ꓢꓲꓽ ꓫꓬ ꓦꓲꓻ ꓐꓬ ꓡꓰ ꓠ, ꓟ (Sunday reflection )
ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓠꓬ ꓘꓴ ꓜꓲꓼ ꓞꓳ ꓟꓵꓽ ꓘꓳꓼ ꓠꓯ, ꓗꓪ ꓐꓰ (33) ꓫꓵꓽ ꓠꓽ ꓟ ꓢꓲꓺ ꓒ ꓦꓬꓼ ꓠꓬꓲ ꓥ ꓡꓳ꓿ ꓠꓬꓲ. ꓠꓬꓲ ꓢꓲꓺ ꓒ ꓦꓬꓼ ꓠꓬꓲ ꓗꓪ ꓵꓻ ꓠ, ꓟ ꓢꓲꓽ ꓫꓬ ꓕꓳ ꓶ ꓠꓬ ꓡꓴ‐ꓘ ꓕꓳ ꓶ 21ꓽ5‐19 ꓝꓲ. ꓗꓪ ꓐꓰ ꓥ ꓢꓲ ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓙꓱ‐ꓣꓴ‐ꓢ‐ꓡꓱ ꓗꓪ ꓟ ꓢꓲꓽ ꓫꓬ ꓦꓲꓻ ꓪꓽ ꓘꓴ ꓦꓲꓻ ꓐꓬ ꓡꓰ ꓠ, ꓟ ꓔꓯ ꓟꓳ. ꓢꓲꓺ ꓒ ꓬꓰ‐ꓢꓴ ꓡꓰ ꓐꓯ ꓔ ꓟ ꓢꓲꓽ ꓫꓬ ꓕꓳ ꓶ ꓝꓲ. ꓥ ꓡꓳ꓿
ꓠꓬꓲ. ꓠꓬꓲ ꓢꓲꓽ ꓫꓬ ꓕꓳ ꓶ ꓗꓪ ꓢꓲꓺ ꓒ ꓬꓰ‐ꓢꓴ ꓡꓰ ꓙꓱ‐ꓣꓴ‐ꓢ‐ꓡꓱ ꓗꓪ ꓫꓬ ꓔ ꓟ ꓢꓲꓽ ꓫꓬ ꓦꓲꓻ ꓪꓽ ꓘꓴ ꓦꓲꓻ ꓐꓬ ꓡꓰ ꓠ, ꓟ ꓚꓱ, ꓬꓲ ꓟꓶ ꓟ ꓙꓵ, ꓔꓯ ꓟꓳ. ꓮ ꓡꓰ ꓒꓬꓱꓼ ꓡ ꓟ ꓚꓱ, ꓔꓯ ꓟ. ꓖꓶ ꓔ ꓟ ꓥ ꓡꓳ꓿ ꓦꓬꓼ ꓠꓬꓲ ꓠꓶꓻ ꓡꓳ ꓬꓲ ꓟꓶ ꓟ ꓙꓵ, ꓦꓬꓼ ꓠꓬꓲ ꓚꓱ, ꓔꓯ ꓟꓳ. ꓣꓳ ꓐ ꓙ ꓟ ꓙꓵ, ꓕꓯ ꓣꓳ ꓠꓬ ꓙꓳꓺ ꓓꓴ ꓟꓽ ꓥ꓿ ꓝꓮꓲ ꓠꓲ, ꓫ. ꓟꓬ ꓫ. ꓟꓲ ꓟꓽ ꓥ ꓟ ꓐꓰ ꓣꓳ ꓠꓬ ꓚꓬꓴ ꓙ ꓟ ꓟꓶ ꓟ ꓠ, ꓟ ꓮ ꓡꓰ ꓞꓳ ꓙꓳ ꓢꓯ. ꓔꓬ ꓠ, ꓟ ꓔꓯ ꓟꓳ ꓟ. ꓖꓶ ꓔ ꓟ ꓙꓵ, ꓟꓲ ꓥ ꓡꓳ꓿
