ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓖꓳ ꓓꓱꓽ ꓔꓲ ꓟ ꓑꓮꓲꓽ (jan.11.2026)
ꓧꓪ. ꓧꓪ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓲꓺ ꓒ ꓢꓲꓺ ꓒ ꓬꓰ‐ꓢꓴ ꓖꓳꓽ ꓓꓱ ꓔꓲ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 3ꓽ 13‐17 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓖꓳꓽ ꓓꓱ ꓔꓲ ꓒꓽ ꓬꓳ‐ꓦ ꓡꓯꓽ ꓒꓯ, ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓖꓳꓽ ꓓꓱ ꓔꓲ ꓟ ꓚꓱ, ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓣꓳ ꓟꓲ ꓠꓯ ꓡ ꓞꓳ ꓮ ꓡꓰ ꓓꓵꓽ ꓙ ꓟ ꓐꓰ ꓡ ꓞꓳ ꓤꓶꓻ ꓠꓯ, ꓗꓪ ꓓꓵꓽ ꓡꓰ ꓟ ꓥ ꓡꓳ꓿ ꓬꓰ‐ꓢꓴ ꓙꓲ‐ꓢꓴ ꓠꓬ ꓝꓴꓲ. ꓟꓽ ꓙꓳ ꓥ ꓟꓲ ꓖꓳꓽ ꓓꓱ ꓔꓲ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓖꓳꓽ ꓓꓱ ꓔꓲ ꓒꓽ ꓬꓳ‐ꓦ ꓡꓯꓽ ꓒꓯ, ꓗꓪ ꓬꓳ‐ꓔ ꓬꓲꓻ ꓟ ꓗꓪ ꓖꓳꓽ ꓓꓱ ꓔꓲ ꓗꓷ ꓟ ꓠꓬ ꓥ ꓡꓳ꓿
ꓖꓳ ꓟ ꓠꓬ ꓬꓰ‐ꓢꓴ ꓙꓲ‐ꓢꓴ ꓠꓬ ꓙ ꓣꓳ ꓟ ꓠꓲ, ꓟ ꓙꓳ ꓟ ꓔꓯ ꓟꓲ ꓠꓯ ꓡ ꓞꓳ ꓔꓯ ꓟ. ꓖꓶ ꓠ, ꓟ ꓥ ꓡꓳ꓿ ꓝꓮꓲ ꓬꓲ ꓠꓬ ꓟꓲ ꓠꓯ ꓡ ꓞꓳ ꓬꓰ ꓟ ꓙꓲ ꓟ ꓟꓬꓱꓽ ꓔꓯ ꓠꓲ, ꓟ ꓚꓱ, ꓔꓯ ꓟ. ꓖꓶ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓐꓰ ꓶꓻ ꓤ ꓗꓪ ꓔꓬ ꓢꓴ ꓟꓽ ꓥ ꓬꓲ ꓠꓬ ꓣꓳ ꓐꓰ ꓕꓲ ꓪ ꓒ ꓕꓲ ꓗꓪ ꓔꓬ ꓢꓴ ꓥ ꓡꓳ꓿ ꓬꓲ ꓟꓲ ꓠꓯ ꓡ ꓞꓳ ꓮ ꓡꓰ ꓐꓰ ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓠꓬꓲ ꓢꓯ. ꓔꓬ ꓟ ꓔꓯ ꓬꓲ ꓠꓬ ꓢꓷ. ꓢꓴ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓣꓳ ꓐꓰ ꓕꓲ ꓪ ꓔꓬ ꓢꓴ ꓰ‐ꓟ‐ꓠꓴ‐ꓡꓲ ꓪꓴ‐ꓢ ꓥ ꓡꓳ꓿ ꓬꓴ‐ꓔ ꓬꓲꓻ ꓙꓬ ꓗꓪ ꓖꓳꓽ ꓓꓱ ꓔꓲ ꓖꓶ ꓟ ꓬꓲꓻ ꓙꓬ ꓘꓴꓽ ꓗꓪ ꓓꓵꓽ ꓡꓰ ꓟ ꓗ. ꓠꓯ ꓢꓲꓺ ꓒ ꓬꓰ‐ꓢꓴ ꓠꓬ ꓪꓴ‐ꓢ ꓟꓬꓱꓽ ꓔꓯ ꓓꓽ ꓪꓴ. ꓬꓰ ꓓꓵ ꓡꓰ ꓟ ꓥ ꓡꓳ꓿
ꓖꓳꓽ ꓓꓱ ꓔꓲ ꓗꓷ ꓚꓱ, ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓣꓳ ꓟꓲ ꓠꓯ ꓡ ꓞꓳ ꓔꓯ ꓫꓵꓻ ꓗꓪ ꓐꓰ ꓝꓮꓲ ꓢꓯ. ꓬꓲꓼ ꓡ ꓟ ꓚꓱ, ꓗꓪ ꓧꓳꓽ ꓙꓰ ꓟ ꓔꓯ ꓟꓲ ꓠꓯ ꓡ ꓞꓳ ꓔꓯ ꓟ. ꓖꓶ ꓗꓷ ꓟ ꓥ ꓡꓳ꓿ ꓬꓲꓻ ꓙꓬ ꓘꓴꓽ ꓗꓪ ꓓꓵꓽ ꓡꓰ ꓟ ꓚꓱ, ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓫꓵꓻ ꓡꓰ ꓟ ꓔꓯ ꓢꓷ. ꓡꓲ ꓝꓲ ꓟ ꓥ ꓡꓳ꓿ ꓬꓲꓻ ꓙꓬ ꓗꓪ ꓐꓰ ꓔꓴ ꓟ ꓠꓬ ꓤꓶꓻ ꓬꓲ ꓫꓵꓼ ꓫꓬ, ꓟ ꓢꓷ. ꓡꓲ ꓓꓴ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓝꓴꓲ. ꓙꓳ ꓟ ꓠꓲ ꓠꓯ ꓡ ꓞꓳ ꓔꓯ ꓚꓬꓴ ꓠ, ꓟ ꓬꓲ ꓤꓶꓻ ꓔꓯ ꓖꓶ ꓗꓷ ꓟ ꓔꓯ ꓟ. ꓖꓶ ꓟ ꓥ ꓡꓳ꓿ ꓖꓳꓽ ꓓꓱ ꓔꓲ ꓖꓶ ꓟ ꓠꓬ ꓡꓯꓼ ꓐꓳ ꓔꓲ ꓓꓴ ꓙ ꓖꓴ ꓗꓪ ꓙꓰ ꓟ ꓙ ꓖꓴ ꓬꓲ ꓪꓴ. ꓥ ꓟ ꓔꓯ ꓣꓳ ꓟꓲ ꓠꓯ ꓡ ꓞꓳ ꓔꓯ ꓟ. ꓖꓶ ꓟ ꓥ ꓡꓳ꓿
ꓐ, ꓐ ꓤ ꓔꓲ ꓢꓲ‐ꓫꓬ‐ꓟ‐ꓦ ꓪꓴ‐ꓢ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓠꓬ ꓬꓰ‐ꓢꓴ ꓖꓳꓽ ꓓꓱ ꓔꓲ ꓗꓷ ꓟ ꓙꓵ, ꓕꓯ ꓔꓬ ꓟ ꓚꓱ, ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓤ ꓔꓲ ꓬꓰ‐ꓢꓴ ꓙꓲ‐ꓢꓴ ꓠꓬ ꓬꓴ‐ꓔ ꓬꓲꓻ ꓟ ꓗꓪ ꓖꓳꓽ ꓓꓱ ꓔꓲ ꓗꓷ ꓟ ꓙꓵ, ꓕꓯ ꓢꓲꓽ‐ꓫꓬ‐ꓟ‐ꓦ ꓪꓴ‐ꓢ ꓠꓬ ꓮ‐ꓖꓴ ꓗꓪ ꓐꓰ ꓬꓯꓼ ꓡ ꓟ ꓥ ꓡꓳ꓿ ꓐ, ꓐ ꓪꓴ‐ꓢ ꓡꓰ ꓕꓱ ꓟ ꓠꓬ ꓥꓪ ꓮ ꓘꓶ. ꓠꓲ, ꓟ ꓥꓪ ꓤ ꓔꓲ ꓥ ꓡꓳ ꓐꓰ ꓢꓯꓼ ꓓꓽ ꓟ ꓡꓰ ꓫ. ꓕꓱ ꓗꓷꓳ꓿ ꓕꓱ ꓟ ꓗꓪ ꓐꓰ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓠꓬ ꓮ ꓕꓯ ꓟꓲ ꓕꓲ ꓪ ꓔꓬ ꓟ ꓔꓯ ꓣꓳ ꓔꓯ ꓢꓷ. ꓡꓲ ꓝꓲˍ ꓟ ꓥ ꓡꓳ꓿ ꓣꓳ ꓖꓳ ꓓꓱꓽ ꓔꓲ ꓟ ꓚꓱ, ꓠꓬ ꓪꓴ‐ꓢ ꓗꓪ ꓐꓰ ꓡꓯꓽ ꓫꓴꓻ ꓘꓳ, ꓣꓴ ꓟꓶ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓖꓳꓽ ꓓꓱ ꓔꓲ ꓟ ꓚꓱ, ꓔꓯ ꓒ ꓙ ꓗꓷ ꓠꓬ ꓣꓳ ꓚꓲ. ꓛꓬ ꓥ ꓟꓲ ꓖꓳ ꓓꓱꓽ ꓔꓲ ꓗꓷ ꓟ ꓔꓯ ꓝꓮꓲ ꓓꓵꓽ ꓙ ꓛꓲ ꓡ ꓟ ꓥ ꓡꓳ꓿ ꓣꓳ ꓖꓳꓽ ꓓꓱ ꓔꓲ ꓟꓶ ꓡꓰ ꓟ ꓙꓵ, ꓕꓯ ꓬꓲꓻ ꓙꓬ ꓠꓬ ꓣꓳ ꓝꓴꓲ ꓔꓯ ꓫꓬ, ꓡꓰ ꓝꓲˍ ꓟ ꓥ ꓡꓳ꓿ ꓝꓮꓲ ꓤꓶꓻ ꓬꓲ ꓫꓵꓼ ꓔꓯ ꓣꓳ ꓔꓯ ꓖꓶ ꓡ ꓟ ꓥ ꓡꓳ꓿ ꓣꓳ ꓠꓬ ꓪꓴ‐ꓢ ꓐꓰ ꓕꓲ ꓖꓳꓽ ꓓꓱ ꓒꓬꓱꓽ ꓡꓰ ꓢꓲ ꓠꓬꓲ ꓪꓴ‐ꓢ ꓤ ꓠꓱ ꓒꓬꓱꓼ ꓡꓰ ꓟ ꓥ ꓡꓳ꓿ ꓝꓮꓲ ꓪꓴ‐ꓢ ꓠꓬ ꓬꓲ ꓔꓯ ꓠ ꓡꓳ ꓟ ꓔꓯ ꓠꓲ, ꓫꓵˍ ꓢꓴ ꓥ ꓡꓳ꓿ ꓣꓳ ꓚꓲ. ꓛꓬ ꓤꓶꓻ ꓠꓯ, ꓗꓪ ꓔꓳ, ꓜꓳ ꓔꓬ ꓟ ꓪꓴꓽ ꓫꓵꓽ ꓔꓯ ꓠꓱ. ꓐꓯ ꓡ ꓞꓳ ꓠꓬ ꓟꓽ ꓢꓷ. ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬ ꓢꓷ. ꓢꓴ ꓥ ꓡꓳ꓿ ꓬꓲ ꓔꓯ ꓣꓳ ꓙꓵꓽ ꓓꓴ ꓬꓰ ꓡꓯ꓿
ꓪꓴ‐ꓢ ꓠꓲ, ꓡꓶꓽ ꓔꓯ ꓒꓴꓽ ꓛꓳꓽ ꓢꓴ ꓠꓬ ꓠ ꓡꓳ ꓢꓴ ꓠꓬ ꓶꓽ ꓙꓳ ꓫꓱ, ꓙꓳ ꓟ ꓥꓡꓳ꓿ ꓠꓬꓲ. ꓠꓬꓲ ꓗꓪ ꓐꓰ ꓠꓴ ꓥꓪ ꓠꓬ ꓣꓳ ꓖꓳꓽ ꓓꓱ ꓔꓲ, ꓗꓷ ꓟ ꓔꓯ ꓓꓴ ꓙ ꓢꓲ ꓠꓬꓲ ꓤꓶꓻ ꓬꓲ ꓫꓵꓼ ꓝꓮꓲ ꓙ ꓣꓳ ꓟ ꓠꓲ, ꓟ ꓙꓳ ꓢꓴ꓾ ꓢꓲꓺ ꓒ ꓠꓲ, ꓡꓶꓽ ꓔꓯ ꓒꓴꓽ ꓛꓳꓽ ꓢꓴ ꓒꓬꓱꓼ ꓡ ꓢꓴ ꓒꓬꓱꓼ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓠꓬ ꓪꓴ‐ꓢ ꓤ ꓠꓱ ꓥ ꓟ ꓔꓯ ꓮ ꓫꓵꓽ ꓟꓬꓱꓽ ꓟꓽ ꓬꓰ ꓢꓲ ꓕꓯ ꓐ, ꓐ ꓤ ꓔꓲ ꓢꓲ‐ꓫꓬ‐ꓠꓟ‐ꓦ ꓢꓽ ꓣꓳ ꓕꓲ ꓖꓳ ꓓꓱ ꓪꓴ‐ꓢ ꓔꓯ ꓡꓯꓼ ꓙꓱ ꓢꓲ ꓠꓬꓲ ꓙ ꓫꓱ, ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
