ꓬꓲꓼ ꓤ ꓠꓬꓲ ꓤ ꓐꓴꓳ ꓢꓸ ꓠꓯ ꓠꓬ ꓙꓲ-ꓢꓴ ꓪ ꓔꓲꓸ ꓘ-ꓣꓲ-ꓢ-ꓔꓴ ꓪ ꓔꓲꓸ ꓑꓮꓲꓽ ꓥ ꓡꓳ= ꓘꓴ ꓜꓲꓼ ꓞꓳ ꓘꓴꓽ ꓠꓯꓸꓼ ꓗꓪ ꓢꓸ ꓠꓯ ꓠꓬ ꓬꓲ ꓟꓶꓽ ꓡꓳꓹ ꓬꓰˍ ꓕꓲ ꓠꓽ ꓟ ꓥ ꓡꓳ= ꓢꓸ ꓠꓯ ꓕꓲ ꓠꓽ ꓟ ꓖꓴ ꓡꓰ ꓠꓬ ꓡ ꓠꓹ ꓟ ꓕꓲ ꓠꓽ ꓗꓪ ꓮꓓꓦꓰꓠꓔꓴ ꓐꓰ ꓐꓯˍ ꓟ ꓢꓲ ꓒ ꓬꓰ-ꓢꓴ ꓟꓲ ꓠꓯ ꓗꓪ ꓛꓲ ꓡ ꓟ ꓘ-ꓣꓲ-ꓢ-ꓟ ꓑꓮꓲꓽ ꓐꓱ ꓶ ꓙꓽ ꓖꓶˍ ꓟ ꓮꓓꓦꓰꓠꓔꓴ ꓦꓬꓼ ꓠꓬꓲ ꓛꓲ ꓡˍ ꓟ ꓥ ꓡꓳ= ꓢꓸ ꓠꓯ ꓠꓬ ꓙꓲ-ꓢꓴ ꓪ ꓔꓲꓸ ꓑꓮꓲꓽ ꓔꓯ ꓬꓰˍ ꓟ ꓥ ꓡꓳ= ꓑꓮꓲꓽ ꓕꓲ ꓟ ꓔꓯ ꓕꓲ ꓘꓳꓼ ꓡꓱꓸꓼ ꓟ ꓬꓲ ꓟꓶꓽ ꓗꓪ ꓗꓶ ꓔˍ ꓟ ꓠꓬ ꓬꓲꓸ ꓬꓲ ꓢꓲ ꓙꓳˍ ꓡꓳ=

ꓢꓲ ꓒ ꓬꓰ-ꓢꓴ ꓠꓬ ꓪ ꓔꓲꓸ ꓥ ꓡꓳ= ꓪ ꓔꓲꓸ ꓕꓯꓽ ꓢꓲ ꓟ ꓪ ꓔꓲꓸ꓾ ꓮ ꓙꓵꓽ ꓟ ꓕꓯꓽ ꓢꓲ ꓗꓪ ꓟ ꓪ ꓔꓲꓸ ꓥ ꓡꓳ ꓐꓯˍ ꓟ ꓣꓳ ꓔꓯ ꓢꓷꓸ ꓡꓰ ꓝꓲˍ ꓟ ꓐꓰ꓾ ꓣꓳ ꓤꓶꓻ ꓗꓪ ꓚꓵ ꓚꓵ ꓢꓲ ꓒ ꓬꓰ-ꓢꓴ ꓠꓬ ꓣꓳ ꓪ ꓔꓲꓸ ꓥꓳ= ꓬꓲ ꓡꓰ ꓙꓵꓽ ꓞꓹ ꓟ꓾ ꓬꓲ ꓡꓰ ꓚꓰꓹ ꓔ ꓟ ꓬꓲ ꓡꓰ ꓠꓲꓹ ꓫꓵˍ ꓟ ꓔꓯ ꓣꓳ ꓬꓰˍ ꓡꓳ= ꓣꓳ ꓠꓬ ꓬꓲ ꓔꓯ ꓪ ꓔꓲ ꓖꓶ ꓣꓱꓽ ꓔꓬ ꓡ= ꓥ ꓠꓬ ꓣꓳ ꓠꓬ ꓣꓳ ꓚꓲꓸ ꓛꓬ ꓚꓳꓽ ꓚꓲꓸ ꓛꓬ ꓪ ꓔꓲꓸ ꓣꓱꓽ ꓢꓲ ꓢꓲ ꓒ ꓬꓰ-ꓢꓴ ꓔꓯ ꓙꓵꓽ ꓔꓬ ꓡ ꓐꓯˍ ꓟ ꓔꓯ ꓣꓳ ꓓꓵꓽ ꓙꓽ ꓠꓬꓲ ꓓꓴ ꓥ ꓡꓳ= ꓢꓸ ꓠꓯ ꓗꓪ ꓣꓳ ꓠ ꓠꓹ ꓪˍ ꓟ ꓢꓲꓽ ꓫꓬ ꓕꓳꓽ ꓶ ꓠꓬ ꓡꓴ-ꓘ 23ꓽ35-43 ꓥ ꓡꓳ=

