“ꓢꓯꓼ ꓕꓵꓼ ꓪꓴꓽ ꓧꓶ ꓢꓲ ꓶꓻ ꓡꓲꓽ ꓓꓽ ꓟ ꓟꓯꓻ ꓢꓴ ꓐꓴꓳ꓾ ꓥꓪ ꓔꓯ ꓡꓯ꓿ ꓥꓪ ꓡꓰ ꓠꓴ ꓪ ꓔꓯ ꓪꓴꓽ ꓧꓶ ꓠꓽ ꓝꓲ_ ꓥꓳ꓾” ꓐꓰ ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓐꓯ ꓔ ꓡꓳ꓿ ꓕꓱ ꓟ ꓠꓬ ꓢꓲ ꓒ ꓬꓰ‐ꓢꓴ ꓬꓲ ꓠꓵꓻ ꓠꓲ, ꓐ ꓐꓲ ꓟ. ꓖꓶ ꓟ ꓔꓯ ꓡꓳ. ꓟꓳ ꓪ ꓡꓳ꓿ ꓡ ꓞꓳ ꓕꓲ ꓣꓳ ꓠꓯꓼ ꓗꓪ ꓠꓬ ꓕꓲ ꓠꓬꓲ ꓡꓲ ꓕꓲ ꓠꓬꓲ ꓢꓯ. ꓔꓬ ꓙꓻ ꓫꓱꓽ ꓟ ꓗꓪ ꓗ, ꓛꓲ_ ꓟ꓾ ꓠꓲ, ꓫ. ꓟ꓾ ꓠꓲ, ꓟ ꓐꓬ ꓔꓬ ꓟ꓾ ꓠꓲ, ꓟ ꓟꓽ ꓗ, ꓛꓲ_ ꓟ ꓕꓱ ꓟꓬ ꓫꓵ ꓐꓰ ꓔꓳ, ꓜꓳ ꓔꓬ ꓟ ꓥꓳ꓾ ꓖꓳ ꓟ ꓡꓰ ꓐꓰ ꓕꓱ ꓟ ꓮ ꓙꓵ ꓔꓯ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓠꓯꓼ ꓗꓪ ꓡꓯ꓾ ꓐꓰ ꓘꓴ ꓔ ꓟ ꓥ ꓡꓳ꓾
ꓣꓳ ꓮ ꓡꓰ ꓐꓰ ꓔꓳ, ꓜꓳ ꓡ ꓥ ꓟꓲ ꓣꓳ ꓐꓱ ꓶ ꓪꓴꓽ ꓧꓶ ꓠꓽ ꓖꓴ ꓠꓬ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓪꓴꓽ ꓧꓶ ꓠꓽ ꓖꓴ ꓓꓰ ꓢ ꓙꓲ_ ꓟ ꓬꓲ ꓔꓶ. ꓟꓽ ꓙꓳ꓾ ꓬꓲ ꓠꓬ ꓣꓳ ꓐꓱ ꓶ ꓙꓲ_ ꓟ ꓛꓳ ꓒꓯ, ꓥ ꓡꓳ꓿ ꓬꓲ ꓠꓲ, ꓡꓱ ꓟ ꓠꓲ, ꓟ ꓠꓬ ꓣꓳ ꓐꓱ ꓶ ꓢꓲ ꓡꓲ, ꓗ, ꓛꓲ ꓟꓶ ꓡ ꓟ ꓥꓳ꓿
ꓖꓳ ꓟ ꓡꓰ ꓐꓰ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓠꓯꓼ ꓗꓪ ꓡ ꓠ, ꓟ꓾ ꓬꓲ ꓗꓪ ꓐꓰ ꓢꓳꓺ ꓣꓴ ꓠ, ꓟ ꓘꓴ ꓔ ꓡꓳ꓾ ꓬꓲ ꓡꓰ ꓐꓰ ꓙꓽ ꓣꓳꓺ ꓠꓲ,꓾ ꓠꓵꓻ ꓠꓲ, ꓐꓰ ꓢꓯ. ꓔꓬ ꓠ, ꓟ ꓬꓲ ꓗꓪ ꓐꓰ ꓢꓳꓺ ꓣꓴ ꓠ, ꓟ ꓥ ꓡꓳ꓿ “ꓥꓪ ꓡꓽ ꓡꓰ ꓟꓯꓻ ꓢꓲ ꓥꓪ ꓔꓯ ꓢꓳ ꓡꓯ꓾” ꓐꓰ ꓐꓯ_ ꓟ ꓠꓬ ꓣꓳ ꓤꓶꓻ ꓔꓯ ꓢꓲ ꓒ ꓬꓰ‐ꓢꓴ ꓠꓯꓼ ꓗꓪ ꓡꓯꓽ ꓙꓱ ꓢꓲ ꓢꓲ ꓒ ꓬꓰ‐ꓢꓴ ꓡꓰ ꓧꓳꓽ ꓪꓴ. ꓟꓴ ꓟ ꓗꓪ ꓢꓯ. ꓔꓬ ꓛꓳ ꓫꓱꓽ ꓠ, ꓟ ꓥ ꓡꓳ꓿
ꓬꓲꓻ ꓙꓬ ꓐꓳ ꓠꓬꓲꓽ ꓐꓳ ꓔꓯ ꓡꓯꓽ ꓒꓯ, ꓐꓰ ꓔꓯ, ꓛꓵ ꓠ, ꓟ ꓓꓰ ꓢ ꓡꓯ ꓒꓶ ꓗꓪ ꓑꓱ. ꓔ ꓟ ꓟꓬ ꓠꓬꓲ ꓢ_ ꓡꓳ꓿ ꓖꓳ ꓟ ꓡꓰ ꓐꓰ ꓑꓱ. ꓔ ꓟ ꓟꓽ ꓪ ꓥ ꓟꓲ ꓠꓻ ꓡꓰ ꓝꓲ_ ꓡꓳ꓿ ꓟꓬ ꓠꓬꓲ ꓡꓲꓽ_ ꓡꓳ꓾ ꓟꓲ ꓠꓯ ꓡ ꓞꓳ ꓤꓶꓻ ꓗꓪ ꓥ ꓟꓲ ꓟꓯꓻ ꓔ ꓟ ꓶꓻ ꓮ ꓟꓬ, ꓙꓳ_ ꓡꓳ꓾ ꓢꓲ ꓒ ꓬꓰ‐ꓢꓴ ꓡꓰ ꓐꓰ ꓢꓯ. ꓔꓬ ꓢꓲ ꓬꓰ‐ꓢꓴ ꓡꓰ ꓟ. ꓖꓶ ꓔ ꓟ ꓡꓰ ꓐꓰ ꓢꓯ. ꓔꓬ ꓠꓬ ꓣꓳ ꓟꓯꓻ ꓔ ꓟ ꓶꓻ ꓠꓬ ꓡꓳ ꓡ ꓥꓳ꓾ ꓠꓵꓻ ꓠꓲ, ꓐꓰ ꓢꓯ. ꓔꓬ ꓠ, ꓟ ꓢꓲ ꓒ ꓬꓰ‐ꓢꓴ ꓡꓰ ꓘꓴ ꓔ ꓟ ꓥ ꓡꓳ꓾ ꓐꓰ ꓢꓯꓼ ꓖꓶ ꓩꓴ ꓡ ꓥꓳ꓿
