ꓬꓲꓼ ꓤ ꓠꓬꓲ ꓤ ꓐꓴꓳ ꓢꓸ ꓠꓯ ꓠꓬ ꓙꓲꓻ ꓫꓬꓹ ꓟ ꓦꓲꓻ ꓘꓴꓽ ꓑꓮꓲꓽ꓾ ꓢꓲꓽ ꓫꓬꓹ ꓟ ꓦꓲꓻ ꓘꓴꓽ ꓑꓮꓲꓽ ꓥ ꓡꓳ= ꓑꓮꓲꓽ ꓕꓱ ꓟ ꓔꓯ ꓮ ꓡꓲ ꓗꓪ ꓚꓳꓸ ꓮ ꓫꓵꓽ ꓑꓶꓸ ꓓꓴ ꓫꓬꓹ ꓔꓶ ꓔ ꓡ= ꓙꓲꓻ ꓫꓬꓹ ꓟ ꓦꓲꓻ ꓘꓴꓽ ꓑꓮꓲꓽ ꓐꓯˍ ꓟ ꓮ ꓫꓵꓽ ꓔꓯ ꓐꓯˍ ꓡ ꓐꓯˍ ꓠꓬ꓾ ꓬꓰ-ꓢꓴ ꓟ-ꓡꓲ-ꓬ ꓬꓳ-ꓢꓷ꓾ ꓬꓲ ꓪ ꓔꓲ ꓦꓲ ꓐꓴ ꓞꓳ ꓙꓳ ꓗꓳꓸ ꓙꓰ ꓟ ꓡꓰ ꓐꓰ ꓦꓲ ꓘꓴꓽ ꓥ ꓕ ꓑꓳꓸꓼ ꓠꓬ ꓖꓳ ꓟ ꓔꓯ ꓔꓯꓺ ꓢꓳ ꓠꓹ ꓟ꓾ ꓖꓳ ꓟ ꓔꓯ ꓡꓳꓸ ꓠꓹ ꓟ꓾ ꓖꓳ ꓟ ꓐꓰ ꓕꓲ ꓡꓰꓹ ꓞꓳ ꓙꓳ ꓠꓹ ꓟ ꓐꓯ ꓢꓲ ꓠꓬꓲ ꓑꓮꓲꓽ ꓕꓱ ꓟ ꓔꓯ ꓬꓰ ꓔꓬ ꓟ ꓥ ꓡꓳ= ꓬꓰ-ꓢꓴ ꓟ-ꓡꓲ-ꓬ ꓬꓳ-ꓢꓷ ꓕꓲ ꓦꓲ ꓘꓴꓽ ꓠꓬ ꓢꓲꓽ ꓫꓬˍ ꓟ ꓙꓲꓻ ꓫꓬˍ ꓟ꓾ ꓣꓱꓽ ꓛꓰꓽ ꓐꓲˍ ꓟ ꓦꓲ ꓘꓴꓽ ꓥ ꓡꓳ= ꓪꓴ-ꓢ ꓠꓲꓹ ꓡꓶꓽ ꓙꓳˍ ꓟ ꓦꓲ ꓘꓴꓽ ꓥ ꓡꓳ=
ꓟꓲ ꓠꓯ ꓕꓱ ꓟ ꓗꓪ ꓠꓬ ꓮꓽ ꓟ ꓥˍ ꓟꓲ ꓦꓲ ꓘꓴꓽ ꓠꓯꓸꓼ ꓗꓪ ꓐꓰ ꓓꓳ ꓡˍ ꓫꓵꓽˍ ꓡꓰꓽ ꓥ ꓡꓳ= ꓮꓽ ꓐ ꓮ ꓟ ꓗꓪ ꓐꓰ ꓓꓳ ꓡˍ ꓫꓵꓽ ꓡꓰꓽ ꓥ ꓡꓳ= ꓦꓲ ꓘꓴꓽ ꓕꓱ ꓟ ꓠꓬ ꓢꓲꓽ ꓫꓬˍ ꓡꓳ= ꓦꓲ ꓘꓴꓽ ꓥ ꓕ ꓑꓳꓸꓼ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓟꓬꓱ ꓓꓳꓽ ꓙꓳˍ ꓫꓵꓽ ꓡꓰꓽ ꓥ ꓡꓳ=
