ꓧꓪ. ꓧꓪ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ ꓟꓶ ꓓꓳ ꓟꓵꓽ ꓗꓪ ꓐꓰ ꓪ ꓔꓲ ꓢꓽ ꓣꓳ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓑꓶ ꓓꓳ ꓟꓵꓽ ꓗꓪ ꓪ ꓔꓲ ꓢꓽ ꓣꓳ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓪꓴ. ꓓꓴ. ꓕꓵꓼ ꓡ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓥ ꓟ ꓟ‐ꓕꓲ ꓕꓳ ꓶ 2ꓽ1‐12 ꓝꓲ. ꓗꓪ ꓑꓶ ꓓꓴ ꓟꓵꓽ ꓗꓪ ꓐꓰ ꓢꓷ. ꓠꓲ, ꓙꓳ ꓢꓴ ꓪ ꓔꓲ ꓢꓽ ꓣꓳ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓡ ꓢꓲ ꓠꓬꓲ ꓪꓴ. ꓓꓴ ꓕꓵꓼ ꓡ ꓟ ꓚꓱ, ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓬꓲ ꓔꓯ ꓧꓪ, ꓢꓴ ꓐꓴ ꓔꓯ ꓢꓷ. ꓡꓲ ꓓꓴ ꓟ. ꓖꓶ ꓢꓲ ꓠꓬꓲ ꓜꓲꓼ ꓟ ꓥ ꓡꓳ꓿ ꓢꓷ. ꓠꓲ, ꓙꓳ ꓟ ꓪ ꓔꓲ ꓢꓽ ꓣꓳ ꓠꓬ ꓬꓴ‐ꓔ ꓞꓳ ꓫꓵꓽ ꓟꓽ ꓥ꓿ ꓖꓳ ꓡꓱ ꓥ ꓟꓲ ꓪꓴ. ꓠꓬꓲ ꓠꓱ. ꓐꓯꓼ ꓞꓳ ꓫꓵꓽ ꓥ ꓟꓲ ꓟꓴ ꓗꓪ ꓢꓷ. ꓡꓲ ꓓꓴ ꓔꓯ ꓡꓳ. ꓟꓳ ꓟ ꓪꓴ. ꓠꓬꓲ ꓟꓲ ꓠꓯ ꓪ ꓔꓲ ꓐꓴ ꓮ ꓙꓵꓽ ꓕꓯ ꓢꓲ ꓪꓴ. ꓟ ꓪ ꓔꓲ ꓦꓵꓻ ꓡ ꓟ ꓚꓱ, ꓔꓯ ꓟꓴ ꓗꓪ ꓖꓳ ꓟ ꓗꓪ ꓐꓰ ꓢꓷ. ꓡꓰ ꓟ ꓥ ꓡꓳ꓿ ꓬꓲ ꓪ ꓠꓬ ꓙꓵꓻ ꓠꓲ, ꓗꓪ ꓐꓰ ꓪ ꓔꓲ ꓔꓯ ꓧꓪ ꓡ ꓟ ꓥ ꓡꓳ꓿ ꓪꓴ‐ꓢ ꓠꓬ ꓬꓲ ꓪ ꓠꓲ, ꓟ ꓠꓯ, ꓗꓪ ꓫ. ꓕꓱ ꓢꓲ ꓠꓬꓲ ꓙ ꓣꓳ ꓢꓴ ꓐꓴ ꓔꓯ ꓝꓮꓲ ꓬꓲ ꓔꓯ ꓧꓪ ꓢꓴ ꓐꓴ ꓔꓯ ꓟꓳ. ꓖꓶ ꓟ. ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓣꓳ ꓤꓶꓻ ꓠꓯ, ꓗꓪ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓙꓰ ꓝꓲ ꓟ ꓧꓳꓽ ꓟꓳ. ꓖꓶ ꓟ ꓖꓳ ꓟ ꓡꓰ ꓐꓰ ꓫꓱ ꓡꓯꓽ ꓘꓳ, ꓟ ꓡ ꓞꓳ ꓐꓰ ꓣꓳ ꓔꓯ ꓟ. ꓖꓶ ꓢꓴ ꓝꓮꓲ ꓬꓲ ꓙꓵ, ꓙꓳ ꓟ ꓥ ꓡꓳ꓿ ꓖꓳ ꓟ ꓔꓯ ꓣꓳ ꓮ ꓡꓰ ꓐꓰ ꓣꓱ ꓢꓲ ꓠꓬꓲ ꓢꓲꓺ ꓒ ꓠꓯ, ꓗꓪ ꓙꓰ ꓔꓬ ꓢꓴ ꓒꓬꓱꓼ ꓔꓬ ꓡ ꓣꓳ ꓓꓵ ꓙ ꓠ, ꓟ ꓥ ꓡꓳ꓿ ꓙꓵꓻ ꓠꓲ, ꓠꓬ ꓙꓻ ꓫꓱ ꓠ, ꓟ ꓙ ꓖ ꓴ ꓓꓽ ꓟ ꓕꓲ ꓟ ꓥ ꓟ ꓔꓯ ꓟ. ꓖꓶ ꓡ ꓟ ꓥ ꓡꓳ꓿ ꓢꓷ. ꓠꓲ, ꓙꓳ ꓟ ꓑꓶ ꓓꓳ ꓟꓵꓽ ꓗꓪ ꓐꓰ ꓪ ꓔꓲ ꓐꓴ ꓠꓬ ꓟꓵꓽ ꓛꓱꓼ ꓟꓵꓽ ꓬꓲꓻ ꓙꓬ ꓟꓽ ꓙꓳ ꓟ ꓟꓵꓽ ꓗꓪ ꓙꓰ ꓢꓲ ꓠꓬꓲ ꓮ ꓘꓶ. ꓛꓲ ꓶꓻ ꓤ ꓟ ꓟꓵꓽ ꓗꓪ ꓐꓰ ꓡ ꓗꓷ ꓟ ꓥ ꓡꓳ꓿ ꓖꓳ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓣꓳ ꓙꓵꓻ ꓠꓲ, ꓥ ꓟꓲ ꓕꓱ ꓟ ꓡꓰ ꓐꓰ ꓫꓱ, ꓡꓯꓽ ꓘꓳ, ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓥ ꓡꓳ꓿ ꓙꓵꓻ ꓠꓲ, ꓠꓬ ꓢꓲ ꓡꓲ ꓟ ꓔꓬ ꓠ, ꓟ ꓐꓱ ꓶ ꓟꓽ ꓥ꓿ ꓣꓳ ꓠꓬ ꓚꓲ. ꓛꓬ ꓠꓯ, ꓗꓪ ꓙꓳ ꓟ ꓢꓯꓼ ꓪ ꓔꓯ ꓣꓱ ꓢꓲ ꓠꓬꓲ ꓙꓲ ꓟ ꓟꓬꓱꓽ ꓔꓯ ꓬꓰ ꓢꓴ ꓝꓮꓲ ꓮ ꓕꓯ ꓥ ꓟꓲ ꓢꓲꓺ ꓒ ꓔꓯ ꓧꓪ, ꓢꓴ꓾ ꓒꓬꓱꓼ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓧꓪ, ꓠ, ꓟ ꓣꓳ ꓢꓽ ꓢꓽ ꓔꓬ ꓟ ꓔꓶ. ꓗꓪ ꓐꓰ ꓓꓳ ꓙꓰ ꓢꓲ ꓠꓬꓲ ꓢꓲꓺ ꓒ ꓔꓯ ꓧꓪ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿
ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓧꓪ, ꓢꓲ ꓠꓬꓲ ꓣꓳ ꓙꓵꓻ ꓠꓲ, ꓔꓯ ꓪꓴꓽ ꓟꓴ ꓡ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓡ ꓞꓳ ꓮ ꓙꓵꓽ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓟꓽ ꓘꓳ, ꓣꓴ꓿ ꓪ ꓔꓲ ꓩꓴ‐ꓡꓲ ꓠꓬ ꓢꓲꓺ ꓒ ꓬꓰ‐ꓢꓴ ꓟ. ꓟꓲꓽ ꓔꓯ ꓠ ꓡꓳ ꓑ ꓙ ꓢꓷ. ꓥ ꓟꓲ ꓬꓲ ꓔꓯ ꓟꓽ ꓘꓳ, ꓣꓴ꓿ ꓢꓷ. ꓠꓲ, ꓙꓳ ꓟ ꓪ ꓔꓲ ꓐꓴ ꓢꓲꓺ ꓒ ꓬꓰ‐ꓢꓴ ꓧꓪ ꓢꓲ ꓠꓬꓲ ꓪꓴꓽ ꓓꓴ ꓕꓵꓼ ꓠ, ꓟ ꓡ ꓟ ꓙꓵ, ꓕꓯ ꓢꓲꓺ ꓒ ꓬꓰ‐ꓢꓴ ꓔꓯ ꓐꓬ ꓡꓰ ꓟꓶ ꓡꓰ ꓠ, ꓟ ꓙ ꓖꓶ ꓢꓴ ꓥ ꓡꓳ꓿ ꓣꓳ ꓠꓲ, ꓟ ꓔꓯ ꓪ ꓔꓲ ꓩꓴ ꓡꓲ ꓡꓰ ꓐꓰ ꓟꓽ ꓗꓷ ꓡꓰ ꓠ, ꓟ ꓣꓳ ꓠꓲ, ꓟ ꓔꓯ ꓙꓵꓽ ꓠ, ꓟ ꓣꓳ ꓚꓵ, ꓡꓳ꓿ ꓢꓷ. ꓠꓲ, ꓙꓳ ꓒꓽ ꓪ ꓔꓲ ꓐꓴ ꓡꓰ ꓢꓲꓺ ꓒ ꓬꓰ‐ꓢꓴ ꓔꓯ ꓡꓯꓽ ꓫꓴꓻ ꓔꓯ ꓖꓶ ꓡ ꓟ ꓠꓬ ꓫꓵꓺ ꓝꓮꓲ ꓟꓴ‐ꓬ ꓐꓰ ꓫꓳ‐ꓠꓱ‐ꓞꓶ ꓐꓴ ꓥ ꓡꓳ꓿ ꓫꓵꓺ ꓠꓬ ꓪ ꓔꓲ ꓥ ꓟ ꓬꓲ ꓢꓷ. ꓡꓲ ꓓꓴ ꓥ ꓡꓳ꓿
ꓟꓴ‐ꓬ ꓠꓬ ꓮ‐ꓐꓲ ꓬꓰ‐ꓢꓴ ꓠꓬ ꓪꓴ‐ꓢ ꓥ ꓟ ꓢꓷ. ꓡꓰ ꓓꓴ ꓥ ꓡꓳ꓿ ꓫꓳ‐ꓠꓱ‐ꓞꓶ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓫ. ꓙꓵꓽ ꓟꓶ ꓙꓵꓽ ꓢꓲ ꓠꓬꓲ ꓣꓳ ꓐꓱ ꓶ ꓫꓵꓻ ꓙ ꓠ, ꓟ ꓬꓲ ꓢꓷ. ꓡꓰ ꓓꓴ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓮ ꓡꓰ ꓫꓵꓽ ꓡꓯꓽ ꓫꓴ ꓡꓰ ꓫꓱ. ꓡꓯꓽ ꓘꓳ ꓔꓬ ꓢꓴ ꓒꓬꓱꓼ ꓔꓬ ꓡ ꓣꓳ ꓠꓲ, ꓟ ꓓꓵꓽ ꓙ ꓠ, ꓟ ꓙꓳ ꓟ ꓥ ꓡꓳ꓿ ꓣꓳ ꓠꓲ, ꓟ ꓠꓯ, ꓗꓪ ꓠꓵꓻ ꓠꓲ,꓾ ꓬꓲ ꓙꓵ,꓾ ꓐꓰ ꓓꓵꓽ ꓙ ꓒꓳ, ꓡꓲ ꓡ ꓟ ꓗꓪ ꓐꓰ ꓫ. ꓢꓴ ꓟꓷꓽ ꓢꓴ ꓐꓴ ꓔꓯ ꓑ ꓡ ꓟ ꓕꓲ ꓒꓳ, ꓗꓪ ꓐꓰ ꓬꓰ ꓙ ꓢꓴ ꓒꓬꓱꓼ ꓡ ꓝꓲ ꓡꓯ꓿ ꓚꓬꓴ ꓢꓲꓺ ꓒ ꓐꓰ ꓣꓳ ꓜꓲꓼ ꓗꓷ ꓠꓬ ꓣꓳ ꓤꓶꓻ ꓠꓬ ꓙꓲ ꓟ ꓚꓱ, ꓗꓪ ꓒꓳ ꓡꓲ ꓡ ꓓꓴ ꓥꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓐꓰ ꓣꓳ ꓜꓲꓼ ꓗꓷ ꓠꓬ ꓣꓳ ꓓꓵꓽ ꓙ ꓚꓱ,꓾ ꓣꓳ ꓬꓰ ꓟ ꓚꓱ, ꓣꓳ ꓠꓲ, ꓟ꓾ ꓐꓰ ꓣꓳ ꓬꓰ ꓗꓷ ꓟ ꓮ ꓙꓵꓽ ꓠꓬ ꓢꓲꓺ ꓒ ꓠꓲ, ꓒꓴ ꓟ ꓚꓱ, ꓗꓪ ꓣꓳ ꓬꓰ ꓪ ꓠ, ꓟ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓧꓪ, ꓓꓴ ꓬꓰ ꓡꓯ꓿ ꓬꓲ ꓔꓯ ꓡꓯꓽ ꓫꓴ ꓖꓶ ꓓꓴ ꓬꓰ ꓡꓯ꓿ ꓚꓬꓴ ꓢꓲꓺ ꓒ ꓔꓯ ꓣꓳ ꓔꓯ ꓧꓳꓽ ꓪꓴ. ꓟꓴ ꓠ, ꓟ ꓙ ꓖꓴ ꓫꓵꓼ ꓠꓯ, ꓗꓪ ꓧꓳꓽ ꓙꓰ ꓠ, ꓟ ꓬꓲ ꓔꓯ ꓘꓳ, ꓣꓴ ꓡꓯ꓿ ꓫ. ꓟꓳ ꓪ꓿
