ꓧꓪ. ꓧꓪꓸꓼ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲ ꓒ ꓬꓰ‐ꓢꓴ ꓛꓲ ꓡˍ ꓟ ꓔꓯ ꓡꓳ. ꓠꓬ, ꓔꓬ ꓟ ꓦꓴ ꓠꓬ, ꓔꓬ ꓟ ꓠꓬ 3 ꓠꓽ ꓕꓲ ꓠꓽ ꓗꓪ ꓛꓲ ꓡꓺꓳ꓿ ꓕꓱ ꓕꓲ ꓠꓽ ꓗꓪ ꓥꓪ ꓡꓰ ꓐꓯ ꓟꓳ. ꓖꓶˍ ꓟ ꓟ. ꓟꓲꓽ ꓬꓲ ꓕꓲꓽ ꓟꓴꓽ ꓔꓯ ꓠꓬ “ꓠꓲ, ꓟ ꓫꓵ ꓢꓲ ꓙꓲˍ ꓟ ꓔꓯ ꓡꓳ.” ꓐꓰ ꓐꓯˍ ꓟ ꓥ ꓡꓳ꓿ (ꓟ‐ꓕꓲ 11ꓽ2‐11) ꓗꓪ ꓛꓲ ꓢ. ꓠꓯ ꓣꓳ ꓵꓻ ꓓꓴ ꓥꓳ꓿ ꓢꓲꓽ ꓫꓬ ꓕꓳꓽ ꓶ ꓗꓪ ꓠꓬ꓾ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓬꓲ ꓛꓳꓽ ꓒꓯ, ꓬꓲ ꓝꓲ ꓓꓴ ꓔꓯ ꓝꓲ ꓩꓴ ꓢꓲ ꓠꓬꓲ ꓕꓱ ꓡꓱ ꓠ ꓠꓬꓲˍ ꓡꓳ꓿ “ꓢꓲꓺ ꓒꓽꓳ ꓠꓴ ꓠꓬ ꓡ ꓠ, ꓟ ꓖꓳ ꓕꓲ ꓣꓳ ꓥ ꓡ꓿ ꓟꓽ ꓥ ꓠꓬ ꓥꓪ ꓡꓰ ꓝꓮꓲ ꓕꓲ ꓣꓳ ꓔꓯ ꓡꓳ. ꓠ ꓔˍ ꓡ꓾ ꓐꓰ ꓢꓲ ꓒ ꓬꓰ‐ꓢꓴ ꓔꓯ ꓠ ꓠꓬꓲˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ꓾ ꓟꓬ ꓔꓶ ꓠꓬꓲ ꓟꓳꓻ ꓡꓰˍ ꓟ꓾ ꓠ. ꓐꓳꓽ ꓢꓴ ꓑ ꓙꓽ ꓡꓰˍ ꓟ꓾ ꓛꓲ ꓫꓳ. ꓢꓴ ꓙ ꓖꓴ ꓫꓱꓽˍ ꓟ꓾ ꓕꓱ ꓟ ꓔꓯ ꓠꓴ ꓪ ꓟ. ꓒꓽ ꓔꓯ ꓙꓰ ꓢꓲ ꓐꓯ ꓟꓳ. ꓖꓶ꓾ ꓐꓰ ꓬꓳ‐ꓦ ꓬꓲ ꓛꓳꓽ ꓒꓯ, ꓐꓴ ꓔꓯ ꓢꓲ ꓒ ꓬꓰ‐ꓢꓴ ꓡꓰ ꓐꓯ ꓟꓳ. ꓖꓶˍ ꓡꓳ꓿
