ꓫ.ˍ ꓟ ꓟꓶꓽ ꓛꓵꓽ ꓟ ꓔꓯ ꓫꓱ. ꓖꓶˍ ꓟ (Reflection)
ꓠꓬꓲ. ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 21ꓽ1‐4 ꓝꓲ. ꓗꓪ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓫ.ˍ ꓟ ꓟꓶꓽ ꓛꓵꓽ ꓟ ꓔꓯ ꓫꓱ. ꓖꓶ ꓟ ꓚꓱ, ꓥ ꓡꓳ꓿ ꓢꓲꓽ ꓫꓬ ꓕꓳ ꓶ ꓗꓪ ꓪꓽ ꓘꓴ ꓦꓲꓻ ꓮ ꓡꓴ ꓒꓴ ꓗꓶ ꓖꓴ ꓗꓪ ꓞꓳ ꓐꓳ ꓐꓴ ꓠꓬ ꓒꓴ ꓗꓶ ꓔꓬ ꓟ ꓔꓯ ꓢꓲꓺ ꓒ ꓬꓰ‐ꓢꓴ ꓡꓳ. ꓟꓳ ꓡꓳ꓿ ꓝꓮꓲ ꓟꓶꓽ ꓛꓵꓽ ꓕꓲ ꓣꓳ ꓥ ꓟꓲ ꓙꓲꓽ ꓒꓬ. ꓠꓬꓲꓽ ꓒꓬ. ꓔꓲ ꓔꓬ ꓟ ꓔꓯ ꓬꓰ‐ꓢꓴ ꓡꓳ. ꓟꓳ ꓗꓷ ꓠꓬ ꓢꓲꓺ ꓒ ꓬꓰ‐ꓢꓴ ꓡꓰ ꓫ. ꓟ ꓟꓶꓽ ꓛꓵꓽ ꓟ ꓕꓱ ꓟ ꓠꓽ ꓮ ꓙꓵꓽ ꓢꓴ ꓟꓬ ꓟꓽ ꓞꓲ ꓔꓲˍ ꓡꓳ꓿
ꓮ ꓡꓲꓳ ꓐꓯ ꓠꓬ ꓠꓱ. ꓐꓯꓼ ꓢꓴ ꓠꓽ ꓣꓱ ꓖꓴ ꓟꓽ ꓓ ꓠ ꓛꓲ ꓙꓳ ꓟ ꓗꓪ ꓐꓯ ꓮ ꓔꓲ. ꓤ ꓡꓰꓽ ꓔꓲ ꓡꓳ꓿ ꓟꓶꓽ ꓛꓵꓽ ꓟ ꓠꓬ ꓚꓲ. ꓛꓬ ꓖꓳ ꓓꓱꓽ ꓦꓵꓻ ꓓꓴ ꓮ ꓙꓵꓽ ꓡꓱ.ꓼ ꓔꓲ ꓗꓷꓳ ꓐꓰ ꓐꓯ ꓖꓶ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓠꓬꓲ. ꓠꓬꓲ ꓣꓳ ꓔꓯ ꓟ. ꓖꓶ ꓔꓬ ꓟ ꓠꓬ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓲ, ꓟ ꓔꓯ ꓡꓳ. ꓔꓬ ꓟ ꓔꓯ ꓟ. ꓖꓶ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓔꓯꓺ ꓥꓳ ꓮ ꓟꓬ, ꓟ. ꓖꓶ ꓗꓷ ꓟ ꓗꓪ ꓐꓰ ꓠꓬꓲ. ꓠꓬꓲ ꓟꓶꓽ ꓛꓵꓼ ꓟ ꓔꓯꓺ ꓥꓳꓽ ꓠꓬ ꓮ ꓘꓶ. ꓙꓲ ꓟ ꓔꓯꓺ ꓥꓳꓽ ꓥ ꓡꓳ꓿ ꓟꓶꓽ ꓛꓵꓽ ꓟ ꓠꓬ ꓬꓲ ꓕꓲ ꓤꓶꓻ ꓡꓱ ꓔꓯ ꓢꓲꓺ ꓒ ꓐꓱ ꓶ ꓔꓲ ꓖꓶ ꓗꓷ ꓟ ꓥ ꓡꓳ꓿ ꓬꓲ ꓠꓯ, ꓗꓪ ꓙꓳ ꓟ ꓔꓯ ꓮ ꓡꓴ ꓔꓲ ꓖꓶ ꓗꓷ ꓟ ꓥ ꓡꓳ꓿
