ꓡꓴ-ꓘ=21ꓽ5-11
ꓛꓳꓽ ꓒꓯꓹ ꓐꓴ ꓕꓲ ꓐꓱꓻ ꓠꓬ꓾ ꓢꓲꓽ ꓫꓬ ꓦꓲˍ ꓐꓰ꓾ ꓖꓳ ꓗꓪ ꓮꓽ ꓘꓶꓸ ꓐꓲꓻˍ ꓟ Bꓸ ꓛꓲˍ ꓐꓰ꓾ ꓔꓲ ꓖꓶ ꓡ ꓟ ꓖꓴꓽ ꓙꓴ ꓡꓰ ꓐꓲꓻ ꓫꓴꓽ ꓔ ꓟ ꓔꓯ ꓖꓴ ꓢꓲ ꓫꓸ ꓕꓱ ꓡꓯꓽ ꓘꓳ ꓔꓬ ꓕꓯ꓾ꓬꓰ-ꓢꓴ ꓡꓰ꓾ ꓠꓴ ꓪꓽ ꓡꓳꓸ ꓟꓳꓻˍ ꓟ꓾ ꓕꓱ ꓗꓪ ꓕꓲ ꓟ ꓕꓯꓽ ꓢꓲ ꓕꓲ ꓟ ꓜꓶꓻ ꓔ ꓟ Bꓸ ꓛꓲ ꓠꓬ ꓟꓽ ꓥꓸ ꓦ ꓟ ꓟꓽ ꓙꓳ ꓗꓷ ꓡꓰˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓲ ꓪꓽ ꓬꓲ ꓔꓯ ꓠ ꓠꓬꓲ ꓢꓲ꓾ ꓟꓸ ꓒꓽꓳ꓾ ꓕꓱ ꓟꓬ ꓙꓰꓽ ꓟ ꓮ ꓕꓯꓽ ꓗꓷ ꓡꓰˍ ꓥꓳ ꓪ? ꓕꓱ ꓟꓬ ꓙꓰꓽ ꓛꓲ ꓡꓺˍ ꓐꓯˍ ꓕꓯ ꓮꓸ ꓫꓵ ꓢꓷꓸ ꓡꓰ ꓓꓴ ꓓꓳ ꓡ ꓥꓳ ꓪ?꓾ ꓐꓰ ꓠ ꓠꓬꓲˍ ꓡꓳ꓿
ꓬꓰ-ꓢꓴ ꓡꓰ꓾ ꓢꓴ ꓠꓴ ꓪꓽ ꓔꓯ ꓟꓽ ꓧꓳꓽ ꓪꓴꓸ ꓙꓰ ꓠꓹ ꓟ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓢ ꓖꓪ ꓠꓽ ꓡꓽ ꓞꓳ ꓮꓽ ꓟꓬꓹ ꓥꓪ ꓟꓬꓱ ꓟꓯꓻ ꓢꓲ꓾ ꓥꓪ ꓠꓬ ꓙꓲ-ꓢꓴ ꓥ ꓡꓳ꓾ ꓐꓰ ꓐꓯ ꓡ ꓥꓳ꓿ ꓝꓮꓲ ꓠꓬ ꓦꓬꓼ ꓠꓬꓲ ꓛꓲ ꓡꓺꓳ꓾ ꓐꓯ ꓡ ꓥꓳ꓿ ꓠꓴ ꓪꓽ ꓠꓬ ꓬꓲ ꓪꓽ ꓔꓯ ꓕꓽ ꓛꓳ꓿ ꓢꓰꓼ ꓡꓯꓽ ꓘꓳˍ ꓟ ꓐꓰ ꓢꓴꓺˍ ꓟ ꓓꓳꓽ ꓬꓲ ꓫꓵꓽ ꓬꓲ ꓙꓰ ꓠꓴ ꓪꓽ ꓑ ꓙꓽˍ ꓕꓯ ꓕꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓙꓰ ꓟ ꓠ ꓧꓶꓸ ꓕꓯ ꓡꓰ ꓒꓬꓱꓼ ꓡ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓡꓳꓹ ꓬꓰ ꓝꓲꓸ ꓠꓬ ꓞꓼ ꓐꓰ ꓟꓽ ꓛꓲ ꓡ ꓢꓰ꓾ ꓐꓯˍ ꓡꓳ꓿
ꓝꓮꓲ ꓬꓲ ꓡꓰ꓾ ꓞꓳ ꓫꓵꓽ ꓛꓳꓽ ꓞꓳ ꓫꓵꓽ ꓒꓳꓹ ꓡꓯꓽ ꓘꓳ ꓔꓴ ꓡ ꓥꓳ꓿ ꓗꓴꓷꓼ ꓛꓳ ꓗꓴꓷˍ ꓟꓲ ꓓꓶꓽ ꓡꓯꓽ ꓘꓳ ꓔꓴ ꓡ ꓥꓳ꓿ꓟꓵꓽˍ ꓟꓲ ꓮꓽ ꓘꓶꓸ ꓓꓵꓺ ꓡ ꓥꓳ꓿ ꓕꓲ ꓖ ꓕꓲ ꓔꓳꓸ ꓦꓰꓼ ꓟꓷ ꓘꓳꓼˍ ꓐꓰ ꓠꓻ ꓓꓱꓽˍ ꓟꓲ ꓓꓳ ꓡ ꓥꓳ꓿ ꓝꓮꓲ ꓠꓬ ꓟꓴꓽ ꓗꓪ ꓗꓪ ꓐꓰ ꓟꓬ ꓑꓬꓺ ꓓꓴˍ ꓐꓰ ꓢꓷꓸ ꓡꓰ ꓓꓴ ꓬꓲ ꓓꓽ ꓟ ꓟꓳꓸ ꓖꓶ ꓡ ꓥꓳ꓾ ꓐꓯˍ ꓡꓳ=
ꓕꓱ ꓕꓲ ꓙꓵꓹ ꓗꓪ ꓬꓰ-ꓢꓴ ꓠꓬ ꓡꓯꓼ ꓐꓳ ꓔꓶꓸ ꓓꓴ ꓙ ꓖꓴ ꓫꓱꓽ ꓠꓹ ꓟ꓾ ꓡꓯꓼ ꓐꓳ ꓔꓶꓸ ꓓꓴ ꓕꓯꓽ ꓢꓲ ꓗꓪ ꓢꓯꓼ ꓟꓬ ꓖꓶ ꓠꓹ ꓟ ꓐꓱ ꓶ ꓬꓲ ꓠꓬ ꓙꓱ-ꓣꓴ-ꓢ-ꓡꓱ ꓡꓳ ꓒꓱ ꓗꓪ ꓛꓲ ꓡꓺꓳ= ꓬꓲ ꓟꓬꓱꓽ ꓬꓰ ꓓꓳ ꓡꓰ ꓔꓬꓳ= ꓖꓳ ꓡꓱ ꓥ ꓟꓲ ꓢꓲ ꓒ ꓠꓬ ꓟꓲ ꓠꓯ ꓕꓱ ꓟ ꓗꓪ ꓐꓰ ꓓꓳ ꓙꓰˍ ꓕꓯ꓾ ꓬꓲ ꓟꓽ ꓔꓬ ꓕꓯ ꓫꓸ ꓙꓵ ꓟꓶ ꓙꓵ ꓓꓴ ꓬꓲ ꓫꓵꓽ ꓬꓲ ꓙꓰꓽ꓾ ꓙꓳꓺ ꓓꓴ ꓬꓲ ꓫꓵꓽ ꓬꓲ ꓙꓰꓽ ꓔꓯ ꓔꓳꓹ ꓜꓳꓽ ꓪˍ ꓟ ꓬꓲ ꓝꓲ ꓓꓴ ꓐꓴ ꓔꓯ ꓮ ꓫꓵꓽˍ ꓡꓰꓸ ꓟꓽ ꓙꓽ ꓖꓶ ꓖꓶ ꓐꓰ ꓬꓲ ꓪ ꓔꓯ ꓡꓳ ꓔꓲꓸ ꓬꓰˍ ꓟ ꓟꓽ ꓥ=