ꓢꓲ ꓒ ꓬꓰ‐ꓢꓴ ꓡꓰ꓾ ꓥꓪ ꓑꓶ. ꓓꓴ ꓠꓲ, ꓟ ꓟꓽ ꓙꓬ ꓡꓰ ꓢꓴ ꓠꓲ, ꓟ ꓟꓽ ꓫ. ꓡꓰ ꓢꓴ ꓠꓬ ꓶꓼ ꓙꓳ ꓫꓱ, ꓙꓳˍ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓠꓬ ꓐꓱ ꓓꓴꓽ ꓗꓪ ꓐꓱ ꓓ, ꓡꓳ꓿ ꓕꓲ ꓠꓬꓲ ꓕꓲ ꓠꓬꓲ ꓠꓲ, ꓫ. ꓓꓴ꓾ ꓫ. ꓝꓲˍ ꓟ ꓡꓰ ꓟꓶ ꓔꓬ ꓡꓳ꓿ ꓖꓳ ꓡꓱ ꓠꓬꓲ ꓬꓲ ꓠꓬ ꓕꓲ ꓖ ꓕꓲ ꓧꓪ, ꓠꓲ, ꓟ ꓣꓳꓺ ꓡꓰ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓠ ꓠꓬꓲˍ ꓟ ꓥ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ ꓐꓯˍ ꓠꓬ꓾ ꓚꓵ ꓚꓵ ꓠꓲ, ꓫ. ꓟ ꓑꓶ. ꓓꓴ꓾ ꓠꓲ, ꓥꓴꓻ ꓔꓬ ꓟ ꓑꓶ. ꓓꓴ꓾ ꓢꓲ ꓒ ꓬꓰ‐ꓢꓴ ꓠꓬ ꓚꓵ ꓚꓵ ꓥ ꓟꓽ ꓢꓷ.꓾ ꓪꓴ‐ꓢ ꓥ ꓟꓽ ꓢꓷ. ꓐꓰ ꓓꓵꓽ ꓙꓽ ꓟꓬꓽ ꓔꓬ ꓡꓳ꓿ ꓖꓳ ꓟ ꓑꓶ. ꓓꓴ ꓬꓲ ꓝꓲ ꓓꓴ ꓐꓴ ꓔꓯ ꓝꓲ ꓩꓴ ꓢꓲ ꓠ ꓠꓬꓲ ꓝꓲˍ ꓟ ꓥ ꓡꓳ꓿
ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤꓶꓻ ꓗꓪ ꓠꓬ ꓮ ꓡꓲ ꓕꓲ ꓔꓳ. ꓗꓪ ꓠꓲ, ꓟ ꓫ. ꓡꓰˍ ꓡ꓿ ꓓꓵꓽ ꓙꓽ ꓟꓬꓽ ꓪꓴꓽ ꓧꓶ ꓓꓴ ꓓꓳ ꓡˍ ꓡ꓿ ꓣꓳ ꓓꓵꓽ ꓙꓽ ꓔ ꓟ ꓡꓰ ꓐꓰ ꓟꓽ ꓡ ꓕꓯ꓾ ꓣꓳ ꓢꓯꓼ ꓕꓵꓼ ꓪꓴꓽ ꓧꓶ ꓔ ꓟ ꓡꓰ ꓐꓰ ꓣꓳ ꓟꓽ ꓪ ꓜꓽ ꓕꓯ꓾ ꓣꓳ ꓐꓰ ꓮ ꓫꓵꓽ ꓗꓴ. ꓙꓲꓽ ꓟꓽ ꓙꓳ ꓙꓳ ꓐꓰ ꓠꓱ. ꓐꓯ ꓶꓻ ꓡꓯꓼ ꓣꓳ ꓚꓱ, ꓖꓶ ꓠ ꓔˍ ꓟ꓾ ꓠꓱ. ꓐꓯ ꓢꓴ ꓐꓱ ꓶ ꓣꓳ ꓟꓬ ꓐꓲ ꓞꓰ ꓠ ꓔˍ ꓟ꓿ ꓕꓱ ꓡꓱ ꓫꓵꓽ ꓓꓳ ꓡˍ ꓕꓯ ꓠꓲ, ꓟ ꓟꓽ ꓫ. ꓡ꓿ ꓣꓳ ꓥꓳ ꓡꓳ. ꓔ ꓟ ꓡꓰ ꓟꓽ ꓥ꓾ ꓣꓳ ꓢꓯꓼ ꓕꓵꓼ ꓔ ꓟ ꓡꓰ ꓟꓽ ꓥ ꓥ ꓐꓰ ꓧꓶ. ꓧꓶ. ꓫꓵ ꓙꓰ ꓢꓲ ꓠꓬꓲ ꓠꓲ, ꓫ ꓟꓬ ꓫ ꓓꓴ꓾ ꓠꓲ, ꓟ ꓪꓴꓽ ꓧꓶ ꓓꓴ ꓫꓵꓽ ꓪꓴ ꓬꓲ ꓫꓵꓽ ꓬꓲ ꓙꓰꓽ ꓔꓳ, ꓜꓳꓽ ꓡˍ ꓕꓯ ꓠꓴ ꓠꓲ, ꓟ ꓟꓽ ꓙꓬ ꓡꓰ ꓡ꓿ ꓠꓴ ꓥꓳ ꓡꓳ. ꓓꓴ ꓟꓽ ꓟꓶꓽ ꓡꓰ ꓡ꓿ ꓮꓽ ꓟ ꓥˍ ꓟꓲ ꓕꓱ ꓡꓱ ꓗꓷ ꓡꓰ ꓗꓴ.ˍ ꓡꓳ꓿ ꓣꓳ ꓔꓳ, ꓜꓳꓽ ꓔꓬ ꓟ ꓫꓵꓽ ꓪꓴ ꓠꓬ ꓛꓬ, ꓕꓯꓽ ꓢꓲ ꓗꓪ ꓢꓯꓼ ꓪ ꓙꓳˍ ꓟ ꓡꓰ ꓐꓰ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓓꓵꓽ ꓙꓽ ꓟꓬꓽ ꓓꓴ ꓓꓳ ꓡ ꓗꓴ.ˍ ꓡꓳ꓿
ꓕꓱ ꓟ ꓠꓬ ꓞꓳ ꓤ ꓮ ꓙꓵꓽ ꓙꓳˍ ꓡꓳ꓿ ꓕꓱ ꓟ ꓠꓬ ꓮꓽ ꓟ ꓥˍ ꓟꓲ ꓓꓵꓽ ꓙꓽ ꓟꓶ ꓗꓴ.ˍ ꓡꓳ꓿ ꓖꓳ ꓡꓱ ꓥˍ ꓟꓲ ꓠꓲ, ꓟ ꓕꓽ ꓫ.꓿ ꓬꓳ. ꓚꓰꓽˍ ꓟ ꓠꓬ ꓮ ꓫꓵꓽ ꓥ ꓐꓯˍ ꓠꓬ ꓣꓳ ꓠꓲ, ꓟ ꓙꓬˍ ꓥ ꓟꓲ ꓠꓲ, ꓟ ꓙꓬˍ ꓟ ꓠꓬꓲꓽ ꓗꓴ. ꓚꓸꓼ ꓗꓪ ꓪꓴ‐ꓢ ꓔꓯ ꓥꓳ ꓡꓳ. ꓠ, ꓟ ꓥ ꓡꓳ꓿ ꓣꓳ ꓢꓯꓼ ꓪ ꓠꓬ ꓮ ꓡꓲ ꓗꓪ ꓚꓳ. ꓡˍ ꓡ꓿ ꓟꓴ ꓖꓪ ꓖꓼ ꓛꓳ ꓓꓴ ꓗꓪ “The Lord is my Strength” ꓪꓴ‐ꓢ ꓠꓬ ꓥꓪ ꓢꓯꓼ ꓪ ꓥ ꓡꓳ꓾ ꓐꓰ ꓐꓯ ꓔ ꓡꓳ꓿ ꓣꓳ ꓪꓴ‐ꓢ ꓔꓯ ꓟꓽ ꓠꓲ, ꓥꓳ ꓕꓯ꓾ ꓣꓳ ꓪꓴ‐ꓢ ꓔꓯ ꓟꓽ ꓦ ꓡꓱ ꓕꓯ꓾ ꓬꓲ ꓔꓯ ꓙꓵꓻ ꓢꓲ ꓠꓬꓲ ꓟꓽ ꓥꓳ ꓡꓳ. ꓔ ꓕꓯ ꓣꓳ ꓠꓬ ꓮ ꓡꓲ ꓥˍ ꓟꓲ ꓖꓳ ꓟ ꓔꓯ ꓧꓪ. ꓟꓽ ꓐ ꓡ꓿