ꓖꓳ ꓡꓱ ꓐꓯˍ ꓥ ꓟꓲ ꓣꓳ ꓦꓲ ꓘꓴꓽ ꓠꓬ ꓟꓽ ꓙꓲ ꓫꓬ ꓕꓯ ꓣꓳ ꓦꓲ ꓘꓴꓽ ꓠꓬ ꓠꓵꓻ ꓠꓲꓹ ꓟꓶꓽ ꓡꓰˍ ꓕꓯ꓾ ꓣꓳ ꓦꓲ ꓘꓴꓽ ꓠꓬ ꓪꓴ-ꓢ ꓟꓶꓽ ꓬꓰˍ ꓕꓯ ꓦꓲ ꓘꓴꓽ ꓕꓱ ꓟ ꓠꓬ ꓠꓻ ꓡꓰ ꓓꓴ꓾ ꓦꓲ ꓘꓴꓽ ꓕꓱ ꓟ ꓠꓬ ꓣꓳ ꓔꓯ ꓓꓳꓽ ꓡꓰ ꓓꓴ ꓗꓷ ꓡꓰˍ ꓡꓳ= ꓖꓳ ꓡꓱ ꓠꓬꓲ ꓟꓲ ꓠꓯ ꓕꓱ ꓟ ꓗꓪ ꓗꓹ ꓛꓲꓽ ꓓꓰ ꓡꓰˍ ꓟ ꓬꓲ ꓔꓶꓸ ꓠꓬ ꓦꓲꓻ ꓥ ꓡꓳ= ꓖꓳ ꓟˍ ꓡꓰ ꓐꓰ ꓟꓽ ꓗꓹ ꓛꓲ ꓓꓰ ꓡꓰ ꓟ ꓬꓲ ꓔꓶꓸ ꓥˍ ꓟꓲ ꓦꓲ ꓖꓳ ꓟ ꓥ ꓗꓴꓸˍ ꓡꓳ= ꓙꓲˍ ꓟ ꓥˍ ꓟꓲ ꓕꓱ ꓗꓪ ꓚꓳꓸ ꓓꓳ ꓡˍ ꓡꓳ꓾ ꓟꓽ ꓙꓲꓻ ꓟˍ ꓟꓲ ꓕꓱ ꓗꓪ ꓚꓳꓸ ꓓꓳ ꓡˍ ꓡꓳ=
ꓣꓳ ꓮ ꓟꓶ ꓕꓲ ꓞꓲꓼ ꓦꓬꓼ ꓠꓬꓲ ꓗꓪ ꓤ ꓠꓱ ꓤ ꓐꓴ ꓐꓯ ꓘꓶꓽ ꓟꓽ ꓠ ꓠꓹ ꓟ ꓤ ꓠꓱ ꓤ ꓐꓴ ꓠꓬ ꓦꓲ ꓘꓴꓽ ꓠꓯꓸꓼ ꓗꓪ ꓮꓽ ꓐ ꓮ ꓟ ꓐꓴ ꓜꓳꓽ ꓜꓳꓽ ꓟꓸ ꓖꓶ ꓑꓱ ꓖꓶˍ ꓟ ꓟꓽ ꓙꓳ ꓟ ꓑꓶꓸ ꓓꓴ꓾ ꓝꓮꓲ ꓦꓲ ꓘꓴꓽ ꓠꓯꓸꓼ ꓗꓪ ꓪꓴ-ꓢ ꓣꓱꓽ ꓛꓰꓽ ꓢꓯꓼ ꓐꓽˍ ꓟ ꓑꓶꓸ ꓓꓴ ꓥ ꓡꓳ꓾ ꓐꓰ ꓣꓳ ꓡꓳꓸ ꓟꓳˍ ꓡꓳ=
ꓖꓳ ꓡꓱ ꓠꓬꓲ ꓣꓳ ꓮ ꓙꓵꓽ ꓠꓬ ꓠꓬꓲꓸ ꓠꓬꓲ ꓑꓮꓲꓽ ꓗꓪ ꓐꓰ ꓣꓳ ꓦꓲꓻ ꓔꓯ ꓣꓳ ꓡꓳꓸ ꓠꓬꓲ ꓓꓴ ꓥ ꓡꓳ= ꓣꓳ ꓦꓲ ꓠꓯꓸꓼ ꓘꓴꓽ ꓗꓪ ꓙꓵꓻ ꓠꓲꓹ ꓕꓱ ꓟ ꓙꓳˍ ꓡ= ꓢꓲ ꓒ ꓬꓰ-ꓢꓴ ꓔꓯ ꓬꓲ ꓪꓴꓸ ꓗꓪ꓾ ꓮ ꓟꓴꓸ ꓟꓴ ꓗꓪ ꓗꓶ ꓔ ꓡ꓾ ꓐꓯˍ ꓟ ꓣꓳ ꓚꓬꓹ ꓠꓬꓲ ꓓꓴ ꓥ ꓡꓳ=
