ꓬꓲꓼ ꓤ ꓠꓬꓲ ꓤ ꓐꓴꓳ꓾ Christmas ꓑꓮꓽ ꓬꓰ-ꓢꓴ ꓛꓲ ꓡˍ ꓟ ꓔꓯ ꓣꓳ ꓙꓽ ꓖꓶ ꓔꓬ ꓟ ꓠꓬ ꓮ ꓟꓶ ꓠꓬ 4 ꓠꓽ ꓕꓲ ꓠꓽ ꓗꓪ ꓛꓲ ꓡꓺꓳ= ꓟ-ꓕꓲ ꓕꓳꓽ ꓶ 1ꓽ18-24 ꓗꓪ ꓣꓳ ꓑ ꓙꓽ ꓠ ꓔˍ ꓟ ꓠꓬ꓾ ꓢꓲ ꓒ ꓬꓰ-ꓢꓴ ꓠꓬ ꓮ ꓡꓲ ꓐꓰ ꓟꓲ ꓠꓯ ꓕꓱ ꓟ ꓗꓪ ꓬꓯꓼ ꓡˍ ꓟ ꓚꓱꓹ ꓔꓯ ꓣꓳ ꓠ ꓠꓹ ꓓꓴ ꓥ ꓡꓳ=
ꓟ-ꓡꓲ ꓐꓰ ꓬꓳ-ꓢꓷ ꓬꓲ ꓪ ꓠꓲꓹ ꓒꓴ ꓔ ꓥˍ ꓟꓲ ꓪꓴ-ꓢ ꓠꓬ ꓬꓲ ꓪ ꓔꓬ ꓗꓪ ꓡ ꓢꓲ ꓠꓬꓲ ꓢꓲ ꓒ ꓬꓰ-ꓢꓴ ꓔꓯ ꓖꓶ ꓩꓴ ꓡˍ ꓟ꓾ ꓟꓴ ꓗꓪ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓒꓬꓱꓼ ꓡ ꓟ ꓚꓱꓹ ꓔꓯ ꓣꓳ ꓟ-ꓕꓲ ꓕꓳ ꓶ ꓗꓪ ꓠ ꓠꓹ ꓪˍ ꓡꓳ=
ꓟꓸ ꓟꓲꓽ ꓕꓱ ꓟ ꓔꓯ ꓣꓳ ꓡꓳꓸ ꓠꓬꓲˍ ꓕꓯ ꓪꓴ-ꓢ ꓠꓬ ꓮ ꓡꓲ ꓠꓬꓲ ꓣꓳ ꓤꓶꓻ ꓗꓪ ꓓꓵꓽ ꓡˍ ꓡ꓾ ꓐꓯˍ ꓟ ꓬꓲ ꓪꓴꓸ ꓕꓲ ꓟ ꓣꓳ ꓡꓳꓸ ꓟꓳˍ ꓡꓳ= ꓮ ꓡꓲꓳ ꓐꓯˍ ꓠꓬ ꓟ-ꓡꓲ-ꓬ ꓠꓬ ꓬꓲ ꓤꓶꓻ ꓗꓪ ꓬꓲ ꓙꓵꓹ ꓮ ꓙꓵꓽ ꓬꓲ ꓙꓽ ꓖꓶ ꓔ ꓡꓳ= ꓟꓲ ꓙꓬ ꓙꓰˍ ꓟ ꓦꓬꓼ ꓠꓬꓲ ꓗꓪ ꓬꓲ ꓮ ꓡꓲ ꓛꓳ ꓫꓱꓽˍ ꓟ꓾ ꓮ ꓡꓲ ꓧꓪ ꓜꓽ ꓧꓪ ꓓꓳˍ ꓟ꓾ ꓮ ꓡꓲ ꓬꓰˍ ꓟ ꓬꓲ ꓮ ꓙꓵꓽ ꓓꓵꓽ ꓙ ꓔ ꓡꓳ= ꓕꓱ ꓟˍ ꓡꓰ ꓐꓰ ꓬꓳ-ꓢꓷ ꓡꓰ ꓟ-ꓡꓲ-ꓬ ꓔꓯ ꓣꓴ ꓢꓲ ꓮ ꓡꓲ ꓐꓰ ꓦꓲꓻ ꓕꓴꓽ ꓠꓹ ꓟ꓾ ꓬꓲ ꓪ ꓦꓲꓻ ꓘꓴꓽ ꓔꓯ ꓮ ꓡꓲ ꓐꓰ ꓫꓬꓹ ꓠꓹ ꓟ ꓙꓽ ꓖꓶ ꓔ ꓡꓳ꓾ ꓬꓲꓼ ꓟꓬ ꓘꓳ ꓔ ꓡꓳ=
ꓖꓳ ꓡꓱ ꓐꓯ ꓥ ꓟꓲ ꓪꓴ-ꓢ ꓠꓬ ꓬꓲ ꓪ ꓙꓽ ꓖꓶ ꓔ ꓟ ꓔꓯ ꓟꓰꓹ ꓟꓰꓹ ꓫꓵ ꓬꓰ ꓦ ꓗꓷˍ ꓡꓳ= ꓫꓬꓹ ꓔꓱꓹ ꓖꓶ ꓗꓷˍ ꓡꓳ= ꓮ ꓡꓲ ꓐꓰ ꓫꓬꓹ ꓔꓱꓹ ꓖꓶ ꓗꓷˍ ꓡ= ꓬꓲ ꓪ ꓟꓽ ꓓꓵꓽ ꓙꓽ ꓔ ꓟ꓾ ꓬꓲ ꓪ ꓟꓽ ꓥꓳ ꓡꓳꓸ ꓔ ꓟ ꓢꓲ ꓒ ꓬꓰ-ꓢꓴ ꓔꓯ ꓠꓬꓲ ꓡꓳꓸ ꓗꓪꓽ ꓫꓵꓼ ꓠꓹ ꓟ ꓐꓱ ꓶ ꓶꓻ ꓕꓲ ꓟ ꓖꓶˍ ꓡꓳ=
ꓶꓻ ꓕꓱ ꓟ ꓟꓶ ꓡꓰˍ ꓕꓯ ꓬꓲ ꓪ ꓠꓬ ꓮ ꓙꓵꓽ ꓟꓽ ꓢꓷꓸ ꓔ= ꓕꓱ ꓟ ꓮ ꓫꓵꓽ ꓬꓲꓸ ꓬꓲ ꓢꓲ ꓥ ꓐꓯˍ ꓟ ꓬꓲ ꓪ ꓟꓽ ꓢꓷꓸ= ꓟꓴ ꓗꓪ ꓝꓲ ꓓꓴ ꓠꓬ ꓡ ꓢꓲ ꓟ-ꓡꓲ-ꓬ ꓔꓯ꓾ ꓠꓴ ꓠꓬ ꓤ ꓕꓲ ꓣꓳ ꓙꓳ ꓡꓰˍ ꓥꓳ= ꓬꓲ ꓟꓬꓱ ꓔꓯ ꓠꓬ ꓲ-ꓟ-ꓠꓴ-ꓡꓰ ꓐꓰ ꓟꓬꓱ ꓖꓶ ꓠ ꓗꓹ ꓡꓳ= ꓕꓱ ꓡꓰˍ ꓐꓯ ꓖꓶˍ ꓡꓳ= ꓟꓲꓽ ꓕꓯ ꓢꓲ ꓗꓪ ꓮ ꓫꓵꓽ ꓔꓳꓹ ꓜꓳꓽ ꓡˍ ꓟ ꓟꓽ ꓛꓲ ꓟꓽ ꓡꓯ ꓡꓰ ꓟꓽ ꓐꓯ ꓔ ꓖꓶ= ꓠꓴ ꓠꓬ ꓬꓲ-ꓙꓲ ꓟꓵꓽ ꓗꓪ ꓢ ꓘꓪ ꓢ ꓟꓲ ꓔꓷꓹ ꓙꓰ ꓪˍ ꓥꓳ꓾ ꓐꓰˍ ꓟꓲ ꓟꓽ ꓛꓲ ꓟꓽ ꓡꓯ ꓡꓰ ꓟꓽ ꓐꓯ ꓔ= ꓠꓴ ꓠꓬ ꓫꓸ ꓙꓵ ꓪˍ ꓥꓳ꓾ ꓐꓰˍ ꓟꓲ ꓟꓽ ꓐꓯ ꓔ ꓖꓶ= ꓠꓴ ꓤ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓫꓵꓻˍ ꓥꓳ ꓐꓰ ꓟꓽ ꓛꓲ ꓟꓽ ꓡꓯ ꓡꓰ ꓢꓲꓽ ꓫꓬ ꓟ-ꓡꓲ-ꓬ ꓔꓯ ꓟꓽ ꓐꓯ ꓔ ꓖꓶ= ꓮ ꓫꓵꓽ ꓥˍ ꓟꓲ ꓮꓽ ꓤ ꓮꓽ ꓤ ꓢꓷꓸ ꓡˍ ꓡꓳ= ꓬꓲ ꓪ ꓠꓬ ꓮ ꓙꓵꓽ ꓡꓱꓸꓼ ꓪꓴ-ꓢ ꓮ ꓡꓲ ꓟꓬꓱꓽ ꓬꓰˍ ꓟ ꓬꓲ ꓪ ꓟꓽ ꓢꓷꓸ= ꓖꓳ ꓡꓱ ꓥˍ ꓟꓲ ꓬꓲ ꓪ ꓠꓬ ꓪꓴ-ꓢ ꓔꓯ ꓙꓵꓻˍ ꓡꓳ= ꓪꓴ-ꓢ ꓖꓶ ꓡˍ ꓟ ꓚꓱꓹ ꓔꓯ ꓬꓲ ꓪ ꓙ ꓫꓱꓽˍ ꓡꓳ=
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓚꓧꓣꓲꓢꓔꓟꓮꓢ ꓦꓬꓼ ꓠꓬꓲ ꓗꓪ ꓣꓳ ꓓꓵꓽ ꓙ ꓓꓴ ꓠꓬ ꓕꓱ ꓟ ꓥꓳ= ꓣꓳ ꓤꓶꓻ ꓗꓪ ꓣꓳ ꓬꓲꓼ ꓟꓬ ꓘꓳ ꓔ ꓟ ꓮ ꓟꓬꓹ ꓙꓳˍ ꓡꓳ= ꓣꓳ ꓞꓲꓼ ꓡꓯꓸ ꓕꓯ ꓣꓳ ꓬꓲꓼ ꓟꓬ ꓘꓳ ꓔ ꓟ꓾ ꓣꓳ ꓠꓲꓹ ꓫꓵˍ ꓟ꓾ ꓒꓬꓱꓼ ꓠꓲꓹ ꓫꓵˍ ꓟ ꓮ ꓟꓬꓹ ꓙꓳˍ ꓥꓳ= ꓖꓳ ꓡꓱ ꓐꓯˍ ꓥ ꓟꓲ ꓣꓳ ꓓꓵꓽ ꓙ ꓔˍ ꓟ ꓡꓰ ꓟꓽ ꓥ ꓥ ꓐꓰ ꓪꓴ-ꓢ ꓠꓬ ꓠꓱꓸ ꓐꓯ ꓕꓲꓽ ꓚꓱꓹ ꓟꓳꓸ ꓖꓶ ꓡˍ ꓫꓵꓽ꓾ ꓪꓴ-ꓢ ꓠꓬ ꓠꓱꓸ ꓐꓯ ꓕꓲ ꓚꓱꓹ ꓗꓪ ꓙꓰ ꓝꓲˍ ꓫꓵꓽ ꓦꓬꓼ ꓠꓬꓲ ꓣꓳ ꓔꓳꓹ ꓜꓳꓽ ꓗꓳꓸ ꓡˍ ꓥꓳ= ꓟ-ꓡꓲ ꓐꓰ ꓬꓳ-ꓢꓷˍ ꓡꓰ ꓐꓰ ꓬꓲ ꓪ ꓬꓲꓼ ꓟꓬ ꓘꓳ ꓔ ꓟ ꓙꓳˍ ꓥ ꓟꓲ ꓪꓴ-ꓢ ꓠꓬ ꓬꓲ ꓪ ꓔꓯ ꓟꓬꓱꓽ ꓕꓲ ꓟ ꓖꓶˍ ꓟ꓾ ꓙ ꓖꓴ ꓕꓲ ꓟ ꓟꓳꓸ ꓖꓶˍ ꓟ ꓡꓰ ꓐꓰ ꓣꓳ ꓤꓶꓻ ꓗꓪ ꓕꓲ ꓖ ꓕꓲ ꓧꓪꓹ ꓣꓳ ꓟꓽ ꓙꓽ ꓖꓶ ꓔ ꓟ꓾ ꓣꓳ ꓟꓽ ꓥꓳ ꓡꓳꓸ ꓔ ꓟ꓾ ꓣꓳ ꓕꓲ ꓧꓪꓹ ꓡꓰꓸ ꓬꓲꓼ ꓟꓬ ꓟꓽ ꓘꓳˍ ꓠꓬꓲ ꓔ ꓟ ꓟꓵꓽ ꓗꓪ ꓙꓰ ꓪˍ ꓫꓵꓽ꓾ ꓖꓳ ꓗꓪ ꓙꓰ ꓢꓲ ꓠꓬꓲ ꓢꓯꓼ ꓕꓵꓼ ꓪˍ ꓫꓵꓽ ꓕꓱ ꓡꓱ ꓫꓵꓽ ꓔꓳꓹ ꓜꓳꓽ ꓪˍ ꓡꓳ=
ꓣꓳ ꓬꓳꓸ ꓚꓰꓽˍ ꓟ ꓠꓬ ꓮ ꓫꓵꓽ ꓥ ꓡ ꓐꓰ ꓐꓯˍ ꓠꓬ ꓪꓴ-ꓢ ꓠꓬ ꓣꓳ ꓕꓯꓽ ꓢꓲ ꓗꓪ ꓪꓽ ꓠꓬꓲˍ ꓡꓳ ꓐꓯ ꓟ ꓟꓲ ꓡꓰꓹ ꓗꓷ ꓟꓽ ꓓꓻ= ꓪꓴ-ꓢ ꓠꓬ ꓣꓳ ꓔꓯ ꓙꓲˍ ꓟ ꓡꓰꓽ ꓖꓶˍ ꓡꓳ ꓐꓯˍ ꓟ ꓣꓳ ꓕꓽ ꓟꓲ ꓡꓰꓹ= ꓖꓳ ꓡꓱ ꓠꓬꓲ ꓣꓳ ꓓꓵꓽ ꓔ ꓟ ꓡꓰ ꓟꓽ ꓥ ꓥˍ ꓟꓲ ꓪꓴ-ꓢ ꓓꓵꓽ ꓙꓽ ꓔ ꓟ꓾ ꓪꓴ-ꓢ ꓙꓽ ꓖꓶ ꓔ ꓟ ꓙ ꓖꓴ ꓗꓪ ꓠꓴ ꓫꓱꓽ ꓔꓬ ꓕꓯ ꓑꓶꓸ ꓑꓶꓸ ꓡꓰꓽ ꓫꓱꓽ ꓗꓳꓸ ꓙꓰ= ꓪꓴ-ꓢ ꓔꓯ ꓙꓵꓻ= ꓮ ꓡꓲꓳ ꓐꓯˍ ꓠꓬ ꓕꓲ ꓖ ꓕꓲ ꓧꓪꓹ ꓣꓳ ꓠꓬ ꓣꓳ ꓓꓵꓽ ꓙ ꓔˍ ꓟ ꓡꓰꓽ ꓣꓳ ꓬꓰ ꓠꓲꓹ ꓫꓵˍ ꓡꓳ= ꓣꓳ ꓥꓳ ꓡꓳꓸ ꓔ ꓟ ꓡꓰꓽ ꓣꓳ ꓠꓬ ꓢꓯꓼ ꓕꓵꓼ ꓠꓲꓹ ꓫꓵˍ ꓡꓳ= ꓖꓳ ꓟ ꓟꓽ ꓒꓬꓱꓼ ꓡ ꓥꓳ ꓐꓯˍ ꓠꓬ ꓣꓳ ꓠꓬ ꓠꓲꓹ ꓟ ꓙꓬ ꓡꓰ ꓢꓲ ꓠꓬꓲ ꓮ ꓙꓵꓽ ꓔꓯ ꓡꓳ ꓒꓰ ꓗꓷ ꓠꓲꓹ ꓫꓵˍ ꓡꓳ= ꓕꓱ ꓡꓱ ꓕꓽ ꓬꓰ ꓐꓰ ꓚꓧꓣꓲꓢꓔꓟꓮꓢ ꓦꓬꓼ ꓠꓬꓲ ꓗꓪ ꓣꓳ ꓔꓯ ꓐꓯ ꓟꓳꓸ ꓖꓶ ꓡˍ ꓡꓳ= ꓪꓴ-ꓢ ꓠꓬ ꓬꓲ ꓚꓱꓹ ꓣꓳ ꓔꓯ ꓟꓳꓸ ꓖꓶ ꓡˍ ꓡꓳ=
ꓣꓳ ꓓꓵꓽ ꓙꓽ ꓔ ꓟ ꓠꓬ ꓕꓲ ꓖ ꓕꓲ ꓧꓪꓹ ꓣꓳ ꓔꓯ ꓐꓬ ꓡꓰ ꓝꓲˍ ꓟ ꓠꓻ ꓡꓰ ꓝꓲˍ ꓟ ꓙꓳˍ ꓡꓳ= ꓖꓳ ꓡꓱ ꓐꓯ ꓥˍ ꓟꓲ ꓪꓴ-ꓢ ꓙꓽ ꓖꓶ ꓔ ꓟ ꓠꓬ ꓮ ꓘꓶꓸ ꓙꓲˍ ꓟ ꓥ ꓡꓳ= ꓪꓴ-ꓢ ꓠꓬ ꓬꓳ-ꓢꓷ ꓐꓰ ꓟ-ꓡꓲ-ꓬ ꓔꓯ ꓙꓽ ꓖꓶ ꓔ ꓟ ꓡꓰ ꓐꓰ ꓣꓳ ꓔꓯ ꓥˍ ꓟꓲ ꓪꓴ-ꓢ ꓶꓻ ꓕꓲ ꓟ ꓖꓶ ꓔ ꓡꓳ= ꓬꓲ ꓟꓬꓱꓽ ꓬꓰ ꓠꓹ ꓟ꓾ ꓬꓲ ꓶꓼ ꓓꓳꓽ ꓫꓱꓹ ꓓꓳꓽ ꓚ ꓠꓹ ꓟ ꓐꓱ ꓶ ꓣꓳ ꓔꓯ ꓠꓴ ꓮ ꓡꓲ ꓗꓪ ꓥˍ ꓟꓲ꓾ ꓠꓴ ꓟꓸ ꓒ ꓟꓸ ꓟ ꓟꓽ ꓥ ꓥˍ ꓟꓲ꓾ ꓠꓴ ꓔꓲꓺ ꓒ ꓔꓲꓺ ꓟ ꓟꓽ ꓥ ꓥˍ ꓟꓲ ꓪꓴ-ꓢ ꓟꓬꓱ ꓚꓺ ꓠꓹ ꓟ ꓬꓲ ꓟꓬꓱ ꓓꓳꓽ ꓫꓱꓸ ꓖꓶ ꓠꓹ ꓟ ꓬꓲ ꓣꓳ ꓔꓯ ꓘꓴ ꓔ ꓟ ꓥ ꓡꓳ= ꓖꓳ ꓡꓱ ꓠꓬꓲ ꓠꓴ ꓮ ꓡꓲ ꓫꓵꓽ ꓤꓶꓻ ꓗꓪ ꓔꓬ ꓥˍ ꓟꓲ ꓪꓴ-ꓢ ꓔꓯ ꓓꓳ ꓟꓴꓹ= ꓮ ꓡꓲ ꓫꓵꓽ ꓔꓳꓹ ꓜꓳꓽ ꓔꓬ ꓥˍ ꓟꓲ ꓪꓴ-ꓢ ꓔꓯ ꓫꓱꓸ ꓖꓶ= ꓖꓳ ꓡꓱ ꓬꓰˍ ꓠꓬ ꓚꓧꓣꓲꓢꓔꓟꓮꓢ ꓣꓱꓽ ꓛꓰꓽ ꓠꓴ ꓟꓶˍ ꓥꓳ=
