“ꓪꓴ‐ꓢ ꓡꓰ꓾ ꓑ ꓫꓬꓼ ꓕꓱ ꓕꓷ ꓠꓬ ꓬꓲ ꓪ ꓟꓷ ꓠꓷ, ꓘꓶꓽ ꓡꓰ ꓥꓪ ꓔꓯ ꓒꓵꓽˍ ꓟꓲ꓾ ꓬꓲ ꓪ ꓠꓲ, ꓟ ꓠꓽ ꓥꓪ ꓔꓯˍ ꓐꓰ ꓶꓽ ꓤꓻ ꓗꓳ, ꓞ, ꓡꓳ꓾” ꓐꓰ ꓬꓲ‐ꓢ‐ꓬ 29ꓽ13 ꓗꓪ ꓐꓯ ꓔ ꓡꓳ꓿
ꓠꓬꓲ. ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓥ ꓟ (ꓟ‐ꓕꓲ 21ꓽ28‐32) ꓗꓪ ꓤ ꓠꓬꓲꓽ ꓫꓵ. ꓔꓯ ꓥꓳꓽ ꓔꓯ ꓣꓳ ꓑ ꓙꓽ ꓪˍ ꓡꓳ꓿ ꓮꓽ ꓐ ꓣꓱꓽ ꓢꓴ ꓡꓰ ꓤ ꓪꓴꓽ ꓔꓯ꓾ ꓥꓪ ꓤꓽꓳ꓾ ꓠꓬꓲ. ꓠꓬꓲ ꓠꓴ ꓠꓬ ꓛꓱꓼ ꓡꓱꓼ ꓐꓱ ꓗꓪ ꓟꓬꓱꓽ ꓬꓰ ꓙꓰ꓾ ꓐꓯˍ ꓡꓳ꓿ ꓬꓲ ꓪꓴ. ꓕꓯ ꓬꓲ ꓠꓬ ꓥꓪ ꓟꓽ ꓙꓰ ꓐꓰ ꓐꓯˍ ꓟꓲ꓾ ꓗ ꓠꓯ. ꓠꓬ ꓬꓲ ꓓꓵꓽ ꓙꓽ ꓡꓰꓼ ꓡ ꓢꓲ ꓙꓰ ꓗꓷꓳ꓿ ꓝꓮꓲ ꓮꓽ ꓐ ꓣꓱꓽ ꓢꓴ ꓡꓰ ꓤ ꓣꓳ ꓔꓯ ꓛꓱꓼ ꓡꓱꓼ ꓐꓱ ꓗꓪ ꓙꓰ ꓝꓲˍ ꓠꓬ ꓬꓲ ꓡꓰ꓾ ꓐ, ꓐꓽꓳ ꓥꓪ ꓙꓰˍ ꓥꓳ꓾ ꓐꓯ ꓢꓲ ꓬꓲ ꓟꓽ ꓙꓰ꓾ ꓐꓯˍ ꓟ ꓔꓯꓺ ꓥꓳꓽ ꓔꓯ ꓣꓳ ꓑ ꓙꓽ ꓪˍ ꓡꓳ꓿ ꓔꓯꓺ ꓥꓳꓽ ꓕꓱ ꓟ ꓗꓪ ꓤ ꓣꓳ ꓠꓬ ꓟꓷ ꓠꓷ, ꓗꓪ ꓐꓰ ꓡꓰꓽ ꓢꓯ. ꓔꓬ ꓢꓲ꓾ ꓖꓳ ꓓꓱꓽ ꓠꓽ ꓟꓽ ꓛꓳꓻ ꓫꓱꓽ꓿
ꓤ ꓣꓳ ꓕꓲ ꓜꓴꓻ ꓗꓪ ꓚꓬꓼ ꓢꓴ ꓐꓴ ꓥˍ ꓟꓲ ꓙꓵꓻ ꓠꓲ, ꓗꓪ ꓮ ꓘꓶ. ꓢꓯꓼ ꓕꓵꓼˍ ꓡꓳ꓿ ꓪꓽˍ ꓟꓲ ꓮ ꓘꓶ. ꓘꓴˍ ꓡꓳ꓿ ꓖꓳ ꓡꓱ ꓥˍ ꓟꓲ ꓪꓴ‐ꓢ ꓔꓯ ꓠꓲ, ꓠꓵ ꓠ, ꓟ꓾ ꓞꓳ ꓤ ꓔꓯ ꓠꓲ, ꓠꓵ ꓠ, ꓟ ꓗꓪ ꓠꓽ ꓢꓯꓼ ꓐꓽ ꓔꓬ ꓡꓳ꓿ ꓬꓲ ꓪ ꓚꓲ. ꓛꓬ ꓬꓲ ꓪ ꓡꓰꓽ ꓪ ꓜꓲ ꓠꓲ, ꓠꓵˍ ꓡꓳ꓿ ꓙꓵꓻ ꓠꓲ, ꓬꓲ. ꓠꓯ. ꓟ ꓚꓵ ꓘꓶꓽˍ ꓟꓲ ꓬꓲ ꓪ ꓔꓯ ꓟꓽ ꓙꓳ꓿ ꓙꓵꓽ ꓗ ꓔꓯ ꓠꓽ ꓞꓳ ꓙꓳˍ ꓡꓳ꓿ ꓟꓷꓽ ꓠꓷ, ꓗꓪ ꓐꓰ ꓡꓰꓽ ꓢꓯ. ꓔꓬ ꓢꓲ ꓛꓳꓻ ꓫꓱꓽˍ ꓟ ꓔꓯ ꓠꓬ ꓟꓽ ꓬꓰ꓿
ꓝꓮꓲ ꓕꓲ ꓛꓱꓽ ꓗꓪ ꓠꓬ ꓡ ꓞꓳ ꓕꓱ ꓕꓲ ꓜꓴꓻ ꓟ ꓐꓰ ꓟꓽ ꓫꓱ. ꓡꓯ ꓘꓳ ꓟ ꓔꓯ ꓖꓴ ꓟ. ꓖꓶ ꓔˍ ꓡꓳ꓿ ꓬꓲ ꓪ ꓠꓽ ꓐꓲꓻ ꓠ ꓛꓲˍ ꓟꓲ ꓫ. ꓕꓱ ꓟꓽ ꓗꓴ.꓿ ꓢꓴ ꓠꓲ, ꓒꓴ ꓗ, ꓛꓲꓽ ꓡꓰ ꓠ ꓛꓲˍ ꓟꓲ ꓫ. ꓕꓱ ꓟꓽ ꓗꓴ.꓿ ꓖꓳ ꓡꓱ ꓥˍ ꓟꓲ ꓔꓱ, ꓟ ꓠꓲ, ꓟ ꓙꓳˍ ꓡꓳ꓿ ꓬꓲ ꓪ ꓠꓬ ꓬꓲ ꓪ ꓚꓲ. ꓛꓬ ꓬꓲ ꓪ ꓠꓲ, ꓘꓪꓽ ꓫꓵˍ ꓡꓳ꓿ ꓘꓳ ꓣꓴ ꓐ ꓡˍ ꓡꓳ꓿ ꓬꓲ ꓪ ꓥꓳꓽ ꓡꓰ ꓧꓶ. ꓡꓰ ꓕꓯ ꓥˍ ꓟꓲ ꓢꓻ ꓢꓻ ꓡꓰꓽ ꓒꓳ, ꓡꓶ. ꓗꓷ ꓐ ꓡˍ ꓡꓳ꓿ ꓟꓷꓽ ꓠꓷ, ꓘꓶꓽ ꓗꓪ ꓐꓰ ꓟꓽ ꓥ ꓥ꓾ ꓐꓯ ꓘꓶꓽ ꓗꓪ ꓐꓰ ꓡꓰꓽ ꓟꓽ ꓥ ꓥ꓾ ꓛꓳꓻ ꓫꓱꓽ ꓚꓱ, ꓗꓪ ꓐꓰ ꓞꓳ ꓙꓳ ꓢꓴ ꓐꓴ ꓥ ꓡꓳ꓿ ꓣꓳ ꓠꓬ ꓤ ꓠꓬꓲꓽ ꓫꓵ. ꓗꓪ ꓟ ꓮ ꓡꓲ ꓕꓲꓽ ꓣꓳ ꓟ ꓥ ꓡ꓿ ꓪꓴ‐ꓢ ꓐꓰ ꓣꓳ ꓠꓬꓲꓽ ꓗꓴ. ꓚꓸꓼ ꓗꓪ ꓮ ꓡꓲ ꓐꓰ ꓙ ꓡꓯ ꓘꓳ ꓔꓬ ꓡ꓾ ꓐꓯˍ ꓟ ꓔꓯ ꓠꓬꓲ. ꓠꓬꓲ ꓗꓪ ꓓꓵꓽ ꓙꓽ ꓠꓬꓲ ꓓꓴ ꓬꓰ ꓡꓯ꓿
