ꓪ ꓔꓲ ꓬꓰ‐ꓢꓴ ꓑꓮꓲꓽ (Sunday reflection) ꓧꓪ. ꓧꓪ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (ꓪ ꓔꓲ ꓢꓲꓺ ꓒ ꓬꓰ‐ꓢꓴ) ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 23ꓽ35‐43 ꓝꓲ. ꓗꓪ ꓛꓲ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓠꓬ ꓪ ꓔꓲ ꓥ ꓟ ꓚꓱ, ꓔꓯ ꓡꓳ. ꓟꓳ ꓓ ꓟ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓢꓲꓺ ꓒ ꓬꓰ‐ꓢꓴ ꓔꓯ ꓪ ꓔꓲ ꓐꓰ ꓟꓬꓱꓺ ꓓꓳꓽ ꓖꓶ ꓟ ꓑꓮꓲꓽ ꓦꓬꓼ ꓠꓬꓲ ꓥ ꓡꓳ꓿ ꓚꓬꓴ ꓢꓲꓺ ꓒ ꓬꓰ‐ꓢꓴ ꓠꓬ ꓪ ꓔꓲ ꓐꓰ ꓟꓬꓱꓺ ꓓꓳꓽ ꓖꓶ ꓥ ꓟꓲ ꓬꓲ ꓠꓬ ꓟꓲ ꓠꓯ ꓗꓪ ꓟ ꓪ ꓔꓲ ꓟꓽ ꓥ ꓬꓲ ꓠꓬ ꓟꓴ ꓗꓪ ꓗꓴꓷꓼ ꓗꓪ ꓟ ꓪ ꓔꓲ ꓥ ꓡꓳ꓿
ꓬꓲ ꓠꓬ ꓣꓳ ꓟꓲ ꓠꓯ ꓡ ꓞꓳ ꓔꓯ ꓝꓴꓲ. ꓗꓪ ꓐꓰ ꓚꓬꓴ ꓙ ꓢꓴ ꓥ ꓢꓲ ꓠꓬꓲ ꓫꓵꓻ ꓗꓪ ꓛꓲ ꓬꓲ ꓠꓬ ꓣꓳ ꓔꓯ ꓠꓲ, ꓠꓵ ꓢꓴ ꓟꓲ ꓥ ꓡꓳ꓿ ꓬꓲ ꓠꓬ ꓣꓳ ꓔꓯ ꓕꓲ ꓞꓲ ꓕꓲ ꓑ ꓢꓯꓼ ꓟꓬ ꓔꓯ ꓟꓲ ꓖꓶ ꓐ ꓡ ꓢꓴ ꓥ ꓡꓳ꓿ ꓪ ꓔꓲ ꓢꓲꓺ ꓒ ꓬꓰ‐ꓢꓴ ꓠꓬ ꓟꓲ ꓠꓯ ꓗꓪ ꓟ ꓪ ꓔꓲ ꓟꓽ ꓥ꓿ ꓬꓲ ꓠꓬ ꓟꓴ ꓗꓪ ꓐꓰ ꓟꓲ ꓠꓯ ꓔꓯ ꓗꓪ ꓫꓵˍ ꓢꓴ ꓪ ꓔꓲ ꓥ ꓡꓳ꓿ ꓬꓲ ꓠꓬ ꓟꓲ ꓠꓯ ꓢꓲ ꓡꓲ ꓟ ꓔꓯ ꓖꓶ ꓐ ꓡ ꓢꓴ ꓝꓮꓲ ꓠꓴꓻ ꓠꓲ, ꓢꓲꓺ ꓒ ꓪ ꓔꓲ ꓥ ꓡꓳ꓿ ꓐꓰ ꓝꓲ ꓓꓴ ꓒꓳ‐ꓡꓳ ꓡꓰ ꓗꓳ‐ꓡꓳ‐ꓫꓲ ꓙꓲ‐ꓢꓴ ꓢꓲꓺ ꓤ ꓐꓴ ꓠꓯ, ꓗꓪ ꓐꓳ ꓔ ꓟ 1ꓽ13‐20 ꓝꓲ. ꓗꓪ ꓡꓳ. ꓟꓳ ꓓꓽ ꓟ ꓥ ꓡꓳ꓿ ꓬꓲ ꓠꓬ ꓣꓳ ꓔꓯ ꓠꓯ ꓞꓲ, ꓟ ꓙꓵ, ꓗꓪ ꓐꓰ ꓣꓳ ꓔꓯ ꓚꓬꓴ ꓓꓳ ꓡ ꓢꓲ꓾ ꓬꓲ ꓠꓲ, ꓠꓵ ꓟ ꓮ ꓐꓲ ꓬꓲ ꓗꓴꓷꓼ ꓗꓪ ꓧꓳꓽ ꓓꓵꓽ ꓡꓰ ꓢꓲ ꓠꓬꓲ ꓙꓲ‐ꓢꓴ ꓠꓯ, ꓗꓪ ꓫꓴ, ꓣꓴˍ ꓟ ꓐꓰ ꓝꓴꓲ ꓖꓽ ꓖꓶ ꓟ ꓟꓶ ꓡꓰ ꓝꓲꓳ꓿
ꓬꓰ‐ꓢꓴ ꓠꓬ ꓟꓳꓻ ꓟꓽ ꓓ ꓟ ꓪꓴ‐ꓢ ꓬꓲ ꓒꓬꓱꓽ ꓥ ꓢꓲ꓾ꓬꓲ ꓠꓬ ꓮ ꓫꓵꓽ ꓟꓲ ꓟꓽ ꓚꓰꓼ ꓔ ꓢꓰꓼ ꓕꓯ ꓡꓰ ꓙꓳ ꓔꓬ ꓢꓴ ꓥ ꓢꓲ ꓠꓬꓲ ꓚꓰꓼ ꓔ ꓟ ꓮ ꓙꓵꓽ ꓬꓲ ꓪꓴ. ꓓꓵ ꓥ ꓡꓳ꓿ ꓪꓴ‐ꓢ ꓠꓬ ꓙꓲ‐ꓢꓴ ꓗꓪ ꓐꓰ ꓙꓳˍ ꓟ ꓥ ꓕ ꓑꓳ. ꓔꓯ ꓬꓲ ꓚꓲ. ꓛꓬ ꓐꓰ ꓧꓳ, ꓡꓰ ꓙꓲꓳ꓿ꓟꓲ ꓠꓯ ꓕꓯꓽ ꓢꓲ ꓗꓪ ꓥ ꓟꓲ ꓟꓴ ꓗꓪ ꓕꓯꓽ ꓢꓲ ꓗꓪ ꓟ ꓥꓟꓲ ꓙꓳˍ ꓟ ꓮ ꓙꓵꓽ ꓥ ꓕ ꓑꓳ. ꓔꓯ ꓡꓯꓼ ꓐꓳ ꓔꓶ. ꓓꓴ ꓗꓪ ꓧꓳ. ꓡꓰ ꓟ ꓬꓰ‐ꓢꓴ ꓫꓵꓽ ꓗꓪ ꓐꓰ ꓪꓴ‐ꓢ ꓬꓲ ꓚꓲ. ꓛꓬ ꓐꓰ ꓧꓳ, ꓡꓰ ꓝꓲꓳ꓿ ꓟꓲ ꓠꓯ ꓗꓴꓷꓼ ꓗꓪ ꓪ ꓔꓲ ꓐꓴ ꓐꓰ ꓪ ꓔꓲ ꓢꓲꓺ ꓒ ꓬꓰ‐ꓢꓴ ꓠꓬ ꓮ ꓫꓵꓽ ꓟꓽ ꓪ ꓡꓯꓽ ꓘꓳ, ꓡ? ꓟꓲ ꓠꓯ ꓪ ꓔꓲ ꓐꓴ ꓠꓬ ꓙꓵꓽ ꓪ ꓡꓰ ꓗꓴꓷꓼ ꓔꓯ ꓙꓵꓽ ꓢꓴ ꓥ ꓡꓳ꓿ ꓝꓮꓲ ꓬꓲ ꓠꓬ ꓗꓴꓷꓼ ꓔꓯ ꓙꓵꓽ ꓪ ꓡꓰ ꓙꓵꓽ ꓢꓴ ꓥ ꓡꓳ꓿
