ꓢꓲꓽ ꓫꓬ ꓢꓴ ꓬꓳ‐ꓦ ꓡꓰ “ꓙꓵꓻ ꓢꓴ ꓐꓴ ꓙꓲ‐ꓢꓴ ꓢꓲ ꓤ ꓐꓴ ꓠꓬ ꓪꓴ‐ꓢ ꓠꓯꓸꓼ ꓗꓪ ꓞꓳ ꓙꓳ ꓢꓯ. ꓔꓬ ꓠ, ꓟ꓾ ꓬꓰ‐ꓢꓴ ꓙꓲ‐ꓢꓴ ꓠꓯꓸꓼ ꓗꓪ ꓢꓯ. ꓔꓬ ꓠ, ꓟ꓾ ꓟꓲ ꓠꓯ ꓗꓪ ꓙꓳˍ ꓟ ꓔꓯ ꓠꓲ, ꓥꓳˍ ꓟ ꓟꓽ ꓥ ꓥ꓾ ꓪꓴ‐ꓢ ꓠꓲ, ꓡꓶ ꓙꓳˍ ꓟ ꓡꓰ ꓞꓳ ꓙꓳ ꓢꓯ. ꓔꓬ ꓠ, ꓟ ꓕꓵꓼ ꓪ ꓖꓶ ꓔ ꓡꓳ꓿
ꓕꓲ ꓠꓬꓲ ꓕꓲ ꓒꓳ, ꓪ ꓜꓲ ꓪꓴ‐ꓢ ꓔꓯ ꓢꓷ. ꓡ ꓢꓲ ꓪꓴ‐ꓢ ꓡꓰ ꓖꓴ ꓟ. ꓖꓶ ꓡˍ ꓟ ꓚꓱ, ꓠꓯꓸꓼ ꓗꓪ ꓞꓳ ꓙꓳ ꓢꓯ. ꓔꓬ ꓠ, ꓟˍ ꓟꓲ ꓐꓯ ꓟ. ꓖꓶ ꓡ ꓔꓬ ꓡꓳ꓿ ꓙꓲ‐ꓢꓴ ꓢꓲ ꓤ ꓐꓴ ꓠꓬ꓾ ꓟꓽ ꓕꓶ ꓞ, ꓟ ꓟꓲ ꓠꓯ ꓗꓪ ꓙꓳˍ ꓟ ꓕꓯꓽ ꓢꓲ ꓗꓪ ꓣꓳ ꓤꓶꓻ ꓔꓯ ꓟꓽ ꓔꓶ ꓔꓶ ꓐꓰ꓾ ꓕꓲ ꓞꓲꓼ ꓕꓶ ꓞ, ꓟ ꓪꓴ‐ꓢ ꓠꓯꓸꓼ ꓗꓪ ꓣꓳ ꓤꓶꓻ ꓔꓯ ꓫꓬ, ꓔꓶ ꓠ, ꓟ ꓥ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓔꓳꓽ ꓶ (ꓡꓴ‐ꓘ 2ꓽ36‐40) ꓗꓪ ꓤ ꓟꓶ ꓤ ꓕꓲ ꓣꓳ ꓟ. ꓟꓲꓽ ꓔꓯ ꓐꓯ ꓟ. ꓖꓶ ꓔ ꓡꓳ꓿ ꓬ,‐ꓫꓱ ꓕꓲ ꓪꓳꓼ ꓢꓴ ꓩ‐ꓠꓴ‐ꓡꓲ ꓮ. ꓟꓲꓽ꓾ ꓟꓷꓽ ꓠꓷ, ꓝ. ꓟ ꓬ,‐ꓠ ꓠꓬ ꓬꓲ ꓞꓲꓼ ꓮ ꓘꓶ. ꓟꓳꓽˍ ꓡꓳ꓿ ꓬꓲ ꓠꓬ ꓬꓲ ꓞꓲꓼ ꓡꓯ. ꓕꓯ ꓡꓰ ꓪꓴ. ꓔꓴ ꓢꓲ ꓬꓲ ꓦꓲ ꓢꓲ ꓒ ꓐꓰ ꓫꓵꓽ ꓘꓳꓼ ꓤ ꓡꓰꓽ ꓔꓬ ꓗꓷ ꓢꓲ꓾ ꓬꓲ ꓞꓲꓼ 84 ꓘꓳꓼ ꓙꓳ ꓡˍ ꓗꓪ ꓛꓲ ꓟꓵꓽ ꓛꓵꓽ ꓟ ꓤꓶꓻ ꓗꓪ ꓞꓳ ꓙꓳ ꓗꓷ ꓟ ꓥ ꓡꓳ꓿ ꓬꓲ ꓠꓬ ꓢꓲꓽ ꓫꓬ ꓦꓲ ꓗꓪ ꓐꓰ ꓮ ꓕꓯ ꓟꓲ ꓟꓽ ꓢꓳ ꓙꓰ꓿
