ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸ= ꓠꓬꓲꓸ ꓠꓬꓲ ꓠꓬ꓾ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓓꓻ ꓟꓽ ꓞꓽ ꓟꓳꓻ ꓠꓲꓹ ꓫꓵ ꓢꓲ ꓠꓬꓲ ꓧꓪ ꓔꓬ ꓢꓴ ꓕꓲ ꓣꓳ ꓟꓸ ꓟꓲꓽ ꓥ ꓡꓳ= ꓟꓸ ꓟꓲꓽ ꓝꓲꓸ ꓠꓬ ꓟ-ꓘꓳ 1ꓽ40-45 ꓗꓪ ꓟ ꓥꓳ= ꓟꓸ ꓟꓲꓽ ꓝꓲꓸ ꓬꓲ ꓕꓲꓽ ꓟꓳꓽ ꓗꓪ ꓠꓬ ꓕꓱ ꓡꓱ ꓥꓳ= ꓔ ꓟꓼ ꓩꓴꓸ ꓓꓲꓻ ꓢꓴ ꓕꓲ ꓣꓳ ꓠꓬ ꓢꓲ ꓒ ꓬꓰ-ꓢꓴ ꓡˍ ꓟ ꓔꓯ ꓑ ꓙꓽˍ ꓕꓯ ꓬꓲ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓓꓻ ꓟꓽ ꓞꓽ ꓧꓪ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓟꓳꓻ ꓡꓰˍ ꓕꓯ ꓢꓲ ꓒ ꓬꓰ-ꓢꓴ ꓛꓲ ꓔꓲꓺ ꓗꓪ ꓟꓳꓼ ꓡꓰ ꓢꓲ ꓠꓬꓲ꓾ ꓢꓲ ꓒꓽꓳ꓾ ꓠꓲꓹ ꓡꓶꓽ ꓙꓳˍ ꓠꓬ ꓠꓴꓻ ꓥꓪ ꓔꓯ ꓫꓱꓸ ꓤ ꓢꓲ ꓠꓬꓲ ꓫꓬˍ ꓖꓶˍ ꓠꓬ ꓥꓪ ꓠꓻ ꓠꓽ ꓓꓻ ꓡꓰˍ ꓥꓳ꓾ ꓐꓰ ꓓꓰꓽ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓐꓯˍ ꓡꓳ= ꓖꓳ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓫꓱꓸ ꓤ ꓔꓴ ꓡ ꓢꓲ ꓠꓬꓲ ꓬꓲ ꓡꓯ ꓒꓯꓹ ꓛꓱ ꓗꓷ ꓢꓲ ꓠꓬꓲ ꓬꓲ ꓔꓯ ꓕꓲꓺ ꓢꓲ ꓠꓬꓲ ꓐꓯˍ ꓟ ꓠꓬ꓾ ꓠꓴ ꓓꓻ ꓡꓰꓳ= ꓙꓰ ꓢꓲ ꓠꓬꓲ ꓔꓲꓺ ꓒ ꓪꓴꓸ ꓓꓴ ꓣꓱꓽ ꓢꓴ ꓔꓯ ꓟꓸ ꓖꓶ ꓙꓰ꓾ ꓐꓰ ꓐꓯˍ ꓟ ꓟꓸ ꓟꓲꓽ ꓝꓲꓸ ꓥ ꓡꓳ=
ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓣꓳ ꓟꓽ ꓓꓻ ꓟꓽ ꓞꓽ ꓧꓪ ꓔꓬ ꓟ ꓠꓬ ꓮ ꓫꓵꓽ ꓥ ꓡ= ꓒꓴ ꓫꓵ ꓥ ꓡ꓾ ꓥ ꓠꓬ ꓙꓵꓽ ꓪ ꓥ ꓡ= ꓥ ꓠꓬ ꓢꓷꓸ ꓠꓲꓹ ꓥ ꓡ= ꓥ ꓠꓬ ꓔꓬ ꓖꓴ ꓟꓵꓽ ꓥ ꓡ= ꓟꓽ ꓓꓻ ꓟꓽ ꓞꓽ ꓚꓵꓸ ꓬꓲꓻ ꓓꓳ ꓢꓲ ꓠꓬꓲ ꓟꓬ ꓐꓲ ꓞꓰ ꓢꓲ ꓠꓬꓲ ꓟꓽ ꓓꓻ ꓟꓽ ꓞꓽ ꓧꓪ ꓔꓬ ꓟ ꓠꓬ ꓮ ꓫꓵꓽ ꓥ ꓡ=
ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲꓸ ꓠꓬꓲ ꓟꓸ ꓟꓲꓽ ꓝꓲꓸ ꓗꓪ ꓔ ꓟꓼ ꓩꓴꓸ ꓓꓲꓻ ꓢꓴ ꓠꓬ ꓬꓲ ꓤꓶꓻ ꓠꓯꓸꓼ ꓗꓪ ꓟꓽ ꓓꓬ ꓟꓽ ꓞꓽ ꓧꓪ ꓟꓽ ꓟꓶ ꓕ ꓑꓳꓸꓼ ꓧꓪ ꓔꓬ ꓟ ꓠꓬ ꓮ ꓫꓵꓽ ꓥ ꓡ ꓐꓯˍ ꓠꓬ ꓬꓲ ꓔꓯ ꓠꓻ ꓗꓪ ꓐꓰ ꓕꓲ ꓞꓲꓼ ꓕꓲ ꓑ ꓓꓻ ꓡꓰ ꓓꓴ ꓫꓬꓻ ꓡꓰ ꓝꓲ ꓢꓴ꓾ ꓬꓲ ꓔꓯ ꓚꓬꓴꓸ ꓖꓶ ꓢꓴ꓾ ꓬꓲ ꓔꓯ ꓠꓵꓻ ꓠꓲꓹ ꓕꓲ ꓞꓲꓼ ꓕꓲ ꓑ ꓖꓶ ꓢꓴ ꓢꓲ ꓒ ꓬꓰ-ꓢꓴ ꓔꓯ ꓧꓪ ꓔꓬ ꓟ ꓥ ꓡꓳ=
ꓠꓬꓲꓸ ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓓꓻ ꓟꓽ ꓞꓽ ꓣꓳ ꓧꓪ ꓠꓬꓲ ꓔꓬ ꓡ= ꓥ ꓠꓬ ꓢꓲ ꓒ ꓬꓰ-ꓢꓴ ꓔꓯ ꓟꓽ ꓧꓪ ꓧꓪ ꓐꓰ ꓠꓱꓸ ꓐꓯ ꓔꓯ ꓡꓰꓽ ꓣꓳꓽ ꓟꓽ ꓓꓬ ꓟꓽ ꓞꓽ ꓧꓪ ꓔꓬ ꓡ꓾ ꓐꓰ ꓣꓳ ꓓꓵꓽ ꓙꓽ ꓠꓬꓲ ꓡꓯ= ꓣꓳ ꓠꓱꓸ ꓐꓯ ꓟꓲ ꓠꓯ ꓗꓪ ꓙꓳˍ ꓟ ꓮ ꓙꓵꓽ ꓣꓳ ꓧꓪ ꓔꓬ ꓟ ꓠꓬ ꓙꓲˍ ꓡꓳ꓾ ꓟꓽ ꓙꓲꓻ ꓐꓰ ꓟꓽ ꓐꓯ= ꓖꓳ ꓡꓱ ꓐꓯˍ ꓥ ꓟꓲ ꓡꓳꓹ ꓬꓰˍ ꓕꓲ ꓠꓬꓲ ꓗꓪ ꓠꓬ ꓠꓬꓲꓸ ꓠꓬꓲ ꓣꓳ ꓟꓽ ꓓꓻ ꓟꓽ ꓞꓽ ꓧꓪ ꓔꓬ ꓟ ꓠꓬ ꓣꓳ ꓔꓯ ꓔꓱꓹ ꓔꓱꓹ ꓚꓵ ꓚꓵˍ ꓐꓰ꓾ ꓣꓳ ꓔꓯ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓖꓶˍ ꓡ= ꓕꓲ ꓞꓲꓼ ꓕꓲ ꓑ ꓟꓴ ꓗꓪ ꓗꓴꓷꓼ ꓗꓪ ꓧꓳꓽ ꓓꓯꓻ ꓙꓰ ꓖꓶˍ ꓡ꓾ ꓚꓬꓴꓸ ꓓꓳ ꓖꓶˍ ꓡ ꓐꓰ ꓐꓯˍ ꓟ ꓔꓯ ꓣꓳ ꓓꓵꓽ ꓙꓽ ꓠꓬꓲ ꓓꓴ ꓥꓳ=
ꓠꓬꓲꓸ ꓠꓬꓲ ꓣꓳ ꓤꓶꓻ ꓠꓯꓸꓼ ꓗꓪ ꓥˍ ꓟꓲ ꓔ ꓟꓼ ꓩꓴꓸ ꓓꓲꓻ ꓢꓴˍ ꓡꓰ ꓐꓰ ꓣꓳ ꓟꓽ ꓓꓻ ꓟꓽ ꓞꓽ ꓧꓪ ꓠꓹ ꓟ ꓠꓬ ꓣꓳ ꓔꓯ ꓚꓬꓴꓸ ꓖꓶ ꓡˍ ꓟ ꓢꓲ ꓒ ꓬꓰ-ꓢꓴ ꓔꓯ ꓧꓪ ꓠꓹ ꓟ ꓥꓳ= ꓬꓲ ꓔꓯ ꓣꓳ ꓟꓶ ꓡꓰˍ ꓠꓬ ꓣꓳ ꓮ ꓙꓵꓽ ꓟꓶˍ ꓥꓳ=
