ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓘꓴꓽ ꓗꓪ ꓘꓶ ꓫꓵꓼ ꓕꓲ ꓟ ꓒꓬꓱꓼ ꓠꓹ ꓟ꓾ ꓡꓯꓽ ꓒꓯꓹ ꓝꓸ ꓠꓹ ꓟ ꓙꓵꓽ ꓗ ꓮ ꓡꓰ ꓙꓳ_ ꓡ?ꓮ ꓡꓰ ꓫꓵ ꓡ ꓞꓳ ꓠꓬ ꓡꓯꓽ ꓒꓯꓹ ꓝꓸ ꓓ_ ꓡ꓾? ꓘꓶ ꓫꓵꓼ ꓕꓱ ꓟ ꓒꓬꓱꓼ ꓡ ꓠꓹ ꓟ ꓮ ꓡꓰ ꓬꓰ ꓠ ꓔ ꓡ? ꓐꓯ_ ꓟ ꓚꓱꓹ ꓔꓯ ꓠ ꓠꓹ ꓓꓴ ꓬꓰ ꓡꓯ꓾
ꓘꓶ ꓫꓵꓼ ꓕꓲ ꓟ ꓒꓬꓱꓼ ꓠꓹ ꓟ ꓡꓯꓽ ꓒꓯꓹ ꓝꓸ ꓠꓹ ꓟ ꓐꓱ ꓶ ꓬꓲ ꓪꓴꓸ ꓕꓲ ꓫꓵ ꓟ ꓠꓬ꓾ꓡꓯꓽ ꓒꓯꓹ ꓝꓸ ꓠꓹ ꓟ ꓐꓱ ꓶ ꓐ ꓡ ꓟ ꓚꓱꓹ ꓙꓳ ꓠ ꓗꓹ ꓡꓳ꓾ ꓬꓲ ꓢꓷꓸ ꓠꓬ ꓮ ꓫꓵ ꓥ ꓡ ꓐꓯ ꓠꓬ ꓠꓴ ꓔꓯ ꓮꓽ ꓟ ꓕꓲ ꓣꓳ ꓡꓰ ꓠꓬꓲꓸ ꓞꓹ ꓟ ꓟꓽ ꓙꓳ ꓙꓳ꓾ ꓠꓴ ꓠꓲꓹ ꓡꓶꓽ ꓗꓪ ꓐꓰ ꓕꓱ ꓟ ꓔꓯ ꓘꓳꓹ ꓣꓴ ꓟ ꓚꓱꓹ ꓥ ꓡꓳ꓾ ꓠꓴ ꓔꓯ ꓕꓲ ꓣꓳ ꓣꓳ ꓡꓰ ꓩꓴ ꓢꓲ ꓠꓬꓲ ꓡꓯꓽ ꓒꓯꓹ ꓝꓸ ꓔ ꓥꓳ ꓐꓯ ꓠꓬ ꓕꓱ ꓟ ꓠꓬ ꓪꓴ-ꓢ ꓟꓲ ꓕꓯ ꓗꓪ ꓡꓯꓽ ꓒꓯꓹ ꓝꓸ ꓥ ꓐꓯ ꓥ ꓟꓲ ꓡꓯꓽ ꓒꓯꓹ ꓝꓸ ꓟ ꓟꓽ ꓒꓬꓱꓼ ꓡ꓾ ꓠꓴ ꓠꓲꓹ ꓡꓶꓽ ꓟꓽ ꓙꓳ ꓟ ꓑꓶ ꓓꓴ ꓖꓶ ꓟꓽ ꓐ ꓡ ꓟ ꓑꓶ ꓓꓴ ꓕꓱ ꓟ ꓠꓬ ꓘꓶ ꓫꓵꓼ ꓟꓽ ꓒꓬꓱꓼ ꓡ꓾ ꓝꓮꓲ ꓬꓲ ꓞꓲꓼ ꓟꓽ ꓐꓲ_ ꓟ꓾ ꓓꓵ ꓙ ꓟꓽ ꓗꓴꓸ ꓟ ꓕꓲ ꓚꓱꓹ ꓐꓯ ꓠꓬ ꓟꓽ ꓐꓲ ꓓ_ ꓢꓴ ꓞꓳ ꓪꓴꓸ ꓐꓴ ꓞꓳ ꓟꓶ ꓐꓴ ꓕꓱ ꓟ ꓠꓬ ꓮ ꓡꓰ ꓥ ꓟꓲ ꓘꓶ ꓫꓵꓼ ꓫꓬꓹ ꓟꓽ ꓓ꓾ ꓮ ꓫꓵ ꓑꓶ ꓓꓴ ꓐꓯ ꓠꓬ ꓬꓲ ꓮ ꓫꓵ ꓬꓰ ꓔꓬ ꓟ ꓬꓲ ꓟꓽ ꓢꓷꓸ ꓟ ꓑꓶ ꓓꓴ ꓬꓲ ꓪꓴꓸ ꓠꓶꓸ ꓔꓯ ꓬꓲ ꓣꓱꓽ ꓟꓽ ꓐ ꓡ ꓟ ꓑꓶ ꓓꓴ ꓕꓱ ꓟ ꓠꓬ ꓡꓯꓽ ꓒꓯꓹ ꓝꓸ ꓟꓽ ꓓ꓾ꓝꓮꓲ ꓬꓲ ꓞꓲꓼ ꓟꓽ ꓐꓲ ꓢꓴ ꓡꓳ ꓟꓲ ꓟꓵꓽ ꓗꓪ ꓠꓬ 18 ꓘꓳꓼ ꓕꓱ ꓡꓱ ꓐꓰ ꓔꓶ ꓔ ꓡꓳ꓾ ꓠꓱꓸ ꓐꓯꓼ ꓟꓵꓽ ꓗꓪ ꓠꓬ 16 ꓘꓳꓼ ꓕꓱ ꓡꓱ ꓐꓰ ꓥ ꓡꓳ꓾ ꓬꓲ ꓞꓲꓼ ꓟꓽ ꓐꓲ ꓢꓴ ꓔꓯ ꓥ ꓟꓲ ꓡꓯꓽ ꓒꓯꓹ ꓝꓸ ꓖꓶ ꓟꓽ ꓓ꓾ ꓮ ꓫꓵ ꓑꓶ ꓓꓴ ꓥ ꓡ꓾ ꓬꓲ ꓪ ꓠꓬ ꓞꓲꓼ ꓣꓳꓺ ꓓ ꓫꓵ ꓡꓯꓽ ꓒꓯꓹ ꓝꓸ ꓟ ꓕꓱ ꓟ ꓮ ꓫꓵ ꓥ ꓡ꓾ ꓮ ꓡꓰ ꓥ ꓡ ꓐꓯ_ ꓟ ꓬꓲ ꓪ ꓟꓽ ꓢꓷꓸ ꓢꓰ꓾ ꓞꓲꓼ ꓣꓳꓺ ꓢꓴ ꓔꓯ ꓡꓯꓽ ꓒꓯꓹ ꓝꓸ ꓖꓶ_ ꓠꓬ ꓮ ꓡꓰ ꓥ ꓟꓲ ꓘꓶ ꓫꓵꓼ ꓟꓽ ꓒꓬꓱꓼ ꓡ꓾ ꓝꓮꓲ ꓕꓲ ꓟ ꓟ ꓠꓬ ꓬꓲ ꓠꓬ ꓬꓲ ꓟꓷꓽ ꓠꓷꓹ ꓘꓶꓽ ꓗꓪ ꓐꓰ ꓪꓵꓼ ꓘꓶꓽ ꓖꓶ ꓐ ꓡ ꓥ ꓟꓲ ꓬꓲ ꓠꓲꓹ ꓡꓶꓽ ꓔꓯ ꓖꓶ ꓐ ꓡ ꓥ ꓟꓲ ꓬꓲ ꓠꓬ ꓬꓲ ꓠꓲꓹ ꓟ ꓘꓴ ꓠꓯꓼ ꓗꓪ ꓠꓱꓸ ꓐꓯꓼ ꓕꓲ ꓫꓵ ꓟꓳ ꓠꓲꓹ ꓫꓵ_ ꓟ ꓑꓶ ꓓꓴ ꓠꓱꓸ ꓐꓯꓼ ꓐꓱ ꓶ ꓡꓯꓽ ꓒꓯꓹ ꓝꓸ ꓥꓳ ꓐꓯ ꓠꓬ ꓕꓱ ꓟ ꓠꓬ ꓘꓶ ꓫꓵꓼ ꓟꓽ ꓒꓬꓱꓼ ꓡ꓾ ꓐꓰ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓗꓪ ꓙꓵ ꓗ ꓙꓳ ꓟ ꓥꓳ=
ꓔꓯ ꓥꓳꓽ ꓐꓯ ꓠꓬ ꓤ ꓟꓶ ꓕꓲ ꓣꓳ ꓟ ꓤ ꓑꓸ ꓤ ꓔꓯ ꓡꓯꓽ ꓒꓯꓹ ꓝꓸ ꓥꓳ= ꓖꓳ ꓡꓱ ꓥ ꓟꓲ ꓬꓲ ꓠꓬ ꓚꓵ ꓚꓵ ꓠꓲꓹ ꓠꓵ ꓟ ꓟꓽ ꓥ ꓥ꓾ ꓐꓰ ꓬꓲ ꓒꓴ ꓫꓵꓺ ꓔꓯ ꓥꓳ ꓡꓳꓸ ꓢꓲ ꓠꓬꓲ ꓡꓯꓽ ꓒꓯꓹ ꓝꓸ ꓥꓳ ꓐꓯ ꓠꓬ ꓕꓱ ꓟ ꓠꓬ ꓘꓶ ꓫꓵꓼ ꓟꓽ ꓒꓬꓱꓼ ꓡ꓾ ꓮ ꓫꓵ ꓔꓯ ꓥ ꓟꓲ ꓟꓽ ꓥꓳ ꓡꓳꓸ ꓬꓲ ꓔꓯ ꓡꓰ ꓚꓵ ꓚꓵ ꓠꓲꓹ ꓠꓵꓻ ꓢꓲ ꓠꓬꓲ ꓠꓲꓹ ꓡꓶꓽ ꓖꓶ ꓐ ꓡ ꓕꓯ ꓢꓲ ꓙꓲ_ ꓟ ꓧꓹ ꓟ ꓪꓴ-ꓢ ꓟꓲ ꓙꓬ ꓗꓪ ꓘꓶ ꓫꓵꓼ ꓒꓬꓱꓼ ꓡ ꓡꓳ=
ꓬꓲ ꓪ ꓮ ꓫꓵ ꓬꓰ ꓔꓬ ꓡ ꓐꓯ ꓟ ꓬꓲ ꓪ ꓢꓷꓸ ꓠ ꓗꓹ ꓡꓳ꓾ ꓤ ꓑ ꓤ ꓤ ꓟꓶ ꓤ ꓬꓲ ꓪ ꓠꓬꓲ ꓫꓵꓸ ꓡꓯꓽ ꓒꓯꓹ ꓝꓸ ꓕꓯ ꓬꓲ ꓪ ꓠꓬꓲꓽ ꓫꓵꓸ ꓠꓬ ꓕꓲ ꓤꓶꓻ ꓡꓱꓼ ꓕꓲ ꓡꓲꓹ ꓔꓬ ꓥꓳ꓾ꓮ ꓕꓯ ꓥ ꓟꓲ ꓘꓶꓽ ꓟꓽ ꓓ ꓐꓯ_ ꓟ ꓬꓲ ꓪ ꓢꓷꓸ ꓠ ꓗ ꓡꓳ=ꓝꓮꓲ ꓤ ꓦꓵ ꓠꓱ ꓦꓵ ꓡ ꓥꓳ ꓐꓯ_ ꓟ ꓥ ꓟꓲ ꓬꓲ ꓪ ꓓꓵ ꓙ ꓕꓷ ꓠ ꓗꓹ ꓡꓳ=ꓬꓲ ꓔꓶꓻ ꓙꓱꓼ ꓕꓱ ꓟ ꓟꓽ ꓙꓳ ꓐꓯ ꓠꓬ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓠꓯꓼ ꓗꓪ ꓡꓯꓽ ꓒꓯꓹ ꓝꓸ ꓟꓽ ꓓ꓾ ꓖꓳ ꓡꓱ ꓠꓬꓲ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓣꓳ ꓤ ꓫꓵꓸ ꓤ ꓠꓱ ꓔꓯ ꓟꓽ ꓥ ꓠꓬ ꓣꓳ ꓚꓳ ꓡꓳ ꓚꓳ ꓫꓵ ꓗꓪ ꓔꓬ ꓟ ꓔꓯ ꓗ-ꓕꓳ-ꓡꓲꓗ ꓘꓴ ꓜꓲꓼ ꓞꓳ ꓘꓴꓽ ꓠꓯꓼ ꓗꓪ ꓬꓲ ꓚꓺ ꓟꓲꓽ ꓕꓱ ꓡꓱ ꓙꓳ_ ꓡꓳ ꓐꓯ ꓟ ꓔꓯ ꓢꓷꓸ ꓠꓹ ꓟ ꓐꓱ ꓶ ꓐꓯ ꓟꓳꓸ ꓖꓶ ꓡꓯ= ꓘꓴ ꓜꓲꓼ ꓞꓳ ꓘꓴꓽ ꓗꓪ ꓠꓬ ꓘꓶ ꓫꓵꓼ ꓕꓲ ꓟ ꓒꓬꓱꓼ ꓠꓹ ꓟ ꓐꓱ ꓶ ꓠꓬ ꓠꓬꓲ ꓫꓵꓸ ꓠꓲꓹ ꓡꓶꓽ ꓙꓳ ꓠ ꓗ ꓡꓳ= ꓬꓲ ꓪ ꓔꓯ ꓮ ꓡꓰ ꓕꓲ ꓣꓳ ꓡꓰ ꓩꓴ_ ꓟ ꓟꓽ ꓙꓳ ꓾ ꓜꓲ ꓜꓲ ꓑꓲꓹꓑꓲꓹ ꓬꓰ_ ꓟ ꓟꓽ ꓙꓳ ꓙꓳ ꓐꓰ ꓬꓲ ꓪ ꓠꓲꓹ ꓡꓶꓽ ꓙꓳ ꓠ ꓗꓹ ꓡꓳ= ꓠꓱꓸ ꓐꓯꓼ ꓮ ꓫꓵ ꓔꓯ ꓥꓳ ꓡꓳꓸ ꓓꓴ ꓟꓽ ꓙꓳ ꓐꓰ ꓬꓲ ꓪ ꓠꓬꓲ ꓣꓳ ꓠꓵꓻ ꓠꓲꓹ ꓟꓳꓸ ꓡꓯ ꓘꓳ ꓠꓹ ꓟ ꓚꓱꓹ ꓔꓯ ꓠꓲꓹ ꓟ ꓠꓯꓼ ꓘꓴ ꓗꓪ ꓗꓷ ꓔ ꓢꓲ ꓠꓬꓲ ꓪꓴ-ꓢ ꓟꓲ ꓙꓬ ꓗꓪ ꓘꓶ ꓫꓵꓼ ꓕꓲ ꓟ ꓗꓷ ꓠꓹ ꓟ ꓐꓱ ꓶ ꓮ ꓔꓯ ꓟꓲ ꓙ ꓜꓲꓼ ꓢꓲ ꓠꓬꓲ ꓟꓬꓱꓽ ꓬꓰ ꓡꓯ=
