ꓢꓲ ꓒ ꓬꓰ‐ꓢꓴ ꓠꓬ ꓮ ꓫꓵꓽ ꓑꓶ. ꓓꓴ ꓖꓳ ꓓꓱꓽ ꓔꓲ, ꓡ꓿ ꓬꓲ ꓠꓬ ꓝꓴꓲ. ꓟꓽ ꓙꓳ ꓥˍ ꓟꓲ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓔꓬ ꓗꓪ ꓙꓰ ꓢꓲ ꓮ ꓫꓵꓽ ꓑꓶ. ꓓꓴ ꓖꓳ ꓓꓱꓽ ꓔꓲ, ꓡ꓿ ꓬꓲꓼ ꓤ ꓠꓬꓲ ꓤ ꓐꓴꓳ ꓧꓪ. ꓧꓪꓸꓼ꓿ ꓢ. ꓠꓯ ꓠꓬ ꓢꓲ ꓒ ꓬꓰ‐ꓢꓴ ꓖꓳ ꓓꓱꓽ ꓔꓲ,ˍ ꓟ ꓑꓮꓲꓽ ꓔꓯ ꓣꓳ ꓬꓰ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓙꓵ, ꓛꓲ ꓡˍ ꓕꓯ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓔꓯ ꓙꓰ ꓢꓲ ꓠꓬꓲ ꓙꓳꓣꓓꓮꓠ ꓬꓲꓻ ꓙꓬ ꓗꓪ ꓖꓳ ꓓꓱꓽ ꓔꓲ, ꓡꓳ꓿
ꓮ ꓫꓵꓽ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓖꓳ ꓓꓱꓽ ꓔꓲ,ˍ ꓡ ꓐꓰ ꓐꓯˍ ꓠꓬ꓾ ꓬꓲ ꓔꓯ ꓝꓴꓲ. ꓙꓳˍ ꓟ ꓝꓴꓲ. ꓠꓶꓼ ꓓ, ꓟ ꓑꓶ. ꓓꓴ ꓟꓽ ꓥ ꓥ ꓐꓰ꓾ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓝꓴꓲ. ꓙꓳ ꓢꓴ ꓐꓰ ꓕꓲ ꓪꓽˍ ꓦꓰꓼ ꓞ, ꓔꓬ ꓡꓳ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓝꓴꓲ. ꓙꓳ ꓢꓴ ꓔꓯ ꓚꓬꓴ. ꓠ, ꓟ ꓐꓱ ꓶ ꓟꓴ ꓗꓪ ꓗꓪ ꓔꓬ ꓢꓲ ꓠꓬꓲ ꓟꓽ ꓘꓴꓻ ꓔꓬ꓿ ꓟꓴ ꓗꓪ ꓗꓪ ꓚꓳ. ꓟꓬ ꓔꓱ, ꓡꓳ. ꓢꓲ ꓠꓬꓲ ꓞꓳ ꓤ ꓔꓯ ꓟꓽ ꓚꓬꓴ.꓿ ꓖꓳ ꓡꓱ ꓐꓯˍ ꓥ ꓟꓲ ꓝꓴꓲ. ꓙꓳ ꓢꓴ ꓐꓰ ꓕꓲ ꓡꓰ, ꓕꓲ ꓛꓳˍ ꓦꓰꓼ ꓞ, ꓢꓲ꓾ ꓝꓴꓲ. ꓙꓳ ꓢꓴ ꓦꓰꓼ ꓞ, ꓔꓬ ꓟ ꓟꓲ ꓠꓯ ꓕꓯꓽ ꓢꓲ ꓬꓲ ꓠꓬ ꓦꓰꓼ ꓞ, ꓢꓲ ꓠꓬꓲ ꓝꓴꓲ. ꓙꓳ ꓢꓴ ꓔꓯ ꓚꓬꓴ.ˍ ꓟ ꓥ ꓡꓳ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓖꓳ ꓡꓱ ꓠꓬꓲ ꓝꓴꓲ. ꓙꓳ ꓢꓴ ꓞꓳ ꓤ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓗꓶ, ꓡꓽ ꓡꓰꓳ꓿ ꓮ ꓡꓲꓳ ꓐꓯˍ ꓠꓬ ꓝꓴꓲ. ꓙꓳ ꓢꓴ ꓒ ꓕꓲ ꓗꓪ ꓢꓲ ꓒ ꓬꓰ‐ꓢꓴ ꓦꓰꓼ ꓞ, ꓡ ꓟ ꓑꓶ. ꓓꓴ ꓥ ꓡꓳ꓿
