ꓟꓲ ꓠꓯ ꓞꓳ ꓤ ꓐꓰ ꓢꓷ. ꓠꓲ, ꓚꓴꓽ ꓬꓲ, ꓗꓪ ꓐꓰ ꓫꓬ, ꓔˍ ꓟ ꓙꓼ ꓐꓴ ꓠꓬ ꓕꓲ ꓠꓬꓲ ꓔꓬ ꓕꓲ ꓠꓬꓲ ꓪꓴꓽ ꓟꓴ ꓡ ꓔꓬ ꓡꓳ꓿
ꓞꓳ ꓤ ꓐꓴ ꓢꓯꓼ ꓕꓵꓼˍ ꓟ ꓠꓬ ꓪ ꓜꓲ ꓪꓴꓽ ꓟꓴ ꓡ ꓔꓬ ꓟˍ ꓡꓰ ꓐꓰ ꓶꓻ ꓤ ꓚꓬ ꓢꓲ. ꓐꓴ ꓥˍ ꓟꓲ ꓞꓼ ꓞꓼ ꓬꓲ ꓫꓵꓼ ꓬꓲ ꓫꓵꓼ
ꓐꓰ ꓮ ꓟꓬ, ꓓꓳ ꓡ ꓔꓬ ꓡꓳ꓿ ꓕꓱ ꓡꓱ ꓪꓴꓽ ꓡ ꓟꓴ ꓡ ꓔꓬ ꓟ ꓡꓰ ꓪꓴ‐ꓢ ꓔꓯ ꓖꓶˍ ꓟ ꓬꓲ ꓙꓵ, ꓥˍ ꓟꓲ ꓠꓲ. ꓡꓰ ꓔꓬ
ꓡꓳ꓿ ꓕꓲ ꓠꓬꓲ ꓡꓰ ꓕꓲ ꓠꓬꓲ ꓗꓪ ꓪꓴ‐ꓢ ꓟꓽ ꓚꓬꓼ ꓠꓬ ꓟꓽ ꓓꓻ ꓟ ꓥ ꓡꓳ꓿
ꓬꓰ‐ꓢꓴ ꓬꓲ ꓝꓲ ꓓꓴ ꓫꓵꓽ ꓞꓲ ꓠꓬꓲꓽ ꓣꓳ ꓠꓬ ꓪꓴ‐ꓢ ꓟꓬꓱꓽ ꓬꓰˍ ꓟ ꓗꓪ ꓧꓪ. ꓡꓰ ꓟ ꓠꓬ ꓢꓲ‐ꓫꓬ‐ꓟ‐ꓦ ꓡꓰ ꓙ ꓖꓴ
ꓟ. ꓖꓶˍ ꓟ ꓑꓶ. ꓓꓴ ꓥ ꓡꓳ꓿ ꓬꓲ ꓪ ꓠꓬ ꓪꓴ‐ꓢ ꓟꓬꓱꓽ ꓬꓰ ꓓꓳ ꓡꓰ ꓢꓲ ꓠꓲ, ꓒꓴ ꓒꓴˍ ꓡꓰꓽ ꓬꓲꓼ ꓡˍ ꓡꓳ꓿ ꓢꓲ ꓒ
ꓬꓰ‐ꓢꓴ ꓥˍ ꓟꓲ ꓢꓲ‐ꓫꓬ‐ꓟ‐ꓦ ꓡꓰ ꓐꓲ ꓞ, ꓢꓲ ꓮ ꓘꓶ. ꓗ, ꓛꓲ ꓢꓲ꓾ ꓪꓴ‐ꓢ ꓔꓯ ꓫ. ꓟꓳˍ ꓡꓳ꓿ ꓮ ꓡꓲꓳ ꓐꓯˍ ꓠꓬ
ꓢꓲ‐ꓫꓬ‐ꓟ‐ꓦ ꓗꓪ ꓐꓰ ꓢꓷ. ꓠꓲ, ꓙꓳ ꓢꓴ ꓐꓰ ꓙꓽ ꓜꓲꓼ ꓢꓴ ꓔꓯˍ ꓐꓰ ꓚꓵ ꓔ ꓟ ꓔꓯ ꓟꓽ ꓢꓷ. ꓢꓴ ꓔꓯ ꓟꓳ. ꓖꓶˍ ꓟ
ꓑꓶ. ꓓꓴ ꓥ ꓡꓳ꓿
ꓣꓳ ꓥˍ ꓟꓲ ꓣꓳ ꓕꓲ ꓠꓬꓲ ꓕꓲ ꓠꓬꓲ ꓞꓳ ꓙꓳ ꓔꓬ ꓟ ꓗꓪ ꓢꓲ‐ꓫꓬ‐ꓟ‐ꓦ ꓔꓯ ꓘꓴ ꓠ ꓗ, ꓡꓳ꓿ ꓚꓲ. ꓛꓬ ꓮ ꓡꓲ ꓟꓬ ꓛꓲ ꓢꓷ.
