ꓠꓲ, ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓲꓽ ꓫꓬ ꓑ ꓑ ꓠꓬ ꓬꓰ‐ꓢꓴ ꓬꓲ ꓫꓵꓽ ꓬꓲ ꓧꓪꓽ ꓥ ꓡꓳ꓿ ꓢꓲꓽ ꓫꓬ ꓑ ꓑ ꓗꓪ ꓢꓲ ꓒ
ꓬꓰ‐ꓢꓴ ꓚꓵ ꓚꓵ ꓔꓬ ꓡꓳ ꓐꓯˍ ꓟ ꓔꓯ ꓣꓳ ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓡꓰ ꓙꓵꓻ ꓔꓬ ꓡꓳ꓿ ꓢꓲꓽ ꓫꓬ ꓑ ꓑ ꓠꓬ ꓔꓯꓺ ꓐꓬꓱꓽ
ꓕꓲ ꓟˍ ꓡꓰꓽ ꓟꓽ ꓥ꓿ ꓢꓲ ꓒ ꓬꓰ‐ꓢꓴ ꓚꓵ ꓚꓵ ꓙꓳ ꓔꓬ ꓟ ꓥ ꓡꓳ꓿ ꓖꓳ ꓟ ꓑꓶ. ꓓꓴ ꓢꓲꓽ ꓫꓬ ꓖꓳ ꓓꓱꓽ ꓔꓯ ꓘꓳ ꓣꓴˍ ꓕ
ꓑꓳꓸꓼ ꓪꓴ‐ꓢ ꓐꓰ ꓣꓳ ꓠꓬ ꓕꓲ ꓠꓲ, ꓕꓲ ꓪ ꓗꓷ ꓡꓰˍ ꓡꓳ꓿ ꓢꓲꓽ ꓫꓬ ꓑ ꓑ ꓗꓪ ꓢꓲ ꓒ ꓬꓰ‐ꓢꓴ ꓔꓬ ꓟ ꓑꓶ. ꓓꓴ ꓢꓲꓽ ꓫꓬ ꓖꓳ
ꓓꓱꓽ ꓢ‐ꓗ‐ꓣ‐ꓟꓯ,‐ꓔꓴ ꓟꓲꓽ ꓙꓬ ꓗꓪ ꓛꓲ ꓬꓰˍ ꓕꓯ ꓣꓳ ꓠꓬ ꓪꓴ. ꓓꓵ ꓕꓱꓼˍ ꓡꓳ꓿ ꓛꓲ ꓝꓲ. ꓖꓶꓽ ꓢꓲ ꓒꓵꓽ ꓗ ꓬꓰˍ ꓡꓳ꓿
ꓪꓴ‐ꓢ ꓠꓬ ꓐꓲ ꓜꓲꓼˍ ꓡꓳ꓿ ꓞꓳ ꓤ ꓠꓬ ꓟꓽ ꓐꓲ ꓜꓲꓼ꓿ ꓣꓱꓽ ꓬꓱꓼ ꓣꓱꓽ ꓞ, ꓓꓴˍ ꓡꓰꓽ ꓐꓲ ꓞ, ꓡꓳ꓿
“ꓥꓪ ꓦꓲꓻ ꓗꓪ ꓢꓲ ꓒ ꓠꓴ ꓓꓵꓽ ꓡˍ ꓟ ꓔꓯ ꓥꓪ ꓘꓳ ꓣꓴ ꓟꓽ ꓒꓵꓽ” ꓐꓰ ꓐꓯˍ ꓟ ꓟꓯꓼ ꓕꓲ ꓦꓬ ꓙꓵꓽ ꓒ ꓬꓲ ꓐꓯ ꓘꓶꓽ ꓠꓬ
ꓪꓴ‐ꓢ ꓬꓲ ꓪꓴꓽ ꓓꓰˍ ꓟ꓾ ꓞꓳ ꓤ ꓟꓽ ꓒꓵꓽ ꓟ ꓔꓯ ꓖꓴ ꓟ. ꓖꓶ ꓔꓬ ꓡꓳ꓿ ꓝꓮꓲ ꓬꓲ ꓡꓰ “ꓖꓳ ꓡꓱ ꓥˍ ꓟꓲ ꓠꓴ ꓐꓯ ꓘꓶꓽ
ꓕꓲ ꓘꓶꓽ ꓐꓯ ꓕꓲ ꓖꓼ ꓥꓪ ꓔꓯ ꓣꓱꓽ ꓙ ꓢꓴ ꓠꓽ ꓓꓻ ꓡꓰˍ ꓥꓳ” ꓐꓰ ꓐꓯˍ ꓟ ꓟꓯꓼ ꓢꓲꓽ ꓒꓽ ꓐꓯ ꓘꓶꓽ ꓠꓬ ꓢꓲ ꓒ ꓬꓰ‐ꓢꓴ ꓔꓯ ꓬꓲ
ꓙꓵꓻˍ ꓟ ꓙꓵꓻ ꓠꓲ,꓾ ꓦ ꓡꓱ ꓐꓳˍ ꓟ ꓪꓴꓽˍ ꓡꓳ ꓐꓯˍ ꓟ ꓔꓯ ꓖꓴ ꓟ. ꓖꓶ ꓔꓬ ꓡꓳ꓿
ꓣꓳ ꓟꓲ ꓠꓯ ꓞꓳ ꓤ ꓐꓴ ꓠꓬ ꓪꓴ‐ꓢ ꓔꓯ ꓣꓱꓽ ꓞ, ꓡꓳ꓿ ꓪꓴ‐ꓢ ꓔꓯ ꓙꓵꓻ ꓢꓲ ꓦ ꓡꓱ ꓐꓳ ꓠ ꓗ, ꓡꓳ꓿ ꓢꓲꓽ ꓫꓬ ꓖꓳ ꓓꓱꓽ
ꓔꓯ ꓘꓳ ꓣꓴˍ ꓟ ꓗꓪ ꓐꓰ ꓪꓴ‐ꓢ ꓐꓰ ꓕꓲ ꓠꓲ, ꓕꓲ ꓪ ꓒꓬꓱꓼ ꓡꓰ ꓠ ꓗ, ꓡꓳ꓿
ꓢꓲꓽ ꓫꓬ ꓢꓴ Carlo Acutis ꓡꓰ “ꓢꓲꓽ ꓫꓬ ꓑ ꓑ ꓠꓬ ꓘꓳ ꓣꓴ ꓢꓴ ꓥ ꓕ ꓑꓳꓸꓼ ꓠꓬ ꓦꓲꓻ ꓕꓲ ꓦꓲꓻ ꓔꓯ ꓫꓬ, ꓜꓶ ꓔꓬ ꓢꓴ ꓔꓯ
ꓫꓱ.ˍ ꓡꓳ꓿ ꓦꓲꓻ ꓖꓳ ꓟ ꓠꓯꓸꓼ ꓗꓪ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓪꓽ ꓬꓲ ꓤꓶꓻ ꓔꓯ ꓞꓳ ꓙꓳ ꓢꓯ. ꓔꓬ ꓢꓴ ꓥ ꓡꓳ꓿” ꓐꓰ ꓐꓯ ꓔˍ
ꓡꓳ꓿
