ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓡꓴ‐ꓘ꓿1ꓽ57‐66) ꓗꓪ ꓬꓲ ꓞꓲꓼ ꓮ ꓘꓶ. ꓟꓳꓽ ꓢꓲ ꓠꓬꓲ ꓞꓳ ꓡꓱꓽ ꓟ ꓥ ꓟ ꓬꓲ‐ꓡꓲ‐ꓫ‐ꓑꓷ ꓠꓬ ꓤ ꓕꓲꓽ ꓣꓳ ꓦꓵꓻ ꓡ ꓗꓷꓳ꓿ ꓫ. ꓕꓱ ꓟꓽ ꓐꓰꓼ ꓡ ꓟ ꓢ‐ꓚꓬ‐ꓡꓲ‐ꓬ ꓥˍ ꓟꓲ ꓬꓲ ꓤ ꓟꓬꓱ ꓔꓯ ꓕꓳꓽ ꓶ ꓒꓬꓽ ꓗꓪ “ꓬꓳ‐ꓦ” ꓐꓰ ꓐꓳ ꓗꓷ ꓕꓯ ꓬꓲ ꓟꓷ ꓠꓷ, ꓠꓬ ꓞꓼ ꓐꓰ ꓫ. ꓕꓱ ꓐꓰꓼ ꓡ ꓗꓷꓳ꓿ ꓪꓴ‐ꓢ ꓟꓽ ꓐ ꓡ ꓟ ꓕꓲ ꓫꓵꓽˍ ꓟꓲ ꓟꓽ ꓙꓳ꓿ ꓮ ꓙꓵꓽ ꓔꓯ ꓪꓴ‐ꓢ ꓐ ꓡˍ ꓟ ꓔꓯ ꓣꓳ ꓟꓳꓻ ꓪˍ ꓡꓳ꓿
ꓖꓳ ꓡꓱ ꓠꓬꓲ ꓞꓳ ꓤ ꓢꓯ ꓼ ꓪ ꓗꓪ ꓐꓰ ꓟꓽ ꓐ ꓡ ꓡꓳ ꓫꓵꓽ ꓮ ꓙꓵꓽ ꓠꓬ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓮ ꓙꓵꓽ ꓔꓯ ꓐ ꓡ ꓟ ꓥ ꓢꓲ꓾ ꓮ ꓙꓵꓽ ꓠꓬ ꓪꓴ‐ꓢ ꓬꓲ ꓪꓽ ꓠꓬꓲˍ ꓟ ꓢꓯꓼ ꓪ ꓗꓪ ꓐꓰ ꓙꓳ ꓔꓬ, ꓟ ꓥ ꓡꓳ ꓐꓯˍ ꓟ ꓔꓯ ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓖꓴ ꓟꓳ. ꓖꓶ ꓡ ꓔꓬ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓟꓽ ꓐꓲ ꓜꓲꓼ ꓟ ꓞꓳ ꓤ ꓠꓬ ꓐꓲ ꓜꓲꓼˍ ꓟ ꓪꓴ‐ꓢ ꓔꓯ ꓙꓵꓻ ꓢꓲ ꓦ ꓡꓱ ꓠꓯ, ꓡꓳ꓿
ꓠꓬꓲ. ꓠꓬꓲ ꓬꓲ‐ꓡꓲ‐ꓫ‐ꓑꓷ ꓐꓰ ꓢ‐ꓚꓬ‐ꓡꓲ‐ꓬ ꓬꓲ ꓪ ꓠꓬꓲ ꓫꓵ. ꓠꓬ ꓬꓲ ꓞꓲꓼ ꓮ ꓘꓶ. ꓪꓴꓽ ꓢꓴ ꓐꓴ ꓥ ꓡꓳ꓿ ꓤ ꓠꓱ ꓟꓶ ꓟꓽ ꓓꓻ ꓟ ꓑꓶ. ꓓꓴ ꓮ ꓟꓬ, ꓟ ꓟꓲꓽ ꓙꓬ ꓗꓪ ꓫ. ꓔꓳ ꓪ ꓢꓴ ꓐꓴ ꓥ ꓡꓳ꓿ ꓖꓳ ꓡꓱ ꓥˍ ꓟꓲ ꓬꓲ ꓪ ꓠꓬꓲꓽ ꓫꓵ. ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓔꓱ, ꓜꓳꓽ ꓢꓴ ꓐꓴ꓾ ꓙꓵꓽ ꓗ ꓮ ꓙꓵꓽ ꓔꓯ ꓞꓳ ꓙꓳ ꓢꓴ ꓐꓴ꓾ ꓙꓵꓻ ꓠꓲ, ꓮ ꓘꓶ. ꓪꓴꓽ ꓢꓴ ꓐꓴ ꓥ ꓡꓳ꓿ ꓡꓴ‐ꓘ 1ꓽ6 ꓗꓪˍ ꓟꓲ “ꓬꓲ ꓪ ꓠꓬꓲꓽ ꓣꓳ ꓠꓬ ꓪꓴ‐ꓢ ꓟꓲꓽ ꓙꓬ ꓗꓪ ꓔꓱ, ꓜꓳꓽ ꓢꓴ ꓥ ꓢꓲ꓾ ꓢꓲ ꓒ ꓕꓵꓼ ꓪˍ ꓐꓰ ꓙꓵꓽ ꓚꓱ, ꓮ ꓙꓵꓽ ꓔꓯ ꓬꓲ ꓜꓶ ꓚ ꓔꓬ ꓢꓴ ꓥ ꓡꓳ꓿” ꓐꓰ ꓐꓯ ꓔˍ ꓡꓳ꓿
ꓖꓳ ꓡꓱ ꓠꓬꓲ ꓠꓬꓲ. ꓠꓬꓲ ꓣꓳ ꓓꓵꓽ ꓙ ꓠꓬꓲ ꓠ ꓔˍ ꓟ ꓠꓬ ꓞꓳ ꓤ ꓢꓯꓼ ꓪ ꓗꓪ ꓐꓰ ꓒꓬꓱꓼ ꓡ ꓟꓽ ꓓꓻ ꓡꓳ ꓫꓵꓽ ꓮ ꓙꓵꓽ ꓠꓬ ꓪꓴ‐ꓢ ꓔꓯ ꓙꓵꓻ ꓢꓲ ꓦ ꓡꓱ ꓐꓳ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓥꓳ ꓐꓯ ꓕꓯ ꓠꓽ ꓮ ꓙꓵꓽ ꓒꓬꓱꓼ ꓡ ꓓ,ˍ ꓡꓳ ꓐꓯˍ ꓟ ꓔꓯ ꓓꓵꓽ ꓙꓽ ꓟꓶ ꓓꓴ ꓥ ꓡꓳ꓿