ꓝꓲ ꓓꓴ ꓐꓴ ꓔꓳꓹ ꓜꓳꓽ ꓡ ꓠ ꓔˍ ꓟ “ꓥꓪ ꓠꓬ ꓟꓲ-ꓢ-ꓬ ꓥꓳ꓾ ꓥꓪ ꓠꓬ ꓙꓲ-ꓢꓴ ꓥꓳ” ꓐꓰ ꓐꓯ ꓡ ꓢꓴ ꓐꓴ꓾ ꓡꓳꓹ ꓬꓰˍ ꓟ ꓦꓬꓼ ꓠꓬꓲ ꓗꓪ ꓔꓳꓹ ꓜꓳꓽ ꓠ ꓔˍ ꓟ ꓙꓳꓺ ꓓꓴ꓾ ꓘꓶꓻ ꓙꓵˍ ꓟ ꓐꓴ ꓔꓯ ꓧꓶꓸ ꓕꓯ ꓡꓰ ꓐꓯ ꓟꓳꓸ ꓖꓶ ꓗꓷꓳ= ꓮ ꓡꓲ ꓕꓲ ꓫꓵꓽ ꓔꓯ ꓔꓳꓹ ꓜꓳꓽ ꓪˍ ꓥ ꓟꓲ ꓢꓲ ꓒ ꓬꓰ-ꓢꓴ ꓠꓬ ꓬꓲ ꓪ ꓐꓰ ꓕꓲ ꓪˍ ꓔꓬ ꓥꓳ= ꓝꓲ ꓓꓴ ꓐꓴ ꓥˍ ꓟꓲ ꓪꓴ-ꓢ ꓗꓴꓷꓼ ꓟꓸ ꓟꓲꓽ ꓔꓯ ꓞꓳ ꓤ ꓮ ꓟꓬꓹ ꓢꓷꓸ ꓡꓰ ꓝꓲˍ ꓥꓳ꓾ ꓐꓰˍ ꓟꓲ ꓙ ꓟꓳ ꓘꓶꓽ ꓖꓶ ꓔ ꓡꓳ=
ꓢꓲ ꓒ ꓬꓰ-ꓢꓴ ꓫꓸ ꓙꓵ ꓟꓶ ꓙꓵ ꓓꓴ ꓟꓽ ꓘꓳ ꓣꓴ ꓗꓷ ꓢꓰꓽ ꓕꓯ ꓙꓱ-ꓣꓴ-ꓢ-ꓡꓱ ꓗꓪ ꓬꓲ ꓝꓲ ꓓꓴ ꓐꓴ ꓔꓯ ꓐꓯ ꓟꓸ ꓖꓶ ꓗꓷ ꓟ ꓢꓲ ꓒ ꓬꓲ ꓙ ꓟꓳ ꓘꓶꓽ꓾ ꓬꓲ ꓕꓵꓼ ꓪ꓾ ꓬꓲ ꓐꓯ ꓘꓶꓽ ꓐꓴ ꓠꓬ ꓢꓲ ꓒ ꓬꓰ-ꓢꓴ ꓬꓲ ꓐꓬꓱꓼ ꓡꓱꓼ ꓡꓱꓼ ꓐꓰ ꓝꓮꓲ ꓛꓲ ꓡˍ ꓟ ꓔꓯ ꓥꓳ ꓡꓳꓸ ꓢꓲ ꓙꓽ ꓖꓶ ꓔꓬ ꓟ ꓠꓬꓲꓸ ꓠꓬꓲ ꓟ ꓙꓲ-ꓢꓴ ꓢꓲ ꓤ ꓐꓴ ꓥ ꓟ ꓣꓳ ꓮ ꓙꓵꓽ ꓔꓯ ꓥˍ ꓟꓲ ꓐꓯ ꓖꓶ ꓡ ꓔꓬ ꓟ ꓥ ꓡꓳ=
