ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪ. ꓧꓪꓸꓼ꓾ ꓠꓬꓲ. ꓠꓬꓲ ꓠꓬ ꓢꓲ ꓒ ꓬꓰ‐ꓢꓴ ꓡꓰ “ꓙꓵꓻ ꓠꓲ, ꓙꓳˍ ꓥ ꓟꓲ ꓪꓴ‐ꓢ ꓔꓯ ꓫ. ꓟꓳ ꓟꓽ ꓗꓴ. ꓢꓴ ꓠꓬ ꓚꓬꓴ. ꓟꓶˍ ꓟ ꓶꓽ ꓤ ꓗꓷ ꓡꓰˍ ꓥꓳ꓿ ꓖꓳ ꓡꓱ ꓥ ꓟꓲ ꓙꓵꓻ ꓠꓲ, ꓙꓳ ꓢꓲ ꓫ. ꓟꓳ ꓗꓴ. ꓢꓴ ꓡꓰꓽ ꓚꓬꓴ.ˍ ꓟ ꓟꓶˍ ꓡꓳ꓿”꓾ ꓐꓰ ꓐꓯ ꓟ. ꓖꓶˍ ꓟ ꓟ. ꓟꓲꓽ ꓝꓲ. ꓥꓳ꓿ ꓟ. ꓟꓲꓽ ꓝꓲ. ꓠꓬ ꓡꓴ‐ꓘ ꓕꓳꓽ ꓶ 17ꓽ11‐19 ꓥꓳ꓿
ꓬꓰ-ꓢꓴ ꓠꓬ ꓙꓱ-ꓣꓴ-ꓢ-ꓡꓱ ꓗꓪ ꓙꓰˍ ꓕꓯ꓾ ꓢ-ꓟ-ꓡꓲˍ ꓐꓰ ꓖ-ꓡꓲ-ꓡꓲ ꓟꓵꓽ ꓠꓬꓲꓽ ꓗꓴꓸ ꓚꓸꓼ ꓗꓪ ꓗꓳꓸ ꓬꓯꓼˍ ꓡꓳ꓿ ꓖꓳ ꓡꓱ ꓢꓲ ꓘꓹ ꓕꓲ ꓘꓹ ꓗꓪ ꓓꓵꓽ ꓙꓰ ꓔꓬ ꓕꓯ꓾ ꓔꓸ ꓟꓼ ꓩꓴ ꓓꓲꓻ ꓢꓴ ꓞꓲ ꓣꓳ ꓬꓲ ꓔꓯ ꓔꓳꓹ ꓜꓳꓽˍ ꓡꓳ꓿ ꓬꓲ ꓪꓽ ꓠꓬ ꓶꓽ ꓤ ꓗꓪ ꓦꓰꓼ ꓞ ꓢꓲ꓾ꓢꓯꓼ ꓓꓽ ꓟ ꓡꓰ꓾ ꓟꓸ ꓒ ꓬꓰ-ꓢꓴꓳ꓾ ꓥꓪ ꓠꓴꓽ ꓔꓯ ꓫꓱꓸ ꓤ ꓡꓯ꓾ ꓐꓯˍ ꓡꓳ꓿
ꓬꓲ ꓪꓽ ꓔꓯ ꓬꓰ-ꓢꓴ ꓡꓳꓸ ꓟꓳꓻ ꓗꓷ ꓠꓬ꓾ ꓬꓲ ꓡꓰ꓾ ꓔꓲ ꓒ ꓐꓴ ꓔꓯ ꓠꓴ ꓪꓽ ꓖꓳ ꓓꓱꓽ ꓟꓳꓸ ꓖꓶ ꓬꓰ꓾ ꓐꓯ ꓖꓶˍ ꓡꓳ꓿ ꓬꓲ ꓪꓽ ꓬꓲ ꓖꓳ ꓡꓱ ꓙꓰ ꓔꓬ ꓕꓯ ꓔꓸ ꓟꓼ ꓩꓴ ꓠꓽ ꓫꓬꓻ ꓡꓰꓳ꓿ ꓬꓲ ꓪꓽ ꓗꓪ ꓟ ꓕꓲ ꓣꓳ ꓠꓬ ꓬꓲ ꓓꓻ ꓡꓰˍ ꓟ ꓔꓯ ꓟꓳꓻˍ ꓕꓯ ꓚꓱꓹ ꓬꓲꓼ ꓡ ꓢꓲ꓾ ꓢꓯꓼ ꓓꓽ ꓟ ꓡꓰ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓢꓲ ꓠꓬꓲ꓾ꓬꓰ-ꓢꓴ ꓟꓲꓽ ꓙꓬ ꓗꓪ ꓟꓳꓼ ꓡꓰ ꓢꓲ ꓬꓲ ꓔꓯ ꓫꓸ ꓟꓳˍ ꓡꓳ꓿ ꓕꓱ ꓕꓲ ꓣꓳ ꓠꓬ ꓢ-ꓟ-ꓡꓲ ꓡꓽ ꓞꓳ ꓥ ꓡꓳ꓿
ꓬꓰ-ꓢꓴ ꓡꓰ꓾ ꓓꓻ ꓡꓰ ꓢꓴ ꓠꓬ ꓞꓲ ꓣꓳ ꓟꓽ ꓥ ꓡ? ꓠꓱꓸ ꓐꓯꓼ ꓗꓴꓸ ꓣꓳ ꓟ ꓮ ꓡꓲ ꓗꓪ ꓙꓰ ꓗꓷ ꓡ꓿ ꓐꓶꓽ ꓞꓳ ꓕꓱ ꓕꓲ ꓣꓳ ꓟꓽ ꓥ ꓠꓬ ꓪꓴ-ꓢ ꓔꓯ ꓟꓬꓱ ꓓꓳꓽ ꓖꓶ ꓠꓹ ꓟ ꓚꓱꓹ ꓬꓲꓼ ꓡ ꓢꓴ ꓟꓽ ꓙꓳ ꓡ꓾ ꓐꓯˍ ꓡꓳ꓿ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓔꓴ ꓢꓲ ꓙꓰ Gꓽ꓿ ꓠꓴ ꓙꓵꓻ ꓠꓲꓹ ꓡꓰ ꓠꓴ ꓔꓯ ꓓꓻ ꓡꓰ ꓝꓲꓳ꓾ ꓐꓯ ꓖꓶˍ ꓡꓳ꓿
