ꓠꓬꓲ. ꓠꓬꓲ ꓠꓬ ꓚꓧꓣꓲꓢꓔꓟꓮꓢ ꓦꓬꓼ ꓠꓬꓲ ꓥ ꓡꓳ꓾ ꓣꓳ ꓟꓲ ꓠꓯ ꓕꓱ ꓟ ꓗꓪ ꓢꓯ. ꓔꓬ ꓟ ꓕꓲ ꓑ, ꓗꓪ ꓣꓳ ꓟꓽ ꓓꓵ ꓙ ꓔ ꓟꓽ ꓥꓳ ꓡꓳ. ꓔ ꓫꓵ ꓬꓲ ꓫꓵ ꓬꓲ ꓙꓰ ꓘꓶ ꓡꓶꓽ ꓗꓽ ꓔ ꓓꓴ ꓓꓵ ꓙ ꓪꓴꓽ ꓧꓶ ꓓꓴ ꓮ ꓘꓶ. ꓓꓳ ꓡ ꓗꓴ. ꓡꓳ꓾ꓕꓱ ꓟ ꓗꓪ ꓐꓰ ꓣꓳ ꓝꓴꓲ ꓟꓽ ꓥ ꓥ ꓐꓰ ꓠꓱ. ꓐꓯꓼ ꓢꓴ ꓬꓰ ꓛꓬ ꓗꓷ ꓟ ꓬꓰ ꓥꓳ ꓗꓷ ꓟ ꓝꓴꓲ ꓔꓯ ꓣꓳ ꓟꓯ ꓠ ꓗꓷꓳ ꓫꓵ ꓬꓲ ꓪ ꓚꓲ ꓛꓬ ꓟꓽ ꓙꓴ ꓞꓷ ꓟ ꓑꓶ ꓓꓴ ꓥꓳ ꓗꓷ ꓟ ꓝꓴꓲ ꓔꓯ ꓣꓳ ꓔꓯ ꓡꓲ ꓡꓳ ꓫꓵ ꓥ ꓟꓲ ꓔꓳ, ꓜꓳ ꓗꓴ. ꓡꓳ꓾ ꓖꓳ ꓟ ꓡꓰ ꓟꓽ ꓞꓲ ꓣꓳ ꓮ ꓘꓶ. ꓠꓲ, ꓠꓵꓻ ꓟ ꓠꓴ ꓛꓳ ꓒꓯ, ꓦꓲꓻ ꓢꓲ ꓒ ꓦꓲꓻ ꓢꓲ ꓟ ꓠꓴ ꓔꓯ ꓗꓶ. ꓗꓷ ꓫꓵ ꓠꓴ ꓔꓯ ꓥꓳꓽ ꓗꓷꓳ ꓫꓵ ꓥ ꓟꓲ ꓔꓳ, ꓜꓳ ꓗꓴ. ꓡꓳ꓾ ꓮ ꓫꓵ ꓑꓶ ꓓꓴ ꓥ ꓟꓲ ꓮ ꓗꓪ ꓥ ꓟꓲ ꓮ ꓕꓯ ꓥ ꓟꓲ ꓠꓴ ꓔꓯ ꓗ. ꓧꓪ ꓔꓬ ꓫꓵ ꓠꓴ ꓔꓯ ꓠꓻ ꓡꓰ ꓠ ꓗꓪ ꓛꓲ ꓬꓰ ꓔꓬ ꓫꓵ ꓕꓱ ꓡꓱ ꓫꓵ ꓙꓳ ꓗꓴ. ꓡꓳ꓾ ꓕꓱ ꓡꓱ ꓔꓳ, ꓜꓳ ꓡ ꓕꓯ ꓠꓴ ꓮ ꓡꓰ ꓬꓰ ꓠꓲ, ꓫꓵ_ ꓡ꓾ ꓣꓳ ꓮ ꓙꓵ ꓠꓬ ꓝꓮꓲ ꓬꓲ ꓔꓯ ꓔꓲ. ꓠꓲ, ꓫꓵ_ ꓟ꓾ ꓬꓲ ꓔꓯ ꓗ. ꓧꓪ ꓠ, ꓟ ꓣꓳ ꓬꓰ ꓠꓲ, ꓫꓵ_ ꓡꓳ꓿