ꓑ ꓫꓬꓼ ꓐꓴ ꓠꓬ ꓖꓳ ꓗꓪ ꓦꓰꓼ ꓢꓲ ꓡꓳꓸ ꓔꓬ ꓡꓳ꓿ ꓢꓲꓽ ꓒ ꓐꓴˍ ꓟꓲ ꓬꓲ ꓔꓯ ꓪꓽ ꓫꓱ ꓢꓲ꓾ ꓢꓴ ꓢꓯꓼ ꓟꓬ ꓔꓯ ꓠꓽ ꓬꓲ ꓚꓬꓴˍ ꓡꓳ꓿ ꓬꓲ ꓠꓬ ꓪꓴ-ꓢ ꓡꓰ ꓢꓲ ꓔ ꓟ ꓙꓲ-ꓢꓴ ꓥ ꓐꓷˍ ꓠꓬ ꓬꓲ ꓚꓲꓸ ꓛꓬ ꓢꓯꓼ ꓟꓬ ꓔꓯ ꓚꓬꓴ ꓝꓲ꓾ ꓐꓯˍ ꓡꓳ꓿ ꓟꓯꓼ ꓤ ꓐꓴˍ ꓟꓲ ꓬꓲ ꓔꓯ ꓤꓲꓺ ꓢꓲ꓾ ꓬꓲꓻ ꓚꓱꓺ ꓔꓯꓹ ꓖꓶ ꓡ ꓢꓲ ꓠꓬꓲ꓾ꓠꓴ ꓠꓬ ꓬꓴ-ꓔ ꓡꓽ ꓞꓳ ꓪ ꓔꓲꓸ ꓥ ꓐꓷˍ ꓠꓬ꓾ ꓠꓴ ꓚꓲꓸ ꓛꓬ ꓔꓯ ꓚꓬꓴ ꓟꓴ꓾ ꓐꓯˍ ꓡꓳ꓿

ꓬꓰ-ꓢꓴ ꓡꓯꓼ ꓐꓳ ꓔꓶꓸ ꓓꓴ ꓪꓴꓸ ꓗꓪ ꓕꓳ ꓶ ꓐꓳ ꓢꓲ꓾ ꓕꓱ ꓕꓲ ꓣꓳ ꓠꓬ ꓬꓴ-ꓔ ꓡꓽ ꓞꓳ ꓪ ꓔꓲꓸ ꓥ ꓡꓳ꓾ ꓐꓰ ꓐꓳ ꓔ ꓡꓳ꓿ ꓖꓳ ꓗꓪ ꓥꓳꓺ ꓞꓹ ꓟ ꓛꓬꓻ ꓢꓴ ꓕꓲ ꓣꓳ ꓠꓬ ꓬꓲ ꓔꓯ ꓫꓸ ꓝꓲꓸ ꓢꓲ꓾ ꓠꓴ ꓠꓬ ꓙꓲ-ꓢꓴ ꓟꓽ ꓥ ꓡ? ꓠꓴ ꓚꓲꓸ ꓛꓬˍ ꓐꓰ ꓥꓪ ꓠꓴꓽ ꓔꓯ ꓚꓬꓴ ꓡꓯ ꓟꓴꓽ꓾ ꓐꓯˍ ꓡꓳ꓿ ꓛꓬꓻ ꓢꓴ ꓠꓱꓸ ꓐꓯ ꓕꓲ ꓣꓳ ꓟ ꓠꓬ ꓬꓲ ꓔꓯ ꓕꓼ ꓢꓲ꓾ ꓣꓳꓽ ꓠꓽ ꓛꓬ ꓒꓵꓽ ꓕꓲꓽ ꓡꓰꓹꓼ ꓟꓶ ꓢꓴ ꓥ ꓢꓲ꓾ ꓪꓴ-ꓢ ꓔꓯ ꓠꓴ ꓟꓽ ꓙꓳ ꓡ? ꓣꓳꓽ ꓠꓽ꓾ ꓣꓳꓽ ꓬꓰ ꓗꓷ ꓟ ꓐꓰ ꓕꓲꓽ ꓡꓰꓹꓼ꓾ ꓔꓱꓹ ꓜꓳꓽˍ ꓟ ꓐꓯ ꓟꓴ ꓬꓲ ꓛꓬꓻ ꓒꓵꓽ ꓟꓶ ꓙꓲꓽ ꓙꓳ ꓢꓴ ꓥꓳ꓿

ꓖꓳ ꓡꓱ ꓥ ꓟꓲ ꓡꓽ ꓞꓳ ꓕꓱ ꓕꓲ ꓣꓳ ꓠꓽ ꓟꓽ ꓙꓲ ꓟ ꓮꓸ ꓫꓵˍ ꓟꓲ ꓟꓽ ꓬꓰ ꓠꓬꓲ꓾ ꓐꓯ ꓖꓶˍ ꓡꓳ꓿ꓖꓳ ꓡꓱ ꓢꓲ ꓬꓲ ꓡꓰ꓾ ꓬꓰ-ꓢꓴꓳ꓾ ꓠꓴ ꓪꓽ ꓔꓲ ꓣꓱꓽ ꓡ ꓕꓯ ꓥꓪ ꓔꓯ ꓕꓽ ꓟꓲ ꓡꓰ ꓝꓲ꓾ ꓐꓯˍ ꓡꓳ꓿ ꓖꓳ ꓡꓱ ꓠꓬ ꓬꓰ-ꓢꓴ ꓡꓰ ꓬꓲ ꓔꓯ꓾ ꓠꓴ ꓔꓯ ꓥꓪ ꓔꓱꓹ ꓔꓱꓹꓼ ꓐꓯ ꓖꓶˍ ꓠꓬꓲ꓾ ꓠꓬꓲꓸ ꓠꓬꓲ ꓠꓴ ꓠꓬ ꓥꓪˍ ꓐꓰ ꓕꓲꓽ ꓪꓺꓼ ꓒꓺ-ꓣ-ꓓꓲ ꓗꓪ ꓔꓬ ꓟꓶˍ ꓥꓳ꓾ ꓐꓯˍ ꓡꓳ꓿