ꓬꓲ ꓠꓬ ꓡ ꓞꓳ ꓡꓳ. ꓟꓳ ꓠ, ꓟ ꓟꓽ ꓥ ꓢꓲꓺ ꓒ ꓔꓯ ꓠꓵꓻ ꓠꓲ, ꓟ ꓪꓴ. ꓠꓬꓲ ꓬꓲ ꓠꓯ, ꓗꓪ ꓙꓳ ꓟ ꓔꓯ ꓔꓲ ꓖꓶ ꓗꓷꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓢꓲꓺ ꓒ ꓬꓰ‐ꓢꓴ ꓠꓬ ꓟꓶꓽ ꓛꓵꓽ ꓠꓲ, ꓟ ꓡꓰ ꓐꓰ ꓣꓳ ꓙꓲꓺ ꓢꓴ ꓢꓲꓺ ꓤ ꓐꓴ ꓔꓯ ꓙꓳ ꓠ, ꓟ ꓟ. ꓖꓶ ꓔ ꓟ ꓥ ꓡꓳ꓿ ꓟꓶꓽ ꓛꓵꓽ ꓟ ꓠꓬ ꓒꓴ ꓫꓵꓺ ꓮ ꓘꓶ. ꓟꓽ ꓙꓳ ꓥ ꓟꓲ ꓪꓴ‐ꓢ ꓔꓯ ꓮ ꓘꓶ. ꓛꓲ ꓙꓵꓻ ꓠꓲ, ꓙꓳ ꓢꓴ ꓥ ꓡꓳ꓿ ꓬꓲ ꓠꓬ ꓪꓴ‐ꓢ ꓬꓲ ꓕꓲ ꓤꓶꓻ ꓡꓱ ꓔꓯ ꓡꓯꓽ ꓙꓱ ꓔ ꓢꓴ ꓥ ꓡꓳ꓿
ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓣꓳ ꓢꓯ. ꓔꓬ ꓟ ꓤꓶꓻ ꓦꓬꓼ ꓠꓬꓲ ꓠꓯ, ꓗꓪ ꓪꓴ‐ꓢ ꓔꓯ ꓡꓰ ꓦꓻ ꓡꓱ ꓔꓬ ꓢꓴ ꓒꓬꓱꓼ ꓔꓬ ꓡ?꓿ ꓝꓮꓲ ꓟꓽ ꓥ ꓠꓬ ꓠꓴ ꓥꓪ ꓠꓬ ꓟꓲ ꓠꓯ ꓒꓴ ꓫꓵꓺ ꓐꓰ ꓙꓵꓽ ꓪ ꓟꓬꓱꓺ ꓓꓳꓽ ꓙꓳ ꓠ, ꓟ ꓐꓱ ꓶ ꓡꓰ ꓬꓰ ꓔꓬ ꓢꓴ ꓒꓬꓱꓼ ꓔꓬ ꓡ ꓣꓳ ꓔꓯ ꓓꓴ ꓙ ꓠ, ꓟ ꓢꓲꓺ ꓒ ꓬꓰ‐ꓢꓴ ꓡꓰ ꓠ ꓠꓬꓲˍ ꓔꓬ ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓟꓶꓽ ꓛꓵꓽ ꓟ ꓡꓰ ꓔꓲ ꓖꓶ ꓟ ꓔꓯ ꓮ ꓙꓵꓽ ꓢꓴ ꓔꓯꓺ ꓢꓲ ꓟꓶꓽ ꓛꓵꓽ ꓟ ꓔꓲ ꓖꓶ ꓟ ꓠꓬ ꓟꓬ ꓡꓳ ꓐꓰ ꓐꓯ ꓖꓶ ꓟ ꓥ ꓡꓳ꓿
ꓪꓴ‐ꓢ ꓔꓲ ꓖꓶ ꓟ ꓡꓯ ꓫꓴꓻ ꓖꓶ ꓟ ꓠꓬ ꓟꓲ ꓠꓯ ꓧꓪꓽ ꓖꓳ ꓓꓱ ꓕꓲ ꓒꓳ, ꓗꓪ ꓐꓰ ꓟꓽ ꓡꓳ. ꓠꓬꓲ ꓪꓴ‐ꓢ ꓠꓬ ꓬꓲ ꓔꓯ ꓮ ꓡꓰ ꓫꓵꓽ ꓠꓲ, ꓟ ꓗꓪ ꓐꓰ ꓔꓲ ꓖꓶ ꓡ? ꓚꓲ. ꓛꓬ ꓢꓯꓼ ꓕꓵꓼ ꓢꓲ ꓠꓬꓲ ꓔꓲ ꓖꓶ ꓡ ꓐꓰ ꓡꓳ. ꓠꓬꓲ ꓢꓴ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓠꓬ ꓪꓴ‐ꓢ ꓟꓬꓱꓽ ꓗꓪ ꓝꓮꓲ ꓙꓲ ꓟ ꓟꓬꓱꓽ ꓗꓪ ꓣꓳ ꓠꓯ, ꓗꓪ ꓙꓳ ꓟ ꓬꓲ ꓙꓵ,꓾ ꓣꓳ ꓢꓷ. ꓔ ꓢꓷ. ꓠꓲ, ꓐꓰ ꓒꓴ ꓫꓵ ꓔꓯ ꓚꓲ. ꓛꓬ ꓐꓱ ꓶ ꓟꓽ ꓡꓳ ꓪꓴ‐ꓢ ꓐꓱ ꓶ ꓔꓲ ꓖꓶ ꓢꓴ ꓒꓬꓱꓼ ꓔꓬ ꓡ ꓐꓰ ꓠ ꓠꓬꓲ ꓓꓴ ꓙꓳ ꓟ ꓥ ꓡꓳ꓿ ꓖꓳ ꓡꓱ ꓥ ꓟ ꓪꓴ. ꓠꓬꓲ ꓣꓳ ꓒ ꓕꓲ ꓗꓪ ꓔꓬ ꓢꓴ ꓐꓴ ꓣꓱ ꓬꓯꓼ ꓣꓱ ꓞ ꓔꓬ ꓢꓴ ꓐꓴ ꓔꓯ ꓒ ꓡ ꓟ ꓕꓲ ꓒꓳ, ꓗꓪ ꓐꓰ ꓬꓰ ꓙ ꓓꓴ ꓬꓰ ꓡꓯ꓿ ꓟꓶꓽ ꓛꓵꓽ ꓟ ꓡꓰ ꓐꓰ ꓠꓲ, ꓟ ꓙꓳ ꓢꓲ ꓠꓬꓲ ꓙꓲ ꓟ ꓟꓬꓱꓽ ꓗꓪ ꓬꓰ ꓙ ꓔꓳ, ꓙ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
