ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸ= ꓠꓬꓲꓸ ꓠꓬꓲ ꓠꓬ꓾ ꓙꓲꓻ ꓔꓱꓹ ꓢꓴ ꓙꓲꓻ ꓫꓬ ꓢꓴ ꓕꓲ ꓣꓳ ꓠꓬ ꓮ ꓡꓲ ꓫꓵꓽ ꓕꓲ ꓣꓳ ꓥ ꓡ꓾ ꓐꓯˍ ꓟ ꓔꓯ ꓣꓳ ꓠꓬꓲꓸ ꓠꓬꓲ ꓟ ꓟꓸ ꓟꓲꓽ ꓝꓲꓸ ꓗꓪ ꓐꓰ ꓣꓳ ꓡꓳꓸ ꓢꓷꓸ ꓓꓴ ꓥꓳ= ꓠꓬꓲꓸ ꓠꓬꓲ ꓟ ꓟꓸ ꓟꓲꓽ ꓝꓲꓸ ꓠꓬ (ꓟ-ꓕꓲ 1ꓽ18-24) ꓥ ꓡꓳ= ꓟꓸ ꓟꓲꓽ ꓝꓲꓸ ꓬꓲ ꓕꓲꓽ ꓟꓴꓽ ꓠꓬ ꓕꓱ ꓡꓱ ꓥꓳ= ꓢꓲ ꓒ ꓬꓰ-ꓢꓴ ꓦꓵꓻ ꓡˍ ꓐꓰ ꓬꓰˍ ꓕꓯ ꓟꓲ-ꓡꓲ ꓔꓯ ꓢꓲꓽ-ꓫꓬ-ꓟ-ꓦ ꓗꓪ ꓐꓰ ꓖꓳ ꓓꓱꓽ ꓗꓪ ꓤ ꓶꓻ ꓞꓹ ꓡꓳ= ꓖꓳ ꓟ ꓔꓯ ꓢꓴˍ ꓟꓲ ꓟꓳˍ ꓡꓳ=
ꓖꓳ ꓕꓯ ꓟ-ꓡꓲ ꓐꓰ ꓬꓳ-ꓢꓷ ꓝꓱ ꓡꓯ ꓘꓳ ꓠꓹ ꓟ ꓥꓳ= ꓖꓳ ꓡꓱ ꓐꓯ ꓥ ꓟꓲ ꓬꓳ-ꓢꓷ ꓠꓬ ꓕꓱ ꓟ ꓔꓯ ꓡꓳꓸ ꓢꓷꓸ ꓡꓰ ꓕꓯ꓾ ꓟ-ꓡꓲ ꓔꓯ ꓘꓳ ꓫꓱ ꓫꓱˍ ꓐꓰ ꓡꓳ ꓔꓲꓸ ꓬꓰ ꓠꓹ ꓟ ꓬꓲ ꓕꓱ ꓡꓱ ꓓꓵꓽ ꓙꓽ ꓔꓬ ꓡꓳ= ꓖꓳ ꓕꓲ ꓑꓹ ꓗꓪ ꓠꓬ ꓢꓲ ꓒ ꓬꓲ ꓟꓴ ꓗꓪ ꓝꓲ ꓓꓴ ꓬꓲ ꓬꓲꓼ ꓟꓬ ꓗꓪ ꓡ ꓢꓲ ꓠꓬꓲ꓾ ꓓ-ꓪꓵ ꓞꓲꓼ ꓤ ꓡꓯꓹ ꓤ ꓬꓳ-ꓢꓷˍꓳ ꓠꓴ ꓕꓽ ꓙꓳꓺ= ꓠꓴ ꓤ ꓟꓶ ꓟ-ꓡꓲ ꓔꓯ ꓠꓴ ꓣꓴ ꓠꓹ ꓟ ꓕꓽ ꓙꓳꓺ= ꓬꓲ ꓔꓯ ꓧꓳꓽ ꓢꓲ ꓠꓬꓲ ꓪꓴ-ꓢ ꓙ ꓟꓳ ꓘꓶꓽ ꓖꓶ ꓔ ꓟ ꓟꓵꓽ ꓗꓪ ꓙꓰ꓾ ꓐꓰ ꓕꓰ ꓡꓰ ꓐꓯ ꓗꓷ ꓗ ꓠꓯꓸ ꓬꓳ-ꓢꓷ ꓠꓬ ꓟ-ꓡꓲ ꓔꓯ ꓘꓴ ꓢꓲ ꓠꓬꓲ ꓢꓲ ꓒ ꓙꓽ ꓟꓳ ꓔ ꓟ ꓟꓵꓽ ꓗꓪ ꓧꓳꓽ ꓔꓯꓹ ꓙꓰˍ ꓡꓳ=
ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓬꓳ-ꓢꓷ ꓠꓬ ꓙꓲꓻ ꓔꓱꓹ ꓢꓴ ꓙꓲꓻ ꓫꓬ ꓢꓴ ꓥ ꓡꓳ= ꓙꓲꓻ ꓔꓱꓹ ꓢꓴ ꓙꓲꓻ ꓫꓬ ꓢꓴ ꓐꓯˍ ꓟ ꓠꓬ ꓮ ꓡꓲ ꓫꓵꓽ ꓥ ꓡ ꓐꓯˍ ꓠꓬ ꓪꓴ-ꓢ ꓐꓰ ꓕꓲ ꓠꓲꓹ ꓕꓲ ꓪꓽ ꓠꓲꓹ ꓧꓳꓹ ꓫꓵꓽ ꓧꓳꓹ ꓡꓯ ꓘꓳˍ ꓟ ꓡ ꓞꓳ ꓔꓯ ꓐꓯˍ ꓟ ꓥ ꓡꓳ= ꓬꓳ-ꓢꓷ ꓠꓬ ꓪꓴ-ꓢ ꓠꓲꓹ ꓡꓶ ꓔꓯ ꓠꓲꓹ ꓧꓳꓹ ꓫꓵꓽ ꓧꓳꓹ ꓢꓲ ꓠꓬꓲ ꓛꓳ ꓔꓬ ꓟ ꓥꓳ= ꓕꓱ ꓟ ꓑꓶꓸ ꓓꓴ ꓪꓴ-ꓢ ꓐꓰ ꓕꓲ ꓡꓰꓹ ꓛꓳ ꓫꓱꓽ ꓔꓬ ꓟ꓾ ꓪꓴ-ꓢ ꓐꓰ ꓕꓲ ꓡꓰꓹ ꓕꓱ ꓡꓱ ꓐꓰ ꓢꓯꓸ ꓔꓬ ꓟ ꓡ ꓞꓳ ꓠꓬ ꓙꓲꓻ ꓔꓱꓹ ꓢꓴ ꓥ ꓡꓳ=
ꓕꓱ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓣꓳ ꓔꓯ ꓥˍ ꓟꓲ ꓣꓳ ꓠꓬ ꓙꓲꓻ ꓔꓱꓹ ꓢꓴ ꓥ ꓡ꓾ ꓟꓽ ꓥ ꓡ ꓐꓯˍ ꓟ ꓔꓯ ꓣꓳ ꓮ ꓡꓲ ꓟ ꓔꓯ ꓡꓳꓸ ꓢꓲ ꓢꓷꓸ ꓓꓹ ꓡ ꓐꓯˍ ꓠꓬ ꓪꓴ-ꓢ ꓐꓰ ꓕꓲ ꓠꓲꓹ ꓕꓲ ꓪꓽ ꓠꓲꓹ ꓧꓳꓹ ꓫꓵꓽ ꓧꓳꓹ ꓕꓱ ꓡꓱ ꓐꓰ ꓓꓹ ꓟꓽ ꓓꓹ ꓐꓯˍ ꓟ ꓔꓯ ꓡꓳꓸ ꓢꓲ ꓠꓬꓲ ꓢꓷꓸ ꓓˍ ꓟ ꓥ ꓡꓳ=
ꓤ ꓟꓶ ꓡꓯꓸ ꓚꓵ ꓟ-ꓡꓲ ꓥˍ ꓟꓲ ꓕꓱ ꓡꓱ ꓥꓳ= ꓬꓲ ꓠꓬꓪꓴ-ꓢ ꓠꓲꓹ ꓡꓶ ꓒ ꓐꓲ ꓐꓰ ꓬꓲ ꓛꓳꓻ ꓔꓬ ꓟ ꓥꓳ= ꓖꓳ ꓟ ꓑꓶꓸ ꓓꓴ ꓟ-ꓡꓲ ꓥˍ ꓟꓲ ꓬꓲ ꓖꓳ ꓓꓱꓽ ꓠꓯꓸꓼ ꓗꓪ ꓶꓼ ꓙꓳ ꓫꓱꓹ ꓙꓳˍ ꓟ ꓢꓲ ꓒ ꓬꓰ-ꓢꓴ ꓔꓯ ꓶꓻ ꓞꓹ ꓟ ꓥ ꓡꓳ= ꓠꓬꓲꓸ ꓠꓬꓲ ꓣꓳ ꓔꓯ ꓟꓸ ꓟꓲꓽ ꓝꓲꓸ ꓗꓪ ꓐꓰ ꓐꓯ ꓖꓶ ꓡ ꓔꓬ ꓟ ꓠꓬ ꓙꓲꓻ ꓔꓱꓹ ꓢꓴ ꓙꓲꓻ ꓫꓬ ꓢꓴ ꓐꓯˍ ꓟ ꓠꓬ ꓪꓴ-ꓢ ꓐꓰ ꓪꓴ-ꓢ ꓠꓲꓹ ꓡꓶ ꓔꓯ ꓕꓲ ꓠꓲꓹ ꓕꓲ ꓪꓽ ꓠꓲꓹ ꓧꓳꓹ ꓫꓵꓽ ꓧꓳꓹ ꓕꓱ ꓡꓱ ꓐꓰ ꓠꓲꓹ ꓟ ꓙꓳ ꓢꓲ ꓠꓬꓲ ꓢꓯꓸ ꓔꓬ ꓟ ꓞꓳ ꓙꓳ ꓔꓬ ꓟ ꓡ ꓞꓳ ꓔꓯ ꓐꓯˍ ꓟ ꓥ ꓡꓳ= ꓪꓴ-ꓢ ꓥˍ ꓟꓲ ꓣꓳ ꓔꓯ ꓕꓱ ꓡꓱ ꓐꓰ ꓬꓲ ꓠꓲꓹ ꓡꓶ ꓗꓪ ꓐꓰ ꓛꓳ ꓫꓱꓽ ꓗꓴꓸˍ ꓟ ꓬꓲ ꓤ ꓫꓵꓸ ꓤ ꓠꓱ ꓐꓴ ꓣꓳ ꓔꓯ ꓕꓱ ꓡꓱ ꓐꓰ ꓒꓬꓱꓼ ꓡ ꓝꓲ ꓠꓲꓹ ꓫꓵˍ ꓡꓳ= ꓕꓱ ꓟ ꓑꓶꓸ ꓓꓴ ꓠꓬꓲꓸ ꓠꓬꓲ ꓣꓳ ꓠꓬ ꓪꓴ-ꓢ ꓐꓯ ꓘꓶꓽ ꓗꓪ ꓐꓰ꓾ ꓠꓬꓲꓸ ꓠꓬꓲ ꓬꓳ-ꓢꓷ ꓡꓰ ꓐꓰ ꓣꓳ ꓠꓬ ꓙꓲꓻ ꓫꓬ ꓢꓴ ꓙꓲꓻ ꓔꓱꓹ ꓢꓴ ꓣꓳ ꓬꓰ ꓠꓹ ꓟ ꓥꓳ=