ꓝꓮꓲ ꓕꓲ ꓫꓵꓽ ꓟ ꓠꓬ ꓙꓳꓣꓓꓮꓠ ꓬꓲꓻ ꓙꓬ ꓖꓳ ꓟ ꓠꓬ ꓬꓲ. ꓬꓲ ꓢꓲ ꓮ ꓘꓶ. ꓙꓳˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓰ ꓐꓯˍ ꓠꓬ ꓬꓲ‐ꓢꓷ‐ꓡꓰ ꓡ ꓞꓳ ꓐꓴ ꓬꓲ‐ꓙꓲ ꓟꓵꓽ ꓗꓪ ꓐꓰ ꓓꓳ ꓡ ꓢꓲ ꓠꓬꓲ ꓪꓴ‐ꓢ ꓡꓰ ꓪꓵꓼ ꓘꓶ ꓖꓶ ꓔ ꓟ ꓘ‐ꓠ ꓟꓵꓽ ꓗꓪ ꓓꓵꓽ ꓬꓰˍ ꓕꓯ ꓬꓲ ꓪ ꓠꓬ ꓬꓲꓻ ꓙꓬ ꓖꓳ ꓟ ꓔꓯ ꓗꓳ. ꓙꓰ ꓠ ꓔˍ ꓡꓳ꓿ ꓖꓳ ꓡꓱ ꓠꓬꓲ ꓬꓲꓻ ꓙꓬ ꓖꓳ ꓟ ꓠꓬ ꓧꓪ. ꓡꓰˍ ꓟ꓾ ꓓꓶꓽ ꓧꓪ. ꓡꓰˍ ꓟ ꓬꓲ ꓚꓱ, ꓥˍ ꓟꓲ ꓢꓷ. ꓡꓰ ꓓꓴ ꓥˍ ꓟꓲ ꓕꓲ ꓫꓵꓽ ꓥ ꓡꓳ꓿
ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓬꓲꓻ ꓙꓬ ꓖꓳ ꓟ ꓗꓪ ꓖꓳ ꓓꓱꓽ ꓔꓲ, ꓡˍ ꓐꓰ ꓐꓯˍ ꓟ ꓠꓬ ꓠꓬꓲ. ꓠꓬꓲ ꓣꓳ ꓮ ꓙꓵꓽ ꓠꓬ ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓐꓰ ꓪꓴ‐ꓢ ꓤ ꓠꓱ ꓒꓬꓱꓼ ꓡꓺꓳ꓾ ꓧꓪ. ꓡꓰꓳ꓾ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓔꓯ ꓬꓲꓻ ꓙꓬ ꓗꓪ ꓐꓰ ꓞꓲꓽ ꓫꓬ ꓡꓰˍ ꓟ ꓟꓽ ꓥ ꓥ ꓐꓰ꓾ ꓢꓲ ꓒ ꓬꓰ‐ꓢꓴ ꓠꓬ ꓬꓲꓻ ꓙꓬ ꓔꓯ ꓢꓲꓽ ꓫꓬ ꓡꓰ ꓝꓲ ꓢꓴ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓬꓲꓻ ꓙꓬ ꓘꓴꓽ ꓗꓪ ꓓꓵꓽ ꓙꓰˍ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓫꓬ ꓡꓰˍ ꓟ ꓟꓽ ꓥ ꓥ ꓐꓰ ꓬꓲꓻ ꓙꓬ ꓠꓬ ꓫꓬ ꓡꓰˍ ꓟ ꓬꓲ ꓚꓱ, ꓥ ꓡꓳ꓿
ꓖꓳ ꓡꓱ ꓢꓲ ꓒ ꓬꓰ‐ꓢꓴ ꓖꓳ ꓓꓱꓽ ꓔꓲ,ˍ ꓔꓯ ꓟꓴ ꓗꓪ ꓗꓪ ꓚꓳ. ꓐꓶꓽ ꓡ ꓢꓲ ꓠꓬꓲ ꓐ, ꓐ ꓪꓴ‐ꓢ ꓬꓲ ꓢꓯꓼ ꓥˍ ꓟꓲ ꓑ ꓙꓽˍ ꓡꓳ꓿ ꓢꓲꓽ‐ꓫꓬ‐ꓟ‐ꓦ ꓥˍ ꓟꓲ ꓬꓯꓼ ꓡˍ ꓡꓳ꓿ ꓖꓳ ꓡꓱ ꓠꓬꓲ ꓢꓽ ꓣꓳ ꓕꓲ ꓖꓳ ꓓꓱꓽ ꓪꓴ‐ꓢ ꓐꓰ ꓣꓳ ꓫꓬꓽ ꓫꓬꓽ ꓡꓰꓽ ꓑ ꓙˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓖꓳ ꓓꓱꓽ ꓔꓲ,ˍ ꓟ ꓖꓳ ꓕꓲ ꓔꓳ. ꓗꓪ ꓥ ꓡꓳ꓿