ꓠꓬꓲꓸ ꓠꓬꓲ ꓬꓳ-ꓢꓷ ꓐꓰ ꓟ-ꓡꓲ ꓕꓲ ꓦꓲ ꓔꓯ ꓣꓳ ꓡꓳꓸ ꓠꓬꓲˍ ꓕꓯ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓐꓰ ꓔꓬ ꓡꓳ= ꓬꓲ ꓪ ꓠꓬ ꓮ ꓫꓵꓽ ꓬꓰˍ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓯꓸꓼ ꓗꓪ ꓡꓰꓽ ꓬꓰˍ ꓡꓳ= ꓬꓲ ꓪ ꓔꓬ ꓟ ꓠꓬ ꓢꓲ ꓒ ꓬꓰ-ꓢꓴ ꓐꓱ ꓶˍ ꓡꓰꓽ ꓥ ꓡꓳ= ꓮ ꓫꓵꓽ ꓥˍ ꓟꓲ ꓢꓲ ꓒ ꓬꓰ-ꓢꓴ ꓐꓱ ꓶˍ ꓡꓰꓽ ꓬꓰˍ ꓡꓳ= ꓮ ꓡꓲ ꓗꓪ ꓙꓰˍ ꓥ ꓟꓲ ꓮ ꓫꓵꓽ ꓓꓵꓽ ꓙꓽˍ ꓥ ꓟꓲ ꓢꓲ ꓒ ꓬꓰ-ꓢꓴ ꓐꓱ ꓶˍ ꓡꓰꓽ ꓥ ꓡꓳ= ꓬꓲ ꓪ ꓠꓬ ꓢꓲꓽ ꓫꓬˍ ꓡꓳ꓾ ꓙꓲꓻ ꓫꓬˍ ꓡꓳ꓾ ꓐꓯˍ ꓥ ꓟꓲ ꓬꓲ ꓪ ꓦꓲ ꓠꓯꓸꓼ ꓗꓪ ꓠꓲꓹ ꓫꓸ ꓟꓬ ꓫꓸ ꓓꓴ ꓠꓬ ꓙꓳˍ ꓡꓳ= ꓕꓲ ꓣꓳ ꓛꓳꓽ ꓕꓲ ꓣꓳ ꓜꓳꓽ ꓜꓳꓽ ꓟꓽ ꓢꓷꓸ ꓟ꓾ ꓕꓲ ꓣꓳ ꓛꓳꓽ ꓕꓲ ꓣꓳ ꓕꓲ ꓖ ꓕꓲ ꓧꓪꓹ ꓠꓲꓹ ꓥꓳ ꓓꓴ꓾ ꓥ ꓠꓬ ꓠꓲꓹ ꓫ ꓟꓬ ꓫ ꓓꓴ ꓥˍ ꓟꓲ ꓔꓳꓹ ꓜꓳꓽ ꓡˍ ꓡꓳ=
ꓬꓲ ꓐꓽ ꓗꓪ ꓚꓳꓸ ꓡˍ ꓟ ꓠꓲꓹ ꓫ ꓟꓬ ꓫ ꓓꓴ꓾ ꓤꓹ ꓠꓬꓲ ꓫꓵꓽ ꓠꓬꓲ ꓓꓴ ꓥˍ ꓟꓲ ꓬꓲ ꓪ ꓔꓳꓹ ꓜꓳꓽˍ ꓡꓳ= ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓪ ꓠꓬ ꓢꓲ ꓒ ꓬꓰ-ꓢꓴ ꓐꓰ ꓪꓴ-ꓢ ꓔꓯ ꓙꓵꓻ ꓔ ꓡꓳ= ꓮ ꓡꓲ ꓫꓵꓽ ꓔꓳꓹ ꓜꓳꓽ ꓡˍ ꓥ ꓟꓲ ꓪꓴ-ꓢ ꓔꓯ ꓠ ꓐꓼ ꓕꓲꓽ ꓙꓵꓻ ꓗꓴꓸˍ ꓟ ꓠꓬ ꓬꓲ ꓪ ꓔꓯ ꓢꓲꓽ ꓫꓬˍ ꓟ ꓦꓲ ꓘꓴꓽ ꓒꓬꓱꓼ ꓡ ꓝꓲˍ ꓟ ꓥ ꓡꓳ=