ꓕꓲ ꓧꓪ, ꓙꓳˍ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓛꓳꓽ ꓒꓯ, ꓐꓴ ꓠꓬ ꓬꓲ ꓪ ꓧꓶ. ꓕꓯ ꓡꓲꓺ ꓜꓶꓽ ꓢꓲ ꓠꓬꓲ ꓠꓯ ꓬꓲꓻ ꓖꓳ ꓐꓽ ꓗꓳ. ꓙꓰˍ ꓡꓳ꓿ ꓖꓳ ꓕꓯ ꓢꓲ ꓒ ꓬꓰ‐ꓢꓴ ꓠꓬ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽ ꓢꓲ ꓬꓲ ꓪ ꓔꓯ ꓡˍ ꓡꓳ꓿ ꓖꓳ ꓕꓯ ꓬꓲ ꓛꓳꓽ ꓒꓯ, ꓐꓴ ꓠꓬ ꓙꓳ ꓡꓰ ꓢꓲ ꓠꓬꓲ ꓠꓲꓽ ꓥ ꓡꓳ꓾ ꓫꓵꓻ ꓗꓴ. ꓫꓵꓻ ꓦ ꓥ ꓡꓳ꓾ ꓐꓰ ꓐꓯ ꓔꓬ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓠꓬ꓾ ꓕꓽ ꓙꓳꓺ ꓥꓪ ꓥ ꓡꓳ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓒꓲ‐ꓕꓱ ꓡꓰ꓾ ꓢꓲꓺ ꓒꓽꓳ ꓠꓴ ꓥ ꓠꓬ꓾ ꓠꓴˍ ꓡꓰ ꓐꓰ ꓬꓲꓻ ꓙꓬ ꓕꓽ ꓢꓲ ꓗꓪ ꓥꓪ ꓫꓱꓽ ꓩꓴ ꓡˍ ꓥꓳ꓾ ꓐꓰ ꓐꓯˍ ꓡꓳ꓿ ꓢꓲ ꓒ ꓬꓰ‐ꓢꓴ ꓡꓰ ꓬꓲ ꓔꓯ ꓾ ꓡꓯ꓾ ꓐꓰ ꓐꓯ ꓖꓶˍ ꓡꓳ꓿ ꓖꓳ ꓕꓯ ꓬꓲ ꓠꓬ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽ ꓗꓳ. ꓙꓰˍ ꓡꓳ꓿ ꓖꓳ ꓡꓱ ꓐꓯ ꓥ ꓟꓲ ꓬꓲꓻ ꓙꓬ ꓔꓯ ꓡꓳ. ꓠꓬꓲ ꓢꓲ ꓠꓬꓲ ꓬꓲ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽ ꓔꓬ ꓡꓳ꓿ ꓝꓮꓲ ꓪꓴꓽˍ ꓟ ꓕꓳꓽ ꓥꓳꓽ ꓔꓯ ꓡꓳ. ꓠꓬꓲˍ ꓕꓯ ꓬꓲ ꓠꓬ ꓬꓲꓻ ꓙꓬ ꓘꓴꓽ ꓗꓪ ꓓꓵꓽ ꓡꓰꓳ꓿ ꓧꓶ. ꓕꓯ ꓢꓲ ꓒ ꓬꓰ‐ꓢꓴ ꓔꓯ ꓡꓳ. ꓠꓬꓲ ꓔꓬ ꓕꓯ ꓠꓬ ꓬꓲ ꓠꓬ ꓬꓲꓻ ꓙꓬ ꓕꓯꓽ ꓢꓲ ꓗꓪ ꓙ ꓖꓴ ꓫꓱꓽ ꓐ ꓡˍ ꓡꓳ꓿ ꓖꓳ ꓡꓱ ꓥ ꓟꓲ ꓬꓲ ꓐꓽ ꓗꓪ ꓡꓳ. ꓠꓬꓲ ꓗꓷˍ ꓕꓯ ꓠꓬ ꓞꓰꓻ ꓬꓰꓳ꓿
