ꓬꓲꓼ ꓤ ꓠꓬꓲ ꓤ ꓐꓴꓳ꓾ꓧꓪ. ꓧꓪꓸꓼ ꓥ ꓡ꓿ ꓕꓱ ꓕꓲ ꓠꓽ ꓟ ꓠꓬ Adventu ꓦꓬꓼ ꓠꓬꓲ ꓠꓬꓲꓽ ꓠꓽ ꓕꓲꓽ ꓠꓽ ꓗꓪ ꓓꓵꓽ ꓡꓺꓳ꓿ ꓟ‐ꓕꓲ ꓕꓳꓽ ꓶ 3ꓽ1‐12 ꓔꓯ ꓣꓳ ꓠ ꓠ, ꓓꓴ ꓥꓳ꓿ ꓟ. ꓟꓲꓽ ꓘꓴꓽ ꓗꓪ ꓠꓬ꓾ ꓡꓲ ꓛꓲ ꓗꓪ ꓚꓳ. ꓬꓲ ꓢꓯꓼ ꓕꓲ ꓢꓯꓼ ꓓꓳ ꓡˍ ꓡꓳ꓿ ꓕꓱ ꓟ ꓠꓬ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓬꓲ ꓢꓯꓼ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓛꓲ ꓡ ꓠ, ꓟ ꓑꓶ. ꓓꓴ ꓟꓴˍ ꓟ ꓪꓽ ꓚꓲ ꓔꓯ ꓱʼ ꓡꓰ ꓝꓲ꓾ ꓖꓳꓼˍ ꓟ ꓙ ꓖꓴ ꓔꓯ ꓫꓬ, ꓔꓱ, ꓗꓷ꓾ ꓐꓰ ꓢꓲ, ꓠꓯ ꓗꓪ ꓔꓬ ꓢꓲ ꓠꓬꓲ ꓡꓲ ꓛꓲ ꓟꓲ ꓗꓪ ꓔꓬ ꓢꓲ ꓠꓬꓲ ꓘꓴꓻ ꓔꓬ ꓟ ꓬꓲ ꓢꓯꓼ ꓕꓲ ꓢꓯꓼ ꓟꓶ ꓔꓬ ꓡꓳ꓿ ꓕꓱ ꓟ ꓚꓱ, ꓔꓯ ꓣꓳ ꓑ ꓙꓽ ꓪˍ ꓡꓳ꓿

ꓣꓳꓽ ꓟꓲ ꓠꓯ ꓕꓱ ꓟ ꓗꓪ ꓬꓲ ꓢꓯꓼ ꓮ ꓟꓬ, ꓙꓳˍ ꓡꓳ꓿ ꓮ ꓟꓶ ꓢꓳꓚꓲꓮꓡ ꓟꓰꓓꓲꓮ ꓦꓬꓼ ꓠꓬꓲ ꓗꓪ ꓪ ꓜꓲ ꓵꓻ ꓖꓴ ꓟꓽ ꓓꓻ ꓠ ꓛꓲ ꓟꓬꓽˍ ꓡꓳ꓿ ꓟꓬ ꓢꓶꓽ ꓒꓴ ꓗꓷˍ ꓟ ꓡꓰ ꓬꓲ ꓢꓯꓼ ꓠꓬ ꓬꓲ ꓫꓬ, ꓬꓲ ꓟꓶꓽ ꓙꓳˍ ꓡꓳ꓿ ꓮ ꓡꓲ ꓟ ꓥˍ ꓟꓲ ꓐꓯ ꓔꓬ ꓫꓵꓽˍ ꓡꓰꓽ ꓥꓳ꓿ ꓠ ꓠ, ꓖꓴ ꓟꓽ ꓓꓻ꓿ ꓙꓲˍ ꓫꓵꓽ ꓙꓳ꓾ ꓟꓽ ꓙꓲꓻ ꓫꓵꓽˍ ꓟꓲ ꓙꓳ꓿ ꓟꓬꓽ ꓠꓬꓲ ꓐꓷ ꓠꓬꓲ ꓟꓽ ꓙꓲꓻ ꓟ ꓟꓬꓽˍ ꓡꓳ꓿ ꓕꓱ ꓡꓱ ꓫꓵꓽ ꓬꓲ ꓢꓯꓼ ꓠꓯꓸꓼ ꓗꓪ ꓣꓳ ꓠꓬ ꓞꓳ ꓙꓳ ꓔꓬ ꓡꓳ꓿ ꓕꓲ ꓖ ꓕꓲ ꓧꓪ, ꓢꓳꓚꓲꓮꓡ ꓟꓰꓓꓲꓮ ꓗꓪ ꓡꓰꓽ ꓟꓽ ꓞꓲ ꓛꓳꓽ ꓒꓯ, ꓛꓳꓽ ꓤ ꓐꓴ ꓔꓬ, ꓗꓪ ꓐꓰ ꓥˍ ꓟꓲ ꓟꓽ ꓙꓲꓻ ꓟ ꓓꓳꓽ ꓬꓲ ꓫꓵꓽ ꓬꓲ ꓙꓰꓽ ꓣꓳ ꓑ ꓙꓽˍ ꓡꓳ꓿

ꓢꓯꓼ ꓕꓱ ꓟꓬ ꓟ ꓠꓯꓸꓼ ꓗꓪ ꓢꓯ. ꓔꓬ ꓟ ꓑꓶ. ꓓꓴ ꓕꓲ ꓖ ꓕꓲ ꓧꓪ, ꓣꓳ ꓠꓬ ꓙꓻ ꓖꓴ ꓪꓴ. ꓡꓰˍ ꓟ꓾ ꓙ ꓖꓴ ꓥꓳꓽ ꓡꓰˍ ꓟ ꓮ ꓟꓬ, ꓙꓳˍ ꓡꓳ꓿ ꓮ ꓡꓲ ꓕꓲ ꓚꓱ, ꓔꓯ ꓢꓲꓺ ꓠ, ꓟ ꓣꓳ ꓟꓽ ꓢꓷ.꓿ ꓮ ꓡꓲ ꓟ ꓔꓯ ꓠ ꓠ, ꓠ, ꓟ ꓣꓳ ꓟꓽ ꓢꓷ.꓿ ꓖꓳ ꓡꓱ ꓠꓬꓲ ꓮ ꓡꓲ ꓢꓯꓼ ꓔꓯ ꓣꓳ ꓢꓲꓺ ꓢꓲ  ꓠ ꓠ, ꓡ꓾ ꓐꓯˍ ꓟ ꓬꓳ. ꓚꓰꓽˍ ꓡꓳ꓿

ꓟ‐ꓕꓲ ꓕꓳꓽ ꓶ 3ꓽ1‐12 ꓗꓪ ꓡꓳ ꓒꓱ ꓗꓪ ꓔꓬ ꓟ ꓞꓳ ꓐꓳ꓾ ꓞꓳ ꓫ. ꓮ ꓙꓵꓽ ꓠꓬ ꓬꓳ‐ꓦ ꓔꓬ, ꓗꓪ ꓡ ꓢꓲ ꓬꓲ ꓔꓯ ꓠ ꓠ, ꓡꓳ꓿ ꓬꓲ ꓐꓯ ꓘꓶꓽ ꓔꓯ ꓠ ꓠ, ꓠꓲ, ꓫꓵˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓬꓲ ꓐꓯ ꓘꓶꓽ ꓠꓬ ꓠꓴꓽ ꓠꓴꓽˍ ꓡꓰꓽ ꓟꓽ ꓥ꓾ ꓗꓳ, ꓗꓳ, ꓡꓰꓽ ꓥ ꓡꓳ꓿ ꓮ. ꓕꓽ ꓪꓴ. ꓒꓲ, ꓡꓰ ꓐꓰ ꓬꓲ ꓪ ꓠꓲ, ꓟ ꓔꓯ ꓗ. ꓬꓯꓼ ꓡꓰ ꓝꓲˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓪ ꓠꓽ ꓟꓽ ꓠꓽ ꓟꓽ ꓠꓽ ꓡˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓠꓬꓲ ꓥ ꓡ꓿ ꓬꓳ‐ꓦ ꓬꓲ ꓐꓯ ꓘꓶꓽ ꓠꓯꓸꓼ ꓗꓪ ꓠꓻ ꓓꓴ ꓙꓳˍ ꓥ ꓟꓲ ꓔꓱ, ꓚꓵˍ ꓟ ꓥ ꓡꓳ꓿ ꓬꓳ‐ꓦ ꓐꓯ ꓘꓶꓽ ꓠꓯꓸꓼ ꓗꓪ ꓗꓳ,ˍ ꓟ꓾ ꓠ. ꓑꓳ ꓗꓪ ꓠ ꓠ, ꓟꓽ ꓢꓻ ꓟ ꓙꓳˍ ꓥ ꓟꓲ ꓬꓲ ꓠꓯꓸꓼ ꓘꓴꓽ ꓗꓪ ꓠꓯꓻ ꓞꓲꓼ ꓓ, ꓡꓳ꓿ ꓠꓵꓻ ꓠꓲ, ꓓ, ꓡꓳ꓿ ꓕꓱ ꓟ ꓔꓯ ꓢꓷ.ˍ ꓟ ꓑꓶ. ꓓꓴ ꓞꓳ ꓟꓳꓽ ꓞꓳ ꓡꓯ. ꓞꓳ ꓐꓳ ꓞꓳ ꓫ. ꓮ ꓙꓵꓽ ꓬꓲ ꓔꓯ ꓡ ꓢꓲ ꓠ ꓠ, ꓡˍ ꓡꓳ꓿ ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓐꓯ ꓘꓶꓽ ꓔꓯ ꓬꓲ ꓪ ꓮ ꓙꓵꓽ ꓘꓳ ꓣꓴˍ ꓡꓳ꓿

ꓖꓳ ꓓꓱꓽ ꓔꓲ, ꓒ ꓬꓳ‐ꓦ ꓠꓬ ꓬꓲ ꓚꓲ. ꓛꓬ ꓡꓰ꓾ ꓥꓪ ꓠꓬ ꓔꓱ, ꓚꓵˍ ꓟ ꓟꓽ ꓥ꓿ ꓔꓱ, ꓚꓵˍ ꓟ ꓠꓬ ꓥꓪ ꓗ ꓠꓯ. ꓢꓲ ꓗꓪ ꓡˍ ꓥꓳ꓿ ꓬꓲ ꓛꓲ ꓠꓲ ꓔꓯ ꓔꓯ, ꓠ, ꓟ ꓡꓰ. ꓥꓪ ꓟꓽ ꓒꓵꓽ꓾ ꓐꓰ ꓐꓯ ꓢꓴˍ ꓟꓲ ꓥ ꓡꓳ꓿ ꓕꓲ ꓚꓱ, ꓐꓯˍ ꓠꓬ The Shadow of the Truth ꓐꓰ ꓐꓯˍ ꓟ ꓔꓱ, ꓚꓵˍ ꓟ ꓬꓲ ꓶꓻ ꓥꓳꓽ ꓕꓲ ꓟ ꓥ ꓡꓳ꓿ ꓬꓳ‐ꓦ ꓬꓲ ꓚꓲ. ꓛꓬ ꓠꓬ ꓔꓱ, ꓚꓵˍ ꓟ ꓟꓽ ꓥ꓿ ꓔꓱ, ꓚꓵˍ ꓟ ꓖꓳ ꓕꓲ ꓣꓳ ꓬꓲ ꓦꓻ ꓐꓬꓱꓽ꓾ ꓕꓲ ꓚꓱ, ꓐꓯˍ ꓠꓬ ꓬꓲ ꓶꓻ ꓥꓳꓽ ꓥ ꓡꓳ꓿ ꓬꓲ ꓶꓻ ꓥꓳꓽ ꓕꓱ ꓘꓶ ꓛꓲ ꓢꓯꓼ ꓙꓳˍ ꓕꓯ ꓠꓽ ꓬꓲ ꓑꓰ, ꓠꓬ ꓮ ꓡꓲ ꓘꓶ ꓛꓲ ꓢꓯꓼ ꓙꓳˍ ꓥ ꓟꓽ ꓢꓷ.꓿ ꓬꓲ ꓦꓻ ꓡꓲ. ꓕꓱ ꓘꓶ ꓛꓲ ꓪꓽ ꓠꓬꓲˍ ꓠꓬ ꓬꓲ ꓑꓰ, ꓠꓽ ꓮ ꓡꓲ ꓟꓬ ꓛꓲ ꓪꓽ ꓠꓬꓲˍ ꓡ꓾ ꓐꓯˍ ꓟ ꓣꓳ ꓓꓵꓽ ꓙꓽ ꓠꓬꓲ ꓓꓴ ꓥ ꓡꓳ꓿

ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓟꓽ ꓟꓶ ꓫꓵˍ ꓕꓯ ꓬꓯꓼ ꓡˍ ꓡꓳ꓿ ꓬꓲ ꓠꓬ ꓚꓵ ꓚꓵ ꓔꓱ, ꓚꓵˍ ꓟ ꓥ ꓡꓳ꓿ ꓬꓳ‐ꓦ ꓕꓯꓽ ꓢꓲ ꓔꓱ, ꓚꓵˍ ꓟ꓾ ꓮ ꓫꓵꓽ ꓡꓲ. ꓔꓯꓺ ꓟꓽ ꓠ ꓗꓪ ꓛꓲ ꓪꓴꓽˍ ꓟ ꓪꓴ‐ꓢ ꓥ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓔꓯ ꓣꓳ ꓟꓽ ꓠ ꓠ, ꓠꓬ ꓮ ꓡꓲ ꓟ ꓔꓯ ꓣꓳ ꓠ ꓠ, ꓡ꓿ ꓡꓳ ꓒꓱ ꓗꓪ ꓔꓬ ꓢꓴ ꓮ ꓙꓵꓽ ꓬꓳ‐ꓦ ꓔꓬ, ꓗꓪ ꓙꓰ ꓔꓬ ꓟ ꓡꓰ ꓐꓰ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓔꓱ, ꓚꓵˍ ꓟ ꓬꓲ ꓢꓯꓼ ꓠꓯꓸꓼ ꓗꓪ ꓣꓳ ꓠ ꓠ, ꓡꓯ꓿

ꓟꓲ ꓠꓯ ꓕꓱ ꓟ ꓗꓪ ꓠ ꓠ, ꓓꓴ ꓬꓲ ꓫꓵꓽ ꓬꓲ ꓙꓰꓽ ꓮ ꓟꓬ, ꓟ ꓠꓯꓸꓼ ꓗꓪ ꓣꓳ ꓢꓲꓺ ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓣꓳ ꓠꓲ, ꓟ ꓠꓯꓸꓼ ꓗꓪ ꓗꓶ ꓡꓯ꓿ ꓟꓬꓽ ꓠꓬꓲ ꓐꓷ, ꓠꓬꓲ ꓮ ꓟꓶ ꓮꓓꓦꓰꓠꓔꓴ ꓦꓬꓼ ꓠꓬꓲ ꓗꓪ ꓪꓴ‐ꓢ ꓐꓯ ꓘꓶꓽ ꓔꓯ ꓟꓽ ꓠꓽ ꓠꓽ ꓠ ꓠ, ꓡꓯ꓿ ꓣꓳ ꓠꓲ, ꓟ ꓠꓯꓸꓼ ꓗꓪ ꓬꓲ ꓔꓯ ꓔꓬ, ꓖꓴ ꓖꓶ ꓡꓯ꓿ ꓮ ꓡꓲꓳ ꓐꓯˍ ꓠꓬ ꓔꓱ, ꓚꓵˍ ꓟ ꓶꓻ ꓥꓳꓽ꓾ ꓬꓲ ꓦ꓾ ꓬꓲ ꓛ ꓗꓴ. ꓡꓲ. ꓕꓱ ꓘꓶ ꓛꓲ ꓢꓯꓼ ꓙꓳˍ ꓠꓬ ꓚꓵ ꓚꓵ ꓢꓯꓼ ꓟꓬ ꓖꓶ ꓐ ꓡˍ ꓟ ꓐꓯ ꓘꓶꓽ ꓥ ꓟ ꓢꓲ ꓒ ꓬꓰ‐ꓢꓴ ꓬꓲ ꓐꓯ ꓘꓶꓽ ꓠꓬ ꓮ ꓡꓲ ꓟꓬ ꓛꓲ ꓢꓯꓼ ꓙꓳˍ ꓡ ꓐꓯˍ ꓟ ꓣꓳꓽ ꓙꓵꓻ ꓠ ꓗ, ꓡꓳ꓿

ꓟꓲ ꓠꓯ ꓕꓱ ꓟ ꓗꓪ ꓬꓲ ꓢꓯꓼ ꓬꓲ ꓫꓵꓽ ꓬꓲ ꓙꓰꓽ ꓙꓳˍ ꓟ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓣꓳ ꓠ ꓠ, ꓡꓯ꓿ ꓪꓴ‐ꓢ ꓐꓯ ꓘꓶꓽ ꓠꓯꓸꓼ ꓘꓴꓽ ꓗꓪ ꓕꓲ ꓖ ꓕꓲ ꓧꓪ, ꓠꓬ ꓣꓳ ꓔꓯ ꓮ. ꓕꓽ ꓡꓰ ꓐꓰ ꓗ. ꓡˍ ꓥꓳ꓿ ꓕꓲ ꓖ ꓕꓲ ꓧꓪ, ꓣꓳ ꓔꓯ ꓮ. ꓔꓳˍ ꓡꓰ ꓐꓰ ꓛꓴꓻ ꓡˍ ꓥꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓕꓱ ꓟ ꓠꓯꓸꓼ ꓘꓴꓽ ꓗꓪ ꓢꓲ ꓡꓲ ꓟ ꓙꓳˍ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓠꓯꓸꓼ ꓗꓪ ꓣꓳ ꓔꓯ ꓠꓲ, ꓟ ꓔꓽ ꓪꓴꓽ ꓡꓰ ꓝꓲˍ ꓟ꓾ ꓠꓲ, ꓟ ꓢꓲ ꓡꓲ ꓡꓰ ꓝꓲˍ ꓟ ꓢꓯꓼ ꓪ ꓙꓳˍ ꓡꓳ꓿ ꓪꓴ‐ꓢ ꓐꓯ ꓘꓶꓽ ꓠꓯꓸꓼ ꓘꓴꓽ ꓗꓪ ꓣꓳ ꓔꓯ ꓟꓲ ꓕꓯ ꓢꓲ ꓙꓰˍ ꓟ ꓦꓬꓼ ꓠꓬꓲ ꓗꓪ ꓢꓯꓼ ꓪ ꓖꓶ ꓠ, ꓟ ꓐꓱ ꓶ ꓖꓶ ꓐ ꓡˍ ꓟ ꓢꓯꓼ ꓪ ꓖꓳ ꓗꓪ ꓓꓯ,ˍ ꓡꓳ꓿ ꓬꓲ ꓠꓬ ꓪꓽ ꓠꓬꓲˍ ꓡꓳ꓾ ꓬꓲ ꓠꓬ ꓣꓳ ꓪꓴ‐ꓢ ꓥ ꓡꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓐꓴꓳ꓾ ꓮ ꓟꓶ ꓮꓓꓦꓰꓠꓔꓴ ꓦꓬꓼ ꓠꓬꓲ ꓮꓓꓦꓰꓠꓔꓴ ꓐꓯˍ ꓟ ꓬꓲ. ꓬꓲ ꓢꓲ ꓕꓲ ꓡꓰ, ꓟꓽ ꓟꓶ ꓫꓵ ꓕꓯ ꓘ‐ꓣꓲ‐ꓢ‐ꓟꓮ ꓑꓮꓲꓽ ꓗꓪ ꓛꓲ ꓡˍ ꓟ ꓢꓲ ꓒ ꓬꓰ‐ꓢꓴ ꓔꓯ ꓒꓵꓽ ꓒꓵꓽˍ ꓐꓰ ꓘꓳ ꓣꓴ ꓟꓶ ꓠ, ꓟ ꓐꓱ ꓶ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓬꓲ ꓦꓲ ꓫꓬ, ꓖꓶ ꓡꓯ꓿ ꓢꓲꓽ ꓫꓬ ꓦꓲ ꓫꓬ, ꓖꓶ ꓡꓯ꓿ ꓬꓲ ꓔꓬ, ꓡˍ ꓥꓳ꓾ ꓬꓲ ꓛꓲ ꓡˍ ꓥꓳ꓿ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓚꓲ. ꓛꓬ ꓦꓲ ꓗꓪ ꓘ‐ꓣꓲ‐ꓢ‐ꓟꓮ ꓦꓬꓼ ꓠꓬꓲ ꓗꓪ ꓘ‐ꓣꓲ‐ꓢ‐ꓟꓮ ꓦꓬꓼ ꓠꓬꓲ ꓔꓯ ꓫꓬ, ꓟ ꓡꓰ ꓐꓰ꓾ ꓮ. ꓔꓳ. ꓡꓰ ꓘ‐ꓣꓲ‐ꓢ‐ꓟꓮ ꓢꓲ, ꓜꓲ ꓔꓯ ꓐꓲꓻ ꓐꓲꓻ ꓡꓰꓽ ꓫꓬ, ꓟ ꓡꓰ ꓐꓰ ꓣꓳ ꓠꓲ, ꓟ ꓠꓯꓸꓼ ꓗꓪ ꓥˍ ꓟꓲ ꓐꓲꓻ ꓐꓲꓻ ꓡꓰꓽ ꓫꓬ, ꓢꓲ ꓠꓬꓲ ꓢꓲ ꓒ ꓬꓰ‐ꓢꓴ ꓔꓯ ꓘꓳ ꓣꓴ ꓡꓯ꓿