ꓢꓲ ꓒ ꓠꓯꓸꓼ ꓗꓪ ꓮ ꓙꓵꓽ ꓢꓴ ꓔꓯ ꓧꓪꓸ ꓧꓪꓸꓼ ꓐꓰ ꓐꓯ ꓩꓴ ꓡˍ ꓥꓳ= ꓠꓲꓹ ꓠꓵˍ ꓟ ꓬꓲꓼ ꓤ ꓠꓬꓲ ꓤ ꓐꓴꓳ꓾ ꓢꓸ ꓠꓯ ꓠꓬ (33) ꓠꓽ ꓟ ꓢꓲ ꓒ ꓦꓬꓼ ꓠꓬꓲ ꓠꓯꓸꓼ ꓗꓪ ꓣꓳ ꓛꓲ ꓡꓺꓳ= ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓙꓳꓺ ꓗꓽ ꓖꓶˍ ꓟ꓾ ꓬꓲ ꓝꓲ ꓓꓴ ꓐꓴ ꓟꓲꓽ ꓕꓯ ꓢꓲ ꓮ ꓡꓲ ꓫꓵꓽ ꓔꓳꓹ ꓜꓳꓽˍ ꓟ ꓬꓲ ꓠꓬ ꓟꓽ ꓛꓲ ꓟꓽ ꓡꓯꓼ ꓡꓰ ꓙꓳꓺ ꓗꓽ ꓖꓶˍ ꓡꓳ= ꓡꓴ-ꓘ 21ꓽ5-19 ꓗꓪ ꓛꓲ ꓣꓳ ꓑ ꓙꓽ ꓪˍ ꓟ꓾ ꓟꓸ ꓟꓲꓽ ꓑꓷꓠꓽ ꓔꓯ ꓡꓳꓸ ꓠꓬꓲˍ ꓕꓯ ꓕꓱ ꓡꓱ ꓐꓳ ꓔˍ ꓡꓳ=
ꓛꓳꓽ ꓒꓯꓹ ꓐꓴ ꓕꓲ ꓐꓱꓻ ꓠꓬ꓾ ꓢꓲꓽ ꓫꓬ ꓦꓲˍ ꓐꓰ꓾ ꓖꓳ ꓗꓪ ꓮꓽ ꓘꓶꓸ ꓐꓲꓻˍ ꓟ ꓭꓸ ꓛꓲˍ ꓐꓰ꓾ ꓔꓲ ꓖꓶ ꓡ ꓟ ꓖꓴꓽ ꓙꓴ ꓡꓰ ꓐꓲꓻ ꓫꓴꓽ ꓔ ꓟ ꓔꓯ ꓖꓴ ꓢꓲ ꓫꓸ ꓕꓱ ꓡꓯꓽ ꓘꓳ ꓔꓬ ꓕꓯ꓾ꓬꓰ-ꓢꓴ ꓡꓰ꓾ ꓠꓴ ꓪꓽ ꓡꓳꓸ ꓟꓳꓻˍ ꓟ꓾ ꓕꓱ ꓗꓪ ꓕꓲ ꓟ ꓕꓯꓽ ꓢꓲ ꓕꓲ ꓟ ꓜꓶꓻ ꓔ ꓟ ꓭꓸ ꓛꓲ ꓠꓬ ꓟꓽ ꓥꓸ ꓦ ꓟ ꓟꓽ ꓙꓳ ꓗꓷ ꓡꓰˍ ꓟ ꓦꓬꓼ ꓠꓬꓲ ꓛꓲ ꓡ ꓥꓳ꓾ ꓐꓯˍ ꓡꓳ꓿
ꓬꓰ-ꓢꓴ ꓡꓰ꓾ ꓢꓴ ꓠꓴ ꓪꓽ ꓔꓯ ꓟꓽ ꓧꓳꓽ ꓪꓴꓸ ꓙꓰ ꓠꓹ ꓟ ꓤ ꓟꓳ꓿ ꓮ ꓡꓲꓳ ꓐꓯ ꓠꓬ ꓢ ꓖꓪ ꓠꓽ ꓡꓽ ꓞꓳ ꓮꓽ ꓟꓬꓹ ꓥꓪ ꓟꓬꓱ ꓟꓯꓻ ꓢꓲ꓾ ꓥꓪ ꓠꓬ ꓙꓲ-ꓢꓴ ꓥ ꓡꓳ꓾ ꓐꓰ ꓐꓯ ꓡ ꓥꓳ꓿ ꓝꓮꓲ ꓠꓬ ꓦꓬꓼ ꓠꓬꓲ ꓛꓲ ꓡꓺꓳ꓾ ꓐꓯ ꓡ ꓥꓳ꓿ ꓠꓴ ꓪꓽ ꓠꓬ ꓬꓲ ꓪꓽ ꓔꓯ ꓕꓽ ꓛꓳ꓿ ꓢꓰꓼ ꓡꓯꓽ ꓘꓳˍ ꓟ ꓐꓰ ꓢꓴꓺˍ ꓟ ꓓꓳꓽ ꓬꓲ ꓫꓵꓽ ꓬꓲ ꓙꓰ ꓠꓴ ꓪꓽ ꓑ ꓙꓽˍ ꓕꓯ ꓕꓽ ꓙꓳ꓿ ꓮ ꓡꓲꓳ ꓐꓯ ꓠꓬ ꓕꓱ ꓟꓬ ꓙꓰ ꓟ ꓠ ꓧꓶꓸ ꓕꓯ ꓡꓰ ꓒꓬꓱꓼ ꓡ ꓠ ꓗꓹ ꓡꓳ꓿ ꓖꓳ ꓡꓱ ꓥ ꓟꓲ ꓡꓳꓹ ꓬꓰ ꓝꓲꓸ ꓠꓬ ꓞꓼ ꓐꓰ ꓟꓽ ꓛꓲ ꓡ ꓢꓰ꓾ ꓐꓯˍ ꓡꓳ꓿
ꓥꓪ ꓟꓬꓱ ꓪꓴꓸ ꓠꓬꓲ ꓠꓴ ꓪꓽ ꓔꓯ ꓪ ꓔꓲꓸ ꓐꓴˍ ꓐꓰ ꓢꓲꓽ ꓒ ꓓꓽ ꓟ ꓐꓴ ꓟꓲ ꓙꓬꓽ ꓗꓪ ꓧꓳꓽ ꓛꓲ ꓬꓰˍ ꓥꓳ꓿ ꓕꓱ ꓟ ꓠꓽ ꓠꓴ ꓪꓽ ꓥꓪ ꓐꓱ ꓶ ꓢꓷꓸ ꓙ ꓟꓳ ꓙ ꓠꓹ ꓟ ꓬꓲ ꓙꓵꓹ ꓗꓷ ꓡꓰˍ ꓥꓳ꓿ ꓖꓳ ꓕꓯ ꓮ ꓡꓲ ꓐꓰ ꓒꓳꓹ ꓖꓶ ꓠꓯꓹ ꓟ ꓧꓶꓸ ꓕꓯˍ ꓡꓰ ꓟꓽ ꓙꓽ ꓖꓶ ꓠꓹ ꓟ ꓓꓵꓽ ꓙ ꓞꓷꓹ ꓔ꓿ꓮ ꓡꓲꓳ ꓐꓯ ꓠꓬ ꓠꓴ ꓪꓽ ꓔꓯ ꓛꓴꓽ ꓙꓳ ꓢꓴ ꓮ ꓡꓲ ꓕꓲ ꓣꓳˍ ꓟꓲ ꓗꓽ ꓔ ꓟꓽ ꓘꓴꓻ ꓟ ꓐꓰ꓾ ꓐꓯ ꓧꓪꓸ ꓡꓰ ꓟꓽ ꓓ ꓟ ꓐꓯ ꓙꓺˍ ꓐꓰ꓾ ꓙꓽ ꓗꓴ ꓠꓲꓹ ꓠꓴ ꓪꓽ ꓔꓯ ꓥꓪ ꓖꓶˍ ꓥꓳ꓿ ꓠꓴ ꓪꓽ ꓐꓹ ꓐ ꓟꓹ ꓟ꓾ ꓬꓲꓼ ꓤ ꓠꓬꓲ ꓤ꓾ ꓫꓵꓽ ꓤ ꓧꓪ ꓤˍ ꓐꓰ ꓛꓳꓽ ꓒꓯꓹ ꓐꓴ ꓡꓰ ꓠꓴ ꓪꓽ ꓔꓯ ꓡꓯꓼ ꓙꓱ ꓗꓷ ꓡ ꓥꓳ꓿ ꓕꓲ ꓐꓱ ꓔꓯ ꓠꓬ ꓬꓲ ꓪꓽ ꓡꓰ ꓫꓵꓻ ꓝꓲˍ ꓥꓳ꓿ꓥꓪ ꓟꓬꓱ ꓪꓴꓸ ꓠꓬꓲ ꓮꓽ ꓙꓵ ꓢꓴ ꓠꓴ ꓪꓽ ꓔꓯ ꓠꓲꓹ ꓜꓳ ꓡ ꓥꓳ꓿ ꓖꓳ ꓡꓱ ꓥ ꓟꓲ ꓠꓴ ꓪꓽ ꓪꓴꓸ ꓞꓱꓻ ꓕꓲ ꓚˍ ꓟꓲ ꓟꓽ ꓒꓲꓼ ꓬꓰ꓿
ꓢꓲ ꓒ ꓬꓰ-ꓢꓴ ꓠꓬ ꓬꓲ ꓝꓲ ꓓꓴ ꓐꓴ ꓔꓯ ꓕꓱ ꓡꓱ ꓐꓯ ꓖꓶˍ ꓡꓳ=