ꓟꓲ ꓠꓯ ꓖꓴ ꓡꓰ ꓟ ꓝꓮꓲ ꓬꓲ ꓟꓶ ꓟ ꓦꓬꓼ ꓠꓬꓲ ꓗꓪ ꓮ ꓡꓰ ꓐꓰ ꓒꓬꓱꓼ ꓡ ꓟ ꓚꓱ, ꓔꓯ ꓟꓳ ꓢꓲꓺ ꓒ ꓬꓰ‐ꓢꓴ ꓡꓰ ꓧꓶ. ꓕꓯ ꓟ ꓦꓬꓼ ꓠꓬꓲ ꓗꓪ ꓐꓰ ꓟ. ꓖꓶ ꓔ ꓟ ꓙꓳ ꓟ ꓥ ꓡꓳ꓿ ꓥꓪ ꓠꓬ ꓬꓰ‐ꓢꓴ ꓥ ꓡꓳ ꓐꓯ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓟꓬꓱꓺ ꓔꓯ ꓣꓳ ꓔ ꓢꓴ ꓐꓴ ꓝꓮꓲ ꓬꓲ ꓡꓰ ꓐꓰ ꓟꓬꓱꓽ ꓬꓰ ꓔ ꓢꓴ ꓐꓴ ꓮ ꓟꓬ, ꓓꓳ ꓡ ꓥꓳꓽ ꓐꓰ ꓐꓯ ꓔ ꓟ ꓥ ꓡꓳ꓿ ꓝꓮꓲ ꓙꓲꓙ‐ꓢꓴ ꓢꓲꓺ ꓤ ꓐꓴ ꓔꓯ ꓟꓽ ꓔꓱ ꓟꓽ ꓥꓳꓽ ꓟ ꓟ. ꓟꓲꓽ ꓚꓺ ꓒꓽ ꓐꓴ ꓠꓯ, ꓗꓪ ꓟꓽ ꓛꓳ ꓙꓰ ꓠ, ꓟ ꓤ ꓟꓳ ꓠ, ꓟ ꓐꓯ ꓟ. ꓖꓶ ꓔ ꓟ ꓥ ꓡ꓿
ꓮ ꓟꓶ ꓟ ꓙꓵ, ꓮ ꓟꓶ ꓟ ꓦꓬꓼ ꓠꓬꓲ ꓗꓪ ꓟ. ꓟꓲꓽ ꓚꓺ ꓒꓽ ꓐꓴ ꓮ ꓟꓬ, ꓡꓳ. ꓟꓳ ꓓꓽ ꓟ ꓦꓬꓼ ꓠꓬꓲ ꓥ ꓡꓳ꓿ ꓢꓲꓺ ꓒ ꓬꓰ‐ꓢꓴ ꓡꓰ ꓔꓶ ꓔ ꓟ ꓘꓴ ꓜꓲꓼ ꓞꓳ ꓗꓪ ꓔꓬ ꓢꓲ ꓠꓬꓲ ꓞꓳ ꓙꓳ ꓠ, ꓟ ꓣꓳ ꓚꓵ, ꓦꓬꓼ ꓠꓬꓲ ꓟꓲ ꓥ ꓡꓳ꓿
ꓟꓯꓼ ꓢꓰꓼ ꓡꓯꓽ ꓘꓳ, ꓟ ꓗꓴꓷꓼ ꓮ ꓟꓬ, ꓟ ꓒꓬꓱꓼ ꓔꓬ ꓟ ꓥ ꓡꓳ꓿ ꓝꓮꓲ ꓫ. ꓓꓴ ꓓꓳ ꓓꓴ ꓦꓰꓼ ꓟꓷꓼ ꓟ ꓗꓴꓷꓼ ꓮ ꓟꓬ, ꓗꓪ ꓒꓬꓱꓼ ꓔꓬ ꓢꓲ ꓠꓬꓲ ꓠꓻ ꓫꓵꓽ ꓠꓻ ꓙꓰ ꓥ ꓟꓲ ꓗꓴꓷꓼ ꓮ ꓟꓬ, ꓗꓪ ꓒꓬꓱꓼ ꓔꓬ ꓟ ꓥ ꓡꓳ꓿ ꓚꓳꓦꓲꓓ ꓠꓻ ꓫꓵꓽ ꓠꓬ ꓕꓲ ꓟꓲ ꓠꓯ ꓡꓱ ꓗꓪ ꓔꓬ ꓟ ꓑ ꓫꓬ ꓐꓴ ꓔꓯ ꓙꓳꓺ ꓓꓴ ꓓꓽ ꓟ ꓒꓬꓱꓼ ꓡ ꓝꓲ ꓗꓷ ꓟ ꓥ ꓡꓳ꓿
ꓝꓮꓲ ꓮ ꓘꓶ. ꓪꓴꓽ ꓟ ꓟꓵꓽ ꓕꓵꓻ ꓟ ꓟꓵꓽ ꓙꓴꓽ ꓙꓵˍ ꓟ ꓥ ꓟꓲ ꓒꓬꓱꓼ ꓡ ꓗꓷ ꓟ ꓥ ꓡꓳ꓿ ꓝꓮꓲ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓢꓰꓼ ꓟ ꓚꓱ, ꓥ ꓟꓲ ꓑ ꓙ ꓟ ꓥ ꓡꓳ꓿ ꓕꓱ ꓟ ꓮ ꓙꓵꓽ ꓠꓬ ꓢꓲꓺ ꓒ ꓬꓰ‐ꓢꓴ ꓗꓳ. ꓗꓷ ꓟ ꓙꓵ, ꓕꓯ ꓡꓰ ꓬꓲ ꓟꓶ ꓟ ꓦꓬꓼ ꓠꓬꓲ ꓗꓪ ꓒꓬꓱꓼ ꓡ ꓟ ꓔꓯ ꓟ. ꓟꓲꓽ ꓚꓺ ꓟ ꓙꓳ ꓟ ꓥ ꓡꓳ꓿