ꓣꓳ ꓢꓲ ꓒ ꓬꓰ-ꓢꓴ ꓤꓶꓻ ꓔꓯ ꓡꓳꓸ ꓠꓬꓲˍ ꓕꓯ ꓞꓲꓼ ꓣꓳˍ ꓕꓯ ꓡꓰ ꓫꓸ ꓙꓵ ꓟꓶ ꓙꓵ ꓓꓴ ꓔꓳꓹ ꓜꓳꓽ ꓗꓳꓸ ꓡˍ ꓡꓳ= ꓮꓽ ꓐ ꓮ ꓟ ꓣꓱꓽ ꓢꓴ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓞꓲꓼ ꓣꓳˍ ꓕꓯ ꓡꓰ ꓠꓲꓹ ꓫ ꓟꓬ ꓫꓸ ꓓꓴ ꓢꓲ ꓒ ꓬꓰ-ꓢꓴ ꓐꓰ ꓕꓲ ꓡꓰꓹ ꓔꓳꓹ ꓜꓳꓽ ꓗꓳꓸ ꓡˍ ꓡꓳ= ꓖꓳ ꓡꓱ ꓥ ꓟꓲ ꓬꓲ ꓪ ꓠꓬ ꓮ ꓡꓲ ꓫꓵꓽ ꓔꓳꓹ ꓜꓳꓽ ꓡˍ ꓥ ꓟꓲ ꓪꓴ-ꓢ ꓔꓯ ꓬꓲ ꓪ ꓙꓵꓻˍ ꓡꓳ= ꓖꓳ ꓟ ꓑꓶꓸ ꓓꓴ ꓬꓲ ꓪ ꓠꓬ ꓢꓲꓽ ꓫꓬˍ ꓟ ꓦꓲ ꓘꓴꓽ ꓒꓬꓱꓼ ꓡˍ ꓡꓳ=
ꓠꓬꓲꓸ ꓠꓬꓲ ꓠꓴ ꓥꓪ ꓮ ꓫꓵꓽ ꓔꓳꓹ ꓜꓳꓽ ꓡˍ ꓥ ꓟꓲ ꓪꓴ-ꓢ ꓔꓯ ꓠ ꓐꓼ ꓕꓲꓽ ꓗꓪ ꓗꓶ ꓔ ꓡ꓾ ꓓꓵꓽ ꓙꓽ ꓠꓬꓲ ꓡꓯ= ꓢꓲ ꓒ ꓬꓰ-ꓢꓴ ꓔꓯ ꓠ ꓐꓼ ꓕꓲꓽ ꓗꓶ ꓔ ꓥꓳ ꓐꓯˍ ꓠꓬ ꓣꓳ ꓦꓲ ꓘꓴꓽ ꓠꓬ ꓡꓱꓻˍ ꓟ꓾ ꓣꓳ ꓦꓲ ꓘꓴꓽ ꓠꓬ ꓶꓼ ꓙꓳ ꓫꓱꓹ ꓙꓳˍ ꓟ꓾ ꓣꓳ ꓦꓲ ꓘꓴꓽ ꓠꓬ ꓮ ꓕꓯ ꓥˍ ꓟꓲ ꓗꓹ ꓛꓲꓽˍ ꓟ ꓦꓲ ꓘꓴ ꓒꓬꓱꓼ ꓡˍ ꓥꓳ꓾ ꓐꓰ ꓣꓳ ꓢꓷꓸ ꓠ ꓗꓹ ꓡꓳ=
ꓝꓮꓲ ꓠꓬꓲꓽ ꓫꓵꓽ ꓕꓲ ꓫꓵꓽ ꓟ ꓠꓬ ꓟ-ꓡꓲ-ꓬ ꓐꓰ ꓬꓳ-ꓢꓷ ꓕꓲ ꓦꓲ ꓢꓴ ꓠꓬ ꓘꓳ ꓫꓱ ꓫꓱˍ ꓐꓰ ꓔꓬ ꓡꓳ= ꓮ ꓫꓵꓽ ꓬꓰˍ ꓥ ꓟꓲ ꓘꓳ ꓫꓱ ꓫꓱˍ ꓡꓰꓽ ꓬꓰ ꓢꓲ ꓠꓬꓲ ꓪꓴ-ꓢ ꓔꓯ ꓥˍ ꓟꓲ ꓘꓳ ꓫꓱ ꓫꓱˍ ꓡꓰꓽ ꓪꓽ ꓘꓴ ꓢꓲ ꓠꓬꓲ꓾ ꓘꓪꓼˍ ꓟ ꓘꓶꓽ ꓘꓹ ꓟ ꓟꓽ ꓙꓳ꓾ ꓮ ꓫꓵꓽ ꓥˍ ꓟꓲ ꓟꓽ ꓪꓳꓹ ꓔꓬ ꓢꓲ ꓢꓯꓼ ꓕꓵꓼˍ ꓡꓳ= ꓕꓱ ꓟ ꓠꓬ ꓬꓲ ꓪ ꓔꓯ ꓙꓲꓻ ꓫꓬˍ ꓟ ꓦꓲ ꓘꓴꓽ ꓒꓬꓱꓼ ꓡ ꓝꓲˍ ꓟ ꓥ ꓡꓳ=
