ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓿ ꓠꓬꓲ. ꓠꓬꓲ ꓠꓬ ꓠꓵꓻ ꓠꓲ, ꓢꓲ ꓒ ꓦꓵꓻ ꓡꓺꓳ꓿ ꓠꓵꓻ ꓠꓲ, ꓢꓲ ꓒ ꓦꓵꓻ ꓡˍ ꓟ ꓦꓬꓼ ꓠꓬꓲ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ ꓐꓰ ꓐꓯ ꓩꓴ ꓡˍ ꓥꓳ꓿ ꓟꓲ ꓠꓯ ꓗꓪ ꓠꓵꓻ ꓠꓲ, ꓐꓯˍ ꓟ ꓣꓳ ꓑ ꓙꓽ ꓠꓬꓲˍ ꓡꓳ꓿ ꓐꓯ ꓘꓶ ꓕꓲ ꓘꓶ ꓙꓳˍ ꓡꓳ꓿ ꓠꓵꓻ ꓠꓲ, ꓔꓯ ꓠꓬ ꓟꓳꓻ ꓓˍ ꓟ ꓔꓯꓺ ꓓꓴ ꓗꓪ ꓐꓰ ꓔꓯꓺ ꓟꓽ ꓠ꓿ ꓮ ꓡꓲ ꓘꓶ ꓛꓲ ꓟꓴˍ ꓡ꓾ ꓮ ꓡꓲ ꓘꓶ ꓛꓲ ꓫꓵˍ ꓡ꓾ ꓐꓰ ꓠꓵꓻ ꓠꓲ, ꓔꓯ ꓣꓳ ꓔꓯꓺ ꓟꓽ ꓠ꓿
ꓖꓳ ꓡꓱ ꓐꓯˍ ꓥ ꓟꓲ ꓠꓵꓻ ꓠꓲ, ꓔꓯ ꓠꓬ ꓔꓯꓺ ꓓꓴ ꓕꓲ ꓟ ꓙꓳˍ ꓡꓳ꓿ ꓖꓳ ꓟ ꓠꓬ ꓮ ꓡꓲ ꓫꓵꓽ ꓥ ꓡ ꓐꓯˍ ꓠꓬ꓾ ꓮ ꓡꓲ ꓘꓶ ꓛꓲ ꓠꓲ, ꓠꓵˍ ꓡ꓾ ꓮ ꓡꓲ ꓘꓶ ꓛꓲ ꓫ. ꓙꓵ ꓟꓶ ꓙꓵ ꓢꓲ ꓠꓬꓲ ꓠꓲ, ꓠꓵ ꓐ ꓡˍ ꓡ ꓐꓯ ꓟ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓢꓷ. ꓓˍ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓣꓳ ꓠꓲ, ꓠꓵ ꓢꓴ ꓐꓱ ꓶ ꓣꓳ ꓮ ꓘꓶ. ꓠꓲ, ꓠꓵˍ ꓠꓬ ꓮ ꓘꓶ. ꓫ. ꓙꓵ ꓟꓶ ꓙꓵ ꓓꓴ ꓔꓳ, ꓜꓳꓽ ꓡ ꓥˍ ꓟꓲ ꓣꓳ ꓜꓲꓽ ꓐ ꓡˍ ꓥꓳ꓿ ꓮ ꓡꓲ ꓓˍ ꓥˍ ꓟꓲ ꓬꓲ ꓔꓯ ꓠꓲ, ꓠꓵ ꓔꓬ ꓟ ꓑꓶ. ꓓꓴ ꓠꓵꓻ ꓠꓲ, ꓠꓬ ꓖꓳ ꓗꓪ ꓥꓳ ꓓ, ꓟ ꓥꓳ꓿
ꓮꓽ ꓐ ꓕꓲ ꓣꓳ ꓠꓬ ꓬꓲ ꓤ ꓠꓱ ꓔꓯ ꓮ ꓘꓶ. ꓠꓲ, ꓠꓵˍ ꓟ ꓑꓶ. ꓓꓴ ꓬꓲ ꓔꓯ ꓜꓽ ꓓꓴ ꓟꓽ ꓙꓳ꓾ ꓖꓪꓽ ꓓꓴ ꓟꓽ ꓙꓳ꓾ ꓬꓲ ꓟꓬꓱꓽ ꓬꓰ ꓖꓴ ꓗꓪ ꓬꓲ ꓔꓯ ꓢꓴ ꓓꓶꓽ ꓠꓬꓲ ꓘꓶꓻ ꓠꓬꓲ ꓮ ꓡꓲ ꓬꓰ ꓔꓬ ꓥˍ ꓟꓲ ꓬꓲ ꓤ ꓠꓱ ꓐꓱ ꓶ ꓬꓲ ꓠꓬ ꓜꓲꓽ ꓐ ꓡˍ ꓟ ꓥ ꓡꓳ꓿ ꓖꓳ ꓟ ꓔꓯ ꓠꓬ ꓠꓵꓻ ꓠꓲ, ꓔꓯꓺ ꓓꓴ ꓐꓰ ꓣꓳ ꓢꓷ. ꓓˍ ꓟ ꓥ ꓡꓳ꓿
ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓣꓳ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓕꓰ ꓡꓱ ꓥꓳ꓿ ꓟꓴꓽ ꓗꓪ ꓗꓴꓷꓼ ꓗꓪ ꓧꓶ. ꓕꓯ ꓡꓰ ꓬꓲ ꓙꓳˍ ꓡꓳ꓿ ꓐꓯ ꓘꓶ ꓠꓬ ꓬꓲ ꓚꓰ ꓬꓲ ꓪꓴ. ꓕꓯ ꓡꓰ ꓙꓳˍ ꓡꓳ꓾ ꓐꓯ ꓟ ꓔꓯ ꓟ. ꓟꓲꓽ ꓗꓪ ꓣꓳ ꓑ ꓙꓽ ꓪˍ ꓟ ꓥꓳ꓿ ꓐꓯ ꓠꓲ, ꓫꓵˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓠꓬ ꓟꓴ ꓗꓪ ꓗꓴꓷꓼ ꓐꓬꓱꓼ ꓡꓱꓼ ꓡꓱꓼ ꓟ ꓗꓴꓷꓼ ꓗꓪ ꓮ ꓫꓵꓽ ꓟꓲ ꓟꓽ ꓞ꓿ ꓖꓳ ꓡꓱ ꓐꓯ ꓥ ꓟꓲ ꓬꓲ ꓠꓬ ꓣꓳ ꓔꓯ ꓠꓲ, ꓠꓵˍ ꓟ ꓑꓶ. ꓓꓴ ꓟꓴ ꓗꓪ ꓗꓴꓷꓼ꓾ ꓪ ꓔꓲ.꓾ ꓙꓳˍ ꓟ ꓮ ꓙꓵꓽ ꓔꓯ ꓬꓲ ꓡꓰ ꓡꓳ ꓒꓰ ꓗꓷ ꓢꓲ ꓠꓬꓲ ꓟꓽ ꓒꓵꓽ ꓟ ꓞꓳ ꓤ ꓒꓬꓱꓽ ꓔꓯ ꓬꓲ ꓣꓴ ꓡˍ ꓟ ꓥꓳ꓿ ꓣꓳ ꓔꓯ ꓚꓬꓴ. ꓠ, ꓟ ꓐꓱ ꓶ ꓬꓲ ꓠꓬ ꓞꓳ ꓤ ꓒꓬꓱꓼ ꓡ ꓟ ꓥ ꓡꓳ꓿
ꓔꓯ ꓥꓳꓽ ꓐꓯ ꓪˍ ꓠꓬ꓾ ꓡ ꓞꓳ ꓕꓲ ꓣꓳ ꓟ ꓠꓬ ꓮ ꓠꓽ ꓒꓬꓱꓼ ꓬꓰˍ ꓟ ꓡꓰ ꓛꓲ ꓱʼ ꓓꓰ ꓡꓰˍ ꓟ ꓞꓳ ꓤ ꓒꓬꓱꓽ ꓣꓴ ꓡˍ ꓟ ꓥꓳ꓿ ꓮ ꓡꓲ ꓘꓶ ꓛꓲ ꓢꓲ ꓒ ꓬꓰ‐ꓢꓴ ꓠꓵꓻ ꓠꓲ, ꓪꓴꓽˍ ꓡ꓿ ꓢꓲ ꓒ ꓬꓰ‐ꓢꓴ ꓠꓵꓻ ꓠꓲ, ꓠꓬ ꓕꓱ ꓡꓰˍ ꓡꓰꓽ ꓟꓽ ꓥ꓿ ꓣꓳ ꓟꓲ ꓠꓯ ꓞꓳ ꓤ ꓐꓱ ꓶ꓾ ꓕꓲ ꓡꓰ, ꓔꓬ ꓟꓶ ꓠ, ꓟ ꓐꓱ ꓶ ꓡꓯꓼ ꓐꓳ ꓔꓶ. ꓓꓴ ꓕꓯꓽ ꓢꓲ ꓗꓪ ꓫꓵꓻˍ ꓗꓪ ꓛꓲ ꓬꓲ ꓠꓵꓻ ꓠꓲ, ꓠꓬ ꓣꓳ ꓟꓳꓻ ꓓ, ꓟ ꓥꓳ꓿ ꓣꓳ ꓔꓯꓺ ꓠꓬꓲ ꓠ. ꓟ ꓥꓳ꓿
