ꓬꓰ‐ꓴ ꓙꓲ‐ꓢꓴ ꓦꓵꓻ ꓡ ꓟ (Merry Christmas) 21.12.2025 (Sunday reflection) ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓟꓲ ꓠꓯ ꓦꓵꓻ ꓡ ꓟ ꓚꓱ, ꓠꓬ ꓟꓲ ꓠꓯ ꓡ ꓞꓳ ꓪꓴ. ꓠꓶ. ꓗꓪ ꓓꓵꓽ ꓙ ꓫꓪ ꓠꓬꓲ ꓠꓬ ꓟꓽ ꓓꓽ ꓮ ꓘꓶ. ꓛꓲ ꓪꓴꓽ ꓟ ꓙꓵꓻ ꓠꓲ, ꓚꓱ, ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓐꓯ ꓠꓬ ꓢꓲ‐ꓫꓬ‐ꓦ‐ꓟ ꓗꓪ ꓐꓰ ꓤ ꓠꓱ ꓶ ꓡꓰ ꓟ ꓐꓰ ꓤ ꓟꓶ ꓡꓯ ꓚꓵ, ꓗꓪ ꓔꓯ ꓗꓳ. ꓗꓷ ꓟ (700) ꓘꓳꓼ ꓗꓪ ꓐꓰ ꓟꓷ ꓠꓷ ꓝ. ꓒ ꓬꓲ‐ꓢ‐ꓬ ꓡꓰ ꓟ. ꓟꓲꓽ ꓚꓺ ꓔ ꓟ ꓥ ꓡꓳ꓿
ꓪꓴ‐ꓢ ꓡꓰ ꓖꓶ ꓔ ꓟ ꓦꓻ ꓢꓯꓼ ꓪ ꓗꓪ ꓐꓰ ꓟꓷ ꓠꓷ ꓝ. ꓒꓽ ꓬꓲ‐ꓢ‐ꓬ ꓡꓰ ꓚꓺ ꓔ ꓟ ꓥ ꓡꓳ꓿ ꓪꓴ‐ꓢ ꓠꓬ ꓝꓴꓲ ꓙꓳ ꓢꓴ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓠ, ꓟ ꓟꓬꓱꓽ ꓬꓰ ꓟ ꓙꓵ, ꓕꓯ ꓬꓳ‐ꓢꓷ ꓐꓰ ꓟ‐ꓡꓲ ꓐꓴ ꓠꓬꓲꓽ ꓣꓳ ꓔꓯ ꓓꓽ ꓪꓴ. ꓣꓱ ꓗꓷ ꓟ ꓥ ꓡꓳ꓿ ꓟ‐ꓡꓲ ꓠꓬ ꓟꓴ ꓗꓪ ꓝꓲ ꓓꓴ ꓡꓰ ꓢꓲ‐ꓫꓬ‐ꓟ‐ꓦ ꓢꓯꓼ ꓪ ꓗꓪ ꓐꓰ ꓤ ꓠꓱ ꓶ ꓡ ꓟ ꓚꓱ, ꓔꓯ ꓐꓯ ꓟ. ꓖꓶ ꓟ ꓙꓵ, ꓕꓯ ꓟ‐ꓡꓲ ꓠꓬ ꓮ ꓘꓶ. ꓛꓲ ꓟꓽ ꓙꓽ ꓜꓲꓼ ꓥ ꓟꓲ ꓪꓴ‐ꓢ ꓔꓯ ꓙꓵꓻ ꓟ꓾ ꓠ ꓡꓳ ꓟ ꓪꓴ. ꓠꓬꓲ ꓪꓴ‐ꓢ ꓝꓲ ꓓꓴ ꓟꓴ ꓗꓪ ꓝꓲ ꓓꓴ ꓐꓯ ꓘꓶꓽ ꓔꓯ ꓘꓳ, ꓣꓴ ꓗꓷꓳ꓿ ꓖꓳ ꓟ ꓠꓬ ꓟ‐ꓡꓲ ꓕꓲ ꓤꓶꓻ ꓡꓱ ꓕꓲ ꓞꓲ ꓡꓱ ꓫ. ꓔꓳ ꓓꓴ ꓓꓽ ꓔꓯ ꓪꓴ‐ꓢ ꓔꓯ ꓙꓵꓻ ꓟ ꓪꓴ. ꓠꓬꓲ ꓠ ꓡꓳ ꓗꓷ ꓟ ꓥ ꓡꓳ꓿
