ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓴꓬꓲ ꓮ ꓣꓳ ꓤ ꓥ ꓟ (Sunday reflection )
ꓧꓪ. ꓧꓪ ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ 2 ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓬꓳ‐ꓦ ꓕꓳ ꓶ 1ꓽ29‐34 ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓮ‐ꓐꓲ ꓥ ꓟ ꓐꓰ ꓪꓴ‐ꓢ ꓬꓲ ꓮ ꓣꓳ ꓤ ꓥ ꓟ ꓚꓱ, ꓔꓯ ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓡꓰ ꓟ. ꓖꓶ ꓔ ꓟ ꓥ ꓡꓳ꓿ ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓡꓰ ꓠꓬꓲ ꓠ ꓪꓴ‐ꓢ ꓬꓲ ꓮ ꓣꓳ ꓤ ꓟꓲ ꓠꓯ ꓗꓪ ꓟ ꓝꓴꓲ ꓣꓴ ꓦ ꓢꓴ ꓥ ꓡꓳ ꓐꓰ ꓐꓯ ꓔ ꓡꓳ꓿
ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓮ ꓐꓲ ꓥ ꓟ ꓔꓯ ꓟ. ꓖꓶ ꓟ ꓥꓡꓳ꓿ ꓬꓲ ꓕꓯ ꓢꓲ ꓪꓴꓽ ꓟ ꓐꓰ ꓬꓲ ꓠꓬ ꓢꓲꓺ ꓒ ꓚꓱ, ꓔꓯ ꓮ ꓘꓶ. ꓛꓲ ꓢꓯꓼ ꓕꓵꓼ ꓢꓲ ꓠꓬꓲ ꓚꓺ ꓢꓴ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓬꓲ ꓮ ꓣꓳ ꓤ ꓥ ꓟ ꓚꓱ, ꓔꓯ ꓢꓲꓽ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓡꓳ꓿ ꓮ ꓣꓳ ꓤ ꓬꓲ ꓟ. ꓟꓲꓽ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓮ ꓙꓵꓽ ꓔꓯ ꓤ ꓪꓴꓽ ꓐꓴ ꓫꓵꓻ ꓟ ꓗꓪ ꓐꓰ ꓚꓬꓴ ꓗꓷ ꓟ ꓥ ꓡꓳ꓿ ꓝꓮꓲ ꓪꓴ‐ꓢ ꓔꓲ ꓓꓴ ꓗꓪ ꓮ ꓣꓳ ꓤ ꓔꓯ ꓔꓲ, ꓟ ꓥ ꓡꓳ꓿ ꓮ ꓣꓳ ꓤ ꓠꓬ ꓝꓴꓲ ꓟꓽ ꓙꓳ ꓬꓲ ꓠꓬ ꓮ ꓘꓶ. ꓛꓲ ꓢꓲꓽ ꓫꓬ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓮ ꓣꓳ ꓤ ꓔꓯꓺ ꓥꓳꓽ ꓠꓬ ꓠꓵꓻꓠꓲ, ꓔꓯ ꓔꓯ ꓔ ꓟ ꓥ ꓡꓳ꓿
ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓖꓳ ꓓꓱ ꓔꓲ, ꓒ ꓬꓳ‐ꓦ ꓡꓰ ꓮ ꓣꓳ ꓤ ꓐꓰ ꓘꓴ ꓟ ꓠꓬ ꓝꓴꓲ ꓙꓳ ꓟ ꓟꓲ ꓠꓯ ꓡ ꓞꓳ ꓐꓱ ꓶ ꓬꓰ‐ꓢꓴ ꓙꓲ‐ꓢꓴ ꓠꓬ ꓬꓲ ꓢꓯꓼ ꓟꓬ, ꓖꓶ ꓗꓷ ꓢꓴ ꓥ ꓟ ꓚꓱ, ꓔꓯ ꓠꓬꓲ. ꓠꓬꓲ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓡ ꓞꓳ ꓝꓴꓲ ꓙꓳ ꓢꓴ ꓮ ꓙꓵꓽ ꓔꓯ ꓚꓬꓴ ꓠ, ꓟ ꓬꓲ ꓢꓯꓼ ꓟꓬ ꓔꓯ ꓖꓶ ꓗꓷ ꓢꓴ ꓥ ꓡꓳ꓿ ꓕꓱ ꓡꓱ ꓐꓰ ꓟꓲ ꓠꓯ ꓡ ꓞꓳ ꓮ ꓙꓵꓽ ꓚꓬꓴ ꓟꓶ ꓟ ꓣꓱ ꓛꓰ ꓟꓶ ꓡꓰ ꓟ ꓥ ꓡꓳ꓿ ꓖꓳ ꓡꓱ ꓥ ꓪꓴ. ꓠꓬꓲ ꓟꓲ‐ꓢ ꓔꓲ, ꓙꓵ, ꓗꓪ ꓔꓲꓺ ꓒ ꓐꓴ ꓡꓰ ꓠꓬꓲ ꓠ ꓪꓴ‐ꓢ ꓮ ꓣꓳ ꓤ ꓔꓯ ꓪꓽ ꓘꓴ ꓟ ꓥ ꓡꓳ꓿ ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓠꓬ ꓪꓴ‐ꓢ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓢꓷ. ꓢꓴ ꓥ ꓡꓳ꓿
ꓝꓮꓲ ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓐꓰ ꓬꓰ‐ꓢꓴ ꓠꓬ ꓫꓵꓽ ꓤ ꓪꓳꓽ ꓤ ꓥ ꓟꓲ ꓪꓴ‐ꓢ ꓮ ꓐꓲ ꓥ ꓟ ꓚꓱ, ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓢꓲ ꓡꓲ ꓓꓴ ꓟ. ꓖꓶ ꓟ ꓙꓵ, ꓕꓯ ꓢꓲ ꓠꓬꓲ ꓢꓷ. ꓡꓰ ꓟ ꓥ ꓡꓳ꓿ ꓣꓳ ꓦꓻ ꓡꓱ ꓟ ꓙꓵꓻ ꓠꓲ, ꓠꓬ ꓪꓴ‐ꓢ ꓡꓰ ꓖꓶ ꓔ ꓟ ꓡꓯ ꓫꓴꓻ ꓥ ꓡꓳ꓿ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓡꓰ ꓣꓳ ꓟꓬꓽ ꓢꓶꓽ ꓔꓯ ꓒꓴ ꓡ ꓟ ꓪꓴ. ꓠꓬꓲ ꓠꓴ ꓥꓪ ꓠꓬ ꓬꓰ‐ꓢꓴ ꓙꓲ‐ꓢꓴ ꓚꓱ, ꓔꓯ ꓢꓷ. ꓡꓰ ꓟ ꓥ ꓡꓳ꓿ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓮ ꓖꓴ ꓡꓰ ꓐꓰ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓯ, ꓗꓪ ꓬꓯꓼ ꓡ ꓟ ꓔꓯ ꓖꓳ ꓓꓱ ꓔꓲ, ꓒ ꓬꓳ‐ꓦ ꓟꓳ. ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓬꓰ‐ꓢꓴ ꓠꓬ ꓟꓰ ꓛꓶꓽ ꓟꓰ ꓔ ꓢꓴ ꓥ ꓟ ꓐꓰ ꓪꓴ‐ꓢ ꓡꓰ ꓝꓲ. ꓔ ꓟ ꓬꓲ ꓮ‐ꓐꓲ ꓥ ꓟ ꓔꓯ ꓣꓳ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓬꓳ‐ꓦ ꓠꓬ ꓮ‐ꓐꓲ ꓚꓬꓴ ꓢꓲꓺ ꓒ ꓔꓯ ꓟꓳ. ꓡꓰꓳ ꓝꓮꓲ ꓢꓷ. ꓡꓰ ꓐꓰ ꓬꓲ ꓠꓬ ꓑꓶ. ꓑꓶ. ꓐꓰ ꓟ. ꓟꓲꓽ ꓚꓺ ꓢꓴ ꓥ ꓡꓳ꓿
ꓝꓮꓲ ꓬꓲ ꓠꓬ ꓦ꓿ꓠꓱ. ꓐꓯꓼ ꓢꓴ ꓔꓯ ꓥ ꓟꓲ ꓢꓲꓺꓒ ꓬꓰ‐ꓢꓴ ꓠꓯ, ꓗꓪ ꓙꓰ ꓠ, ꓟ ꓟ. ꓖꓶ ꓢꓴ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓖꓳ ꓓꓱ ꓔꓲ, ꓒꓽ ꓬꓳ‐ꓦ ꓡꓰ ꓐꓰ ꓣꓳ ꓔꓬ ꓟ ꓦꓲꓻ ꓘꓴꓽ ꓞꓳ ꓘ,꓾ ꓜꓴ꓾ ꓣꓳ ꓫ. ꓕꓱ ꓚꓱ, ꓬꓰ ꓟ ꓟꓬꓱꓽ ꓮ ꓙꓵꓽ ꓗꓪ ꓐꓰ ꓢꓲꓺ ꓒ ꓬꓰ‐ꓢꓴ ꓔꓯ ꓟ. ꓖꓶ ꓢꓴ ꓒꓬꓱꓼ ꓠ, ꓟ ꓘꓴ ꓔꓬ ꓟ ꓥ ꓡꓳ꓿ ꓢꓲꓺꓒ ꓬꓰ‐ꓢꓴ ꓠꓬ ꓝꓴꓲ ꓙꓳ ꓢꓴ ꓔꓯ ꓠꓲ, ꓠꓵ ꓢꓴ ꓥ ꓡꓳ꓿ ꓬꓲ ꓠꓬ ꓟꓲ ꓠꓯ ꓡ ꓞꓳ ꓡꓰ ꓡꓳ ꓗꓷ ꓥ ꓟꓲ ꓬꓲ ꓠꓯ ꓣꓳ ꓔꓯ ꓠꓲ, ꓠꓵ ꓢꓴ ꓥ ꓡꓳ꓿
ꓬꓲ ꓝꓴꓲ ꓮ ꓘꓶ. ꓙꓳ ꓥ ꓟꓲ ꓢꓲꓺ ꓒ ꓠꓯ, ꓗꓪ ꓡ ꓠ, ꓟ ꓢꓲꓺ ꓒ ꓠꓬ ꓣꓳ ꓔꓯ ꓘꓴ ꓔꓬ ꓟ ꓥ ꓡꓳ꓿ ꓣꓳ ꓬꓰ ꓗꓷ ꓟ ꓝꓴꓲ꓾ ꓫ. ꓔꓳ ꓓꓴ ꓚꓱ, ꓾ ꓠꓲ, ꓫ. ꓟꓬꓽ ꓫ. ꓓꓴ꓾ ꓠꓲ, ꓟ ꓐꓬ ꓡꓰ ꓚꓱ, ꓮ ꓙꓵꓽ ꓔꓯ ꓛ ꓗꓷ ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓙꓰ ꓠ ꓟ ꓠꓬꓲ. ꓠꓬꓲ ꓘꓴ ꓔꓬ ꓡꓳ꓿ ꓠꓬꓲ. ꓠꓬꓲ ꓗꓪ ꓐꓰ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓔꓯ ꓣꓳ ꓠꓲ, ꓟ ꓗꓪ ꓘꓳ, ꓣꓴ ꓠ, ꓟ꓾ ꓬꓰ‐ꓢꓴ ꓙꓲ‐ꓢꓴ ꓠꓵꓻ ꓠꓲ, ꓔꓯ ꓣꓳ ꓙꓵꓻ ꓠ, ꓟ꓾ ꓝꓮꓲ ꓬꓲ ꓠꓵꓻ ꓠꓲ, ꓔꓯ ꓟꓲ ꓠꓯ ꓡ ꓞꓳ ꓔꓯ ꓚꓺ ꓟ. ꓖꓶ ꓢꓴ ꓒꓬꓱꓼ ꓡ ꓠ ,ꓟ ꓢꓯꓼ ꓕꓵꓼ ꓡꓯ꓿ ꓣꓳ ꓝꓴꓲ ꓐꓰ ꓠꓲ, ꓫ. ꓟꓬꓽ ꓫ. ꓓꓴ ꓮ ꓙꓵꓽ ꓔꓯ ꓪꓴ‐ꓢ ꓮ ꓣꓳ ꓤ ꓔꓯ ꓟ. ꓖꓶ ꓓꓴ ꓬꓰ ꓡꓯ꓿