ꓠꓲ, ꓙꓳˍ ꓐꓯˍ ꓥ ꓟꓲ꓾ ꓮ ꓘꓶ ꓛꓲ ꓒꓴ ꓫꓵ ꓙꓳˍ ꓐꓯˍ ꓥ ꓟꓲ꓾ ꓢꓲ‐ꓫꓬ‐ꓟ‐ꓦ ꓬꓲ ꓠꓬꓲ ꓙ ꓖꓶˍ ꓟ ꓠꓯꓸꓼ ꓗꓪ ꓞꓳ ꓫꓱꓽ
ꓟꓽ ꓐ ꓡ ꓥꓳ ꓐꓯˍ ꓠꓬ ꓪꓴ‐ꓢ ꓣꓱꓽ ꓛꓰꓽ ꓔꓯ ꓮ ꓟꓬ, ꓟ ꓪ ꓟꓽ ꓓꓻ ꓟ ꓥ ꓡꓳ꓿ ꓮ ꓙꓵꓽ ꓔꓯ ꓖꓶ ꓐ ꓡˍ ꓟ ꓠꓬ ꓪꓴ‐ꓢ
ꓕꓲ ꓣꓳˍ ꓡꓰꓽ ꓥ ꓡꓳ꓿
ꓪꓴ‐ꓢ ꓔꓯ ꓧꓪ ꓢꓴ ꓠꓬ ꓮ ꓫꓵꓽ ꓔꓯ ꓥˍ ꓟꓲ ꓟꓶˍ ꓟ ꓥ ꓡꓳ꓿ ꓢꓲ‐ꓫꓬ‐ꓟ‐ꓦ ꓠꓯꓸꓼ ꓗꓪ ꓞꓳ ꓙꓳ ꓢꓯ. ꓔꓬ ꓢꓴ ꓠꓬ
ꓪꓴ‐ꓢ ꓣꓱꓽ ꓛꓰꓽ ꓘꓳ ꓣꓴ ꓟꓶ ꓢꓲ꓾ ꓣꓱꓽ ꓛꓰꓽ ꓐꓲ ꓞ, ꓢꓴ ꓠꓬ ꓚꓲ. ꓛꓬ ꓢꓷ. ꓔ ꓟ ꓢꓷ. ꓠꓲ,꓾ ꓚꓲ. ꓛꓬ ꓧꓪ ꓔ ꓟ ꓐꓳ
ꓶ ꓐꓰ ꓪꓴ‐ꓢ ꓐꓰ ꓞꓳ ꓤ ꓔꓯ ꓣꓱꓽ ꓙ ꓐ ꓡˍ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓙꓲ‐ꓢꓴ ꓢꓲ ꓤ ꓤꓶꓻ ꓬꓲ ꓝꓳ, ꓟꓶ ꓠꓬ
ꓢꓲ‐ꓫꓬ‐ꓟ‐ꓦ ꓙ ꓖꓴ ꓟ. ꓖꓶˍ ꓟ ꓠꓯꓸꓼ ꓗꓪ ꓞꓳ ꓙꓳ ꓔꓬ ꓟ ꓥ ꓡꓳ꓿
