ꓢꓲꓽ ꓫꓬ ꓦꓲꓻ ꓘꓴꓽ ꓑꓮꓲꓽ ꓦꓬꓼ ꓠꓬꓲ (28.12.2025 ) ꓢꓴꓠꓓꓮꓬ ꓣꓰꓝꓡꓰꓚꓔꓲꓳꓠ
ꓠꓬꓲ. ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓟ‐ꓕꓲ ꓕꓳ ꓶ 2ꓽ13‐15 / 19‐23 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓟ‐ꓡꓲ ꓐꓰ ꓬꓳ‐ꓢꓷ ꓐꓰ ꓮ‐ꓐꓲ ꓢꓲꓺ ꓒ ꓬꓰ‐ꓢꓴ ꓠꓬ ꓬꓲ‐ꓙꓲ ꓟꓵꓽ ꓗꓪ ꓛꓰ, ꓑꓬ ꓙꓰ ꓟ ꓐꓰ ꓪ ꓔꓲ ꓩꓴ ꓡꓲ ꓫꓵꓻ ꓡꓰ ꓟ ꓙꓵ, ꓕꓯ ꓢ‐ꓢ‐ꓡꓱ ꓗꓪ ꓬꓲꓼ ꓙꓰ ꓟ ꓚꓱ, ꓥ ꓡꓳ꓿ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓐꓯ ꓟ ꓠꓬ ꓬꓰ‐ꓢꓴ ꓟ‐ꓡꓲ꓾ ꓬꓳ‐ꓢꓷ ꓐꓴ ꓦꓲꓻ ꓘꓴꓽ ꓔꓯ ꓐꓯ ꓟ ꓥ ꓡꓳ꓿ ꓮ ꓘꓶ. ꓛꓲ ꓓꓵꓽ ꓙ ꓟꓶ ꓓꓴ ꓠꓬ ꓡ ꓞꓳ ꓢꓽ ꓣꓳ ꓐꓰ ꓐ ꓟ ꓦ ꓡꓳ꓿
ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓪꓴ‐ꓢ ꓮ‐ꓐꓲ ꓥ ꓢꓲ ꓠꓬꓲ ꓟ‐ꓡꓲ ꓠꓬ ꓣꓱ ꓛꓰ ꓑꓯ ꓟꓶ ꓢꓴ ꓥ ꓢꓲ ꓠꓬꓲ ꓬꓳ‐ꓢ ꓠꓬ ꓜꓳ ꓓꓰ ꓡꓰ ꓢꓴ ꓥ ꓡꓳ꓿ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓐꓰ ꓘꓴꓽ ꓗꓷ ꓟ ꓠꓬ ꓬꓲ ꓪ ꓢꓽ ꓣꓳ ꓠꓬ ꓪꓴ‐ꓢ ꓠꓲ, ꓡꓶꓽ ꓔꓯ ꓛꓳꓽ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓗꓷ ꓢꓲ ꓠꓬꓲ ꓝꓴꓲ. ꓙꓳ ꓟ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓙ ꓠ, ꓟ ꓟꓬꓱꓽ ꓬꓰ ꓗꓷ ꓢꓴ ꓐꓴ ꓥ ꓡꓳ꓿ ꓢꓲꓽ ꓫꓬ ꓦꓲꓻ ꓘꓴꓽ ꓔꓯ ꓠꓬꓲ. ꓠꓬꓲ ꓣꓳ ꓙꓲ‐ꓢꓴ ꓢꓲꓺ ꓤ ꓦꓲꓻ ꓘꓴꓽ ꓐꓴ ꓮ ꓙꓵꓽ ꓔꓯꓺ ꓢꓳꓻ ꓠ, ꓟ ꓮ ꓘꓶ. ꓛꓲ ꓣꓳ ꓚꓵ, ꓟ ꓙꓵ, ꓟꓲ ꓥ ꓡꓳ꓿ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓗꓪ ꓜ ꓓꓴ ꓓꓳ ꓓꓴ ꓐꓱ ꓶ ꓠꓱ. ꓐꓯꓼ ꓦꓲꓻ ꓘꓴꓽ ꓢꓴ ꓐꓴ ꓡꓰ ꓐꓰ ꓢꓯꓼ ꓕꓵꓼ ꓢꓲ ꓠꓬꓲ ꓞꓳ ꓙꓳ ꓗꓷ ꓟ ꓥ ꓡꓳ꓿
ꓕꓲ ꓧꓪ, ꓧꓪ ꓮ ꓘꓶ. ꓫ. ꓓꓴ ꓙꓵ, ꓟꓲ ꓔꓳ, ꓜꓳ ꓗꓷꓳ꓿ ꓮ ꓟꓬꓽ ꓗꓪ ꓛꓲ ꓫ. ꓔ ꓥ ꓐꓯ ꓠꓬ ꓮ‐ꓐꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓔꓯ ꓮ‐ꓠꓬꓲ ꓦꓲꓻ ꓗꓪ ꓐꓬꓱ ꓟꓳ ꓗꓷ ꓗꓪ ꓛꓲ ꓫ. ꓢꓴ ꓕꓲ ꓦꓲꓻ ꓥ ꓡꓳ꓿ ꓟ, ꓟ ꓟ‐ꓡꓲ ꓠꓬ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓤ ꓠꓱ ꓶ ꓡ ꓟ ꓔꓯ ꓔꓱ ꓚꓵ, ꓟ ꓜꓳ ꓓꓰ ꓡꓰ ꓢꓴ ꓢꓲꓽ ꓫꓬ ꓢꓴ ꓬꓳ‐ꓢꓷ ꓠꓬ ꓬꓰ ꓙ ꓔꓳ, ꓙ ꓗꓷ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓵꓻ ꓗꓷ ꓟ ꓢꓲꓽ ꓫꓬ ꓕꓳ ꓶ ꓗꓪ ꓐ ꓟ ꓡꓰ ꓐꓰ ꓮ‐ꓐꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓟꓽ ꓙꓲ ꓢꓴ ꓐꓴ ꓡꓯꓽ ꓒꓯ, ꓗꓪ ꓐꓰ ꓗꓽ ꓕꓽ ꓖꓶ ꓠ, ꓟ ꓬꓲ‐ꓙꓲ ꓟꓵꓽ ꓗꓪ ꓛꓰ, ꓑꓬ ꓙꓰ ꓟ ꓥ ꓡꓳ꓿ ꓬꓲ ꓪ ꓠꓬ ꓟꓯꓼ ꓘꓰ ꓟꓯꓼ ꓑꓬ ꓢꓴ ꓐꓴ ꓟꓽ ꓥ ꓟꓲ꓾ ꓟꓽ ꓙꓲ ꓟ ꓪ ꓔꓲ ꓡꓯꓽ ꓒꓯ, ꓗꓪ ꓐꓰ ꓘꓰ ꓑꓬ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪꓴ‐ꓢ ꓔꓯ ꓙꓵꓻ ꓟ꓾ ꓐꓰ ꓠ ꓡꓳ ꓟ ꓚꓱ, ꓗꓪ ꓐꓰ ꓢꓯ. ꓔꓬ ꓗꓷ ꓢꓴ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓢꓴ ꓐꓴ ꓥ ꓡꓳ꓿ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓐꓯ ꓟ ꓠꓬ ꓟ. ꓟꓲꓽ ꓗꓪ ꓐꓰ ꓟ. ꓖꓶ ꓟ ꓟꓽ ꓥ ꓬꓲ ꓪ ꓠꓬ ꓟꓲ ꓠꓯ ꓗꓪ ꓞꓳ ꓙꓳ ꓔꓬ ꓗꓷ ꓢꓴ ꓐꓴ ꓥ ꓢꓲ ꓠꓬꓲ ꓟꓲ ꓠꓯ ꓗꓪ ꓮ ꓡꓰ ꓐꓰ ꓢꓯ. ꓔꓬ ꓠ, ꓟ ꓟ. ꓖꓶ ꓗꓷꓳ꓿
ꓦꓲꓻ ꓘꓴꓽ ꓕꓲ ꓦꓲꓻ ꓘꓴꓽ ꓠꓬ ꓘꓴ ꓜꓲꓼ ꓞꓳ ꓤ ꓥ ꓡꓳ ꓐꓰ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓠꓬ ꓟ. ꓖꓶ ꓔ ꓟ ꓥ ꓡꓳ꓿ ꓙꓲ ꓟ ꓚꓱ, ꓙꓲ ꓟ ꓫꓱ ꓠꓬ ꓦꓲꓻ ꓘꓴꓽ ꓗꓪ ꓡ ꓟ ꓥ ꓡꓳ꓿ ꓦꓲꓻ ꓘꓴꓽ ꓡ ꓞꓳ ꓠꓯ, ꓗꓪ ꓙꓵꓻ ꓠꓲ, ꓚꓱ, ꓠꓵꓻ ꓠꓲ, ꓚꓱ, ꓝꓴꓲ ꓖꓼ ꓖꓶ ꓖꓶ ꓟ ꓚꓱ, ꓔꓯ ꓟ. ꓖꓶ ꓐ ꓡ ꓟ ꓬꓲ ꓔꓶ ꓟꓲ ꓥ ꓡꓳ꓿ ꓕꓲ ꓠꓲ, ꓕꓲ ꓪ ꓪꓽ ꓘꓴ ꓟ꓾ ꓕꓲ ꓪ ꓔꓬ ꓟ ꓐꓰ ꓙꓲ ꓟ ꓚꓱ, ꓗꓪ ꓢꓯꓼ ꓕꓵꓼ ꓠ, ꓟ ꓶ ꓙꓳ ꓟ ꓦꓲꓻ ꓘꓴꓽ ꓟꓲ ꓥ ꓡꓳ꓿ ꓦꓲꓻ ꓘꓴꓽ ꓡ ꓞꓳ ꓐꓯ ꓟ ꓠꓬ ꓪꓴ‐ꓢ ꓡꓰ ꓚꓰꓼ ꓖꓶ ꓔ ꓟ ꓪꓴ‐ꓢ ꓡꓰ ꓝꓱ ꓔ ꓢꓴ ꓐꓴ ꓡ ꓞꓳ ꓕꓲ ꓜꓴꓻ ꓥ ꓡꓳ꓿ ꓦꓲꓻ ꓘꓴꓽ ꓢꓴ ꓐꓴ ꓠꓬ ꓚꓲ. ꓛꓬ ꓐꓰ ꓒ ꓕꓲ ꓔꓬ ꓢꓴ ꓚꓲ. ꓛꓬ ꓚꓱ, ꓔꓯ ꓢꓷ. ꓢꓴ ꓐꓴ ꓮ ꓘꓶ. ꓙꓲ ꓟ ꓛꓳꓽ ꓒꓯ, ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓦꓲꓻ ꓘꓴꓽ ꓡ ꓞꓳ ꓔꓯ ꓞꓳ ꓒꓴ ꓠꓯ, ꓡꓳ꓿ ꓦꓲꓻ ꓘꓴꓽ ꓡ ꓞꓳ ꓕꓲ ꓠꓲ, ꓟ ꓙꓳ ꓠꓯ, ꓟ ꓥ ꓡꓳ꓿ ꓦꓲꓻ ꓘꓴꓽ ꓗꓪ ꓙꓲ ꓟ ꓫꓱ, ꓪꓽ ꓡꓯꓽ ꓘꓳ, ꓓꓴ ꓙꓳ ꓕꓯ ꓢꓲ ꓠꓬꓲ ꓦꓲꓻ ꓘꓴꓽ ꓪꓴꓽ ꓡ ꓓ ꓟ ꓐꓰ ꓜꓴꓻ ꓘꓴ ꓜꓲꓼ ꓞꓳ ꓠꓯ, ꓗꓪ ꓪꓽ ꓡꓯꓽ ꓘꓳ ꓟ ꓠꓲ, ꓟ ꓙꓳ ꓡ ꓓꓴ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓠꓬꓲ ꓕꓱ ꓗꓪ ꓗꓳ‐ꓡꓳ‐ꓫꓲ ꓕꓳ ꓶ 3ꓽ12‐21 ꓝꓲ. ꓗꓪ ꓕꓲ ꓦꓲꓻ ꓘꓴꓽ ꓗꓪ ꓮ ꓡꓰ ꓛꓳ ꓙꓳ ꓠ, ꓟ ꓔꓯ ꓝꓲ ꓓꓴ ꓒꓳ‐ꓡꓳ ꓡꓰ ꓐꓳ ꓔ ꓟ ꓥ ꓡꓳ꓿ ꓦꓲꓻ ꓢꓲꓽ ꓒ ꓠꓬ ꓦꓲꓻ ꓢꓲꓽ ꓟ ꓔꓯ ꓠꓲ, ꓠꓵ ꓠꓯ, ꓟ ꓐꓰ ꓦꓲꓻ ꓢꓲꓽ ꓟ ꓠꓬ ꓒꓴ ꓛꓳꓽ ꓠꓯ, ꓔꓯ ꓐꓯ ꓖꓶ ꓔ ꓡꓳ꓿ ꓝꓮꓲ ꓤ ꓠꓱ ꓤ ꓐꓴ ꓥ ꓟꓲ ꓐ, ꓐ ꓟ, ꓟ ꓔꓯ ꓞꓳ ꓒꓵ ꓠꓯ, ꓐꓰ ꓐꓯ ꓘꓶꓽ ꓛꓳ ꓠ, ꓟ ꓐꓯ ꓔ ꓡꓳ꓿ ꓟꓲ ꓠꓯ ꓡ ꓞꓳ ꓮ ꓙꓵꓽ ꓠꓬ ꓐ, ꓐ ꓟ, ꓟ ꓐꓴ ꓠꓯ, ꓗꓪ ꓐꓰ ꓦꓵꓻ ꓡ ꓢꓴ ꓐꓴ ꓥ ꓡꓳ꓿
ꓖꓳ ꓡꓱ ꓥ ꓟ ꓪꓴ. ꓠꓬꓲ ꓡ ꓞꓳ ꓮ ꓙꓵꓽ ꓠꓬ ꓦꓲꓻ ꓘꓴꓽ ꓗꓪ ꓪꓽ ꓡꓯꓽ ꓘꓳ ꓟ ꓠꓲ, ꓟ ꓙꓳ ꓠꓯ, ꓟ ꓥ ꓡꓳ꓿ ꓠꓬꓲ. ꓠꓬꓲ ꓟ ꓦꓬꓼ ꓠꓬꓲ ꓗꓪ ꓦꓲꓻ ꓘꓴꓽ ꓡ ꓞꓳ ꓔꓯ ꓞꓳ ꓒꓵꓽ ꓠꓯ, ꓟ ꓮ ꓘꓶ. ꓟꓽ ꓙꓳ ꓡꓰꓳ꓿ ꓦꓲꓻ ꓘꓴꓽ ꓗꓪ ꓪꓽ ꓡꓯꓽ ꓘꓳ ꓟ ꓠꓲ, ꓟ ꓮ ꓘꓶ. ꓟꓽ ꓙꓳ ꓡꓰꓳ꓿ ꓠꓴ ꓥꓪ ꓠꓬ ꓢꓲꓽ ꓫꓬ ꓟ ꓦꓲꓻ ꓘꓴꓽ ꓔꓯ ꓔꓯꓺ ꓢꓳ ꓢꓲ ꓠꓬꓲ ꓢꓯ. ꓔꓬ ꓞꓳ ꓙꓳ ꓓꓴ ꓬꓰ ꓡꓯ꓿ ꓟꓲ ꓠꓯ ꓦꓬꓼ ꓠꓬꓲ ꓑꓶ. ꓓꓴ ꓫ. ꓓꓴ ꓟꓷ ꓓꓴ ꓙꓳ ꓥ ꓟꓲ ꓠꓲ, ꓟ ꓟꓽ ꓐꓬ ꓡꓰ ꓕꓲ ꓦꓲꓻ ꓘꓴꓽ ꓢꓴ ꓮ ꓙꓵꓽ ꓪꓽ ꓡꓯꓽ ꓘꓳ ꓢꓲ ꓠꓬꓲ ꓪꓽ ꓘꓴ ꓪꓴ‐ꓢ ꓠꓯ, ꓗꓪ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿ ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓫ. ꓓꓴ ꓟꓷ ꓓꓴ ꓔꓳ, ꓜꓳ ꓔꓬ ꓟ ꓦꓲꓻ ꓘꓴꓽ ꓐꓴ ꓐꓱ ꓶ ꓙꓵꓻ ꓠꓲ, ꓚꓱ, ꓟꓽ ꓪꓽ ꓡꓯꓽ ꓘꓳ ꓗꓷ ꓔꓬ ꓟ ꓦꓲꓻ ꓘꓴꓽ ꓢꓴ ꓐꓴ ꓐꓱ ꓶ ꓮ ꓘꓶ. ꓛꓲ ꓪꓽ ꓘꓴ ꓙ ꓓꓴ ꓬꓰ ꓡꓯ꓿ ꓫ. ꓟꓳ ꓪ ꓿ꓮ ꓙꓵꓽ ꓢꓴ ꓔꓯ ꓗ, ꓛꓲ ꓬꓰ‐ꓢꓴ ꓦꓵꓻ ꓡ ꓟ ꓙꓵ, ꓥꓳ꓿
