ꓢꓲ ꓒ ꓬꓰ‐ꓢꓴ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ꓾ ꓠꓬꓲ. ꓠꓬꓲ ꓠꓬ ꓢꓲꓽ ꓫꓬ ꓕꓳꓽ ꓶ ꓕꓱ ꓕꓲ ꓕꓱ ꓠꓬ ꓠꓴ ꓪ ꓑ ꓙꓽˍ ꓟ ꓗꓪ ꓐꓰ ꓐꓲ ꓡꓰꓳ꓾ ꓐꓰ ꓐꓯˍ ꓟ ꓐꓯ ꓘꓶꓽ ꓥ ꓡꓳ꓿ ꓟ. ꓟꓲꓽ ꓝꓲ. ꓕꓱ ꓟ ꓠꓬ ꓡꓴ‐ꓘ 4ꓽ14‐22 ꓗꓪ ꓟ ꓥꓳ꓿
ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓳꓽ ꓗꓪ ꓠꓬ ꓕꓱ ꓡꓱ ꓐꓯ ꓔ ꓡꓳ꓿ ꓢꓲ ꓒ ꓬꓰ‐ꓢꓴ ꓠꓬ ꓖ‐ꓡꓲ‐ꓡꓲ ꓟꓵꓽ ꓗꓪ ꓚꓳ ꓙꓰ ꓢꓲ ꓠꓬꓲ ꓟ. ꓟꓲꓽ ꓚ ꓟ. ꓖꓶ ꓔꓬ ꓡꓳ꓿ ꓜꓲꓼ ꓦꓲ ꓗꓪ ꓛꓲ ꓡ ꓠꓬ ꓬꓲ ꓠꓬ ꓟ. ꓟꓲꓽ ꓡꓲꓺ ꓔꓯ ꓒꓶ ꓢꓲ ꓠꓬꓲ ꓵˍ ꓡꓳ꓿ ꓟ. ꓟꓲꓽ ꓡꓲꓺ ꓠꓬ ꓬꓲ‐ꓢ‐ꓬ ꓕꓳꓽ ꓶ ꓥ ꓡꓳ꓿
ꓬꓲ‐ꓢ‐ꓬ ꓕꓳꓽ ꓶ ꓗꓪ ꓠꓬ ꓢꓲ ꓒ ꓬꓰ‐ꓢꓴ ꓡꓰ ꓕꓰ ꓡꓰ ꓵˍ ꓡꓳ꓿ “ꓢꓲ ꓒ ꓬꓲ ꓦ ꓠꓬ ꓥꓪ ꓔꓯ ꓥꓳꓽ ꓞ, ꓡꓳ꓿ ꓮ ꓡꓲꓳ ꓐꓯˍ ꓠꓬ ꓞꓳ ꓫ ꓔꓯ ꓶꓼ ꓥꓳꓽ ꓫꓱ, ꓥꓳꓽ ꓚ ꓟ. ꓖꓶ ꓠ, ꓟ ꓬꓲ ꓥꓪ ꓔꓯ ꓟꓰ ꓞꓶꓻ ꓟꓰ ꓗꓷꓳ꓿ ꓖꓳ ꓡꓱ ꓢꓲ ꓚꓳ ꓑ ꓔꓯ ꓩꓴ ꓗꓷˍ ꓟ ꓓꓳꓽ ꓐꓰ ꓟꓬ ꓔꓶ ꓠꓬꓲ ꓟꓳꓻ ꓡ ꓟ ꓓꓳꓽ ꓚ ꓟ. ꓖꓶˍ ꓟ ꓐꓰ꓾ ꓠꓬꓲ. ꓬꓯꓼ ꓢꓴ ꓔꓯ ꓩꓴ ꓗꓷˍ ꓟ ꓓꓳꓽ ꓐꓰ ꓢꓲ ꓒ ꓠꓬ ꓞꓳ ꓤ ꓔꓯ ꓘꓳ ꓣꓴˍ ꓟ ꓘꓳꓼ ꓚ ꓟ. ꓖꓶ ꓠ, ꓟ ꓬꓲ ꓥꓪ ꓔꓯ ꓝꓲ ꓩꓴ ꓡꓺꓳ ꓐꓰ ꓐꓳ ꓔ ꓡꓳ꓾” ꓐꓰ ꓢꓲ ꓒ ꓬꓰ‐ꓢꓴ ꓕꓱ ꓡꓱ ꓐꓯˍ ꓟ ꓟ. ꓟꓲꓽ ꓝꓲ. ꓥꓳ꓿ ꓝꓮꓲ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓡꓳ, ꓬꓰˍ ꓕꓯ ꓕꓳꓽ ꓶ ꓡꓲꓺ ꓔꓯ ꓡꓲꓺ ꓗꓷ ꓗ ꓠꓯ. ꓬꓲ ꓠꓬ ꓕꓱ ꓡꓱ ꓐꓯˍ ꓡꓳ꓾ “ꓠꓬꓲ. ꓠꓬꓲ ꓠꓬ ꓢꓲꓽ ꓫꓬ ꓕꓳꓽ ꓶ ꓕꓱ ꓕꓲ ꓕꓱ ꓠꓬ ꓠꓴ ꓪ ꓑ ꓙꓽˍ ꓟ ꓗꓪ ꓐꓰ ꓐꓲ ꓡꓰꓳ꓾” ꓐꓰ ꓐꓯˍ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓵˍ ꓟ ꓬꓲ‐ꓢ‐ꓬ ꓕꓳꓽ ꓶ ꓠꓬ ꓧꓶ. ꓕꓯ ꓮ ꓠꓱ ꓟꓷꓽ ꓠꓷ, ꓝ ꓢꓴ ꓬꓲ‐ꓢ‐ꓬ ꓤꓶꓻ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓤꓶꓻ ꓗꓪ ꓛꓲ ꓠꓬ 700 ꓘꓳꓼ ꓟꓽ ꓞꓲꓺꓟꓶ ꓫꓵˍ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓗꓳ. ꓗꓷ ꓟ 700 ꓘꓳꓼ ꓬꓲ‐ꓢ‐ꓬ ꓐꓯ ꓔ ꓟ ꓐꓯ ꓘꓶ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓐꓯ ꓔꓬ ꓟ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓕꓱ ꓟ ꓠꓬ ꓥꓪ ꓔꓯ ꓐꓯ ꓔꓬ ꓟ ꓥꓳ꓾ ꓠꓬꓲ. ꓠꓬꓲ ꓠꓬ ꓗꓳ. ꓡ 700 ꓘꓳꓼ ꓟꓽ ꓞꓲ ꓗꓪ ꓠꓴ ꓪ ꓥꓳ ꓡꓳ. ꓔꓬ ꓟ ꓪꓴ‐ꓢ ꓠꓬ ꓥꓪ ꓥꓳ꓾ ꓐꓰ ꓐꓯˍ ꓟ ꓔꓯ ꓬꓲ ꓐꓯ ꓔꓬ ꓟ ꓥ ꓡꓳ= ꓕꓱ ꓟ ꓑꓶꓸ ꓓꓴ ꓗꓳꓸ ꓡˍ ꓕꓯ ꓥꓳ ꓡꓳꓸ ꓔꓬ ꓟ ꓠꓬꓲꓸ ꓠꓬꓲ ꓕꓱ ꓗꓪ ꓛꓲ ꓡꓺꓳ꓾ ꓐꓰ ꓐꓯ ꓖꓶ ꓔꓬ ꓟ ꓐꓯ ꓘꓶꓽ ꓥ ꓡꓳ=
ꓝꓮꓲ ꓕꓲ ꓟ ꓠꓬ꓾ ꓠꓬꓲꓸ ꓠꓬꓲ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓠꓬ ꓠꓴ ꓪ ꓑ ꓙꓽˍ ꓟ ꓗꓪ ꓐꓰ ꓐꓲ ꓡꓰꓳ ꓐꓰ ꓐꓯˍ ꓟ ꓕꓲ ꓡꓰꓹ ꓐꓰ ꓣꓳ ꓤꓶꓻ ꓗꓪ ꓥˍ ꓟꓲ ꓪꓴ-ꓢ ꓐꓯ ꓘꓶꓽ ꓠꓬ ꓐꓲ ꓜꓲꓼ ꓡꓰꓳ ꓐꓰ ꓐꓯ ꓠꓹ ꓟ ꓥꓳ=
