ꓐ, ꓐ ꓪꓴ‐ꓢ ꓔꓯ ꓣꓳ ꓢꓷ.ˍ ꓡꓳ ꓐꓯˍ ꓟ ꓔꓯ ꓣꓳ ꓮ ꓡꓲ ꓐꓰ ꓢꓷ. ꓐ ꓡˍ ꓡ꓿ ꓪꓴ‐ꓢ ꓡꓰ ꓖꓶ ꓔ ꓟ ꓕꓵꓼ ꓪ ꓐꓰ ꓙꓵꓽ ꓗ ꓔꓯ ꓛꓳꓻ ꓫꓱꓽˍ ꓟ ꓐꓰ ꓐ, ꓐ ꓪꓴ‐ꓢ ꓠꓲ, ꓡꓶꓽ ꓙꓳˍ ꓟ ꓡꓰ ꓐꓰ ꓛꓳꓻ ꓫꓱꓽˍ ꓟ ꓗꓪ ꓐꓰ ꓢꓷ. ꓐ ꓡˍ ꓡꓳ꓿ ꓪꓴ‐ꓢ ꓠꓬ ꓣꓳ ꓤꓶꓻ ꓠꓯꓸꓼ ꓘꓴꓽ ꓗꓪ ꓢꓯ. ꓔꓬ ꓙꓳ ꓔꓬ ꓡꓳ꓿ ꓪꓴ‐ꓢ ꓔꓯ ꓦ ꓡꓱ ꓐꓳ ꓢꓲ꓾ ꓪꓴ‐ꓢ ꓔꓯ ꓡꓰꓽ ꓪꓴ. ꓓꓵ ꓕꓱꓼ ꓢꓴ ꓐꓴ ꓤꓶꓻ ꓗꓪ ꓪꓴ‐ꓢ ꓡꓰ ꓮ ꓕꓯ ꓟꓲ ꓠꓬꓲ ꓙ ꓡꓳ. ꓙ ꓖꓶ ꓔꓬ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓡꓴ‐ꓘ 2ꓽ22‐35) ꓗꓪ ꓢꓲ‐ꓟꓰ ꓠꓬ ꓙꓲ ꓫꓬˍ ꓟ ꓐꓰ ꓠꓲ, ꓒꓵꓽ ꓠꓲ, ꓡꓱ ꓢꓴ꓾ ꓪꓴ‐ꓢ ꓠꓲ, ꓡꓶꓽ ꓙꓳˍ ꓟ ꓡꓰ ꓞꓳ ꓙꓳ ꓢꓯ. ꓔꓬ ꓢꓴ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓬꓲ ꓠꓬ ꓢꓲꓽ‐ꓫꓬ‐ꓟ‐ꓦ ꓐꓰ ꓐꓲ ꓞ, ꓢꓴ ꓥ ꓢꓲ ꓠꓬꓲ ꓬꓰ‐ꓢꓴ ꓔꓯ ꓟꓽ ꓟꓳ ꓕ ꓑꓳ. ꓟꓽ ꓫꓵꓻ ꓐꓰ ꓙ ꓟꓳ ꓘꓶꓽ ꓟꓶ ꓔ ꓢꓴ ꓥ ꓡꓳ꓿
ꓟꓳ‐ꓫꓲ ꓙꓵꓽ ꓗ ꓙꓳˍ ꓟ ꓡꓰ ꓶˍ ꓟ ꓗ ꓫꓵ ꓬꓰ ꓠ, ꓟ ꓦꓬꓼ ꓠꓬꓲ ꓐꓲ ꓡˍ ꓕꓯ ꓬꓰ‐ꓢꓴ ꓙꓲ‐ꓢꓴ ꓔꓯ ꓢꓲꓽ ꓫꓬ ꓦꓲ ꓗꓪ ꓟ‐ꓡꓲ ꓐꓰ ꓬꓳ‐ꓢꓷ ꓠꓬ ꓧꓳꓽ ꓔꓯ, ꓡˍ ꓡꓳ꓿ ꓢꓲ‐ꓟꓰ ꓠꓬ ꓬꓰ‐ꓢꓴ ꓔꓯ ꓬꓲ ꓡꓯꓼ ꓖꓳꓼ ꓗꓪ ꓔꓯ, ꓔ ꓢꓲ꓾ “ꓠꓬꓲ ꓟꓳ ꓓꓴ ꓥ ꓟ ꓚꓬꓴ. ꓢꓲ ꓒ ꓔꓯ ꓥꓪ ꓟꓬ ꓢꓶꓽ ꓡꓰ ꓡꓳ. ꓟꓳꓻ ꓡꓰꓳ꓾ ꓐꓰ ꓐꓯˍ ꓡꓳ꓿ ꓝꓮꓲ ꓬꓲ ꓡꓰ “ꓤ ꓠꓱ ꓤ ꓕꓱ ꓟ ꓠꓬ ꓬꓲ‐ꓢꓷ‐ꓡꓰ ꓮꓽ ꓟꓬ, ꓣꓳ ꓔꓯ ꓚꓬꓴ. ꓟꓶ ꓝꓲ ꓠ, ꓟ ꓐꓰ꓾ ꓝꓮꓲ ꓮꓽ ꓟꓬ, ꓣꓳ ꓔꓯ ꓡꓱ. ꓗꓷ ꓝꓲ ꓠ, ꓟ ꓪꓴ‐ꓢ ꓡꓰ ꓢꓲ ꓚꓰ. ꓔ ꓟ ꓥ ꓡꓳ꓿ ꓬꓲ ꓠꓽ ꓢꓴ ꓡꓰ ꓔꓳ, ꓡˍ ꓟ ꓢꓷ. ꓡꓰ ꓓꓴ ꓒꓬꓱꓼ ꓡˍ ꓥꓳ꓿” ꓝꓮꓲ ꓟ‐ꓡꓲ ꓔꓯ ꓥˍ ꓟꓲ “ꓠꓴ ꓠꓲ, ꓟ ꓔꓯˍ ꓟꓲ ꓬꓲ ꓑꓶ. ꓓꓴ ꓮ ꓕꓽ ꓪꓴ. ꓒꓲ. ꓡꓰ ꓗ. ꓙ ꓙꓰˍ ꓟ ꓡꓰ ꓐꓰ ꓗ. ꓬꓯꓼ ꓡˍ ꓥꓳ꓾” ꓐꓯˍ ꓡꓳ꓿
ꓚꓵ ꓚꓵ ꓟ‐ꓡꓲ ꓠꓬ ꓢꓲ ꓒ ꓬꓰ‐ꓢꓴ ꓒꓬꓱꓽ ꓟꓳꓻ ꓡ ꓟ ꓗꓪ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓔꓵ. ꓗꓷˍ ꓗꓪ ꓛꓲ ꓢꓲ ꓒ ꓬꓰ‐ꓢꓴ ꓬꓲ ꓫ. ꓙꓵ ꓜꓲꓽˍ ꓟ ꓔꓯ ꓒꓬꓱꓽ ꓔꓳ, ꓟꓬ ꓔꓳ, ꓟꓳꓻ ꓢꓲ ꓠꓲ, ꓟ ꓗꓪ ꓮ. ꓕꓽ ꓪꓴ. ꓒꓲ, ꓗ. ꓙ ꓙꓰˍ ꓟ ꓡꓰ ꓠꓻ ꓙꓵ ꓗꓷ ꓢꓴ ꓥ ꓡꓳ꓿ ꓖꓳ ꓡꓱ ꓠꓲ, ꓟ ꓐꓶꓽ ꓡꓰ ꓠ ꓛꓲ ꓫ.ˍ ꓟ ꓔꓯ ꓥˍ ꓟꓲ ꓬꓲ ꓜꓲꓽ ꓗꓷ ꓢꓲ꓾ ꓢꓲ ꓡꓲ ꓟ ꓔꓯ ꓫꓬ, ꓔꓶ ꓐ ꓡ ꓢꓴ ꓥ ꓡꓳ꓿ ꓟꓲ ꓠꓯ ꓔꓯ ꓢꓲ ꓡꓲ ꓡꓰ ꓝꓲ ꓠꓲ, ꓫꓵˍ ꓟ ꓟ, ꓟ ꓟ‐ꓡꓲ ꓔꓯ ꓣꓳ ꓔꓯꓺ ꓢꓳ ꓢꓲ꓾ ꓟ, ꓟ ꓟ‐ꓡꓲ ꓡꓰ ꓐꓰ ꓞꓳ ꓙꓳ ꓢꓯ. ꓔꓬ ꓢꓲ ꓠꓬꓲ ꓟꓲ ꓠꓯ ꓢꓲ ꓡꓲ ꓟ ꓟꓶ ꓠ, ꓟ ꓐꓱ ꓶ꓾ ꓟꓬ‐ꓟ ꓗꓴꓷꓼ ꓢꓲ ꓡꓲ ꓟ ꓙꓳ ꓡ ꓠ, ꓟ ꓐꓱ ꓶ ꓪꓽ ꓘꓴ ꓓꓴ ꓬꓰ ꓡꓯ꓿
