ꓞꓳ ꓤ ꓕꓲꓽ ꓣꓳ ꓟ ꓬꓲ ꓬꓰ_ ꓟ ꓙꓲ_ ꓡ꓾ ꓟꓽ ꓙꓲ_ ꓡ꓾ ꓪꓴ‐ꓢ ꓟꓲ ꓙꓬ ꓗꓪ ꓙꓲ_ ꓡ꓾ ꓟꓽ ꓙꓲ_ ꓡ꓾ ꓐꓯ_ ꓟ ꓔꓯ ꓢ ꓫꓵꓽ ꓗꓪ ꓐꓰ ꓡꓳ. ꓠꓬꓲ_ ꓡꓳ꓿ ꓬꓲ. ꓪꓴ. ꓕꓲꓽ ꓟ ꓟ ꓠꓬ ꓬꓲ ꓬꓰ_ ꓟ ꓟꓬꓱꓽ ꓖꓳ ꓟ ꓠꓬ ꓬꓲ ꓚꓲ ꓛꓬ ꓙꓲ_ ꓟ ꓥ ꓠ ꓔ ꓡꓳ꓾ ꓟꓬꓱꓽ ꓖꓳ ꓟ ꓮꓽ ꓟ ꓮ ꓫꓵ ꓥ ꓟꓲ ꓙꓲ_ ꓟ ꓚꓱ, ꓥ ꓠ ꓔ ꓡꓳ꓾ ꓔꓯ ꓥꓳꓽ ꓞꓳ ꓫ. ꓔꓯ ꓬꓰ ꓙ_ ꓟ꓾ ꓪꓽ ꓘꓴ_ ꓟ꓾ ꓮꓽ ꓐ ꓮ ꓟ ꓔꓯ ꓒꓵ_ ꓟ ꓕꓱ ꓟ ꓠꓬ ꓙꓲ_ ꓟ ꓥ ꓡꓳ꓿ ꓟꓽ ꓙꓲ_ ꓟ ꓠꓬ ꓗꓶ. ꓟ꓾ ꓞꓳ ꓤ ꓢꓰꓼ ꓟ꓾ꓕꓱ ꓟ ꓠꓬ ꓟꓽ ꓙꓲ ꓬꓲ ꓚꓲ ꓛꓬ ꓥ ꓟꓲ ꓟꓽ ꓙꓲ ꓮ ꓡꓰ ꓥ ꓟꓲ ꓟꓽ ꓙꓲ ꓟ ꓥ ꓡꓳ꓿
ꓠꓬꓲꓽ ꓫꓵ ꓟ ꓠꓬ ꓬꓲ ꓔꓶꓻ ꓙꓱꓼ ꓥ ꓡꓳ꓾ ꓠꓴ ꓬꓰ_ ꓟ ꓟꓬꓱꓽ ꓠꓬ ꓙꓲ_ ꓟ ꓥ ꓟꓲ ꓠꓴ ꓔꓶꓻ ꓙꓱꓼ ꓠꓴ ꓠꓲ, ꓡꓶꓽ ꓠꓬ ꓟꓽ ꓫꓬ ꓕꓯ ꓖꓳꓼ ꓕꓯ ꓞꓳ ꓙꓲ ꓕꓲ ꓣꓳ ꓒꓬꓱꓼ ꓡ ꓟꓽ ꓓ꓾ ꓠꓴ ꓬꓰ_ ꓟ ꓙꓲ_ ꓟ ꓥ ꓟꓲ ꓠꓴ ꓔꓶꓻ ꓙꓱꓼ ꓟꓽ ꓔꓱ, ꓕꓯ ꓞꓳ ꓙꓲ ꓕꓲ ꓣꓳ ꓟꓽ ꓒꓬꓱꓼ ꓡ꓾ ꓔꓯ ꓥꓳꓽ ꓞꓳ ꓫ. ꓔꓯ ꓬꓰ ꓙ ꓬꓰ ꓙ ꓟ ꓠꓬ ꓟꓬꓱ ꓓꓳꓽ ꓟꓶ ꓠ, ꓟ ꓬꓲ ꓠꓯꓼ ꓗꓪ ꓙꓳ_ ꓡꓳ꓾ ꓬꓲ ꓬꓰ_ ꓟ ꓠꓬ ꓙꓲ ꓥ ꓟꓲ ꓬꓲ ꓔꓶꓻ ꓙꓱꓼ ꓠꓬ ꓟꓽ ꓙꓲ꓾ ꓢꓴ ꓡꓰ ꓬꓲ ꓔꓯ ꓫꓱ. ꓖꓶ ꓠ, ꓟ꓾ ꓬꓲ ꓔꓯ ꓓꓳ, ꓟꓴ ꓠ, ꓟ꓾ ꓢꓴ ꓡꓰ ꓬꓲ ꓔꓯ ꓙꓲ_ ꓟ ꓐꓯ ꓠ, ꓟ ꓔꓶꓻ ꓙꓱꓼ ꓗꓷ ꓔ ꓟ ꓑꓶ ꓓꓴ ꓥ ꓡꓳ꓾
ꓢ ꓫꓵꓽ ꓟ ꓠꓬ꓾ꓬꓲ ꓝꓲ. ꓬꓲ ꓒꓯꓼ ꓔꓯ ꓡꓳ. ꓠꓬꓲ ꓠ, ꓟ ꓥ ꓡꓳ꓿ ꓬꓲ ꓕꓲ ꓫꓵ ꓫꓵ ꓬꓰ ꓕꓯ ꓬꓲ ꓬꓰ_ ꓟ ꓖꓳ ꓕꓲ ꓑ, ꓗꓪ ꓬꓲ ꓔꓯ ꓮ ꓡꓰ ꓫꓵ ꓠꓬꓲ. ꓞ, ꓓꓴ ꓙꓳ_ ꓡ꓾ ꓮ ꓡꓰ ꓫꓵ ꓬꓲ ꓝꓲ. ꓬꓲ ꓒꓯꓼ ꓔꓯ ꓠꓬꓲ. ꓔ ꓓꓴ ꓙꓳ_ ꓡ꓾ꓮ ꓡꓰ ꓫꓵ ꓬꓲ ꓔꓯ ꓜꓲ ꓜꓲ ꓟꓴ ꓟꓴ ꓬꓰ ꓝꓲ_ ꓡ꓾ ꓐꓯ_ ꓟ ꓡꓳ. ꓠꓬꓲ ꓠ ꓗ, ꓡꓳ꓿ ꓖꓳ ꓡꓰ ꓠꓬꓲ ꓮ ꓟ ꓡꓲ ꓮ ꓡꓰ ꓐꓰ ꓬꓲ ꓚꓲ ꓛꓬ ꓬꓲ ꓠꓲ, ꓡꓶꓽ ꓡꓰ ꓬꓲ ꓢꓷ. ꓥꓳ꓾ ꓐꓯ ꓠꓬ ꓖꓳ ꓟ ꓠꓬ ꓙꓲ ꓥ꓾ ꓟꓽ ꓙꓲ_ ꓥ꓾ ꓐꓯ_ ꓟ ꓓꓳ ꓡ ꓥꓳ꓿ ꓔꓯ ꓥꓳꓽ ꓬꓲ ꓔꓯ ꓢꓴ ꓡꓰ ꓮ. ꓕ ꓟꓳ. ꓢꓲ ꓡ ꓛꓴ. ꓟꓳ. ꓢꓲ ꓠꓬꓲ ꓕꓲ ꓫꓵ ꓫꓵ ꓟꓽ ꓙꓲ ꓟ ꓬꓰ ꓝꓲ ꓠꓬ ꓬꓲ ꓠꓲ, ꓡꓶꓽ ꓟꓽ ꓙꓳ ꓥ ꓟꓲ ꓬꓰ ꓪ ꓡꓰ ꓕꓯ ꓬꓲ ꓠꓬ ꓝꓴꓲ ꓮ ꓘꓶ. ꓟꓽ ꓪꓴꓽ꓾
ꓕꓱ ꓡꓱ ꓢ ꓫꓵꓽ ꓗꓪ ꓐꓰ ꓡ ꓞꓳ ꓕꓲ ꓣꓳ ꓬꓲ ꓬꓰ_ ꓟ ꓙꓲ_ ꓡ꓾ ꓟꓽ ꓙꓲ_ ꓡ꓾ ꓐꓯ_ ꓟ ꓪꓴ‐ꓢ ꓟꓲ ꓙꓬ ꓗꓪ ꓟꓬꓱ ꓓꓳꓽ ꓟꓶ. ꓡ ꓟꓽ ꓟꓶ. ꓡ ꓐꓯ_ ꓟ ꓣꓳ ꓔꓯ ꓘꓴ ꓜꓲꓼ ꓞꓳ ꓗꓪ ꓐꓰ ꓐꓯ ꓟꓳ. ꓡ ꓔꓬ ꓡꓳ꓿