ꓕꓱ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓕꓱ ꓟ ꓑꓶ. ꓓꓴ ꓣꓳ ꓗ, ꓛꓲꓽ ꓓꓴ ꓥ ꓡꓳ꓿ ꓗ, ꓛꓲꓽˍ ꓟ ꓦꓬꓼ ꓠꓬꓲ ꓥꓳ꓿ ꓣꓳ ꓔꓯ ꓚꓬꓴ. ꓖꓶ ꓡˍ ꓟ ꓪꓴ‐ꓢ ꓠꓬ ꓠꓱ. ꓐꓯ ꓪꓴ‐ꓢ ꓡꓰ ꓟꓽ ꓥ꓿ ꓣꓳ ꓔꓯ ꓠꓲ, ꓠꓵ ꓔꓬ ꓟ ꓪꓴ‐ꓢ ꓥꓳ꓿
ꓕꓱ ꓟ ꓑꓶ. ꓓꓴ ꓣꓳ ꓥˍ ꓟꓲ ꓠꓵꓻ ꓠꓲ, ꓢꓲ ꓒˍ ꓡꓰ ꓐꓰ ꓣꓳ ꓠꓵꓻ ꓠꓲ, ꓔꓯ ꓮ ꓡꓲ ꓘꓶ ꓛꓲ ꓠꓲ, ꓠꓵˍ ꓡ ꓐꓰ ꓢꓷ. ꓠ, ꓟ ꓐꓱ ꓶ ꓣꓳ ꓠꓬ ꓮ ꓡꓲ ꓘꓶ ꓛꓲ ꓫ. ꓙꓵ ꓟꓶ ꓙꓵ ꓓꓴ ꓔꓳ, ꓜꓳꓽˍ ꓥ ꓟꓲ ꓣꓳ ꓢꓲ ꓒ ꓐꓱ ꓶ ꓣꓳ ꓢꓯꓼ ꓕꓵꓼ ꓓꓴ ꓥꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓠꓬ ꓣꓳ ꓐꓱ ꓶ ꓬꓲ ꓪꓴ. ꓕꓯ ꓡꓰ ꓣꓱꓽ ꓬꓰ ꓔˍ ꓟ ꓑꓶ. ꓓꓴ ꓣꓳ ꓠꓬ ꓐꓲ ꓜꓲꓼ ꓡꓰˍ ꓟ ꓥ ꓡꓳ꓿ ꓕꓱ ꓟ ꓑꓶ. ꓓꓴ ꓣꓳ ꓦꓵꓻ ꓡˍ ꓟ ꓢꓲ ꓒ ꓬꓰ‐ꓢꓴ ꓐꓱ ꓶ ꓥˍ ꓟꓲ ꓣꓳ ꓠꓬ ꓫ. ꓙꓵ ꓟꓶ ꓙꓵ ꓓꓴ ꓮ ꓡꓲ ꓔꓳ, ꓜꓳꓽ ꓡˍ ꓥ ꓟꓲ ꓬꓲ ꓐꓯ ꓘꓶ ꓔꓯ ꓛꓳ ꓢꓲ ꓠꓬꓲ ꓬꓲ ꓐꓰ ꓕꓲ ꓪꓽ ꓔꓬ ꓓꓴ ꓥꓳ꓿ ꓠꓬꓲ. ꓠꓬꓲ ꓟ. ꓟꓲꓽ ꓝꓲ. ꓠꓬ꓾ ꓐꓯ ꓘꓶꓽ ꓠꓬ ꓧꓪꓽ ꓖꓳ ꓓꓱꓽ ꓒꓬꓱꓼ ꓡ ꓢꓲ꓾ ꓖꓳ ꓕꓯ ꓥꓪ ꓠꓴꓽ ꓐꓰ ꓕꓲ ꓡꓰ, ꓔꓬ ꓡꓳ꓾ ꓐꓰ ꓐꓯˍ ꓟ ꓡꓰ ꓐꓰ ꓣꓳ ꓮ ꓡꓲ ꓘꓶ ꓛꓲ ꓫ. ꓙꓵ ꓟꓶ ꓙꓵ ꓓꓴ ꓔꓳ, ꓜꓳꓽ ꓔꓬ ꓥˍ ꓟꓲ꓾ ꓑꓳ ꓡꓯ ꓘꓳ ꓢꓰꓼ ꓡꓯ ꓘꓳ ꓔꓳ, ꓜꓳꓽ ꓔꓬ ꓥˍ ꓟꓲ꓾ ꓕꓱ ꓟ ꓠꓬ ꓣꓳ ꓠꓬ ꓪꓴ‐ꓢ ꓐꓱ ꓶ ꓫ. ꓙꓵ ꓟꓶ ꓙꓵ ꓔꓬ ꓡꓳ꓿ ꓢꓲ ꓒ ꓬꓰ‐ꓢꓴ ꓥˍ ꓟꓲ ꓖꓳ ꓕꓯ ꓠꓬ ꓣꓳ ꓐꓰ ꓕꓲ ꓡꓰ, ꓔꓬ ꓡꓳ ꓐꓰ ꓐꓯˍ ꓕꓯ ꓠꓬ ꓣꓳ ꓠꓬ ꓗ, ꓛꓲꓽ ꓓꓴ ꓥꓳ꓿ ꓠꓵꓻ ꓠꓲ, ꓢꓲ ꓒ ꓣꓳ ꓔꓯ ꓙꓳˍ ꓟ ꓑꓶ. ꓓꓴ ꓣꓳ ꓕꓯ ꓟ ꓡꓰ ꓛꓲ ꓗ, ꓛꓲꓽ ꓓꓴ ꓠꓱ. ꓐꓯ ꓟꓽ ꓙꓳꓻꓳ꓿