ꓪꓽ ꓘꓴ ꓠꓬꓲ ꓜꓽ ꓓꓴ ꓚꓲ. ꓠꓬꓲ ꓐꓰ ꓟꓶꓽ ꓘꓶꓼ ꓠꓯꓼ ꓠꓯꓼ ꓕꓱ ꓡꓱ ꓬꓰ ꓔꓬ ꓟ ꓥ ꓡꓳ꓿ ꓬꓯꓼ ꓡ ꓠ, ꓟ ꓚꓬꓴ. ꓢꓲ ꓒ ꓔꓯ ꓥꓳ ꓡꓳ. ꓢꓲ ꓢꓯꓼ ꓕꓵꓼ ꓔꓬ ꓢꓴ ꓥ ꓡꓳ꓿ ꓖꓳ ꓟ ꓪꓴ. ꓠꓬꓲ ꓬꓲ ꓚꓲ. ꓛꓬ ꓡꓰ ꓞꓳ ꓫꓵꓼ ꓤ ꓬꓰ‐ꓢꓴ ꓔꓯ ꓢꓲꓽ ꓫꓬ ꓦꓲ ꓗꓪ ꓟꓳꓻ ꓪ ꓡꓰꓳ꓿ ꓤ ꓠꓱ ꓤ ꓬꓰ‐ꓢꓴ ꓔꓯ ꓬꓲ ꓟꓳꓻ ꓡꓰˍ ꓕꓯ ꓬꓲ ꓠꓬ ꓠꓲ, ꓒꓴ ꓗ, ꓛꓲꓽ ꓠꓲ, ꓡꓰ꓾ “ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓔꓯ ꓫꓴ, ꓣꓴ ꓢꓴ ꓥ ꓡꓳ” ꓐꓰ ꓐꓯ ꓗꓷꓳ꓿ ꓠꓱ. ꓐꓯ ꓢꓴ ꓔꓯ ꓥˍ ꓲ ꓬꓲ ꓐꓯ ꓖꓶˍ ꓡꓳ꓿
ꓣꓳ ꓐꓴ ꓥˍ ꓟꓲ ꓣꓳ ꓞꓳ ꓙꓳ ꓢꓯ. ꓔꓬ ꓪˍ ꓟ ꓤꓶꓻ ꓠꓯꓸꓼ ꓗꓪ ꓜꓽ ꓓꓴ ꓚꓲ. ꓪꓽ ꓘꓴˍ ꓟ ꓐꓰ ꓕꓲ ꓪ ꓮ ꓟꓶ ꓟꓲ ꓠꓯ ꓗꓪ ꓒꓬꓱꓼ ꓔꓬ ꓟ ꓢꓯꓼ ꓪꓽ ꓠꓬꓲ ꓢꓴ ꓐꓴ ꓡꓰ ꓢꓯꓼ ꓐꓽ ꓢꓴ ꓔꓯ ꓧꓪ. ꓜꓽˍ ꓟ꓾ ꓟꓲ ꓠꓯ ꓔꓯ ꓐꓬ ꓡꓰ ꓝꓲˍ ꓟ ꓚꓱ,꓾ ꓞꓳ ꓤ ꓔꓯ ꓒꓵꓽ ꓗ ꓟꓽ ꓬꓰ ꓬꓰ ꓐꓰ ꓙꓵꓽ ꓪ ꓔꓯ ꓡꓰꓽ ꓒꓵꓽ ꓔꓬ ꓢꓴ ꓐꓴ ꓟꓲ ꓠꓯ ꓕꓱ ꓟ ꓗꓪ ꓐꓰ ꓟꓶꓽ ꓡꓰ ꓢꓲ꓾ ꓢꓲ ꓡꓲˍ ꓟ ꓟꓲ ꓠꓯ ꓒꓬꓱꓼ ꓡ ꓠ, ꓟ ꓐꓱ ꓶ ꓕꓲ ꓪꓽˍ ꓪꓽ ꓘꓴ ꓓꓴ ꓬꓰ ꓡꓯ꓿
