ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓦ ꓐ ꓛꓲ ꓐꓯˍ ꓟ ꓠꓬ ꓬꓲ ꓚꓲꓸ ꓛꓬ ꓠꓬꓲ ꓟꓳꓻ ꓓꓴ ꓟꓽ ꓙꓳ= ꓬꓲ ꓠꓯꓸꓼ ꓘꓴꓽ ꓗꓪ ꓐꓰ ꓮ ꓔꓳꓸ ꓟꓽ ꓙꓳ= ꓬꓲ ꓠꓬ ꓟꓲꓽ ꓟꓲ ꓗꓪ ꓚꓳꓸ ꓓꓳ ꓡˍ ꓟ ꓠꓬꓲ ꓟꓳꓻ ꓓꓴ ꓮ ꓔꓳꓸ ꓔꓯ ꓟꓳꓸ ꓖꓶˍ ꓟ ꓟꓬ ꓐ (ꓒꓬꓱꓽ ꓟꓬ ꓓꓴ) ꓕꓲ ꓟˍ ꓡꓰꓽ ꓥ ꓡꓳ= ꓖꓳ ꓡꓱ ꓐꓯˍ ꓥ ꓟꓲ ꓞꓳ ꓤ ꓐꓱ ꓶ ꓮ ꓘꓶꓸ ꓣꓱꓽ ꓬꓯꓼˍ ꓡꓳ= ꓦ ꓐ ꓛꓲ ꓔꓯ ꓡꓳꓸ ꓟꓳˍ ꓟ ꓗꓪ ꓐꓰ ꓣꓳ ꓠꓬ ꓟꓲꓽ ꓟꓲ ꓔꓯ ꓡꓳꓸ ꓟꓳˍ ꓡꓳ= ꓬꓲ ꓠꓬ ꓟꓬ ꓐ (ꓒꓬꓱꓽ ꓟꓬ ꓓꓴ) ꓕꓲ ꓟˍ ꓡꓰ ꓐꓰ ꓥꓳ= ꓕꓱ ꓟˍ ꓡꓰ ꓐꓰ ꓟꓲ ꓠꓯ ꓕꓱ ꓟ ꓗꓪ ꓠꓬ ꓮ ꓫꓵꓽ ꓥˍ ꓟꓲ ꓕꓲ ꓫꓵꓽ ꓫꓵꓽ ꓔꓯ ꓖꓴ ꓟꓳꓸ ꓖꓶˍ ꓫꓵꓽ ꓡꓰꓽ ꓥ ꓡꓳ= ꓢꓲꓹ ꓜꓲ ꓢꓲꓹ ꓟꓲ ꓪꓽ ꓚꓲ ꓪꓽ ꓔ ꓮ ꓙꓵꓽ ꓠꓬ ꓪꓴ-ꓢ ꓡꓯꓼ ꓓꓴ ꓔꓯ ꓖꓴ ꓟꓳꓸ ꓖꓶ ꓔꓬ ꓡꓳ= ꓕꓱ ꓟ ꓠꓬ ꓪꓴ-ꓢ ꓙꓳˍ ꓡꓳ꓾ ꓚꓰꓼ ꓢꓴ ꓙꓳˍ ꓡꓳ ꓐꓯˍ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓔꓬ ꓡꓳ=