ꓟ‐ꓡꓲ ꓠꓬ ꓪꓴ‐ꓢ ꓙꓵꓻ ꓟ ꓙꓵꓻ ꓠꓲ, ꓮ ꓟꓬ, ꓙꓳ ꓟ ꓣꓳ ꓡꓳ. ꓟꓳ ꓓꓽ ꓟ ꓥ ꓡꓳ꓿ ꓝꓮꓲ ꓬꓳ‐ꓢꓷ ꓔꓯ ꓣꓳ ꓡꓳ. ꓠꓬꓲ ꓠꓬ ꓟ‐ꓡꓲ ꓔꓯ ꓡꓯꓽ ꓒꓯ, ꓝ ꓔ ꓥ ꓢꓲ ꓕꓲ ꓪ ꓧꓪꓽ ꓖꓳ ꓓꓱꓽ ꓟꓽ ꓑꓯ, ꓥ ꓟꓲ ꓤ ꓠꓱ ꓙꓳ ꓟ ꓔꓯ ꓢꓷ. ꓡꓰ ꓠꓬ ꓮ ꓘꓶ. ꓛꓲ ꓓꓵ ꓙ ꓟꓶ ꓓꓴ ꓓꓽ ꓟ ꓙꓳ ꓡꓰ ꓟ ꓥ ꓡꓳ꓿ ꓕꓱ ꓡꓱ ꓗꓷ ꓟ ꓠꓬ ꓬꓴ‐ꓔ ꓙꓵꓻ ꓠꓲ, ꓗꓪ ꓠꓬ ꓡꓳ ꓓꓰ ꓡꓰ ꓡꓳ ꓢꓰꓼ ꓟ ꓙꓵꓽ ꓪ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓬꓳ‐ꓢꓷ ꓠꓬ ꓟ‐ꓡꓲ ꓔꓯ ꓫ. ꓔꓳ ꓠꓲ, ꓟꓽ ꓫꓵˍ ꓟ ꓪꓴ. ꓠꓬꓲ ꓟ‐ꓡꓲ ꓔꓯ ꓛ ꓗꓷ ꓢꓲ ꓠꓬꓲ ꓶꓻ ꓤ ꓗꓪ ꓘꓰ ꓙꓰ ꓠ, ꓟ ꓙ ꓖꓶ ꓗꓷ ꓟ ꓙꓵ, ꓕꓯ ꓬꓲ ꓟꓶ ꓗꓪ ꓟꓳ. ꓖꓶ ꓡ ꓢꓲ ꓓ‐ꓪꓵ ꓞꓲꓼ ꓤ ꓡꓯ ꓤ ꓬꓳ‐ꓢꓷꓳ꓾ ꓟ‐ꓡꓲ ꓐꓰ ꓝꓱ ꓡꓯ ꓘꓳ ꓠ, ꓟ ꓕꓽ ꓓꓵꓽ ꓙ ꓟꓬꓽ꓿
ꓮ ꓡꓲꓳ ꓐꓯ ꓠꓬ ꓬꓲ ꓠꓽ ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓤ ꓠꓱ ꓶ ꓡꓰ ꓟ ꓥ ꓡꓳ꓿ ꓐꓰ ꓐꓯ ꓖꓶ ꓟ ꓥ ꓡꓳ꓿ ꓕꓱ ꓡꓱ ꓐꓰ ꓪꓴ‐ꓢ ꓡꓰ ꓝꓴꓲ. ꓙꓳ ꓢꓴ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓟ ꓙ ꓖꓴ ꓗꓪ ꓬꓳ‐ꓢ ꓥ ꓟꓲ ꓐ ꓗꓷ ꓟ ꓥ ꓡꓳ꓿ ꓬꓳ‐ꓢ ꓠꓬ ꓪꓴ‐ꓢ ꓔꓯ ꓮ ꓘꓶ. ꓛꓲ ꓙꓵꓻ ꓟ ꓐꓰ ꓠ ꓡꓳ ꓟ ꓔꓯ ꓣꓳ ꓡꓳ. ꓟꓳ ꓪ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓠꓬ ꓪꓴ‐ꓢ ꓡꓰ ꓣꓳ ꓔꓯ ꓬꓲ ꓡꓰ ꓪꓴ‐ꓢ ꓟꓬꓱꓽ ꓗꓪ ꓬꓰ ꓝꓲ ꓠꓲ, ꓫꓵˍ ꓟ ꓐꓰ ꓙꓲ ꓟ ꓟꓬꓱꓽ ꓗꓪ ꓬꓰ ꓝꓲ ꓠꓲ, ꓟ꓾ ꓡ ꓞꓳ ꓮ ꓟꓬ, ꓐꓱ ꓶ ꓙꓲ ꓖꓴ ꓙꓳ ꓟ ꓟꓬꓱꓽ ꓗꓪ ꓬꓰ ꓝꓲ ꓟ ꓚꓱ, ꓙꓳ ꓟ ꓥ ꓡꓳ꓿
ꓖꓳ ꓕꓯ ꓠꓴ ꓥꓪ ꓠꓬ ꓪꓴ‐ꓢ ꓔꓯ ꓙꓵꓻ ꓢꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓡꓳ ꓠ, ꓟ ꓣꓳ ꓚꓵ, ꓟ ꓥ ꓡꓳ꓿ ꓕꓲ ꓧꓪ, ꓧꓪ ꓣꓳ ꓠꓬ ꓣꓳ ꓓꓵꓽ ꓙ ꓔ ꓟ ꓐꓰ ꓒꓬꓱꓽ ꓡ ꓟ ꓠꓬ ꓟꓽ ꓪ ꓟ ꓟꓽ ꓫꓱ ꓟ ꓙꓳ ꓟ ꓙꓵ, ꓕꓯ ꓟ‐ꓡꓲ ꓐꓰ ꓬꓳ‐ꓢꓷ ꓠꓬ ꓮ ꓡꓰ ꓕꓲ ꓒꓳ, ꓗꓪ ꓐꓰ ꓪꓴ‐ꓢ ꓟꓬꓱꓽ ꓗꓪ ꓢꓯꓼ ꓕꓵꓼ ꓟ ꓚꓱ, ꓔꓯ ꓣꓳ ꓡꓳ ꓠꓬꓲ ꓢꓲ ꓠꓬꓲ ꓢꓯꓼ ꓪ ꓣꓴ ꓓꓴ ꓬꓰ ꓡꓯ꓿ ꓟꓽ ꓟꓶ ꓫꓵˍ ꓟ ꓙꓵ, ꓕꓯ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓦꓵꓻ ꓡ ꓟ ꓔꓯ ꓣꓳ ꓑꓮꓲꓽ ꓓꓽ ꓟ ꓬꓲ ꓙꓵ, ꓛꓲ ꓡ ꓟ ꓥ ꓡꓳ꓿
ꓟ‐ꓡꓲ ꓗꓪ ꓐꓰ ꓦꓵꓻ ꓡ ꓟ ꓤ ꓠꓱ ꓤ ꓬꓰ‐ꓢꓴ ꓐꓰ ꓟꓬꓱꓽ ꓖꓶ ꓠ, ꓟ ꓟꓴ ꓗꓪ ꓝꓲ ꓓꓴ ꓡꓰ ꓐꓯ ꓔ ꓟ ꓐꓯ ꓘꓶꓽ ꓙꓳ ꓟ ꓥ ꓡꓳ꓿ ꓬꓰ‐ꓢꓴ ꓟꓬꓱꓺ ꓠꓬ ꓚꓬꓴ ꓙ ꓢꓴ ꓐꓰ ꓬꓲ ꓟ. ꓟꓲ ꓙꓳ ꓟ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓵꓻ ꓠ, ꓟ ꓢꓲꓼ ꓫꓬ ꓕꓳ ꓶ ꓕꓲ ꓕꓱ ꓟꓷ ꓠꓷ ꓝ. ꓒꓽ ꓬꓲ‐ꓢ‐ꓬ ꓕꓳ ꓶ (7ꓽ10‐14) ꓝꓲ. ꓝꓮꓲ ꓝꓲ ꓓꓴ ꓒꓳ‐ꓡꓳ ꓡꓰ ꓣꓳ‐ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓐꓳ ꓔ ꓟ ꓣꓳ‐ꓟ 1ꓽ1‐7 ꓝꓲ. ꓗꓪ ꓥ ꓟꓲ ꓲ‐ꓟ‐ꓠꓴ‐ꓡꓰ ꓣꓳ ꓐꓰ ꓕꓲ ꓪ ꓔꓬ ꓟ ꓪꓴ‐ꓢ ꓥ ꓟ ꓚꓱ, ꓔꓯ ꓐꓳ ꓔ ꓟ ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓐꓳ ꓔ ꓟ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬ ꓚꓬꓴ ꓙ ꓢꓴ ꓢꓲꓺ ꓒ ꓥ ꓡꓳ꓿ ꓝꓮꓲ ꓬꓲ ꓠꓬ ꓣꓳ ꓐꓰ ꓕꓲ ꓪ ꓔꓬ ꓟ ꓪꓴ‐ꓢ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓦꓵꓻ ꓡ ꓟ ꓮ‐ꓐꓲ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓔꓯ ꓣꓳ ꓙꓵꓻ ꓢꓲ ꓠꓬꓲ ꓠ ꓡꓳ ꓠ, ꓟ ꓣꓳ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿ ꓣꓳ ꓙꓵꓻ ꓠꓲ, ꓔꓯ ꓔꓶ ꓡꓰ ꓝꓲ ꓡꓯ꓿ ꓫ. ꓟꓳ ꓪ꓿
