ꓖꓳ ꓗꓸ ꓠꓯꓸ ꓬꓲ ꓪꓽ ꓘ-ꓒꓱ-ꓠꓴ ꓗꓪ ꓛꓲ ꓬꓰˍ ꓡꓳ꓿ ꓠꓽ ꓦꓬꓼ ꓠꓬꓲ ꓗꓪ ꓬꓲ ꓠꓬ ꓜꓲꓼ ꓦꓲ ꓗꓪ ꓓꓵꓽ ꓡꓰ ꓢꓲ ꓟꓸ ꓟꓲꓽ ꓟꓸ ꓖꓶˍ ꓡꓳ꓿ ꓬꓲ ꓟꓸ ꓖꓶˍ ꓟ ꓠꓬ ꓙꓵꓽ ꓗ ꓟꓸ ꓒ ꓐꓴ ꓡꓰ ꓟꓸ ꓖꓶˍ ꓟ ꓡꓰ ꓐꓰ ꓟꓽ ꓥ ꓥ꓾ ꓙꓵꓽ ꓪ ꓙꓳ ꓙꓳˍ ꓡꓰꓽ ꓟꓸ ꓖꓶˍ ꓠꓬꓲ ꓬꓲ ꓪꓽ ꓓꓵꓽ ꓙ ꓟꓶꓻˍ ꓡꓳ꓿
ꓖꓳ ꓕꓯ ꓬꓲ ꓪꓽ ꓜꓲꓼ ꓦꓲ ꓗꓪ ꓟꓽ ꓫꓬ ꓠꓲꓽ ꓓꓯꓹ ꓟ ꓡꓽ ꓞꓳ ꓕꓲ ꓣꓳ ꓔꓬ ꓢꓲ꓾ ꓘꓴꓻ ꓔꓴ ꓡ ꓢꓲ ꓠꓬꓲ꓾ꓠ-ꓢ-ꓡꓱ ꓢꓴ ꓬꓰ-ꓢꓴꓳ꓾ ꓥꓪ ꓠꓴꓽ ꓠꓬ ꓠꓴˍ ꓐꓰ ꓮꓸ ꓫꓵ ꓗꓴꓸ ꓙꓲꓽ ꓙꓳˍ ꓡ? ꓠꓴ ꓠꓬ ꓥꓪ ꓠꓴꓽ ꓔꓯ ꓟꓶꓽ ꓡꓰ ꓝꓲˍ ꓐꓰ ꓡꓻ ꓟ ꓥ ꓡ? ꓠꓴ ꓮꓽ ꓟ ꓥ ꓟ ꓥꓪ ꓢꓷꓸˍ ꓡꓳ꓿ ꓠꓴ ꓠꓽ ꓪꓴ-ꓢ ꓬꓲ ꓢꓲ ꓚꓲꓸ ꓔ ꓟ ꓖꓳ ꓕꓲ ꓣꓳ ꓟ ꓥꓳ꓾ ꓐꓯˍ ꓡꓳ꓿ ꓬꓰ-ꓢꓴ ꓡꓰ ꓬꓲ ꓔꓯ ꓕꓼ ꓢꓲ꓾ ꓕꓽ ꓪꓳꓹ꓾ ꓬꓲ ꓗꓪ ꓐꓰ ꓓꓳ ꓡꓯ꓾ ꓐꓯ ꓖꓶˍ ꓡꓳ꓿ ꓖꓳ ꓡꓱ ꓠꓬ ꓟꓽ ꓫꓬ ꓠꓲꓽ ꓡꓰ ꓡꓽ ꓞꓳ ꓖꓳ ꓟ ꓔꓯ ꓚꓵꓹ ꓡ ꓝꓲ ꓢꓲ꓾ ꓢꓯꓼ ꓓꓽ ꓟ ꓘꓴꓻ ꓠꓬꓲ ꓐꓰ ꓬꓲ ꓗꓪ ꓐꓰ ꓓꓳ ꓙꓰꓳ꓿
ꓖꓳ ꓕꓯ ꓖꓳ ꓗꓪ ꓔꓬ ꓢꓴ ꓮꓽ ꓙꓵ ꓓꓵꓽ ꓙ ꓟꓶ ꓡꓰ ꓢꓲ꓾ ꓕꓱ ꓟ ꓮꓸ ꓫꓵ ꓥ ꓡ? ꓙꓵꓽ ꓪ ꓙꓳˍ ꓟ ꓟꓸ ꓟꓲꓽ ꓫꓵꓼ ꓕꓲꓽ ꓫꓵꓽ ꓥ ꓐꓷ꓿ ꓠꓲꓽ ꓔꓯˍ ꓟꓲ ꓬꓲ ꓙꓵꓽ ꓪ ꓗꓪ ꓐꓰ ꓝꓲˍ ꓕꓯ ꓬꓲ ꓪꓽ ꓒꓵꓽ ꓛꓳˍ ꓐꓷ꓾ ꓐꓰ ꓐꓯ ꓡꓯꓽ ꓘꓳˍ ꓡꓳ꓿ ꓬꓲ ꓓꓳꓽ ꓕꓱ ꓟ ꓠꓬ ꓖ-ꓡꓲ-ꓡꓲ ꓕꓲ ꓟꓵꓽ ꓡꓱꓸꓼ ꓗꓪ ꓞꓼ ꓐꓰ ꓚ ꓒꓬꓱ ꓙꓰˍ ꓡꓳ꓿