ꓖꓳ ꓡꓱ ꓥ ꓟꓲ ꓢꓲ ꓒ ꓬꓰ‐ꓢꓴ ꓚꓱ, ꓠꓬ ꓖꓳ ꓡꓱ ꓟꓽ ꓥ꓾ ꓮ ꓡꓰ ꓔ ꓐꓰ ꓐꓯ ꓠꓬ ꓣꓳ ꓠꓲ, ꓟ ꓠꓯꓼ ꓗꓪ ꓪꓴ‐ꓢ ꓦ ꓒꓬꓱꓽ ꓕꓲ ꓟ ꓔꓶꓻ ꓔ ꓡꓳ꓾ ꓪꓴ‐ꓢ ꓠꓬ ꓬꓲ ꓞꓳ ꓤ ꓔꓯ ꓚꓰꓼ ꓕꓯ ꓬꓲ ꓶꓻ ꓒꓬꓱ ꓔꓯ ꓡꓳ. ꓢꓲ ꓠꓬꓲ ꓣꓳ ꓔꓯ ꓚꓰꓼ ꓔ ꓟ ꓥ ꓡꓳ꓿ ꓖꓳ ꓡꓱ ꓠꓬꓲ ꓪꓴ‐ꓢ ꓤ ꓮ ꓟꓲ ꓣꓳ ꓠꓬ ꓪꓴ‐ꓢ ꓤ ꓮ ꓟꓲ ꓕꓲ ꓣꓳ ꓡꓰ ꓐꓰ ꓞꓳ ꓙꓳ ꓠ ꓔ ꓡꓳ꓾ ꓢꓯꓼ ꓕꓵꓼ ꓠ ꓔ ꓡꓳ꓿ ꓬꓲ ꓪ ꓮ ꓡꓰ ꓬꓰ ꓡ ꓐꓯ ꓟ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓬꓲ ꓪ ꓔꓯ ꓑꓮꓲ ꓬꓰ ꓢꓲ ꓠꓬꓲ ꓐꓯ ꓗ. ꓟ ꓟꓽ ꓥ ꓥ ꓐꓰ ꓣꓳ ꓠꓬ ꓮꓽ ꓟ ꓥ ꓡ ꓐꓯ ꓟ ꓕꓯ ꓢꓲ ꓗꓪ ꓦꓰꓼ ꓞ, ꓠ, ꓟ ꓣꓳ. ꓚꓵ ꓡꓳ꓾ ꓟ. ꓟꓲꓽ ꓘꓴ ꓗꓪ ꓪꓴ‐ꓢ ꓠꓬ ꓕꓱ ꓡꓱ ꓐꓯ ꓔ ꓡꓳ꓿ ꓥꓶ ꓢꓴ ꓙꓵꓻ ꓢꓴ ꓮ ꓙꓵ ꓕꓯ ꓢꓲ ꓗꓪ ꓪꓴ‐ꓢ ꓬꓲ ꓟꓶꓽ ꓦ ꓦ ꓖꓶ_ ꓡꓳ꓾ ꓟꓲꓽ ꓟꓲ ꓣꓴ ꓖꓶ_ ꓡꓳ꓾ ꓖꓳ ꓟ ꓡꓰ ꓐꓰ ꓬꓲ ꓠꓵꓻ ꓠꓲ, ꓠꓬ ꓮ ꓡꓰ ꓟ ꓔꓯ ꓥ ꓟꓲ ꓙꓳ_ ꓡꓳ ꓐꓯ ꓔ ꓡꓳ꓿ ꓪꓴ‐ꓢ ꓤ ꓠꓱ ꓥ ꓟ ꓣꓳ ꓥ ꓟꓲ ꓣꓳ ꓠꓵꓻ ꓠꓲ, ꓠꓬ ꓣꓳ ꓔꓯ ꓮ ꓡꓰ ꓬꓰ ꓖꓶ ꓡ ꓡ꓾ꓐꓯ_ ꓟ ꓕꓯ ꓢꓲ ꓗꓪ ꓟꓽ ꓥ ꓥ ꓐꓰ ꓣꓳ ꓠꓬ ꓮꓽ ꓟ ꓥ ꓡ ꓮ ꓡꓰ ꓗꓪ ꓦꓰꓼ ꓞ, ꓔꓬ ꓡ ꓐꓯ_ ꓟ ꓕꓯ ꓢꓲ ꓗꓪ ꓦꓰꓼ ꓢꓲ ꓠꓬꓲ ꓬꓲ ꓪ ꓣꓳ ꓔꓯ ꓬꓰ_ ꓟ ꓕꓯ ꓢꓲ ꓗꓪ ꓣꓳ ꓠꓬ ꓚꓱ, ꓬꓲꓼ ꓙꓰ ꓠꓵ ꓠꓲ, ꓟꓳ. ꓖꓶ ꓠ, ꓟ ꓥ ꓡꓳ꓿ ꓣꓳ ꓔꓯ ꓛꓴ ꓙꓳ ꓢꓴ ꓔꓯ ꓠꓲ, ꓠꓵꓻ ꓐꓰ ꓣꓳ ꓐꓯ ꓕꓯ ꓣꓳ ꓔꓯ ꓛꓴ ꓙꓳ ꓢꓴ ꓠꓬ ꓣꓳ ꓠꓵꓻ ꓠꓲ, ꓔꓯ ꓟꓶ ꓒꓵ_ ꓟ ꓑꓶ ꓓꓴ ꓟꓽ ꓥ꓾ ꓬꓲ ꓪ ꓠꓬ ꓣꓳ ꓠꓵꓻ ꓠꓲ, ꓔꓯ ꓟꓶ ꓒꓵ_ ꓟ ꓑꓶ ꓓꓴ ꓟꓽ ꓥ ꓥ ꓐꓰ ꓣꓳ ꓠꓬ ꓪꓴ‐ꓢ ꓤ ꓠꓱ ꓥ ꓡꓳ ꓐꓯ_ ꓟ ꓚꓱ, ꓗꓪ ꓦꓰꓼ ꓞ, ꓢꓲ ꓠꓬꓲ ꓣꓳ ꓠꓵꓻ ꓠꓲ, ꓕꓱ ꓟ ꓟꓳ. ꓖꓶ_ ꓟ ꓥ ꓡꓳ꓿ ꓬꓲ ꓪ ꓠꓬ ꓮ ꓘꓶ. ꓒꓵ_ ꓟ ꓑꓶ ꓓꓴ ꓬꓲ ꓪ ꓠꓬ ꓮ ꓘꓶ. ꓓ_ ꓟ ꓑꓶ ꓓꓴ ꓟꓽ ꓥ꓾ ꓣꓳ ꓠꓬ ꓪꓴ‐ꓢ ꓤ ꓠꓱ ꓥ ꓡꓳ ꓐꓯ_ ꓟ ꓕꓯ ꓢꓲ ꓗꓪ ꓦꓰꓼ ꓞ, ꓢꓲ ꓠꓬꓲ ꓕꓱ ꓡꓱ ꓐꓰ ꓞꓳ ꓙꓳ ꓠ, ꓟ ꓥ ꓡꓳ꓿
ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓫʼꓟꓮꓢ ꓦꓬꓼ ꓠꓬꓲ ꓗꓪ ꓖꓼ ꓖꓶ ꓠꓲ, ꓕꓱ ꓟ ꓔꓯ ꓪꓳ ꓢꓳ. ꓔ ꓡꓯ꓾ ꓪꓴ‐ꓢ ꓠꓬ ꓣꓳ ꓔꓯ ꓠꓲ, ꓠꓵꓻ ꓡꓳ꓾ ꓣꓳ ꓠꓬ ꓝꓴꓲ ꓙꓳ ꓢꓴ ꓥ ꓪꓴ‐ꓢ ꓟꓲ ꓙꓬ ꓗꓪ ꓛꓬ ꓥꓳꓽ ꓡꓰ ꓢꓴ ꓥ꓾ ꓒꓵ_ ꓟ ꓟꓽ ꓥ꓾ ꓖꓳ ꓡꓱ ꓐꓯ ꓥ ꓟꓲ ꓪꓴ‐ꓢ ꓠꓬ ꓠꓵꓻ ꓠꓲ, ꓡꓰ ꓣꓳ ꓔꓯ ꓢꓳ ꓣꓴ ꓖꓶ_ ꓟ ꓦꓬꓼ ꓠꓬꓲ ꓣꓳ ꓔꓯ ꓢꓯꓼ ꓟꓬ ꓖꓶ_ ꓟ ꓦꓬꓼ ꓠꓬꓲ ꓗꓪ ꓣꓳ ꓥ ꓟꓲ ꓠꓱ. ꓐꓯꓼ ꓢꓴ ꓝꓴꓲ ꓔꓯ ꓖꓼ ꓖꓶ ꓢꓲ ꓠꓬꓲ ꓪꓴ‐ꓢ ꓠꓵꓻ ꓠꓲ, ꓔꓯ ꓘꓳ, ꓣꓴ ꓡꓯ꓿