ꓚꓧꓣꓲꓢꓔꓟꓮꓢ ꓐꓯˍ ꓟ ꓠꓬ ꓪꓴ-ꓢ ꓠꓬ ꓟꓲ ꓠꓯ ꓞꓳ ꓤ ꓒꓬꓱꓼ ꓡꓺꓳ= ꓰꓟꓮꓠꓴꓰꓡ ꓐꓯˍ ꓟ ꓕꓲ ꓡꓰꓹ ꓐꓰ ꓪꓴ-ꓢ ꓠꓬ ꓞꓳ ꓤ ꓐꓰ ꓔꓬꓳ ꓐꓰ ꓐꓯˍ ꓟ ꓬꓲꓸ ꓬꓲ ꓢꓲ ꓥ ꓡꓳ= ꓠꓬꓲꓸ ꓠꓬꓲ ꓠꓴ ꓥꓪ ꓤꓶꓻ ꓗꓪ ꓢꓲ ꓒ ꓬꓰ-ꓢꓴ ꓔꓯ ꓘꓳ ꓣꓴ ꓐ ꓡˍ ꓡ= ꓮ ꓡꓲ ꓫꓵꓽ ꓔꓳꓹ ꓜꓳꓽˍ ꓥˍ ꓟꓲ ꓢꓲ ꓒ ꓬꓰ-ꓢꓴ ꓔꓯ ꓕꓽ ꓒꓲꓼ ꓬꓰ ꓝꓲ= ꓮ ꓡꓲ ꓫꓵꓽ ꓫꓵꓽ ꓪꓴ ꓔꓳꓹ ꓜꓳꓽ ꓡˍ ꓥ ꓟꓲ ꓠꓴ ꓙꓵꓻ ꓠꓲꓹ ꓔꓯ ꓕꓽ ꓟꓶꓽ ꓬꓰ ꓝꓲ= ꓕꓱ ꓡꓱ ꓬꓰˍ ꓠꓬ ꓣꓳ ꓚꓧꓣꓲꓢꓔꓟꓮꓢ ꓬꓲꓸ ꓬꓲ ꓢꓲ ꓥ ꓟ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓠꓲꓹ ꓟ ꓠꓯꓸꓼ ꓗꓪ ꓔꓬ ꓡ ꓢꓲ ꓠꓬꓲ ꓮ ꓡꓲ ꓫꓵꓽ ꓔꓳꓹ ꓜꓳꓽ ꓡˍ ꓥ ꓟꓲ ꓣꓳ ꓠꓬ ꓑꓶꓸ ꓑꓶꓸ ꓡꓰꓽ ꓪꓴ-ꓢ ꓔꓯ ꓙꓵꓻ ꓢꓲ꓾ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓢꓶꓸ ꓟꓽ ꓞꓲ ꓪꓴ-ꓢ ꓔꓯ ꓙꓵꓻ ꓢꓲ ꓠꓬꓲ ꓣꓳ ꓞꓳ ꓙꓳ ꓐ ꓡˍ ꓥꓳ ꓐꓰ ꓮ ꓙꓵꓽ ꓢꓴ ꓔꓯ ꓢꓯꓼ ꓖꓶ ꓬꓲꓼ ꓠꓬꓲꓸ ꓖꓶ ꓠꓲꓹ ꓫꓵˍ ꓡꓳ=