———-
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓟꓲ ꓠꓯ ꓕꓱ ꓟ ꓗꓪ ꓞꓳ ꓤ ꓟꓬꓽ ꓠꓬꓲ ꓠꓬ ꓚꓲ. ꓛꓬ ꓚꓳꓽ ꓚꓲ. ꓛꓬ ꓟꓴꓺ ꓢꓴ꓾ ꓓꓳ, ꓟꓴ ꓒꓵꓽ ꓢꓴ ꓐꓯˍ ꓟ ꓔꓯ ꓚꓲ. ꓛꓬ ꓠꓯ. ꓘꓪ ꓣꓳꓺ ꓢꓴ ꓱʼ ꓢꓴ ꓐꓴ ꓔꓯ ꓙꓵꓽ ꓪ ꓣꓱꓽ ꓢꓲ ꓟ. ꓖꓶˍ ꓡꓳ꓿ ꓙꓵꓽ ꓪ ꓕꓱ ꓟ ꓠꓬ “ꓥꓪ” ꓐꓯˍ ꓟ ꓘꓶꓽ ꓘ, ꓠꓲ,꓾ ꓚꓲ. ꓛꓬˍ ꓡꓰꓽ ꓓꓻˍ ꓟ꓾ ꓚꓲ. ꓛꓬ ꓚꓳꓽ ꓚꓲ. ꓛꓬ ꓮ ꓟꓴ. ꓟꓴ ꓟꓳꓻˍ ꓟ ꓕꓱ ꓡꓱ ꓫꓵꓽ ꓗꓪ ꓐꓰ ꓒꓬꓱꓼ ꓡˍ ꓟ ꓥ ꓡꓳ꓿
ꓕꓱ ꓡꓱ ꓫꓵꓽ ꓙꓵꓽ ꓪ ꓠꓬ ꓚꓲ. ꓛꓬ ꓔꓯˍ ꓡꓰꓽ ꓟꓽ ꓞꓲ ꓠꓱ. ꓐꓯ ꓢꓴ ꓕꓯˍ ꓟꓲ ꓟꓽ ꓙꓲꓻ ꓟ ꓗꓷ ꓡꓰ ꓝꓲˍ ꓡꓳ꓿ ꓙꓵꓽ ꓗ ꓟ. ꓒ ꓐꓴ ꓒ‐ꓡꓲ‐ꓢꓷ ꓐꓴ ꓥˍ ꓟꓲ ꓙꓵꓽ ꓪ ꓕꓱ ꓟ ꓔꓯ ꓣꓱꓽˍ ꓡꓳ꓿ ꓖꓳ ꓡꓱ ꓥˍ ꓟꓲ ꓢꓲ ꓒ ꓬꓰ‐ꓢꓴ ꓠꓽ ꓮ ꓟꓬ, ꓙꓲꓻ ꓖꓴ ꓐꓱ ꓶ ꓠꓱ. ꓐꓯ ꓢꓴ ꓔꓯ ꓤꓶꓻ ꓔꓯ ꓛꓵ ꓔꓴ ꓠ, ꓟ ꓐꓱ ꓶ ꓬꓲ ꓙꓵꓽ ꓪ ꓔꓯ ꓣꓱꓽ ꓗꓷꓳ꓿
ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓟꓽ ꓫꓬ ꓠꓲꓽ ꓜꓶꓽ ꓞ, ꓢꓴ ꓔꓯ ꓢꓲ ꓒ ꓬꓰ‐ꓢꓴ ꓬꓲ ꓙꓵꓽ ꓪ ꓗꓪ ꓐꓰ ꓠꓲꓽ ꓔꓯ ꓖꓼ ꓓꓳ ꓖꓶ ꓗꓷꓳ꓿ ꓡ ꓞꓳ ꓖꓳ ꓕꓲ ꓣꓳ ꓠꓬ ꓟꓽ ꓫꓬ ꓠꓲꓽ ꓡꓰ ꓞꓳ, ꓞ, ꓟ ꓗꓪ ꓐꓰ ꓡꓲ, ꓙꓰ ꓟꓶ ꓡꓰꓳ꓿