ꓟꓲ ꓠꓯ ꓪ ꓔꓲ ꓐꓴ ꓠꓬ ꓒꓴ ꓫꓵꓺ ꓐꓰ ꓔꓬ ꓖꓴ ꓦꓲꓻ ꓙꓲ ꓙꓲ ꓗꓪ ꓡꓰ ꓔꓬ ꓢꓴ ꓥ ꓡꓳ꓿ ꓗꓴꓷꓼ ꓗꓪ ꓔꓬ ꓟ ꓑ ꓫꓬ ꓐꓴ ꓠꓬ ꓬꓲ ꓪ ꓢꓯꓼ ꓟꓬ ꓖꓶ ꓢꓲ ꓠꓬꓲ ꓪ ꓔꓲ ꓔꓯ ꓗꓽ ꓕꓽ ꓖꓶ ꓟ ꓥ ꓡꓳ꓿ ꓖꓳ ꓡꓱ ꓥ ꓟꓲ ꓪ ꓔꓲ ꓬꓰ‐ꓢꓴ ꓠꓬ ꓟꓲ ꓠꓯ ꓪ ꓔꓲ ꓐꓴ ꓡꓰ ꓐꓰ ꓟꓽ ꓫꓱ, ꓟꓽ ꓪ ꓟ ꓥ ꓡꓳ꓿ ꓪ ꓔꓲ ꓬꓰ‐ꓢꓴ ꓠꓬ ꓠꓵꓻ ꓠꓲ, ꓡꓰ ꓙꓵꓽ ꓢꓴ ꓥ ꓡꓳ꓿ ꓬꓲ ꓪꓴꓽ ꓓꓵ ꓗꓪ ꓛꓴꓽ ꓪꓴ. ꓛꓴꓽ ꓔꓯ ꓘꓳ ꓢꓲ ꓔꓬ ꓡꓳ꓿ ꓟꓲ ꓠꓯ ꓗꓪ ꓢꓯ. ꓔꓬ ꓗꓷ ꓟ ꓙꓵ, ꓕꓯ ꓥ ꓟꓲ ꓫ. ꓫ. ꓡꓰ ꓔꓬ ꓢꓴ ꓥ ꓡꓳ꓿
ꓪ ꓔꓲ ꓬꓰ‐ꓢꓴ ꓠꓬ ꓬꓲ ꓗ. ꓠꓯ ꓢꓲ ꓛꓳꓽ ꓢꓴ ꓐꓴ ꓐꓱ ꓶ ꓬꓲ ꓢꓯꓼ ꓟꓬ ꓔꓯ ꓖꓶ ꓗꓷ ꓗꓪ ꓛꓲ ꓠꓲ, ꓠꓵ ꓢꓴ ꓥ ꓡꓳ꓿ ꓠꓬꓲ. ꓠꓬꓲ ꓣꓳ ꓡꓳ. ꓟꓳ ꓶꓼ ꓓꓳ ꓫꓱ, ꓓꓳ ꓗꓪ ꓢꓲꓺ ꓒ ꓬꓰ‐ꓢꓴ ꓔꓯ ꓡꓯꓼ ꓐꓳ ꓔꓶ. ꓓꓴ ꓗꓪ ꓕꓯꓼ ꓔꓶ.ˍ ꓟ ꓙꓵ, ꓕꓯ ꓬꓲ ꓒ ꓕꓲꓲ ꓗꓪ ꓞꓳ ꓘꓴ ꓠꓬꓲꓽ ꓣꓳ ꓔꓯ ꓡꓳ. ꓟꓳ ꓪ ꓟ ꓥ ꓡꓳ꓿ ꓞꓳ ꓘꓴꓽ ꓠꓬꓲ ꓣꓳ ꓠꓬ ꓕꓲ ꓣꓳ ꓐꓰ ꓕꓲ ꓣꓳ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓟꓳ ꓟꓽ ꓫꓱ, ꓡꓯꓽ ꓘꓳ ꓟꓽ ꓪ ꓡꓯꓽ ꓘꓳ, ꓟ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓟꓲ ꓠꓯ ꓕꓲ ꓒꓳ, ꓗꓪ ꓐꓰ ꓡꓳ. ꓠꓬꓲ ꓠꓬ ꓞꓳ ꓘꓴꓽ ꓞꓳ ꓠꓯ, ꓐꓰ ꓡꓳ. ꓟꓳ ꓟ ꓥ ꓡꓳ꓿ ꓣꓳ ꓡꓱ ꓥ ꓟꓲ ꓞꓳ ꓘꓴꓽ ꓠꓬ ꓦꓻ ꓟꓬ ꓢꓷ ꓗꓪ ꓐꓰ ꓬꓰ‐ꓢꓴ ꓔꓯ ꓡꓳ. ꓠꓬꓲ ꓠꓬ ꓪꓴ‐ꓢ ꓐꓰ ꓡꓳ. ꓟꓳ ꓟ ꓥ ꓡꓳ꓿
ꓢꓲꓺ ꓒ ꓬꓰ‐ꓢꓴ ꓔꓯ ꓬꓰ‐ꓢꓴꓽꓳ ꓠꓴ ꓗꓴꓷꓼ ꓟꓶ ꓡꓰ ꓢꓲ ꓬꓯꓼ ꓡ ꓕꓯ ꓥꓪ ꓔꓯ ꓕꓽ ꓟꓲ ꓡꓰ ꓝꓲ ꓐꓯ ꓡꓳ꓿ ꓬꓰ‐ꓢꓴ ꓡꓰ ꓠꓴ ꓔꓯ ꓥꓪ ꓔꓱ, ꓔꓱ, ꓐꓯ ꓖꓶ ꓠꓬꓲ꓾ ꓠꓬꓲ. ꓠꓬꓲ ꓠꓴ ꓠꓬ ꓥꓪ ꓐꓰ ꓕꓲꓽ ꓪ ꓒ‐ꓣ‐ꓓꓲ ꓟꓴ ꓗꓪ ꓗꓴꓷꓼ ꓗꓪ ꓔꓬ ꓥꓳ ꓐꓰ ꓐꓯ ꓖꓶ ꓡꓳ꓿ ꓠꓬꓲ. ꓠꓬꓲ ꓠꓴ ꓥꓪ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓮ ꓡꓰ ꓕꓲ ꓒꓳ, ꓗꓪ ꓐꓰ ꓙꓵꓻ ꓔꓬ ꓡ? ꓞꓳ ꓘꓴꓽ ꓠꓬꓲꓽ ꓣꓳ ꓟ ꓮ ꓡꓰ ꓕꓲ ꓣꓳ ꓡꓰ ꓐꓰ ꓙꓵꓻ ꓔꓬ ꓡ ꓣꓳ ꓚꓲ. ꓛꓬ ꓔꓯ ꓓꓴ ꓙ ꓠꓬꓲ. ꓡꓯ꓿ ꓢꓲꓺ ꓒ ꓬꓰ‐ꓢꓴ ꓔꓯ ꓣꓳ ꓤꓶꓻ ꓠꓯ, ꓗꓪ ꓙꓵꓽ ꓡ ꓠ, ꓟ ꓘꓴ ꓓꓴ ꓬꓰ ꓡꓯ꓿ ꓢꓲꓺ ꓒ ꓠꓯ, ꓗꓪ ꓡ ꓓꓴ ꓬꓰ ꓡꓯ꓿ ꓫ. ꓟꓳ ꓪ꓿
