꓱ, ꓥ ꓡꓳ ꓐꓯˍ ꓥ ꓟꓲ ꓞꓳ ꓤ ꓖꓳ ꓓꓱꓽ ꓔꓯ ꓛꓳ ꓢꓲ ꓥˍ ꓟꓲ꓾ ꓬꓲ ꓙꓵ, ꓐꓰ ꓬꓲ ꓦꓬꓼ ꓠꓬꓲ ꓔꓯ ꓛꓳ ꓢꓲ ꓥˍ ꓟꓲ꓾ ꓬꓲ ꓖ ꓔꓯ ꓛꓳ ꓢꓲ ꓥˍ ꓟꓲ ꓬꓰ ꓠ ꓔˍ ꓟ ꓐꓰ ꓬꓰ ꓟꓽ ꓛꓵ ꓟ ꓕꓱ ꓡꓱ ꓙꓳˍ ꓟ ꓥ ꓡꓳ꓿ ꓣꓳ ꓚꓲ.ˍ ꓟ ꓡꓰ ꓠꓱ. ꓐꓯ ꓢꓴ ꓜꓽ ꓓꓴ ꓟꓽ ꓚꓲ. ꓟ ꓑꓶ. ꓓꓴ ꓠꓲ, ꓟ ꓦꓶ ꓟꓽ ꓛꓵ꓿

ꓚꓲ. ꓛꓬ ꓚꓲ. ꓐ ꓡˍ ꓠꓬ ꓪꓴ‐ꓢ ꓔꓯ ꓫꓱ. ꓖꓶ꓿ ꓠꓱ. ꓐꓯ ꓢꓴ ꓜꓽ ꓓꓴ ꓟꓽ ꓚꓲ. ꓟ ꓔꓯ ꓟꓳˍ ꓕꓯ ꓝꓴꓲ. ꓐꓯ ꓠꓲ, ꓫꓵˍ ꓟ ꓠꓲ, ꓟ ꓔꓯ ꓤ ꓟꓳ ꓗꓷ ꓡꓯ꓿ ꓬꓰ‐ꓢꓴ ꓙꓲ‐ꓢꓴ ꓬꓲ ꓚꓲ. ꓛꓬ ꓡꓰ ꓖꓽ ꓖꓶ ꓐ ꓡˍ ꓕꓯ ꓠꓽ ꓟꓽ ꓐꓲ ꓜꓲꓼ ꓟ ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓽ ꓕꓲ ꓣꓳ ꓛꓳꓽ ꓕꓲ ꓣꓳ ꓟꓬꓽ ꓠꓬꓲ ꓖꓽ ꓖꓶ ꓡꓯ ꓘꓳ ꓠ, ꓟ ꓥ ꓡꓳ꓿

ꓬꓲ ꓐꓰꓽ ꓔꓯ ꓣꓴ ꓦ ꓗꓷ ꓐ ꓡˍ ꓕꓯ ꓡꓰꓽ ꓙꓲꓻˍ ꓟ ꓬꓲ ꓫꓵꓼ ꓐꓰ ꓐꓲ ꓞ, ꓟ ꓠꓬꓲ ꓫꓵꓼ ꓔꓯ ꓟꓶˍ ꓥꓳ ꓐꓯˍ ꓟ ꓔꓯ ꓠꓲ, ꓟ ꓗꓪ ꓗꓶ ꓔ ꓢꓲ ꓠꓲ, ꓟ ꓫꓵꓼ ꓡ ꓞꓳ ꓫꓵꓼ ꓤꓶꓻ ꓗꓪ ꓞꓳ ꓙꓳˍ ꓟ ꓔꓯ ꓗꓽ ꓔ. ꓓꓴ ꓗꓷ ꓡꓰ ꓝꓲˍ ꓟ ꓟꓽ ꓙꓲꓻ ꓟ ꓬꓲ ꓐꓰꓽ ꓝꓴꓲ. ꓐꓴ ꓔꓯ ꓡꓳ ꓩꓴ ꓗꓷ ꓠ ꓗ, ꓟ ꓥ ꓡꓳ꓿