ꓟꓲ ꓠꓯ ꓡꓳ ꓬꓰ ꓟ ꓦꓬꓼ ꓠꓬꓲ ꓐꓰ ꓢꓲꓺ ꓒ ꓬꓰ‐ꓢꓴ ꓠꓬꓲꓽ ꓧꓪ, ꓕꓲ ꓧꓪ, ꓟꓲ ꓠꓯ ꓬꓯꓼ ꓡ ꓟ ꓙꓵ, ꓥ ꓡꓳ꓿ ꓮ‐ꓠꓱ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬꓲꓽ ꓧꓪ ꓕꓲ ꓧꓪ ꓟꓲ ꓠꓯ ꓗꓪ ꓬꓯꓼ ꓡ ꓟ ꓚꓱ, ꓔꓯ ꓟꓳ. ꓮ ꓘꓶ. ꓛꓲ ꓡꓳ ꓠꓬꓲ ꓗꓷ ꓟ ꓥ ꓡꓳ꓿ ꓮ ꓙꓵꓽ ꓟ ꓕꓯ ꓢꓲ ꓗꓪ ꓠꓬ ꓗꓳ‐ꓡꓳ‐ꓕꓵ ꓗꓪ ꓔꓬ ꓟ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬꓲꓽ ꓧꓪ. ꓕꓲ ꓧꓪ ꓬꓯꓼ ꓡ ꓟ ꓙꓵ, ꓔꓯ ꓮ ꓘꓶ. ꓛꓲ ꓡꓳ ꓠꓬꓲ ꓩꓴ ꓠꓬꓲ ꓗꓷꓳ꓿
ꓬꓲ ꓪ ꓠꓬ ꓢꓲꓺ ꓒ ꓬꓰ‐ꓢꓴ ꓠꓬꓲꓽ ꓧꓪ. ꓕꓲ ꓧꓪ. ꓬꓯꓼ ꓡ ꓟ ꓚꓱ, ꓔꓯ ꓟꓳ. ꓮ ꓘꓶ. ꓛꓲ ꓟꓽ ꓢꓷ. ꓟ ꓪꓴ. ꓠꓬꓲ ꓝꓲ ꓓꓴ ꓒꓳ‐ꓡꓳ ꓡꓰ ꓮ ꓡꓰ ꓞꓳ ꓙꓳ ꓢꓯ. ꓔꓬ ꓠ, ꓟ ꓚꓱ, ꓔꓯ ꓟꓳ. ꓕꓳ ꓶ ꓠꓬꓲꓽ ꓑꓬ ꓐꓳ ꓢꓲ ꓠꓬꓲ ꓙꓲ ꓟ ꓚꓱ, ꓗꓪ ꓫꓬ ꓔꓱ, ꓖꓶ ꓗꓷꓳ꓿
ꓮ ꓟꓶ ꓙ ꓙꓵ, ꓗꓪ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓠꓬꓲꓽ ꓧꓪ, ꓕꓲ ꓧꓪ, ꓟꓲ ꓠꓯ ꓬꓯꓼ ꓡ ꓟ ꓚꓱ, ꓔꓯ ꓟꓳ ꓣꓳ ꓮ ꓡꓰ ꓐꓰ ꓡꓳ. ꓠꓬꓲ ꓔꓬ ꓡ? ꓢꓲꓺ ꓒ ꓡ ꓟ ꓙꓵ, ꓔꓯ ꓣꓳ ꓡꓳ. ꓠꓬꓲ ꓔꓬ ꓕꓯ ꓣꓳ ꓠꓬꓲ ꓠꓬꓲ. ꓠ. ꓮ ꓫꓵꓽ ꓟꓬꓱꓽ ꓡꓰ ꓟꓽ ꓬꓰ ꓔꓬ ꓠ, ꓟ ꓟꓽ ꓥ꓿
1. ꓣꓳ ꓠꓬ ꓚꓲ. ꓛꓬ ꓤꓶꓻ ꓔꓯ ꓫꓬ, ꓔꓱ ꓢꓲ ꓠꓬꓲ ꓢꓲꓺ ꓒ ꓔꓯ ꓡꓳ. ꓠꓬꓲ ꓩꓴ ꓠꓬꓲ ꓔꓬ ꓠ, ꓟ ꓥ ꓡꓳ꓿
