“ꓟꓶꓼ ꓘꓶꓼ ꓟꓲꓽ ꓟꓲ ꓓꓵꓽ ꓡꓰˍ ꓕꓯ꓾ ꓬꓲ ꓪꓽ ꓡꓰ ꓖꓳ ꓗꓪ ꓔꓬ ꓟ ꓠꓻ ꓢꓴ ꓒꓬꓽ ꓢꓴ ꓮꓽ ꓙꓵˍ ꓐꓰ ꓠꓲꓽ ꓜꓶꓽ ꓞꓹ ꓢꓴ ꓔꓯ ꓬꓲ ꓔꓬ ꓗꓪ ꓧꓳꓽ ꓡ ꓡꓳ꓿ꓕꓲ ꓡꓳ ꓒꓱ ꓢꓴ ꓮꓽ ꓙꓵ ꓠꓬ ꓗ ꓘꓶꓽ ꓗꓪ ꓜꓲꓼ ꓞꓹ ꓡꓳ꓿ꓠꓻ ꓫꓵꓽ ꓠꓻ ꓙꓰꓽ ꓠꓻ ꓢꓴ ꓮꓽ ꓟꓬꓹ ꓔꓯ ꓬꓲ ꓡꓰ ꓫꓬꓹ ꓓꓻ ꓡꓰˍ ꓡꓳ꓿ ꓠꓲꓽ ꓮꓽ ꓟꓬꓹ ꓔꓯˍ ꓟꓲ ꓬꓲ ꓖꓼ ꓓꓳ ꓗꓷ ꓢꓲ꓾ ꓠꓲꓽ ꓜꓴ ꓠꓬ ꓬꓲ ꓮꓽ ꓟ ꓥ ꓟ ꓔꓯ ꓢꓷꓸˍ ꓠꓬꓲ ꓬꓲꓸ ꓡꓰ ꓬꓲ ꓪꓽ ꓔꓯ ꓟꓽ ꓫꓸ ꓕꓱ ꓝꓲ꓿ꓗꓸ ꓠꓯꓸ ꓠꓯꓼ ꓟꓲꓽ ꓕꓯ ꓟꓽ ꓙꓲ ꓡ ꓢꓰ ꓕꓯˍ ꓡꓰ ꓬꓰ-ꓢꓴ ꓔꓴ ꓡ ꓢꓲ꓾ ꓢꓲ ꓡꓲ ꓟ ꓡꓲ ꓛꓲ ꓟꓵꓽ ꓕꓲ ꓔꓳꓸ ꓗꓪ ꓙꓰ ꓢꓲ ꓠꓬꓲ ꓖꓳ ꓗꓪ ꓪꓽ ꓘꓴˍ ꓡꓳ꓿” ꓟ‐ꓘꓳ 1ꓽ32‐35
ꓢꓲ ꓒ ꓬꓰ‐ꓢꓴ ꓡꓰ ꓠꓻ ꓔꓬ ꓢꓴ ꓐꓴ ꓔꓯ ꓠꓻ ꓫꓬ, ꓖꓶ_ ꓟ ꓐꓰ ꓠꓲꓽ ꓔꓯ ꓖꓼ ꓓꓳ ꓖꓶ_ ꓟ ꓢꓲ ꓫꓬ ꓕꓳ ꓶ ꓝꓲ. ꓥ ꓡꓳ꓾ ꓡ ꓞꓳ ꓮ ꓟꓬ, ꓠꓬ ꓢꓲ ꓒꓽ ꓡꓰ ꓠꓻ ꓫꓬ, ꓖꓶ_ ꓟ꓾ ꓠꓲꓽ ꓔꓯ ꓖꓼ ꓓꓳ ꓖꓶ_ ꓟ ꓔꓯ ꓟꓳ ꓡꓰ ꓠꓬ ꓓꓵꓽ ꓙ ꓟꓶ ꓟ ꓥ ꓡꓳ꓾ ꓟꓬꓱ ꓓꓳ ꓖꓶ_ ꓡꓳ꓾ ꓢꓲ ꓒ ꓡꓰ ꓬꓰ ꓖꓶ_ ꓟ ꓔꓯ ꓬꓲ ꓪ ꓓꓵꓽ ꓙ ꓟꓶ ꓢꓯꓼ ꓪ ꓔꓯ ꓫꓱ. ꓖꓶ ꓔꓬ ꓡꓳ꓿
ꓞꓳ ꓤ ꓡꓰ ꓫꓱ. ꓖꓶ ꓡ ꓟ ꓘꓶꓽ ꓔꓯ ꓘꓳ, ꓣꓴ ꓓꓵ ꓙ ꓔꓬ ꓟ ꓓꓰ ꓢ ꓢꓲ ꓒ ꓬꓰ‐ꓢꓴ ꓠꓬ ꓡ ꓞꓳ ꓐꓴ ꓐꓰ ꓶ_ ꓟ꓾ ꓢꓲ ꓡꓲ, ꓟ ꓔꓶ. ꓗꓪ ꓙꓰ ꓢꓲ ꓕꓲ ꓣꓳ ꓕꓵꓼ ꓪꓽ ꓘꓴ ꓢꓲ ꓠꓬꓲ ꓟꓲ ꓠꓯ ꓗꓪ ꓤ ꓠꓬꓲ ꓫꓵ ꓠꓬꓲ ꓡ ꓟ ꓔꓯ ꓗꓳ. ꓙꓰ ꓗꓷ ꓟ ꓥꓳ꓿ ꓕꓱ ꓡꓱ ꓬꓰ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓬꓰ ꓠ ꓔ ꓟ ꓔꓯ ꓡꓰ ꓓꓵꓽ ꓙ ꓬꓰ ꓔꓬ ꓟ ꓥꓳ꓿
ꓣꓳ ꓥ ꓟꓲ ꓚꓲ ꓛꓬ ꓬꓰ ꓠ ꓔ ꓟ ꓟꓬꓱꓽ ꓚꓱ, ꓔꓯ ꓡꓰ ꓓꓵ ꓙ ꓢꓲ ꓬꓰ ꓔꓬ ꓡ꓾ ꓟꓽ ꓥ ꓠꓬ ꓢꓴ ꓡꓰ ꓫꓱ. ꓖꓶ ꓡ ꓟ ꓔꓯ ꓡꓰ ꓥ ꓡꓳ. ꓔꓬ ꓡ ꓐꓰ ꓠ ꓠꓬꓲ ꓘꓶꓽ ꓐꓰ ꓠꓬꓲ. ꓠꓬꓲ ꓟ ꓢꓲ ꓫꓬ ꓕꓳ ꓶ ꓗꓪ ꓐꓰ ꓓꓵꓽ ꓙ ꓔꓱ, ꓕ ꓠꓬꓲ ꓓꓴ ꓬꓰ ꓡꓯ꓿
