ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓕꓱ ꓕꓲ ꓠꓽ ꓟ ꓠꓬ Advent ꓐꓰ ꓐꓯˍ ꓟ ꓢꓲ ꓒ ꓦꓬꓼ ꓠꓬꓲ ꓥ ꓡꓳ꓿ Advent ꓐꓰ ꓐꓯˍ ꓟ ꓛꓲ ꓡ ꓠ ꓔˍ ꓟ꓾ ꓟꓽ ꓟꓶ ꓫꓵˍ ꓕꓯ ꓛꓲ ꓡˍ ꓟ ꓐꓯˍ ꓟ ꓬꓲ. ꓬꓲ ꓢꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓟꓲ ꓠꓯ ꓗꓪ ꓛꓲ ꓡˍ ꓟ ꓘ‐ꓣꓲ‐ꓢ‐ꓟꓮꓢ ꓑꓮꓲꓽ ꓔꓯ ꓙꓽ ꓖꓶˍ ꓟ꓾ ꓟꓽ ꓛꓲ ꓟꓽ ꓡꓯꓼ ꓡꓰ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓬꓲ ꓔꓬ, ꓖꓴ ꓬꓲ ꓔꓶ. ꓫꓬ, ꓖꓶˍ ꓟ ꓙꓵ, ꓔꓯ ꓬꓰ ꓪꓴ. ꓔꓴˍ ꓟ ꓢ. ꓠꓯ ꓠꓽ ꓦꓬꓼ ꓠꓬꓲ ꓥ ꓡꓳ꓿ ꓢꓲ ꓒ ꓬꓰ‐ꓢꓴ ꓛꓲ ꓡˍ ꓕꓯ ꓬꓲ ꓒꓬꓱꓽ ꓟꓳꓻ ꓡˍ ꓕꓯ ꓣꓳ ꓠꓲ, ꓟ ꓠꓯꓸꓼ ꓘꓴꓽ ꓗꓪ ꓣꓳ ꓦꓲꓻ ꓘꓴꓽ ꓗꓪ ꓒꓵꓽ ꓒꓵꓽ ꓡꓰꓽ ꓘꓳ, ꓣꓴ ꓐ ꓡ ꓠ, ꓟ ꓐꓱ ꓶ ꓢ. ꓠꓯ ꓗꓪ ꓚꓳ. ꓗ‐ꓔꓳ‐ꓡꓲꓗ ꓘꓴ ꓜꓲꓼ ꓞꓳ ꓐꓴ ꓠꓬ ꓪꓽ ꓘꓴˍ ꓟ ꓗꓪ ꓐꓰ ꓥˍ ꓟꓲ꓾ ꓬꓰˍ ꓟ ꓟꓬꓱ ꓗꓪ ꓐꓰ ꓥˍ ꓟꓲ ꓪꓴ. ꓔꓴˍ ꓟ ꓕꓲ ꓠꓬꓲ ꓥ ꓡꓳ꓿
ꓥ ꓡꓳ꓾ ꓣꓳ ꓠꓬ ꓕꓲ ꓠꓬꓲ ꓕꓲ ꓠꓬꓲ ꓢꓲ ꓒ ꓬꓰ‐ꓢꓴ ꓐꓰ ꓕꓲ ꓡꓰ, ꓔꓬ ꓡꓳ꓿ ꓖꓳ ꓡꓱ ꓐꓯˍ ꓥ ꓟꓲ ꓘ‐ꓣꓲ‐ꓢ‐ꓟꓮꓢ ꓦꓬꓼ ꓠꓬꓲ ꓣꓳ ꓪ ꓜꓲ ꓢꓲ ꓒ ꓬꓰ‐ꓢꓴ ꓔꓯ ꓜꓳꓽ ꓜꓳꓽ ꓐꓰ ꓘꓳ, ꓣꓴ ꓠ, ꓟ ꓐꓱ ꓶ ꓣꓳ ꓢꓯꓼ ꓕꓵꓼ ꓔꓬ ꓟ ꓥ ꓡꓳ꓿ ꓢ. ꓠꓯ ꓣꓳ ꓵꓻ ꓠ, ꓟ ꓢꓲꓽ ꓫꓬ ꓕꓳꓽ ꓶ ꓬꓲ ꓪꓴ. ꓕꓲ ꓕꓱ ꓗꓪ ꓬꓲ‐ꓢ‐ꓬ ꓕꓳꓽ ꓶ 2ꓽ1‐5 ꓗꓪ ꓣꓳ ꓔꓯ ꓢꓯꓼ ꓖꓶ ꓔ ꓟ ꓙꓳˍ ꓡꓳ꓿ ꓥꓳ ꓡꓳ. ꓢꓲ ꓢꓯ. ꓔꓬ ꓠ, ꓟ꓾ ꓥꓳ ꓡꓳ. ꓓꓴ ꓙꓳ ꓠ, ꓟ꓾ ꓟꓵꓽ ꓘꓳꓼ ꓦꓬꓼ ꓠꓬꓲ ꓮ ꓡꓲ ꓘꓶ ꓛꓲ ꓫ. ꓥˍ ꓟꓲ ꓥꓳ ꓡꓳ. ꓓꓴ ꓕꓱ ꓟ ꓮ ꓕꓯ ꓥˍ ꓟꓲ ꓟꓽ ꓟꓶ ꓡꓰ ꓝꓲ ꓠ, ꓟ ꓣꓳ ꓔꓯ ꓢꓯꓼ ꓖꓶ ꓔ ꓡꓳ꓿ ꓢꓯꓼ ꓖꓶ ꓘꓶꓽ ꓕꓱ ꓟ ꓠꓬ ꓮ ꓟꓶ ꓦꓬꓼ ꓠꓬꓲ ꓟꓬꓽ ꓠꓬꓲ ꓣꓳ ꓗꓴꓷꓼ ꓘꓴꓽ ꓗꓪ ꓮ ꓘꓶ. ꓣꓱꓽ ꓬꓯꓼˍ ꓟ ꓢꓯꓼ ꓪ ꓟꓶˍ ꓟ ꓚꓱ, ꓕꓲ ꓚꓱ, ꓥ ꓡꓳ꓿
ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓮ ꓟꓶ ꓣꓳ ꓦꓬꓼ ꓠꓬꓲ ꓗꓪ ꓣꓳ ꓟꓬ‐ꓟ ꓗꓴꓷꓼ ꓗꓪ ꓢꓰꓼ ꓡꓯ ꓘꓳ ꓔꓬ ꓟ ꓓꓶꓽ ꓡꓯ ꓘꓳ ꓔꓬ ꓟ꓾ ꓫ. ꓢꓴ ꓟꓷꓼ ꓢꓴ ꓜꓴ ꓥꓴꓻ ꓔꓬ ꓟ ꓕꓱ ꓡꓱ ꓫꓵꓽ ꓚꓱ, ꓔꓯ ꓣꓳ ꓡꓳ. ꓟꓳꓻ ꓪˍ ꓡꓳ꓿ ꓖꓳ ꓡꓱ ꓠꓬꓲ ꓣꓳ ꓠꓬ ꓮ ꓡꓲ ꓗꓪ ꓡꓳ. ꓠꓬꓲˍ ꓥ ꓟꓲ ꓠꓲ, ꓟ ꓫ. ꓓꓴˍ ꓡꓰꓽ꓾ ꓥꓳ ꓡꓳ. ꓓꓴ ꓟꓽ ꓙꓳ ꓟ ꓫꓱ. ꓫꓱ. ꓡꓰꓽ ꓪꓴ‐ꓢ ꓐꓯˍ ꓟ ꓮ ꓡꓲ ꓗꓪ ꓔꓬ ꓡ꓾ ꓪꓴ‐ꓢ ꓐꓯ ꓘꓶꓽ ꓠꓬ ꓮ ꓡꓲ ꓗꓪ ꓙꓰ ꓗꓷ ꓡ ꓐꓯˍ ꓟ ꓚꓱ, ꓔꓯ ꓓꓵꓽ ꓙ ꓠꓬꓲ ꓗꓴ.ˍ ꓟ ꓦꓬꓼ ꓠꓬꓲ ꓔꓳ, ꓜꓳꓽ ꓔꓬ ꓟ ꓥ ꓡꓳ꓿
ꓪꓴ‐ꓢ ꓐꓯ ꓘꓶꓽ ꓠꓬ ꓣꓳ ꓔꓯ ꓬꓲ‐ꓢ‐ꓬ ꓕꓳꓽ ꓶ ꓗꓪ ꓐꓰ ꓥꓳ ꓡꓳ. ꓓꓴ ꓙꓳ ꓠ, ꓟ ꓐꓱ ꓶ ꓣꓳ ꓔꓯ ꓢꓯꓼ ꓖꓶ ꓔ ꓟ ꓥ ꓡꓳ꓿ ꓣꓳ ꓕꓱ ꓟ ꓔꓯ ꓮ ꓔꓲ. ꓤ ꓓꓴ. ꓓꓴ. ꓤ ꓠ ꓠ, ꓓꓴ ꓬꓰ ꓡꓯ꓿ ꓬꓲ‐ꓢ‐ꓬ ꓕꓳꓽ ꓶ 2ꓽ2‐4 ꓗꓪ꓾ ꓡꓳ, ꓬꓰˍ ꓟ ꓦꓬꓼ ꓠꓬꓲ ꓗꓪ ꓪꓴ‐ꓢ ꓬꓲ ꓪꓽ ꓚꓲ ꓠꓬ ꓪꓽ ꓙꓵꓽ ꓪꓴ. ꓓꓵ ꓗꓪ ꓔꓶ ꓕꓶ ꓡꓰ ꓢꓲ꓾ ꓠꓱ. ꓐꓯ ꓪꓽ ꓚꓲ ꓢꓶ. ꓟꓽ ꓞꓲ ꓓꓳ, ꓟꓴ ꓔ ꓟ ꓒꓬꓱꓼ ꓡ ꓢꓲ ꓠꓬꓲ꓾ ꓞꓳ ꓫꓵꓽ ꓥ ꓕ ꓑꓳ ꓠꓬ ꓪꓽ ꓚꓲ ꓖꓳ ꓟ ꓗꓪ ꓜꓲꓼ ꓡˍ ꓥꓳ꓿ ꓖꓳ ꓡꓱ ꓢꓲ ꓞꓳ ꓫꓵꓽ ꓞꓳ ꓙꓰꓽ ꓐꓴ ꓠꓬ꓾ ꓪꓴ‐ꓢ ꓡꓰ ꓣꓳ ꓔꓯ ꓬꓲ ꓚꓱ, ꓟ. ꓖꓶ ꓡ ꓠ, ꓟˍ ꓐꓰ ꓬꓲ ꓙ ꓖꓴ ꓐꓯ ꓖꓶ ꓡ ꓠ, ꓟ꓾ ꓣꓳ ꓠꓬ ꓪꓴ‐ꓢ ꓪꓽ ꓚꓲ ꓗꓪ ꓓꓯ ꓙꓰ ꓡꓯ꓿ ꓬ‐ꓗꓴ ꓬꓲ ꓪꓴ‐ꓢ ꓦꓲ ꓗꓪ ꓙꓰ ꓡꓯ꓿ ꓮ ꓡꓲꓳ ꓐꓯˍ ꓠꓬ ꓜꓲ‐ꓬꓴ ꓗꓪ ꓐꓰ ꓙꓵꓽ ꓗ ꓟ. ꓒꓬꓱ ꓙꓰˍ ꓥꓳ꓿ ꓙꓱ‐ꓣꓴ‐ꓢ‐ꓡꓱ ꓗꓪ ꓐꓰ ꓪꓴ‐ꓢ ꓐꓯ ꓘꓶꓽ ꓐꓯ ꓓꓳ ꓙꓰˍ ꓥꓳ꓾ ꓐꓰ ꓐꓯˍ ꓥꓳ꓿ ꓬꓲ ꓡꓰ ꓞꓳ ꓫꓵꓽ ꓐꓴ ꓐꓯ ꓟꓴ ꓫꓬ, ꓖꓶ ꓢꓲ꓾ ꓞꓳ ꓙꓰꓽ ꓐꓴ ꓓꓲꓽ ꓟꓴꓻ ꓐꓯ ꓞꓷ,ˍ ꓥꓳ꓿ ꓬꓲ ꓪ ꓮ ꓕꓽ ꓪꓴ. ꓒꓲ, ꓠꓬ ꓡꓽ ꓘꓶꓽ ꓓꓶꓽˍ ꓥꓳ꓿ ꓬꓲ ꓪ ꓐꓽ ꓥꓷ,ˍ ꓟꓲ ꓟꓳ. ꓞꓳ, ꓓꓶꓽˍ ꓥꓳ꓿ ꓖꓳ ꓡꓱ ꓢꓲ ꓞꓳ ꓫꓵꓽ ꓞꓳ ꓙꓰꓽ ꓢꓰꓼ ꓡꓯ ꓘꓳˍ ꓟ ꓟꓽ ꓙꓳ ꓗꓷ ꓡꓰˍ ꓥꓳ꓿ ꓟꓯꓼ ꓓꓶꓽ ꓡꓯ ꓘꓳ ꓠ, ꓟ ꓟˍ ꓟꓲ ꓬꓲ ꓪ ꓝꓮꓲ ꓟꓽ ꓢꓳꓺꓳ꓿ ꓢꓲꓽ ꓫꓬ ꓕꓳꓽ ꓶ ꓕꓱ ꓟ ꓔꓯ ꓡꓳ. ꓠꓬꓲˍ ꓕꓯ ꓣꓳ ꓐꓱ ꓶ ꓠꓬ ꓥꓳ ꓡꓳ. ꓓꓴ ꓙꓳˍ ꓡꓳ꓿ ꓣꓳ ꓐꓱ ꓶ ꓠꓬ ꓠꓲ, ꓟ ꓘꓴꓽ ꓠꓯꓸꓼ ꓗꓪ ꓔꓽ ꓪꓴꓽ ꓓꓴ ꓢꓯꓼ ꓦ ꓓꓴ ꓙꓳˍ ꓡꓳ꓿ ꓮ ꓫꓵꓽ ꓑꓶ. ꓓꓴ ꓥ ꓡ꓿ ꓣꓳ ꓟꓲ ꓠꓯ ꓕꓱ ꓟ ꓗꓪ ꓞꓳ ꓙꓳ ꓔꓬ ꓟ ꓦꓬꓼ ꓠꓬꓲ ꓗꓪ ꓢ. ꓖꓶ ꓢꓰꓼ ꓡꓯ ꓘꓳˍ ꓟ ꓟꓽ ꓙꓳ ꓟ꓾ ꓓꓶꓽ ꓡꓯ ꓘꓳˍ ꓟ ꓟꓽ ꓙꓳ ꓟ ꓕꓱ ꓡꓱ ꓫꓵꓽ ꓗꓴꓷꓼ ꓥ ꓟ ꓕꓲ ꓞꓲꓼ ꓕꓲ ꓑ ꓢꓯꓼ ꓟꓬ ꓙꓳˍ ꓡꓳ ꓐꓯˍ ꓟ ꓪꓴ‐ꓢ ꓣꓳ ꓔꓯ ꓪꓵꓼ ꓘꓶꓽ ꓖꓶ ꓔꓬ ꓡꓳ꓿
