ꓬꓰ‐ꓢꓴ ꓦꓵꓻ ꓡ ꓟ ꓓꓳꓽ (Monday reflection)
ꓧꓪ. ꓧꓪ ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓝꓲ. ꓠꓬ ꓡꓴ‐ꓘ ꓕꓳ ꓶ 1ꓽ26‐38) ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓦꓵꓻ ꓠ, ꓟ ꓚꓱ, ꓥ ꓡꓳ꓿ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓔꓯ ꓚꓬꓴ ꓠ, ꓟ ꓚꓺ ꓟꓲꓽ ꓗꓪ ꓮ ꓘꓶ. ꓛꓲ ꓓꓵꓽ ꓙ ꓟꓶ ꓓꓽ ꓟ ꓠꓬ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓟ, ꓟ ꓟ‐ꓡꓲ ꓠꓯ, ꓗꓪ ꓐꓰ ꓦꓵꓻ ꓡ ꓟ ꓚꓱ, ꓥ ꓡꓳ꓿ ꓟ‐ꓡꓲ ꓠꓬ ꓮ ꓘꓶ. ꓛꓲ ꓙꓺ ꓣꓳ ꓢꓴ ꓥ ꓟ ꓪꓴ. ꓠꓬꓲ ꓪꓴ‐ꓢ ꓠꓲ, ꓠꓶꓽ ꓔꓯ ꓒꓵꓽ ꓛꓳ ꓢꓴ ꓥ ꓟ ꓪꓴ. ꓠꓬꓲ ꓪꓴ‐ꓢ ꓠꓬ ꓣꓱ ꓗꓷ ꓟ ꓥ ꓡꓳ꓿ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓤꓶꓻ ꓠꓯ, ꓗꓪ ꓐꓰ ꓡ ꓟ ꓚꓱ, ꓔꓯ ꓣꓳ ꓠꓬꓲ ꓡꓯ꓿
ꓢꓲꓽ ꓫꓬ ꓕꓳ ꓶ ꓐꓳ ꓒꓽ ꓡꓴ‐ꓘ ꓠꓬ ꓢꓲ‐ꓫꓬ‐ꓟ‐ꓦ ꓔꓯ ꓠ‐ꓢ‐ꓡꓱ ꓞꓳ ꓘ, ꓗꓪ ꓔꓬ ꓟ ꓟ‐ꓡꓲ ꓔꓯ ꓪꓴ‐ꓢ ꓶꓼ ꓓꓳꓽ ꓫꓱ, ꓓꓳꓽ ꓐꓯ ꓟ. ꓖꓶ ꓠ, ꓟ ꓝꓲ. ꓗꓷ ꓟ ꓥ ꓡꓳ꓿ ꓕꓱ ꓟ ꓠꓬ ꓪꓴ‐ꓢ ꓠꓬ ꓟꓲ ꓠꓯ ꓡ ꓞꓳ ꓐꓴ ꓫ. ꓕꓱ ꓗꓴ. ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓪꓴ‐ꓢ ꓡꓰ ꓘꓴꓽ ꓢꓴ ꓪꓴ‐ꓢ ꓣꓱ ꓢꓴ ꓐꓴ ꓮ ꓟꓽ ꓥ ꓟꓲ ꓟꓬꓱꓺ ꓓꓳꓽ ꓙꓳ ꓢꓴ ꓐꓴ ꓟꓽ ꓥ꓾ ꓟꓲ ꓠꓯ ꓒꓴ ꓫꓵꓺ ꓙꓳ ꓢꓴ ꓟꓽ ꓥ꓾ ꓙꓵꓽ ꓪ ꓙꓳ ꓢꓴ ꓥ ꓟꓽ ꓛꓲ ꓟ ꓥ ꓡꓳ꓿ ꓪꓴ‐ꓢ ꓠꓬ ꓣꓳ ꓔꓬ ꓟ ꓔꓶ. ꓗꓪ ꓡ ꓢꓴ ꓥ ꓡꓳ꓿ ꓗ, ꓛꓲ ꓟ ꓓꓳꓽ ꓢꓲꓺ ꓒ ꓢꓲ ꓡꓲ ꓟ ꓠꓴ ꓐꓰ ꓕꓲ ꓪ ꓙꓳ ꓝꓲ ꓐꓯ ꓖꓶ ꓟ꓾ ꓟꓴ ꓗꓪ ꓝꓲ ꓓꓴ ꓚꓬ‐ꓑꓷ‐ꓡꓰ ꓡꓰ ꓟ‐ꓡꓲ ꓔꓯ ꓫ. ꓕꓱ ꓟ ꓠꓬ ꓟ‐ꓡꓲ ꓠꓬ ꓙꓵꓻ ꓠꓲ, ꓮ ꓘꓶ. ꓙꓳ ꓟ ꓚꓱ, ꓔꓯ ꓡꓳ. ꓟꓳ ꓓꓽ ꓡꓳ꓿ ꓤ ꓟꓶ ꓤ ꓮ ꓙꓵꓽ ꓢꓴ ꓕꓯ ꓢꓲ ꓶꓼ ꓙꓳ ꓫꓱ, ꓙꓳ ꓢꓴ ꓠꓬ ꓠꓴ ꓥ ꓡꓳ꓿
ꓠꓴ ꓖꓳ ꓓꓱ ꓗꓪ ꓶꓻ ꓞ, ꓟˍ ꓟꓲ ꓶꓼ ꓙꓳ ꓫꓱ, ꓙꓳ ꓡꓳ꓿ ꓪꓴ‐ꓢ ꓠꓬ ꓟ‐ꓡꓲ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓪꓴ‐ꓢ ꓡꓰ ꓣꓳ ꓔꓯ ꓬꓰ ꓝꓲ. ꓠꓲ, ꓫꓵˍ ꓟ ꓟꓬꓱꓽ ꓔꓯ ꓬꓰ ꓝꓲ ꓠ, ꓟ ꓣꓱ ꓛꓰ ꓖꓶ ꓔ ꓟ ꓥ ꓡꓳ꓿ ꓟ‐ꓡꓲ ꓠꓬ ꓙꓳꓺ ꓟ ꓔꓯ ꓪꓴ‐ꓢ ꓡꓰ ꓮ ꓡꓰ ꓫꓵꓽ ꓫ. ꓕꓱ ꓖꓶˍ ꓟ ꓚꓱ,꓾ ꓟ‐ꓡꓲ ꓠꓬ ꓟꓴ ꓗꓪ ꓝꓲ ꓓꓴ ꓡꓰ ꓬꓲ ꓔꓯ ꓫ. ꓕꓱ ꓡ ꓟ ꓑꓶ. ꓓꓴ ꓮ ꓘꓶ. ꓙꓳꓺ ꓔꓬ ꓟ ꓥ ꓡꓳ꓿ ꓖꓳ ꓟ ꓠꓬ ꓟ‐ꓡꓲ ꓠꓬ ꓟꓲ ꓠꓯ ꓡ ꓞꓳ ꓚꓵˍ ꓥ ꓟ ꓔꓯ ꓟ. ꓖꓶ ꓔ ꓟ ꓥꓡꓳ꓿
ꓖꓳ ꓡꓱ ꓥ ꓟ ꓟꓴ ꓗꓪ ꓝꓲ ꓓꓴ ꓡꓰ ꓕꓽ ꓙꓳꓺ ꓐꓴ ꓐꓯ ꓟ ꓥ ꓡꓳ꓿ ꓪꓴ‐ꓢ ꓡꓰ ꓣꓳ ꓓꓵꓽ ꓙ ꓟ ꓟꓽ ꓒꓬꓱꓼ ꓡ ꓟ ꓙꓵ, ꓝꓮꓲ ꓠꓲ, ꓫ. ꓟꓬ ꓫ. ꓓꓴ ꓙꓳ ꓡ ꓟ ꓙꓵ, ꓕꓯ ꓪꓴ‐ꓢ ꓡꓰ ꓣꓳ ꓔꓯ ꓟꓽ ꓡꓳ ꓗꓷ ꓬꓲ ꓠꓬ ꓮ ꓕꓯ ꓥ ꓟꓲ ꓬꓰ ꓙ ꓢꓴ ꓥ ꓡꓳ꓿ ꓬꓲ ꓠꓬ ꓮ ꓕꓯ ꓥ ꓟꓲ ꓣꓳ ꓒ ꓕꓲ ꓗꓪ ꓔꓬ ꓢꓴ ꓥ ꓟ ꓐꓰ ꓣꓳ ꓔꓯ ꓬꓰ ꓙ ꓢꓴ ꓪꓴ‐ꓢ ꓥ ꓟ ꓔꓯ ꓟ. ꓖꓶ ꓔ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓡ ꓞꓳ ꓒꓬꓱꓼ ꓡ ꓟ ꓚꓱ, ꓓꓵꓽ ꓙ ꓟꓶ ꓓꓴ ꓚꓱ,꓾ ꓟꓴ ꓗꓪ ꓝꓲ ꓓꓴ ꓡꓰ ꓮ ꓘꓶ. ꓛꓲ ꓢꓲꓽ ꓫꓬ ꓟ ꓟ‐ꓡꓲ ꓠꓯ, ꓗꓪ ꓤ ꓶꓻ ꓡꓰ ꓢꓲ ꓠꓬꓲ ꓪꓴ‐ꓢ ꓮ‐ꓐꓲ ꓦꓵꓻ ꓡ ꓟ ꓔꓯ ꓓꓳꓽ ꓐꓯ ꓟ. ꓖꓶ ꓔ ꓟ ꓥ ꓡꓳ꓿ ꓕꓱ ꓟ ꓠꓬ ꓮ ꓘꓶ. ꓛꓲ ꓓꓵꓽ ꓙ ꓟꓶ ꓓꓴ ꓓꓽ ꓟ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓙꓵꓻ ꓠꓲ, ꓗꓪ ꓮ ꓘꓶ.ꓛꓲ ꓪꓴꓽ ꓟ ꓙꓵꓻ ꓠꓲ, ꓚꓱ, ꓕꓲ ꓟ ꓟꓲ ꓥ ꓡꓳ꓿ ꓟ‐ꓡꓲ ꓠꓬ ꓙꓺ ꓣꓳ ꓟ ꓢꓴ ꓐꓰ ꓬꓲ ꓠꓬ ꓟꓴ ꓗꓪ ꓝꓲ ꓓꓴ ꓡꓰ ꓐꓯ ꓟ. ꓖꓶ ꓡ ꓟ ꓔꓯ ꓮ ꓫꓵꓽ ꓥ ꓟ ꓟꓽ ꓢꓷ. ꓥ ꓟꓲ ꓪꓴ‐ꓢ ꓔꓯ ꓙꓵꓻ ꓙꓵꓻ ꓠꓲ, ꓗꓪ ꓐꓰ ꓘꓳ, ꓣꓴ ꓗꓷ ꓥ ꓡꓳ꓿ ꓕꓱ ꓟ ꓔꓯ ꓡꓳ. ꓟꓳ ꓠꓬ ꓟ‐ꓡꓲ ꓠꓬ ꓙꓵꓻ ꓠꓲ, ꓮ ꓘꓶ. ꓛꓲ ꓙꓳ ꓢꓴ ꓐꓴ ꓡꓳ. ꓟꓳ ꓓꓽ ꓥ ꓡꓳ꓿
ꓟ‐ꓡꓲ ꓡꓰ ꓥꓪ ꓠꓬ ꓪꓴ‐ꓢ ꓛꓳ‐ꓟ ꓥ ꓔꓯ ꓐꓯ ꓖꓶ ꓟ ꓥ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓔꓯ ꓥ ꓟꓲ ꓟ‐ꓡꓲ ꓠꓬ ꓪꓴ‐ꓢ ꓔꓯ ꓙꓵꓻ ꓟ ꓙꓵꓻ ꓠꓲ, ꓔꓯ ꓔꓯꓺ ꓢꓳ ꓠ, ꓟ ꓘꓴ ꓔꓬ ꓟ ꓥ ꓡꓳ꓿ ꓣꓳ ꓔꓬ ꓟ ꓘꓴ ꓜꓲꓼ ꓞꓳ ꓗꓪ ꓪꓴ‐ꓢ ꓟꓬꓱꓽ ꓗꓪ ꓟ‐ꓡꓲ ꓡꓰ ꓐꓰ ꓙꓻ ꓣꓳ ꓟ ꓠꓲ, ꓟ ꓙꓳ ꓢꓴ ꓠꓵꓻ ꓠꓲ, ꓙꓳ ꓢꓴ ꓒꓬꓱꓼ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿
ꓪꓴ‐ꓢ ꓡꓰ ꓬꓰ ꓟ ꓟꓬꓱꓽ ꓗꓪ ꓠꓬ ꓟꓲ ꓠꓯ ꓡ ꓞꓳ ꓓꓵꓽ ꓙ ꓚꓱ, ꓒꓬꓱꓼ ꓡ ꓟ ꓔꓯ ꓒꓬꓱꓼ ꓡ ꓝꓲ ꓟ ꓔꓯ ꓟꓴ ꓗꓪ ꓝꓲ ꓓꓴ ꓡꓰ ꓐꓯ ꓟ. ꓖꓶ ꓗꓷꓳ꓿ ꓪꓴ‐ꓢ ꓠꓬ ꓮ ꓫꓵꓽ ꓥ ꓟ ꓒꓬꓱꓼ ꓡ ꓝꓲ ꓓꓽ ꓢꓴ ꓪꓴ‐ꓢ ꓥ ꓡꓳ꓿ ꓠꓴ ꓥꓪ ꓠꓬ ꓝꓴꓲ. ꓙꓳ ꓢꓴ꓾ ꓒꓬꓱꓼ ꓡ ꓟꓽ ꓓꓽ ꓐꓰ ꓓꓴ ꓙ ꓔ ꓥ ꓟꓲ ꓪꓴ‐ꓢ ꓡꓰ ꓣꓳ ꓔꓯ ꓣꓱ ꓠꓬ ꓪꓴ‐ꓢ ꓢꓯꓼ ꓪ ꓗꓪ ꓐꓰ ꓒꓬꓱꓼ ꓡ ꓓꓽ ꓔꓯ ꓟ. ꓖꓶ ꓡ ꓟ ꓥ ꓡꓳ꓿
ꓠꓬꓲ. ꓠꓬꓲ ꓢꓲꓺ ꓒ ꓦꓵꓻ ꓡ ꓝꓲ ꓔꓯ ꓡꓳ. ꓠꓬꓲ ꓔꓬ ꓟ ꓙꓵ, ꓗꓪ ꓣꓳ ꓮ ꓫꓵꓽ ꓬꓰ ꓠꓯ, ꓡ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓠ ꓠ, ꓓꓴ ꓬꓰ ꓡꓯ꓾ ꓣꓳ ꓪꓴ‐ꓢ ꓡꓰ ꓬꓰ ꓝꓲ ꓠꓲ, ꓟ ꓔꓯ ꓣꓳ ꓓꓴꓽ ꓙ ꓝꓲ ꓓꓴ ꓟꓽ ꓙꓳ ꓥ ꓟꓲ ꓪꓴ‐ꓢ ꓔꓯ ꓙꓵꓻ ꓢꓲ ꓠꓬꓲ ꓬꓰ ꓠ ꓟ ꓢꓯꓼ ꓕꓵꓼ ꓡꓯ꓿ ꓟ‐ꓡꓲ ꓡꓰ ꓐꓰ ꓙꓺ ꓣꓳ ꓠꓲ, ꓟ ꓣꓱ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓓꓴ ꓬꓰ ꓡꓯ꓿ ꓪꓴ‐ꓢ ꓖꓶ ꓡ ꓟ ꓣꓳ ꓓꓰ ꓟ ꓣꓱ ꓛꓰ ꓠꓬ ꓢꓲ‐ꓫꓬ‐ꓟ ꓗꓪ ꓪꓴꓽ ꓡꓳ ꓬꓰ ꓟ ꓟꓬꓱꓽ ꓒꓬꓱꓼ ꓡ ꓝꓲˍ ꓟ ꓔꓯ ꓣꓳ ꓙꓵꓻ ꓓꓴ ꓬꓰ ꓡꓯ꓿ ꓫ. ꓟꓳ ꓪ ꓿
