ꓢ-ꓘꓰ-ꓬꓴ ꓟꓬꓱ ꓔˍ ꓟ ꓝꓲꓸ ꓫ ꓒ ꓕꓲ ꓣꓳ ꓠꓬ ꓬꓰ-ꓢꓴ ꓔꓯ ꓟꓳꓻ ꓪ ꓠꓹ ꓟ ꓐꓱ ꓶ ꓢꓯꓼ ꓕꓵꓼˍ ꓡꓳ= (ꓡꓴ-ꓘ=19ꓽ1-10) ꓬꓲ ꓠꓬ ꓬꓰ-ꓢꓴ ꓓꓳꓽ ꓑ ꓙꓽ ꓡꓰ ꓠꓬꓲ ꓬꓲ ꓔꓯ ꓟꓳꓻ ꓪ ꓠꓹ ꓟ ꓠꓲꓹ ꓡꓶꓽ ꓙꓳˍ ꓟ ꓡꓰꓽ ꓟꓽ ꓞꓲ꓾ ꓬꓰ-ꓢꓴ ꓐꓰ ꓔꓳꓹ ꓜꓳꓽ ꓪ ꓠꓹ ꓟ ꓥꓳ ꓡꓳꓸ ꓔꓬ ꓡꓳ= ꓬꓲ ꓥꓳ ꓡꓳꓸ ꓔˍ ꓟ ꓕꓯꓽ ꓢꓲ ꓬꓲ ꓟꓶ ꓡꓰꓳ= ꓘꓶꓽ ꓢꓶꓽ ꓜꓲ ꓕꓯꓽ ꓢꓲ ꓗꓪ ꓔꓬ ꓟ ꓢ-ꓘꓰ-ꓬꓴ ꓔꓯ ꓟꓳꓻ ꓡꓰˍ ꓕꓯ ꓬꓰ-ꓢꓴ ꓡꓰ ꓢ-ꓘꓰ-ꓬꓴ ꓔꓯ ꓘꓴꓻ ꓢꓲ ꓬꓲ ꓦꓲꓻ ꓗꓪ ꓙꓰˍ ꓡꓳ=
ꓢ-ꓘꓰ-ꓬꓴ ꓐꓯˍ ꓟ ꓠꓬ ꓝꓴꓲꓸ ꓙꓳ ꓢꓴ ꓕꓲ ꓣꓳ ꓥ ꓡꓳ= ꓬꓲ ꓠꓬ ꓬꓲ ꓐꓰ ꓞꓳ ꓫꓵꓽ ꓕꓲ ꓫꓵꓽˍ ꓥ ꓟ ꓬꓴ-ꓔ ꓡ ꓞꓳ ꓔꓬ ꓗꓪ ꓚꓳꓸ ꓝꓲꓸ ꓒꓴ ꓮ ꓟꓬꓹ ꓫˍ ꓡꓳ꓾ ꓖꓳˍ ꓡꓳ= ꓖꓳ ꓡꓱ ꓥˍ ꓟꓲ ꓬꓰ-ꓢꓴ ꓠꓬ ꓬꓲ ꓦꓲ ꓗꓪ ꓛꓲ ꓡˍ ꓕꓯ ꓢ-ꓘꓰ-ꓬꓴ ꓠꓬ ꓬꓰ-ꓢꓴ ꓛꓲ ꓡˍ ꓟ ꓑꓶꓸ ꓓꓴ ꓫꓸ ꓟꓳ ꓢꓲ꓾ ꓠꓲꓹ ꓟ ꓡꓶꓸˍ ꓡꓳ= ꓬꓲ ꓛꓬꓻ ꓗꓷ ꓟ ꓝꓴꓲꓸ ꓬꓰ-ꓢꓴ ꓔꓯ ꓐꓯ ꓖꓶˍ ꓡꓳ= ꓬꓲ ꓙꓳˍ ꓟ ꓖꓴꓽ ꓙꓴꓽ ꓠꓬ ꓞꓳ ꓫꓸ ꓔꓯ ꓕꓲ ꓐꓶꓽ ꓐꓱ ꓖꓶˍ ꓥꓳ= ꓝꓮꓲ ꓬꓲ ꓮꓽ ꓟ ꓔꓯ ꓒꓯꓸ ꓜꓽ ꓗꓷˍ ꓟꓲ ꓖꓳ ꓕꓲ ꓣꓳ ꓔꓯ ꓡꓲ ꓩꓴꓸ ꓡꓲꓸ ꓖꓶˍ ꓥꓳ꓾ ꓐꓰ ꓬꓰ-ꓢꓴ ꓔꓯ ꓐꓯ ꓖꓶˍ ꓡꓳ= ꓕꓱ ꓟ ꓠꓬ ꓠꓲꓹ ꓟ ꓡꓶꓸˍ ꓟ ꓬꓲ ꓔꓯ ꓐꓬꓱꓽ ꓥ ꓡꓳ= ꓬꓰ-ꓢꓴ ꓠꓬ ꓢ-ꓘꓰ-ꓬꓴ ꓔꓯ ꓖꓽ ꓖꓶ ꓗꓷ ꓢꓲ꓾ ꓬꓲ ꓕꓲ ꓣꓳˍ ꓡꓰꓽ ꓟꓽ ꓞꓲ ꓬꓲ ꓕꓲ ꓦꓲ ꓢꓴ ꓐꓱ ꓶˍ ꓟꓲ ꓚꓬꓴꓸ ꓙˍ ꓟ ꓣꓱꓽ ꓛꓰꓽ ꓖꓶ ꓗꓷꓳ=
ꓚꓵ ꓚꓵ ꓪꓴ-ꓢ ꓠꓬ ꓠꓲꓹ ꓟ ꓐꓶꓽ ꓡꓰˍ ꓗꓪ ꓛꓲ ꓠꓲꓹ ꓟ ꓡꓶꓸˍ ꓟ ꓔꓯ ꓠꓲꓹ ꓠꓵˍ ꓡꓳ= ꓢ-ꓘꓰ-ꓬꓴ ꓬꓰ ꓗꓷ ꓟ ꓒꓳꓹ ꓡꓶꓸ ꓡˍ ꓟ ꓚꓱꓹ ꓠꓬ ꓬꓲ ꓞꓳ ꓙꓳ ꓚꓱꓹ ꓡꓶꓸ ꓗꓷ ꓠꓹ ꓟ ꓐꓰ ꓢꓲ ꓒ ꓗ ꓠꓯꓸ ꓛꓳ ꓠꓹ ꓟ ꓠꓲꓹ ꓡꓶꓽ ꓚꓵ ꓚꓵ ꓙꓳˍ ꓟ ꓔꓯ ꓢꓲꓽ ꓢꓲꓽ ꓡꓰꓽ ꓖꓴ ꓟꓳꓸ ꓖꓶˍ ꓟ ꓥ ꓡꓳ= ꓬꓰ-ꓢꓴ ꓔꓯ ꓡ ꓢꓲ ꓝꓴꓲꓸ ꓖꓽ ꓖꓶ ꓟꓶ ꓠꓹ ꓟ ꓓꓰꓽ ꓢꓴ ꓐꓴ ꓗꓳ ꓡꓳ ꓗꓪ ꓮꓽ ꓟ ꓠꓬ ꓢ-ꓘꓰ-ꓬꓴ ꓬꓰˍ ꓟ ꓡꓰ ꓐꓰ ꓬꓰ ꓗꓷˍ ꓡ= ꓬꓲ ꓪ ꓘꓴꓽ ꓗꓷ ꓟ ꓔꓯ ꓝꓮꓲ ꓡꓲꓸ ꓖꓶ ꓗꓷ ꓢꓴ ꓙꓳˍ ꓡ= ꓬꓲ ꓪ ꓬꓰ ꓗꓷ ꓟ ꓟꓽ ꓧꓺ ꓟ꓾ ꓟꓽ ꓙꓲꓻ ꓟ ꓝꓴꓲꓸ ꓐꓱ ꓶ ꓝꓮꓲ ꓫꓬꓹ ꓔꓱꓹˍ ꓟ ꓔꓯ ꓬꓰ ꓗꓷ ꓢꓴ ꓮꓽ ꓟ ꓙꓳˍ ꓡ= ꓪꓴ-ꓢ ꓠꓬ ꓣꓳ ꓝꓴꓲꓸ ꓔꓯ ꓖꓽ ꓖꓶ ꓠꓹ ꓟ ꓐꓱ ꓶ ꓣꓳ ꓡꓰ ꓬꓲ ꓔꓯ ꓡꓲꓸ ꓖꓶˍ ꓟ ꓔꓯ ꓬꓲ ꓟꓽ ꓡꓳꓸ ꓠꓬꓹ ꓔꓬ= ꓖꓳ ꓡꓱ ꓐꓯˍ ꓥ ꓟꓲ ꓣꓳ ꓠꓲꓹ ꓟ ꓗꓪ ꓐꓰ ꓓꓳ ꓡˍ ꓟ ꓠꓲꓹ ꓟ ꓙꓽ ꓡꓰꓼ ꓡˍ ꓟ ꓔꓯ ꓟꓳꓸ ꓖꓶ ꓠꓹ ꓟ ꓐꓱ ꓶ ꓠꓬ ꓣꓳ ꓒꓳꓹ ꓡꓶꓸ ꓗꓷ ꓠ ꓗꓹ ꓡꓳ= ꓝꓴꓲꓸ ꓔꓯ ꓝꓮꓲ ꓕꓲ ꓧꓪꓹ ꓟꓽ ꓬꓰ ꓪ ꓡꓰ ꓠꓹ ꓟ ꓫꓪꓸ ꓞꓷꓹ ꓐ ꓡˍ ꓟˍ ꓟꓲ ꓕꓱ ꓠꓲꓹ ꓟ ꓒꓳꓹ ꓡꓶꓸˍ ꓟ ꓗꓪ ꓐꓰ ꓪꓴꓸ ꓔꓴ ꓢꓲ ꓟꓶ ꓡˍ ꓟ ꓥ ꓡꓳ=
ꓪꓴ-ꓢ ꓠꓬ ꓬꓲ ꓫꓱꓸ ꓤ ꓠꓲꓹ ꓐꓰ ꓣꓳ ꓕꓯꓽ ꓢꓲ ꓗꓪ ꓗꓶ ꓔˍ ꓟ ꓬꓲ ꓠꓵꓻ ꓠꓲꓹ ꓔꓯ ꓮ ꓕꓯ ꓟꓲ ꓕꓶꓻ ꓞꓹ ꓝꓲˍ ꓡꓳ= ꓢꓲ ꓒ ꓠꓬ ꓣꓳ ꓔꓯ ꓚꓰꓼ ꓔ ꓡꓳ= ꓬꓲ ꓚꓰꓼ ꓔ ꓟ ꓮ ꓙꓵꓽ ꓔꓯ ꓬꓲ ꓠꓲꓹ ꓠꓵˍ ꓡꓳ= ꓣꓳ ꓙ ꓖꓴ ꓥꓳꓽ ꓙꓰˍ ꓕꓯ꓾ ꓣꓳ ꓚꓵ ꓚꓵ ꓠꓲꓹ ꓟ ꓡꓶꓸˍ ꓕꓯ꓾ ꓢꓲ ꓒ ꓠꓬ ꓣꓳ ꓔꓯ ꓧꓪ ꓢꓲ ꓣꓱꓽ ꓛꓰꓽ ꓙꓳ ꓙꓳ ꓡꓰꓽ꓾ ꓟꓬꓱ ꓓꓳꓽ ꓙꓳ ꓙꓳ ꓡꓰꓽ ꓚꓱꓹ ꓬꓲꓼ ꓡ ꓝꓲˍ ꓡꓳ= ꓣꓳ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓮ ꓡꓲ ꓟꓬ ꓛꓲ ꓣꓳꓺˍ ꓥˍ ꓟꓲ ꓣꓳ ꓕꓲ ꓣꓳ ꓡꓰ ꓕꓲ ꓣꓳ ꓠꓬ ꓪꓴ-ꓢ ꓟꓲꓽ ꓙꓬ ꓗꓪ ꓣꓱꓽ ꓬꓯꓼ ꓢꓴˍ ꓡꓰꓽ ꓥ ꓡꓳ ꓐꓯˍ ꓟ ꓔꓯ ꓠꓬꓲꓸ ꓠꓬꓲ ꓟ ꓢꓲꓽ ꓫꓬ ꓕꓳꓽ ꓶ ꓗꓪ ꓐꓰ ꓣꓳ ꓔꓯ ꓐꓯ ꓖꓶ ꓡ ꓔꓬ ꓡꓳ=
