ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓹꓼ꓿ ꓠꓬꓲ. ꓠꓬꓲ ꓠꓬ꓾ ꓪꓴ‐ꓢ ꓦ ꓡꓱ ꓢꓴ ꓐꓯˍ ꓥ ꓟꓲ ꓤꓶꓻ ꓮ ꓟꓬ, ꓐꓬ ꓡꓰ ꓔꓬ ꓡꓳ꓿ ꓖꓳ ꓟ ꓑꓶ. ꓓꓴ ꓠꓬꓲ. ꓠꓬꓲ ꓢꓲ ꓒ ꓬꓰ‐ꓢꓴ ꓠꓬ ꓣꓳ ꓤꓶꓻ ꓔꓯ ꓮ ꓡꓲ ꓫꓵꓽ ꓔꓳ, ꓜꓳꓽ ꓡˍ ꓥˍ ꓟꓲ ꓟꓽ ꓐꓬ ꓡꓰ ꓠ, ꓟ ꓠꓬ ꓣꓳ ꓤꓶꓻ ꓔꓯ ꓡꓳ ꓓꓰ ꓕꓯꓽ ꓢꓲ ꓗꓪ ꓕꓶ ꓕꓶ ꓞ, ꓞ, ꓐꓰ ꓜꓶ ꓔ ꓠ ꓗ, ꓡꓳ꓿ ꓣꓳ ꓤꓶꓻ ꓔꓯ ꓟꓽ ꓐꓱꓽ ꓡꓰ ꓠ, ꓟ ꓣꓳ ꓠꓬ ꓕꓶ ꓞ, ꓟ ꓡꓳ ꓓꓰ ꓑ. ꓕꓯꓽ ꓢꓲ ꓗꓪ ꓠꓴ ꓦꓲꓻ ꓔꓯ꓾ ꓠꓴ ꓤꓶꓻ ꓔꓯ ꓫꓬ, ꓔ ꓠ ꓗ, ꓡꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓕꓵꓼ ꓪ ꓖꓶ ꓡˍ ꓟ ꓐꓯ ꓘꓶꓽ ꓣꓳ ꓠ ꓠ, ꓓꓴ ꓥꓳ꓿
ꓟ. ꓟꓲꓽ ꓝꓲ. ꓠꓬ (ꓟ‐ꓕꓲ 7ꓽ21,24‐27) ꓥ ꓡꓳ꓿ ꓟ. ꓟꓲꓽ ꓝꓲ. ꓬꓲ ꓕꓲꓽ ꓟꓴꓽ ꓗꓪ ꓢꓲ ꓒ ꓬꓰ‐ꓢꓴ ꓠꓬ ꓬꓲ ꓛꓳꓽ ꓒꓯ, ꓐꓴ ꓔꓯ ꓕꓱ ꓡꓱ ꓐꓯˍ ꓡꓳ꓿ “ꓢꓲꓺ ꓒꓽꓳ ꓢꓲꓺ ꓒꓽꓳ ꓐꓰ ꓘꓴ ꓢꓴ ꓥ ꓕ ꓑꓳꓸꓼ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓪ ꓟꓽ ꓓꓻ꓿ ꓐ, ꓐ ꓠꓲ, ꓡꓶꓽ ꓔꓯ ꓛꓳꓻ ꓢꓴˍ ꓡꓰꓽ ꓟꓴ ꓗꓪ ꓗꓴꓷꓼ ꓗꓪ ꓓꓵꓽ ꓡꓰ ꓪ ꓓ, ꓡꓳ꓿” ꓕꓱ ꓟˍ ꓡꓰꓽ ꓟꓽ ꓞꓲꓺ ꓢꓲ ꓒ ꓬꓰ‐ꓢꓴ ꓝ. ꓢꓲ ꓠꓬꓲ ꓕꓱ ꓡꓱ ꓐꓯˍ ꓡꓳ꓿ “ꓖꓳ ꓡꓱ ꓠꓬꓲ ꓮꓽ ꓟ ꓥˍ ꓟꓲ ꓥꓪ ꓐꓯ ꓘꓶꓽ ꓕꓱ ꓟꓬ ꓟ ꓑ ꓙꓽ ꓢꓲ ꓛꓳꓻ ꓢꓴ ꓠꓽ ꓡꓳ ꓓꓰ ꓑ. ꓕꓯꓽ ꓢꓲ ꓗꓪ ꓦꓲ ꓫꓬˍ ꓟ ꓙꓽ ꓗꓴ. ꓠꓲ, ꓙꓳ ꓢꓴ ꓕꓲ ꓣꓳˍ ꓡꓰ ꓐꓰ ꓗ, ꓡꓳ꓿ ꓟꓶꓽ ꓦ ꓦ ꓡ꓾ ꓬꓲꓻ ꓙꓬ ꓙꓵꓽ ꓡ꓾ ꓟꓲꓽ ꓦꓲ ꓕꓳꓽ ꓥꓳꓽ ꓙꓱꓼ ꓡ ꓢꓲ ꓖꓳ ꓕꓲ ꓦꓲ ꓗꓪ ꓓꓶꓽ ꓡˍ ꓟꓲ ꓟꓽ ꓐꓱꓽ ꓙꓰ꓿ ꓮ ꓡꓲꓳ ꓐꓯˍ ꓠꓬ ꓬꓲ ꓚꓰ ꓠꓽ ꓡꓳ ꓓꓰ ꓑ. ꓕꓯꓽ ꓢꓲ ꓜꓶ ꓔ ꓟ ꓥ ꓡꓳ꓿ ꓮꓽ ꓟ ꓥˍ ꓟꓲ ꓥꓪ ꓐꓯ ꓘꓶꓽ ꓕꓱ ꓟꓬ ꓟ ꓔꓯ ꓑ ꓙꓽ ꓢꓲ ꓟꓽ ꓛꓳ ꓬꓰ ꓢꓴ ꓠꓽ ꓧꓶꓽ ꓚꓲ ꓕꓯꓽ ꓢꓲ ꓗꓪ ꓦꓲ ꓫꓬ, ꓔ ꓟ ꓔꓯ ꓫꓱ.ˍ ꓡꓳ꓿ ꓟꓲꓽ ꓦꓲ ꓕꓳꓽ ꓶ ꓙꓱꓼ ꓡ꓾ ꓟꓶꓽ ꓦ ꓡꓲ ꓡ꓾ ꓬꓲ ꓙꓬ ꓙꓵꓽ ꓡˍ ꓠꓬ ꓖꓳ ꓟ ꓠꓬ ꓐꓬ ꓡꓰˍ ꓥꓳ꓾ ꓐꓰ ꓢꓲ ꓒ ꓬꓰ‐ꓢꓴ ꓡꓰ ꓔꓱ, ꓔꓱ, ꓡꓰꓽ ꓐꓯ ꓖꓶ ꓔ ꓟ ꓥ ꓡꓳ꓿
ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓠꓬ ꓣꓳ ꓠꓬ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓑ ꓙꓽ ꓕꓲ ꓖꓼ꓾ ꓪꓴ‐ꓢ ꓔꓯ ꓦ ꓡꓱ ꓔ ꓕꓲ ꓖꓼ ꓣꓳ ꓤꓶꓻ ꓠꓽ ꓟꓽ ꓕꓶ ꓡꓰ꓿ ꓕꓶ ꓞ, ꓟ ꓡꓳ ꓓꓰ ꓑ. ꓕꓯꓽ ꓢꓲ ꓗꓪ ꓔꓶ ꓔ ꓟ ꓣꓳ ꓤꓶꓻ ꓟꓽ ꓥ ꓡꓰ ꓢꓰꓽ꓿ ꓮ ꓡꓰ ꓕꓯ ꓡꓰꓽ ꓣꓳ ꓤꓶꓻ ꓠꓬ ꓕꓶ ꓞ, ꓡ ꓐꓯˍ ꓠꓬ꓾ ꓡꓳ ꓓꓰ ꓑ. ꓕꓯꓽ ꓢꓲ ꓗꓪ ꓜꓶ ꓔ ꓕꓲ ꓠꓬꓲ ꓕꓯ ꓡꓰꓽ ꓣꓳ ꓤꓶꓻ ꓠꓬ ꓕꓶ ꓞ, ꓟ ꓥꓳ꓿ ꓡꓳ ꓓꓰ ꓑ. ꓕꓯꓽ ꓢꓲ ꓗꓪ ꓜꓶ ꓔ ꓟ ꓣꓳ ꓤꓶꓻ ꓠꓬ ꓮ ꓡꓲ ꓫꓵꓽ ꓥ ꓡ ꓐꓯˍ ꓠꓬ꓾ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓑꓽ ꓙ ꓢꓲ ꓛꓳꓻ ꓬꓰ ꓢꓴ꓾ ꓥ ꓡꓳ꓿
ꓖꓳ ꓡꓱ ꓥˍ ꓟꓲ ꓠꓬꓲ. ꓠꓬꓲ ꓣꓳ ꓤꓶꓻ ꓦꓬꓼ ꓠꓬꓲ ꓗꓪ ꓣꓳ ꓡꓳ. ꓠꓬꓲ ꓡꓯ꓿ ꓪꓴ‐ꓢ ꓦ ꓡꓱ ꓢꓴ ꓮ ꓟꓬ, ꓠꓬ ꓕꓲꓽ ꓠꓬꓲ ꓕꓲꓽ ꓠꓬꓲ ꓪꓽ ꓘꓴˍ ꓡꓳ꓿ ꓕꓲꓽ ꓠꓬꓲ ꓕꓲꓽ ꓠꓬꓲ ꓟ. ꓟꓲꓽ ꓵ꓾ ꓕꓲꓽ ꓠꓬꓲ ꓕꓲꓽ ꓠꓬꓲ ꓪꓴ‐ꓢ ꓐꓯ ꓘꓶꓽ ꓔꓯ ꓑ ꓙꓽˍ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓬꓲ ꓪ ꓞ ꓓ, ꓟ ꓠꓬ ꓕꓲꓽ ꓠꓬꓲ ꓡꓰ ꓕꓲꓽ ꓠꓬꓲ ꓟ ꓤꓶꓻ ꓗꓪ ꓔꓱ, ꓔꓱ, ꓚꓵ ꓚꓵ ꓡꓰꓽ ꓛꓳ ꓫꓱꓽˍ ꓟ ꓟꓽ ꓙꓳ꓿ ꓖꓳ ꓟ ꓑꓶ. ꓓꓴ ꓢꓷ.ˍ ꓕꓲꓽ ꓖꓼ ꓟꓽ ꓥ꓿ ꓛꓳꓻ ꓫꓱꓽ ꓢꓴˍ ꓡꓰꓽ ꓢꓲ ꓒ ꓬꓰ‐ꓢꓴ ꓕꓯꓽ ꓢꓲ ꓗꓪ ꓣꓳ ꓤꓶꓻ ꓢꓯ. ꓓ, ꓟ ꓔꓯ ꓫꓱ.ˍ ꓡꓳ꓿ ꓕꓱ ꓟ ꓑꓶ. ꓓꓴ ꓢꓲ ꓒ ꓬꓰ‐ꓢꓴ ꓠꓬ ꓕꓱ ꓡꓱ ꓐꓯˍ ꓡꓳ꓿ “ꓠꓴ ꓪ ꓥꓪ ꓐꓯ ꓘꓶꓽ ꓠ ꓠ, ꓢꓴ ꓠꓬ ꓥꓪ ꓛꓳꓽ ꓒꓯ, ꓥꓳ꓿ ꓥꓪ ꓠꓬ ꓠꓴ ꓪ ꓢꓲꓺ ꓒ ꓥꓳ꓿ ꓠꓴ ꓪ ꓥꓪ ꓕꓯꓽ ꓢꓲ ꓗꓪ ꓫꓬ, ꓔ ꓟ ꓑꓶ. ꓓꓴ ꓠꓴ ꓪ ꓠꓬ ꓮ ꓫꓵꓽ ꓙꓳꓺ ꓟꓽ ꓛꓵ꓿”