2. ꓙꓲ ꓟ ꓟꓬꓱꓽ ꓔꓯ ꓬꓰ ꓢꓲ ꓠꓬꓲ ꓡꓳ. ꓠꓬꓲ ꓔꓬ ꓠ, ꓟ ꓥ ꓡꓳ꓿
3. ꓣꓳ ꓔꓯ ꓝꓴꓲ. ꓟꓽ ꓥ ꓟꓲ ꓫ. ꓓꓴ ꓟꓷꓼ ꓓꓴ ꓙꓲ ꓣꓳ ꓟꓬ ꓑꓬ ꓓꓴ ꓔꓳ, ꓜꓳ ꓡ ꓥ ꓟꓲ ꓠꓲ, ꓟ ꓫꓵˍ ꓢꓲ ꓠꓬꓲ ꓢꓲꓺ ꓒ ꓬꓰ‐ꓢꓴ ꓔꓯ ꓡꓳ. ꓠꓬꓲ ꓔꓬ ꓠ, ꓟ ꓥ ꓡꓳ꓿
4. ꓙꓵꓻ ꓠꓲ, ꓔꓯ ꓔꓶ ꓡꓰ ꓝꓮꓲ ꓢꓲ ꓠꓬꓲ ꓮ ꓕꓯ ꓟꓲ ꓢꓲꓺ ꓒ ꓔꓯ ꓡꓳ. ꓠꓬꓲ ꓔꓬ ꓠ, ꓟ ꓬꓲ ꓙꓵ, ꓟꓲ ꓥ ꓡꓳ꓿
ꓣꓳ ꓚꓬꓴ ꓢꓲꓺ ꓒ ꓬꓰ‐ꓢꓴ ꓙꓲ‐ꓢꓴ ꓠꓬꓲ. ꓧꓪ. ꓕꓲ ꓧꓪ. ꓟ ꓟꓽ ꓬꓯꓼ ꓡ ꓢꓲ ꓕꓯ ꓟꓲ ꓠꓯ ꓗꓪ ꓮ ꓘꓶ. ꓛꓲ ꓓꓵꓽ ꓙ ꓫ. ꓓꓴ ꓠꓲ, ꓫ. ꓟꓬ ꓫ. ꓓꓴ ꓮ ꓟꓬ, ꓒꓬꓱꓼ ꓡ ꓟ ꓟꓲ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓔꓯ ꓠꓲ, ꓫ. ꓟꓬ ꓫ. ꓓꓴ ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓬꓰ‐ꓢꓴ ꓡꓰ ꓮ ꓡꓰ ꓐꓰ ꓧꓪ. ꓡꓰ ꓠ, ꓟ ꓢꓯꓼ ꓪ ꓢꓷ. ꓠꓲ, ꓖꓶ ꓡ ꓓꓴ ꓥ ꓡꓳ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓮ ꓡꓰꓳ ꓫꓵꓽ ꓔꓳ, ꓜꓳ ꓡ ꓥ ꓟꓲ ꓢꓲꓺ ꓒ ꓔꓯ ꓪꓳꓻ ꓔ ꓢꓲ ꓠꓬꓲ ꓞꓳ ꓙꓳ ꓢꓯ. ꓔꓬ ꓓꓴ ꓬꓰ ꓡꓯ꓿ ꓣꓳ ꓙꓲ‐ꓢꓴ ꓢꓲꓺ ꓤ ꓐꓴ ꓠꓬ ꓣꓳ ꓙꓵꓻ ꓠꓲ, ꓔꓯ ꓔꓶ ꓡꓰ ꓠ, ꓟ ꓙꓵꓻ ꓠꓲ, ꓮ ꓟꓬ, ꓙꓳ ꓡ ꓠ, ꓟ ꓢꓲꓺ ꓒ ꓬꓰ‐ꓢꓴ ꓠꓯ, ꓗꓪ ꓪꓽ ꓘꓴ ꓓꓴ ꓬꓰ ꓡꓯ꓿ ꓡꓴ‐ꓘ ꓕꓳ ꓶ 21ꓽ19 ꓝꓲ. ꓗꓪ ꓠꓴ ꓪ ꓜꓲꓽ ꓘꓴꓻˍ ꓠꓬ ꓠꓴ ꓪ ꓶ ꓟꓬ ꓚꓬꓴ ꓟꓶˍ ꓥꓳ꓿ ꓐꓰ ꓐꓳ ꓔ ꓟ ꓥ ꓡꓳ꓿ ꓢꓲꓺ ꓒ ꓔꓯ ꓧꓪ ꓓꓴ ꓬꓰ ꓡꓯ꓿