ꓮ ꓡꓲꓳ ꓐꓯˍ ꓠꓬ Cause and Effect ꓐꓯˍ ꓟ ꓟꓲ ꓠꓯ ꓕꓱ ꓟ ꓗꓪ ꓠꓬ ꓕꓲ ꓫꓵꓽ ꓫꓵꓽ ꓒꓬꓱꓼ ꓡˍ ꓟ ꓬꓲ ꓚꓱꓹ ꓠꓬ ꓙꓳˍ ꓡꓳ= ꓬꓲ ꓚꓲꓸ ꓛꓬ ꓬꓲ ꓒꓬꓱꓼ ꓡˍ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ= ꓟꓲ ꓠꓯ ꓕꓱ ꓟ ꓗꓪ ꓙꓳˍ ꓟ ꓮ ꓙꓵꓽ ꓠꓬ ꓕꓲ ꓫꓵꓽ ꓫꓵꓽ ꓔꓯ ꓖꓴ ꓟꓳꓸ ꓖꓶ ꓔꓬ ꓫꓵꓽ ꓡꓰꓽ ꓥ ꓡꓳ= ꓕꓱ ꓟ ꓠꓬ ꓪꓴ-ꓢ ꓠꓲꓹ ꓡꓶ ꓙꓳˍ ꓟ ꓥ ꓡꓳ=
ꓕꓱ ꓟˍ ꓡꓰ ꓐꓰ ꓣꓳ ꓟꓲ ꓠꓯ ꓞꓳ ꓤ ꓥˍ ꓟꓲ ꓣꓳ ꓠꓬ ꓪꓴ-ꓢ ꓔꓯ ꓟꓽ ꓢꓷꓸ ꓕꓯ ꓣꓳ ꓠꓬ ꓪꓴ-ꓢ ꓔꓯ ꓟꓽ ꓢꓷꓸ ꓥˍ ꓟꓲ ꓕꓲ ꓫꓵꓽ ꓫꓵꓽ ꓔꓯ ꓣꓳ ꓡꓰ ꓟꓳꓸ ꓖꓶ ꓔꓬ ꓡꓳ= ꓣꓳ ꓠꓲꓹ ꓟ ꓠꓯꓸꓼ ꓘꓴꓽ ꓗꓪ ꓮ ꓫꓵꓽ ꓓꓯꓹ ꓡ= ꓣꓳ ꓒꓵꓽ ꓶ ꓠꓬ ꓮ ꓫꓵꓽ ꓥ ꓡ꓾ ꓐꓯˍ ꓟ ꓐꓰ ꓗꓴꓸ ꓙꓲꓽ ꓙꓳ ꓢꓲ ꓠꓬꓲ ꓣꓳ ꓠꓬ ꓠꓱꓸ ꓐꓯ ꓗꓪ ꓠꓱ ꓫꓳꓸ ꓟꓸ ꓗꓪ ꓕꓱ ꓡꓱ ꓫꓵꓽ ꓟꓳꓸ ꓖꓶ ꓔꓬ ꓡꓳ= ꓔꓯ ꓥꓳꓽ ꓐꓯˍ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓘꓴꓽ ꓗꓪ ꓗꓶꓸ ꓥꓳꓽ ꓡꓰꓽ ꓙꓳˍ ꓠꓬ ꓣꓳ ꓟꓷꓽ ꓠꓷꓹ ꓘꓴꓽ ꓗꓪ ꓐꓰ ꓥˍ ꓟꓲ ꓣꓳ ꓠꓬ ꓗꓶꓸ ꓢꓴ ꓥ꓾ ꓐꓰ ꓟꓳꓸ ꓖꓶ ꓔꓬ ꓡꓳ=
ꓕꓱ ꓟˍ ꓡꓰ ꓐꓰ ꓣꓳ ꓠꓲꓹ ꓟ ꓠꓯꓸꓼ ꓘꓴꓽ ꓗꓪ ꓦꓯꓸ ꓠꓲꓹ ꓙꓵꓽˍ ꓟ ꓡꓰꓽ ꓐꓲ ꓓꓹ ꓠꓬ ꓣꓳ ꓠꓬ ꓮ ꓡꓲ ꓐꓰ ꓦꓬꓽ ꓛꓳꓽ ꓧꓪ ꓠꓹ ꓟ꓾ ꓮ ꓡꓲ ꓐꓰ ꓥꓶˍ ꓫꓵꓽ ꓬꓰ ꓠꓹ ꓟ ꓡꓰꓽ ꓓꓵꓽ ꓙꓽˍ ꓡꓳ= ꓖꓳ ꓡꓱ ꓠꓬꓲ ꓣꓳ ꓠꓬ ꓮ ꓡꓲ ꓫꓵꓽ ꓞꓳ ꓥꓶ ꓥ ꓡ ꓐꓯˍ ꓟ ꓣꓳ ꓫꓸ ꓕꓱˍ ꓟ ꓗꓪ ꓐꓰ ꓟꓳꓸ ꓖꓶ ꓔꓬ ꓡꓳ= ꓖꓳ ꓡꓱ ꓠꓬꓲ ꓞꓳ ꓤ ꓥˍ ꓟꓲ ꓮ ꓡꓲ ꓫꓵꓽ ꓥˍ ꓟꓲ ꓕꓲ ꓫꓵꓽ ꓟꓽ ꓥ ꓕꓲ ꓫꓵꓽ ꓠꓬ ꓟꓳꓸ ꓖꓶ ꓔꓬ ꓡꓳ=
ꓢꓸ ꓠꓯ ꓠꓬ ꓠꓬꓲꓽ ꓠꓽ ꓕꓲ ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ= ꓢꓲ ꓒ ꓦꓬꓼ ꓠꓬꓲ ꓗꓪ (ꓬꓳ-ꓦ= 1ꓽ29-34) ꓗꓪ ꓣꓳ ꓟꓳˍ ꓟ ꓠꓬ꓾ ꓖꓳ ꓓꓱꓽ ꓔꓲꓹ ꓒ ꓬꓳ-ꓦ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓖꓴ ꓟꓳꓸ ꓖꓶˍ ꓟ ꓚꓱꓹ ꓣꓳ ꓟꓳˍ ꓡꓳ= ꓬꓳ-ꓦ ꓠꓬ ꓬꓲ ꓤꓶꓻ ꓕꓲ ꓤꓶꓻ ꓡꓱꓸꓼ ꓔꓯ ꓢꓲ ꓒ ꓬꓰ-ꓢꓴ ꓔꓯ ꓖꓴ ꓟꓳꓸ ꓖꓶ ꓠꓹ ꓟ ꓐꓱ ꓶ ꓢꓲꓺ ꓗꓷˍ ꓡꓳ= ꓬꓲ ꓤꓶꓻ ꓔꓯ ꓠꓬ ꓕꓲ ꓤꓶꓻ ꓡꓱꓸꓼ ꓢꓲ ꓒ ꓔꓯ ꓔꓲꓺ ꓖꓶˍ ꓡꓳ= ꓖꓳ ꓡꓱ ꓠꓬꓲ ꓬꓲ ꓠꓬ ꓡꓲ ꓛꓲ ꓗꓪ ꓙꓰ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓐꓱ ꓶ ꓜꓶꓽ ꓟꓴꓽ ꓬꓰ ꓠꓹ ꓟ꓾ ꓢꓲ ꓒ ꓬꓰ-ꓢꓴ ꓔꓯ ꓖꓴ ꓟꓳꓸ ꓖꓶ ꓠꓹ ꓟ ꓬꓲ ꓙꓰˍ ꓡꓳ=