ꓖꓳ ꓟ ꓑꓶ. ꓓꓴ ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓠꓬꓲ. ꓠꓬꓲ ꓣꓳ ꓤꓶꓻ ꓠꓯꓸꓼ ꓘꓴꓽ ꓗꓪ ꓠꓬ “ꓢꓲꓺ ꓒꓽꓳ꓾ ꓪꓴ‐ꓢꓺꓳ꓾” ꓘꓴ ꓕꓲ ꓖꓼ ꓣꓳ ꓠꓬ ꓟꓴꓽ ꓗꓪ ꓗꓴꓷꓼ ꓗꓪ ꓟꓽ ꓪ ꓓꓵꓽ ꓡꓰ꓿ ꓐ, ꓐ ꓪꓴ‐ꓢ ꓠꓲ, ꓡꓶꓽ ꓐꓯˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓔꓱ, ꓔꓱ, ꓚꓵ ꓚꓵ ꓐꓰ ꓛꓳꓻ ꓬꓰ ꓢꓴ ꓔꓯˍ ꓡꓰꓽ ꓐꓯˍ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓐ, ꓐ ꓠꓲ, ꓡꓶ ꓛꓳꓻ ꓢꓴˍ ꓡꓰꓽ ꓟꓴꓽ ꓗꓪ ꓗꓴꓷꓼ ꓗꓪ ꓛꓲ ꓬꓰ ꓓ, ꓡꓳ꓾ ꓐꓯˍ ꓟ ꓠꓬ ꓢꓲ ꓒ ꓬꓰ‐ꓢꓴ ꓐꓯ ꓘꓶꓽ ꓔꓯ ꓑ ꓙꓽ ꓢꓲ ꓔꓱ, ꓔꓱ, ꓚꓵ ꓚꓵˍ ꓐꓰ ꓛꓳꓻ ꓢꓴ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓣꓳ ꓮ ꓙꓵꓽ ꓠꓬ ꓑ ꓙꓽ ꓕꓲ ꓖꓼ ꓡꓰꓽ꓾ ꓦ ꓡꓱ ꓔ ꓕꓲ ꓖꓼ ꓕꓽ ꓬꓰ꓿ ꓢꓲꓺ ꓒꓽꓳ ꓢꓲꓺ ꓒꓽꓳ ꓘꓴꓻ ꓕꓲ ꓖꓼ ꓕꓽ ꓬꓰ꓿ ꓫ. ꓙꓵ ꓟꓶ ꓙꓵ ꓓꓴ ꓮ ꓡꓲ ꓔꓳ, ꓜꓳꓽ ꓡˍ ꓥ ꓟꓲ ꓢꓲ ꓒ ꓬꓰ‐ꓢꓴ ꓐꓯ ꓔ ꓟ ꓐꓯ ꓘꓶꓽ ꓔꓯ ꓛꓳꓻ ꓫꓱꓽˍ ꓥꓳ ꓓꓵꓽ ꓙꓽ ꓞꓷ, ꓔ ꓢꓴ ꓣꓳ ꓬꓰˍ ꓥꓳ ꓐꓯˍ ꓠꓬ ꓣꓳ ꓤꓶꓻ ꓠꓬ ꓮ ꓡꓲ ꓗ, ꓥˍ ꓟꓲ ꓟꓽ ꓐꓱꓽ ꓬꓰ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓭ. ꓛꓲ ꓡꓳ ꓓꓰ ꓑ. ꓥ ꓟ ꓢꓲ ꓒ ꓬꓰ‐ꓢꓴ ꓕꓯꓽ ꓢꓲ ꓗꓪ ꓣꓳ ꓦꓲꓻ ꓫꓬ, ꓔ ꓟ ꓑꓶ. ꓓꓴ ꓥ ꓡꓳ꓿
