ꓬꓰ‐ꓢꓴ ꓙꓱ‐ꓣꓴ‐ꓢ‐ꓡꓱ ꓗꓪ ꓫꓱꓽ ꓛꓲ ꓬꓰ ꓕꓯ ꓞꓳ ꓜꓴ ꓐꓴ ꓠꓬ ꓪꓴ‐ꓢ ꓗꓴꓷꓼ ꓞꓼ ꓐꓰ ꓓꓳ ꓡ ꓥꓳ꓾ ꓐꓰ ꓓꓵꓽ ꓙ ꓠꓬꓲ ꓬꓰ‐ꓢꓴ ꓡꓰ ꓔꓯ ꓥꓳꓽ ꓕꓲ ꓟ ꓐꓰ ꓟ. ꓖꓶ ꓟ ꓚꓱ, ꓠꓬꓲ. ꓠꓬꓲ ꓢꓲ ꓫꓬ ꓕꓳ ꓶ ꓗꓪ ꓡꓳ. ꓟꓳ ꓪ ꓟ ꓥꓳ꓿
ꓔꓯ ꓥꓳꓽ ꓗꓪ ꓢꓲꓽ ꓒ ꓕꓲ ꓣꓳ ꓠꓬ ꓚꓳ ꓑ. ꓞꓲ ꓣꓳ ꓔꓯ ꓘꓴ ꓢꓲ ꓒꓴ ꓕꓲ ꓣꓳ ꓕꓲ ꓟ‐ꓠ ꓖꓶ_ ꓡꓳ꓾ ꓕꓲ ꓐꓱ ꓚꓳ ꓑ. ꓠꓬ ꓕꓱ ꓟ ꓔꓯ ꓣꓱ ꓢꓲ ꓮ ꓟꓬ, ꓟꓬ ꓡ ꓠ ꓬꓰ_ ꓡꓳ꓾ ꓬꓲ ꓪ ꓢꓯꓼ ꓕꓵꓼ ꓟ ꓑꓶ ꓓꓴ ꓢꓲꓽ ꓒ ꓡꓰ ꓫꓱ. ꓖꓶ_ ꓟ ꓟꓶ_ ꓡꓳ꓾ ꓖꓳ ꓡꓱ ꓥ ꓟꓲ ꓖꓳ ꓗꓪ ꓐꓰ ꓕꓲ ꓣꓳ ꓠꓬ ꓬꓲ ꓪ ꓟ_ ꓟ ꓒꓴ ꓕꓲ ꓟ‐ꓠ ꓔꓯ ꓫ ꓔ ꓢꓲ ꓟꓬ ꓡ ꓠ ꓟꓽ ꓢꓯꓼ ꓕꓵꓼ ꓾ ꓬꓲ ꓠꓬ ꓙꓳꓺ ꓠꓲ, ꓐꓰ ꓮ ꓫꓵ ꓥ ꓟꓲ ꓟꓽ ꓒꓳ, ꓡꓶ. ꓬꓲ ꓔꓯ ꓖꓶ_ ꓟ ꓙꓵ ꓪ ꓔꓯ ꓥ ꓟꓲ ꓟꓽ ꓢꓯꓼ ꓕꓵꓼ ꓟ ꓑꓶ ꓓꓴ ꓙꓵꓽ ꓪ ꓔꓯ ꓥ ꓟꓲ ꓟꓶ ꓡꓰ ꓢꓲ ꓟ ꓥ ꓡꓳ꓿
ꓢꓲ‐ꓒ ꓬꓰ‐ꓢꓴ ꓠꓬ ꓕꓱ ꓔꓯ ꓥꓳꓽ ꓗꓪ ꓐꓰ ꓙꓲ ꓢꓴ ꓢꓲ ꓤ ꓐꓴ ꓔꓯ ꓟ. ꓖꓶ_ ꓟ ꓠꓬ ꓪꓴ‐ꓢ ꓠꓬ ꓣꓳ ꓮ ꓙꓵ ꓔꓯ ꓙꓵ ꓪ ꓕꓲ ꓟ ꓟꓽ ꓥ ꓕꓲ ꓟ ꓖꓶ ꓔ ꓡꓳ꓿ ꓕꓱ ꓟ ꓔꓯ ꓟꓽ ꓣꓱ ꓣꓱ ꓫ ꓔ ꓠꓬ ꓪꓴ ꓟꓴ ꓡ ꓓꓴ ꓟꓽ ꓙꓳ꓾ ꓗꓷ ꓡꓰ ꓗꓴ._ ꓡꓳ꓿ ꓪꓴ‐ꓢ ꓐꓱ ꓶ꓾ꓫ ꓔꓬ ꓢꓴ ꓐꓱ ꓶ꓾ ꓣꓳ ꓗꓳ ꓡꓳ ꓐꓱ ꓶ꓾ ꓣꓳ ꓔꓯ ꓕꓵꓼ ꓪ ꓖꓶ ꓡ ꓟ ꓔꓯ ꓠꓲ, ꓟ ꓟꓽ ꓑꓬ ꓢꓯꓼ ꓕꓵꓼ ꓢꓲ ꓣꓱ ꓠ, ꓟ ꓘꓴ ꓔ ꓟ ꓥ ꓡꓳ꓿
ꓣꓳ ꓕꓲ ꓣꓳ ꓡꓲ ꓕꓲ ꓣꓳ ꓠꓯꓼ ꓔꓯ ꓪꓴ‐ꓢ ꓡꓰ ꓚꓲ ꓛꓬ ꓘꓳ, ꓣꓴ ꓟꓶ ꓟ ꓙꓵꓽ ꓪ ꓔꓯ ꓮ ꓡꓰ ꓣꓱ_ ꓟ ꓔꓯ ꓕꓲ ꓠꓬꓲ ꓠꓬ ꓠ ꓠꓬꓲ ꓟꓶ ꓡ ꓥꓳ꓾ ꓟꓬ ꓡ ꓠ ꓬꓰ ꓢꓴ ꓔꓯ ꓠꓬ ꓫꓱ. ꓖꓶ ꓡ ꓥꓳ꓾ ꓖꓳ ꓡꓱ ꓥ ꓟꓲ ꓫ ꓔ ꓢꓴ ꓠꓬ ꓣꓳ ꓪ ꓟꓶ_ ꓟ ꓙꓵ ꓪ ꓔꓯ ꓥ ꓟꓲ ꓟꓶꓽ ꓡꓰ_ ꓟ ꓟꓶ ꓡ ꓥꓳ꓾ ꓖꓳ ꓡꓱ ꓠꓬꓲ ꓢꓲ ꓒ ꓬꓰ‐ꓢꓴ ꓡꓰ ꓙꓳ ꓢꓴ ꓥ ꓔ ꓑꓳ. ꓔꓯ ꓡꓴꓽ ꓖꓶ _ ꓢꓰ ꓥꓳ꓾ ꓟꓽ ꓙꓳ ꓢꓴ ꓔꓯ ꓠꓽ ꓬꓲ ꓙꓳ_ ꓟ ꓟꓲ ꓣꓴ ꓔꓯ, ꓙꓰ_ ꓥꓳ꓾ ꓐꓰ ꓐꓯ ꓔ ꓟ ꓡꓰ ꓐꓰ ꓣꓳ ꓠꓯꓼ ꓗꓪ ꓙꓳ_ ꓟ ꓢꓯꓼ ꓪ ꓪꓴ‐ꓢ ꓡꓰ ꓖꓶ ꓔ ꓟ ꓣꓱ ꓛꓲ ꓔꓯ ꓣꓱꓽ ꓢꓲ ꓠꓬꓲ ꓟꓬ ꓡ ꓠ, ꓟ꓾ ꓫ ꓔ ꓓꓴ ꓟꓽ ꓬꓰ ꓢꓯꓼ ꓕꓵꓼ ꓓꓴ ꓬꓰ ꓡꓯ꓿