ꓕꓱ ꓟˍ ꓡꓰ ꓐꓰ ꓢꓲ ꓒ ꓬꓰ-ꓢꓴ ꓬꓲ ꓔꓬ ꓗꓪ ꓖꓳ ꓓꓱꓽ ꓔꓲꓹ ꓡˍ ꓕꓯ ꓥˍ ꓟꓲ ꓬꓲ ꓠꓬ꓾ “ꓠꓬꓲ ꓠꓹ꓾ ꓪꓴ-ꓢ ꓮ ꓣꓳ ꓤ ꓔꓲꓸ꓾ ꓟꓲ ꓠꓯ ꓗꓪ ꓟ ꓝꓴꓲꓸ ꓣꓴ ꓦ ꓗꓷ ꓢꓴ ꓪꓴ-ꓢ ꓬꓲ ꓮ ꓣꓳ ꓤ ꓥ ꓡꓳ꓾” ꓐꓰ ꓐꓯ ꓔ ꓡꓳ= ꓖꓳ ꓡꓱ ꓠꓬꓲ ꓬꓳ-ꓦ ꓠꓬ ꓬꓲ ꓟꓷꓽ ꓠꓷꓹ ꓘꓶꓽ ꓗꓪ ꓐꓰ ꓥˍ ꓟꓲ꓾ ꓬꓲ ꓛꓳ ꓫꓱꓽˍ ꓟ ꓗꓪ ꓐꓰ ꓥˍ ꓟꓲ꓾ ꓓꓵꓽ ꓙꓽ ꓚꓱꓹ ꓗꓪ ꓥˍ ꓟꓲ ꓮ ꓙꓵꓽ ꓢꓲ ꓒ ꓬꓰ-ꓢꓴ ꓔꓯ ꓡꓰꓽ ꓖꓴ ꓟꓳꓸ ꓖꓶˍ ꓡꓳ= ꓬꓲ ꓢꓯꓸ ꓔꓬ ꓟ ꓠꓬ ꓢꓲ ꓒ ꓬꓰ-ꓢꓴ ꓐꓱ ꓶˍ ꓡꓰꓽ ꓥ ꓡꓳ=
ꓥ ꓡꓳ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓴ ꓙꓲ-ꓢꓴ ꓢꓲ ꓤ ꓒꓬꓱꓼ ꓡˍ ꓕꓯ꓾ ꓥ ꓠꓬ ꓠꓴ ꓢꓲ ꓒ ꓬꓰ-ꓢꓴ ꓔꓯ ꓢꓷꓸ ꓡꓰ ꓕꓯ ꓠꓴ ꓠꓬ ꓠꓴ ꓚꓲꓸ ꓛꓬ ꓡꓰꓽ ꓢꓯꓸ ꓔꓬ ꓟꓽ ꓓꓻꓳ= ꓮ ꓡꓲ ꓫꓵꓽ ꓐꓱ ꓶ ꓮꓽ ꓟ ꓐꓱ ꓶ ꓢꓯꓸ ꓔꓬ ꓠ ꓗˍ ꓡ ꓐꓯˍ ꓠꓬ꓾ ꓢꓲ ꓒ ꓬꓰ-ꓢꓴ ꓐꓱ ꓶ ꓢꓯꓸ ꓔꓬ ꓠ ꓗꓹ ꓡꓳ= ꓠꓴ ꓠꓲꓹ ꓟ ꓘꓴꓽ ꓠꓯꓸꓼ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓢꓲ ꓡꓲ ꓟ ꓙꓵꓽ ꓡ ꓠꓹ ꓟ꓾ ꓠꓴ ꓠꓲꓹ ꓟ ꓘꓴꓽ ꓠꓯꓸꓼ ꓗꓪ ꓢꓲ ꓒ ꓬꓰ-ꓢꓴ ꓬꓲ ꓐꓯ ꓘꓶꓽ ꓔꓬ ꓡ ꓠꓹ ꓟ ꓠꓴ ꓠꓬ ꓮ ꓕꓯ ꓟꓲ ꓙꓽ ꓖꓶ ꓠ ꓔˍ ꓡꓳ=
ꓖꓳ ꓡꓱ ꓬꓰˍ ꓠꓬ ꓠꓴ ꓠꓲꓹ ꓟ ꓠꓯꓸꓼ ꓘꓴꓽ ꓗꓪ ꓒꓵꓽ ꓶ ꓠꓴ ꓡꓰ ꓟꓳꓸ ꓖꓶˍ ꓡꓳ= ꓠꓴ ꓠꓲꓹ ꓟ ꓠꓯꓸꓼ ꓘꓴꓽ ꓗꓪ ꓙꓳˍ ꓟ ꓢꓲ ꓒ ꓬꓰ-ꓢꓴ ꓔꓯ ꓠꓴ ꓠꓬ ꓟꓷꓽ ꓠꓷꓹ ꓘꓶ ꓗꓪ ꓐꓰ ꓥˍ ꓟꓲ꓾ ꓛꓳ ꓫꓱꓽˍ ꓟ ꓗꓪ ꓐꓰ ꓥˍ ꓟꓲ ꓟꓳꓸ ꓖꓶ ꓐ ꓡˍ ꓡꓳ= ꓠꓴ ꓔꓯ ꓟꓳꓻ ꓢꓴ ꓠꓬ꓾ ꓳ ꓢꓲ ꓒ ꓬꓰ-ꓢꓴ ꓠꓬ ꓚꓵ ꓚꓵ ꓙꓳˍ ꓐꓭ= ꓪꓴ-ꓢ ꓠꓬ ꓙꓳˍ ꓐꓭ ꓐꓰ ꓢꓷꓸ ꓡˍ ꓥꓳ=
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓠꓬ ꓬꓲꓸ ꓬꓲ ꓢꓲ ꓠꓬ ꓕꓱ ꓟˍ ꓡꓰꓽ ꓥ ꓡꓳ= ꓪꓴ-ꓢ ꓡꓰ ꓣꓳ ꓔꓯ ꓚꓰꓼ ꓔ ꓖꓶˍ ꓟ ꓬꓲꓸ ꓬꓲ ꓢꓲ ꓠꓬ ꓟꓲ ꓠꓯ ꓕꓱ ꓟ ꓗꓪ ꓬꓲ ꓔꓯ ꓡꓰꓽ ꓠꓲꓹ ꓠꓵ ꓠꓹ ꓟ ꓐꓰ ꓬꓲ ꓟꓬꓱꓽ ꓬꓰ ꓠꓹ ꓟ꓾ ꓣꓳ ꓠꓶꓽ ꓛꓳꓽ ꓔꓯ ꓠꓲꓹ ꓠꓵ ꓠꓹ ꓟ ꓡꓰꓽ ꓥ ꓡꓳ= ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓴ ꓧꓪꓽ ꓖꓳ ꓓꓱꓽ ꓗꓪ ꓐꓰ ꓮ ꓫꓵꓽ ꓔꓯ ꓮ ꓟ ꓔꓯ ꓟꓳꓸ ꓖꓶ ꓔꓬ ꓡ= ꓮ ꓫꓵꓽ ꓕꓲ ꓫꓵꓽ ꓠꓴ ꓦꓲ ꓘꓴꓽ ꓠꓯꓸꓼ ꓘꓴꓽ ꓗꓪ ꓠꓴ ꓛꓳꓽ ꓒꓯꓹ ꓛꓳꓽ ꓤ ꓘꓴꓽ ꓗꓪ ꓮ ꓫꓵꓽ ꓟꓳꓸ ꓖꓶ ꓔꓬ ꓡ= ꓟꓬ ꓠꓯꓸˍ ꓟ ꓟꓳꓸ ꓖꓶ ꓔꓬ ꓡ꓾ ꓦꓯꓸ ꓠꓲꓹ ꓙꓵꓽˍ ꓟ ꓟꓳꓸ ꓖꓶ ꓔꓬ ꓡ= ꓟꓽ ꓥ ꓠꓬ ꓠꓴ ꓠꓲꓹ ꓟ ꓠꓯꓸꓼ ꓘꓴꓽ ꓗꓪ ꓟꓽ ꓔꓱꓹ ꓟꓽ ꓜꓳꓽ ꓟ ꓟꓳꓸ ꓖꓶ ꓔꓬ ꓡ= ꓠꓬꓲꓸ ꓠꓬꓲ ꓠꓴ ꓥꓪ ꓓꓵꓽ ꓙꓽ ꓓꓴ ꓬꓰ ꓡꓯ=
ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓢꓯꓼ ꓖꓶ ꓔ ꓟ ꓠꓬ ꓪꓴ-ꓢ ꓔꓯ ꓡꓰꓽ ꓦ ꓡꓱ ꓢꓲ ꓠꓬꓲ ꓬꓲ ꓐꓱ ꓶ ꓢꓷꓸ ꓙ ꓟꓳ ꓙ ꓠꓹ ꓟ ꓣꓳ ꓔꓯ ꓐꓯ ꓟꓳꓸ ꓖꓶ ꓡ ꓔꓬ ꓟ ꓥ ꓡꓳ= (ꓬꓲ-ꓢ-ꓬ 49ꓽ3ꓹ 5-6) ꓗꓪ ꓥˍ ꓟꓲ ꓪꓴ-ꓢ ꓠꓬ ꓬꓲ-ꓢ-ꓬ ꓔꓯ ꓢꓲ ꓗꓷˍ ꓟ ꓬꓲ ꓚꓳ ꓑꓸ ꓢꓲ ꓗꓷˍ ꓟ ꓔꓯ ꓣꓳ ꓡꓳꓸ ꓟꓳˍ ꓡꓳ= ꓬꓲ-ꓢ-ꓬ ꓠꓬ ꓬꓲ-ꓢꓷ-ꓡꓰ ꓐꓱ ꓶ ꓟꓬꓱ ꓓꓳꓽ ꓙꓳˍ ꓟ ꓟꓷꓽ ꓠꓷꓹ ꓝꓸ ꓒ ꓒꓬꓱꓼ ꓡˍ ꓡꓳ= ꓢꓲ ꓒ ꓬꓰ-ꓢꓴ ꓬꓲ ꓚꓲꓸ ꓛꓬ ꓡꓰ ꓬꓲ ꓔꓯ ꓢꓲꓺ ꓔ ꓡꓳ= ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓠꓴ ꓥꓪ ꓔꓯ ꓥˍ ꓟꓲ ꓢꓲ ꓒ ꓬꓰ-ꓢꓴ ꓢꓲꓺ ꓔ ꓡꓳ= ꓙꓵꓻ ꓠꓲꓹ ꓔꓯ ꓘꓳ ꓣꓴ ꓟꓶ ꓢꓴ ꓮ ꓙꓵꓽ ꓠꓬ ꓪꓴ-ꓢ ꓡꓰ ꓢꓲ ꓔ ꓟ ꓥ ꓡꓳ= ꓠꓴ ꓬꓰˍ ꓟ ꓟꓬꓱꓽ ꓗꓪ꓾ ꓠꓴ ꓟꓷꓽ ꓠꓷꓹ ꓘꓶ ꓗꓪ꓾ ꓕꓲ ꓠꓬꓲ ꓕꓲ ꓠꓬꓲ ꓠꓴ ꓫꓸ ꓕꓱˍ ꓟ ꓗꓪ ꓮ ꓡꓲ ꓫꓵꓽ ꓠꓴ ꓫꓸ ꓕꓱ ꓘꓶ ꓓꓳ ꓡˍ ꓡ= ꓕꓲ ꓠꓬꓲ ꓕꓲ ꓠꓬꓲ ꓠꓴ ꓓꓵꓽ ꓙꓽˍ ꓟ ꓗꓪ ꓮ ꓡꓲ ꓫꓵꓽ ꓓꓵꓽ ꓙꓽ ꓚꓱꓹ ꓠꓴ ꓓꓵꓽ ꓙꓽ ꓚꓱꓹ ꓠꓴ ꓓꓴꓽ ꓙꓽ ꓔꓬ ꓡ ꓐꓯˍ ꓟ ꓓꓵꓽ ꓙꓽ ꓠꓬꓲ ꓡꓯ=
